WENÉNÉ LÉ LUK A GYE (Évangile selon Luc) 22 - Kazambale lé Sebe Sauunu 1979

Minwiinmunu Jézu ma we ble

¹ Buru lé lévɛn ’ka a va lo, alé fɛti lé wa laama Taboyi lé fɛti, é bɔ é pu.

² Balebanmunu segelenu valé sɛbɛgifemunu a kwa kulina léé, ’wo Jézu gya, naa, wa kanana munu lee.

³ Naa, Judas lé wa laama Kariɔtzan, ’té é ke mi vu ta fié va mi do nya bɛ, Satan wɔra a bli gi.

⁴ Yé Judas go nana lɛ Balebanmunu segelenu valé Balebangikɔn tabin sunyanu nwiinzannu va léé, ’é a kɛla fɛan zo yé é Jézu pa wo lee, a we ma.

⁵ Wo gi nana, yé wo dére pa do léé, ’wo gɔɔli nɔ a lɛ.

⁶ Wo dére pale zuo, bléyian é bɔalɛ léé, é Jézu pa wo lee munu ma trɔnné va, é a ’bɛ naginina.

Jézu valé é zuomunu Taboyi lé fɛti kɛlɛ

⁷ Buru lé lévɛn ’ka a va lo, ’bɛ yi bɔ aan wo, yian nya lé woo Taboyi lé ’blané gya bɛ,

⁸ Jézu Piɛri valé Jan nwunvɔ yé é lé wo lɛ léé: ’Ka go Taboyi lé fɛti ma’lɛrɛ ko lɛ yé ko a ble.

⁹ Yé wo lé a lɛ léé: É sɔ i lɛ léé, ko ma’lɛrɛ fɛ kyɛnnaa?

¹⁰ É a zi pa wo lɛ léé: Ka ye, dé ka bɔ bɔrana fla, ka dan kee lɛ gɔné do nya ’yibɔ nya é bɛ ta; ’ka go a zuo kɔn lé é go a gi, ana,

¹¹ yé ’ka fe kɔnzan lɛ léma: Mizan léma: Fɛ kyɛnna lé yee valé é zuomunu é dan Taboyi lé fɛ ble lɛɛ?

¹² Yé kɔn nwiin kɔn gi blɛn do lé tablé valé blinnu ke a gi, é dan a gɔɔn lɛ ka lɛ; ana lé ’ka Taboyi lé fɛ ma’lɛrɛ ma.

¹³ Wo go, yé wo bɔ fɛnu ma bélé fɛan zo lé Jézu a fe wo lɛ, a zo, yé wo Taboyi lé fɛti lé fɛnu ma’lɛrɛ.

¹⁴ A bléyi bɔ aan wo, yee valé nwunvɔmunu nyana tablé zi.

Jézu we dɛrɛ paa é zuomunu gi

¹⁵ Yé é lé wo lɛ léé: É sɔ an lɛ é baba léé, maa Taboyi ’ko lé fɛ ble ka va anlé nyanéblele ’lɛ;

¹⁶ naa, maa lé ka lɛ léé, maa ’ka dan a bɛ ble lɛ lo, fɔɔ ’té a kɛlɛle lɛ sɔɔ Kazambale lé fuatɛrɛ la.

¹⁷ É ’yiminikana do si aan wo, é Bale bɔ vɔ yé é léé: ’Ka kana ’ko si yé ’ka a gifɛ guli ka ke ma;

¹⁸ naa, maa lé ka lɛ léé, é sia bléyi ’ko ma, maa ’ka dan dɔrɔyi mini lɛ lo fɔɔ yé Kazambale lé plale mi nwiin é da.

¹⁹ ’Bɛ zuo, é buru si, yé Bale bɔvɔle zuo é a bɔi yé é a nɔ wo lɛ a fele nya léé: An kɔlɛ lé maa a nɔ kalé we ma, yee lé ke ’ko. ’Ka we ’ko kɛlɛ an sele dɔle ka gi we ma.

²⁰ A zo duo lé dé wo fɛ ble faa é ’yiminikana si yé é a nɔ wo lɛ a fele nya léé: Fɛ lé ke ’yiminikana ’ko gi, an nyɛ lé; é a gipawe dɛrɛ dɔ plɛplɛ nyɛ lé é zana kalé we gi, a nya.

