WENÉNÉ LÉ LUK A GYE (Évangile selon Luc) 23 - Kazambale lé Sebe Sauunu 1979

Wo go Jézu nya Pilat ’lɛ

¹ Wo faa nwa yé wo go Jézu nya Pilat va.

² Wo kun we dɔle ma a nwiin yé wo léé: Ko bɔ mi ’ko ma kolé munu gi pana léé, ’wo nwa minwiinzan blɛn ma, a fele nya léé, té wo gɔɔli banwo Sézaa lɛ lo, yé é léé, yeebozen ɛ ke Krist nya, minwiinzan nya.

³ Pilat we laa a lee léé: Bii ɛ ke Juifinu nwiinzan blɛn nyaa? Jézu lé a lɛ léé: Yee lé bé fe bɛ.

⁴ Pilat lé Balebanmunu segelenu valé mi gu lɛ léé: Maa ’ka a ye lɛ léé, we mi ’ko gyɛ lo.

⁵ Wo vo a fena léé: É munu nwa we paale nya ’bɛnu gi Judé tɛrɛ faa la, é sia Galilé tɛrɛ la, fɛana lé é we paale sia, ana, fɔɔ yé é bɔ ’ko.

Wo go Jézu nya Érɔd va

⁶ Pilat Galilé tɔ ’ma aan wo wo ta, é a laa wo lee léé: Mi ’ko a Galilé tɛrɛ la mi nyaa?

⁷ É a ’ma aan wo léé, é a Érɔd tɛrɛ la bɛn nya, é a pa zia Érɔd va; ’bɛ a é ziin Jérusalɛm ’bɛ yinu nya.

⁸ Érɔd Jézu ye aan wo, a gi nana é baba; é a tawe ’ma é kyɛn, amalé é a a va turu léé, ’é a ye, yé a bli a a lɛ léé, ’é alé gyɛzorowe do kɛlɛna ye.

⁹ É we kiɛre laa a lee, naa, Jézu ’ka a zi do kpen vɔ lɛ lo.

¹⁰ Balebanmunu segelenu valé sɛbɛgifemunu ana mi, yé wo we dɔ a nwiin gladére plɛplɛ nya.

¹¹ Érɔd valé élé sunyanu Jézu kɛlɛ gwɛmazan zo; dé é we nana a ma faa é sɔ nɔnɔmi baba zén a ta yé é a pa zia é ziin Pilat va.

¹² Yi ’ko nya lé Pilat valé Érɔd kɛlɛ béé valé béé nya, dɔlé té wa ’wo ke nyanénzannu nya é vinin.

Wo ga dɔ Jézu nwiin

¹³ Balebanmunu segelenu koo, minwiinmunu koo, flamunu koo, Pilat wo zén ékeva yé é lé wo lɛ léé:

¹⁴ Ka da mi ’ko nya an lɛ bélé mi lé é munu gi pa minwiinzan ma, a zo. Yé maa we laa a lee ka yuɛ va, yé wenu lé ka dɔ a nwiin, maa ’ka a do kpen ye lɛ a pagi nya lo;

¹⁵ Érɔd é ziin, ’bɛ ’ka we ye lɛ a ma lo yé ’bɛ a pa ko lɛ zia é ziin; ka yé loo? mi ’ko ’ka gawe do kpen kɛlɛ lɛ lo.

¹⁶ Amalé dé maa a bla wɛsɛné nya faa an dan daan lɛ a ma.

¹⁷ Fɛti do do bɔle nya Pilat éé bokɔngizan do bɔraan munu lɛ.

¹⁸ Wo faa siaa ékeva léé: ’I mi ’ko gyɛ yé ’i Barabas bɔra ko lɛ.

¹⁹ ’Bɛ mi ’ko, ’bɛ nwa minwiinmunu ma fla, yé ’bɛ mi do gyɛ amalé wa vɔ bokɔn gi.

²⁰ É a Pilat gi léé, ’é daan Jézu ma, amalé é we fe wo lɛ é ziin.

²¹ Naa, wo siaa léé: ’Bé gyɛ yili la! ’Bé gyɛ yili la!

²² Pilat lé wo lɛ a gɔnɔ yaazan nya léé: Mɛ wenyané lé mi ’ko a kɛlɛɛ? Maa ’ka gawe do kpen ye lɛ a ma lo. Amalé dé maa a bla wɛsɛné nya faa, an dan daan lɛ a ma.

²³ Wo yee we duo fe siaale plɛplɛ nya léé, ’wa gyɛ yili la, yé wo lɔlu mini Pilat lɛ.

²⁴ Amalé we lé é sɔ wo lɛ, Pilat a kɛlɛ.

²⁵ Mi lé wa vɔ bokɔn gi nwale minwiinzannu ma valé mi gyɛle ma, ’té wa laa a lee bɛ, é daan ’bɛ ma yé é Jézu nɔ wolé blibɔmawe lɛ.

Wo Jézu gyɛ yili la

²⁶ Wa gona Jézu nya aan wo, ’té Sirɛnezan Simɔn si féi yé wo ’bɛ kun yé wo Jézu lé yiliblan dɔ ’bɛ nwiin yé ’bɛ go a nya a zuo.

²⁷ Mi gu blɛn go Jézu zuo ’té lomu a wo va, ’té ’bɛnu ’wo golɛ gya, ’té woo wuvɔa a ta.

²⁸ Jézu nɔla yé é lé wo lɛ léé: Jérusalɛm lomu, té ka wuvɔ maa ta lo; ’ka wuvɔ kabozen valé kalé nénu ɛ ta.

²⁹ Ka ye, a yinu é dan bɔ lɛ, a nya lé munu é dan a fe lɛ léé: Sɔnzannu zé fila vɔ; lomu lé wo ’ka né yaa lɛ lo, ’té wo ’ka nyɔ dɔ lɛ né ’léé lo, wozé fila vɔ.

³⁰ Yé wo dan a fe lɛ gɔ blɛnnu lɛ léé: ’Ka zana ko ta. Yé wo dan a fe lɛ gɔ sɛsɛnu lɛ léé: ’Ka dia ko gi.

³¹ Naa, dé wo we ’konu kɛlɛ yili drɔɔdrɔɔ lɛ ’naan, ’té a gale zé é dan kɛlɛ lɛ kaa?

³² A bléyi duo nya lé wo go wenyanékɛlɛzan fié lé, é a lé wo wo gyɛ Jézu va, wo nya.

³³ Wo bɔ aan wo fɛ lé wana laama Miwuowɔlɛ, ana, yé wo Jézu gyɛ yiliblan ta ’bɛna, yé wo wenyanékɛlɛzannu fié gyɛ a va, a do a a bɛyilazia, yé a do a a bɛbolazia.

³⁴ Jézu léé: An Ti, we lé wa kɛlɛna, wo ’ka a gi dɔɔa lo, amalé ’i wo ma we vo. Wo alé sɔnu guli ’wo ke ma ’munnu zunle nya.

³⁵ Munu dɔ ’bɛna ’té wa naginian. Minwiinmunu a ma we nana a fele nya léé: É mi bɛnu si we gi; dé yee ɛ ke Krist nya, mi lé Kazambale a si a va, a nya, ’é ébozen si we gi ma.

³⁶ Sunyanu é ziin wa ma we nana, yé wo bié yé wo dɔrɔ tɔndɔle nɔ a lɛ

³⁷ yé wo léé: Dé i a Juifinu nwiinzan blɛn nya ’i ibozen si we gi.

³⁸ Wo sɛbɛ gyɛ a ’wuo ta loru léé: Juifinu nwiinzan blɛn lé ke ’ko.

³⁹ Wenyanékɛlɛzannu lé wo ke é dunle yiliblan ta Jézu va bɛ, a do Jézu sɔnɔ yé é léé: Biian i ke Krist nya loo? ’I ibozen si we gi, yé ’i ko si we gi é ziin.

⁴⁰ Naa, a bɔluzan we pla a lɛ léé: Bii lé wo ga duo dɔ i nwiin ’naan, i ’ka kanaan Bale lee loo?

⁴¹ Ko gale yara lé; kolé wenyané ma ban lé; naa, mi ’ko ’ka wenyané do kpen kɛlɛ lɛ lo.

⁴² Yé é lé Jézu lɛ léé: Dé i bɔ ilé fuatɛrɛ la, an sele ’é dɔ i gi ma.

⁴³ Yé Jézu lé a lɛ léé: Kyɔ, i dan kɛlɛ lɛ an va paradi webozen nya. Maa fe i lɛ.

Jézu gale

⁴⁴ Yiéyi pa aan wo gunu dɔra tɛrɛ faa la, fɔɔ nyanadi yiri plɛplɛ nya.

⁴⁵ Yiri yɔɔ yé Balebangikɔn gi sɔ lé wa kɛlɛ kɔnmi nya, a fee bo é méléna.

⁴⁶ Jézu siaa dére plɛplɛ nya léé: An Ti, maa an léli bɛ pa i lee. Dére ’konu fele nya lé é ga.

⁴⁷ We lé é bɔ sunyayɔsoru ’lɛzan a ye aan wo, é Bale tɔ bɔ yé é léé: Mi ’ko a mi tegele nya webozen nya.

⁴⁸ Munu faa lé wo zén ékeva mi gu nya we ’ko ma, dé wo we ’ko kɛlɛle ye faa wo go fla ’wo golɛ gyɛle nya.

⁴⁹ Munu faa lé wo Jézu dɔɔ, é valé lomu lé wo valé Jézunu si Galilé tɛrɛ la wo nya, wo dɔ baa ’té wa naginian.

Jézu pale

⁵⁰ Webolikinizan do ana wa laama Jozɛfu. É a mi tegele valé mi zin nya,

⁵¹ yé é ’ka pa lɛ mi koɛnu va wolé wefele valé wolé wekɛlɛle nya lo. É si Juifinu lé fla do lé wa laama Arimaté, a ta, yé é a Kazambale plale mi nwiin lɛbɛnna.

⁵² Mi ’ko go Pilat va yé é Jézu gale laa a lee.

⁵³ É a si yiliblan ta, yé é a pasɔ vuru a ma, yé é a pa mipana lé wa bo gɔlɛ gi, ’té wo ’ka tan mi vinin pa lɛ a gi lo, ana.

⁵⁴ Fɛnu ma’lɛrɛ yi lé, ’té flinyi pélisiale bɔ é pu.

⁵⁵ Lomu lé wo valé Jézunu si Galilé tɛrɛ la, wo go Jozɛfunu nya, yé mi pana koo, bɛan zo lé wo Jézu gale pa koo, wo ana ye,

⁵⁶ yé wo da fla yé wo lia ginzan valé lasikɔrɔ ma’lɛrɛ. A zuo wo flin flinyi nya bélidɔwe yɛrama.