²¹ Ka ye, mi lé é ke an pana munu lee, a bɛ a an va fɛ pala ’ko gi duowo.

²² Maa blami Be a gona, fɛan zo lé Bale a fe, a yɛrama, naa, mi lé é an pa munu lee, a gale nyɔ.

²³ Yé wo kun we laale ma wo ke lee léé, ’wo va mi kyɛn ɛ dan we ’ko kɛlɛ lɛɛ?

Dé de ɛ ke wo va mi blɛn nyaa?

²⁴ Zavɔle nwa é ziin nwunvɔmunu méléna yé wo léé, ’wo va mi kyɛn ɛ ke mi blɛn nyaa?

²⁵ Jézu lé wo lɛ léé: Bɛnnu nwiinmunu a é plale ’wo nwiin plɛplɛ, ’té wa fé wo lɛ léé, ’ka ’wo laa wezinkɛlɛzannu.

²⁶ É ’ka ’bɛ zo ka va lo. Ka va mi blɛn ’é kɛlɛ mi kiéné nya ma, yé ka ta loruzan ’é kɛlɛ ka wuozan nya ma.

²⁷ Naa, mi lé é ke tablé zi, yee ɛ ke mi blɛn nya laa, taa, mi lé éé fɛblele sié ’té éé dan a nya bɛ, ’bɛ ɛ ke mi blɛn nyaa? Tablézizan kaan loo? Naa, maa a ka méléna bélé mi lé éé fɛblele sian ’té éé dan a nya, a zo.

²⁸ Ka a munu lé wo yara pa we ta an va an gidanlenu gi, wo nya;

²⁹ amalé maa fuatɛrɛ bɛ pa ka lee, bélé fɛan zo lé an Ti a bɛ pa an lee, a zo,

³⁰ yé ka dan fɛ ble lɛ anlé tablé ta anlé fuatɛrɛ la, yé ka dan nyana lɛ webleblinnu ta Izraɛl lé bɛn vu ta fié lé we blele we ma.

Jézu Piɛri lé sɔnvɔle é ma fale vɔ

³¹ Mizan léma: Simɔn, Simɔn, é sɔ Satan lɛ léé, ’é i wuo bo bélé ’sawɔlɛ wuobole zo.

³² Naa, an bazoro ilé we ma, léé, té i blipale ta é zana lo; yé bii, dé i bli nɔla yian ma, ’i i bwenu dɔ gligli ma.

³³ Piɛri lé a lɛ léé: Mizan, an ma a é ’lɛrɛle, dé i go bokɔn gioo, dé i gan‐oo, ko ɛ ke i nya.

³⁴ Yé Jézu léé: Piɛri, kyɔ, dé manegɔné ’ka tan we lɛ lo, i dan a fe lɛ gɔnɔ yaa léé, ’é ’ka an dɔɔa lo. Maa fe i lɛ.

Gɔɔlipabala — pulu — sawala — wolé we

³⁵ Jézu lé wo lɛ é ziin léé: Dé maa ka nwunvɔ, ’té gɔɔlipabala koo, pulu koo, sawala koo, ’té wo ’ka aan wo ka lee lo, fɛ do vuru ka maa? Wo léé: Gba.

³⁶ É lé wo lɛ léé: Naa, sin, mi lé gɔɔlipabala ke a lee, ’é a si ma, mi lé pulu ke a lee, ’é a si é ziin ma, yé mi lé gwɔun ’ka a lee lo, ’élé sɔ dan yé é gwɔun lɔ ma.

³⁷ Naa, maa lé ka lɛ léé, dére ’ko lé wa gyɛ sɛbɛ gi é a lé a lɛ é sɔɔ an nya; é léé: Wa nɔnɔ wenyanékɛlɛzannu va. An ma we lé wa gyɛ sɛbɛ gi, é vo sɛné yé a faa kɛlɛle lɛ é sɔɔ.

³⁸ Wo léé: Mizan, gwɔun fié lo. É lé wo lɛ léé: ’Bɛ a é yi.

Jézu bazoro Jɛtsémané

³⁹ É bɔra aan wo yé é go Ɔlivi gɔ nwiin a kɛlɛbɛ kyɛn zo. ’Té a zuomunu a a va.

⁴⁰ Wo bɔ aan wo fɛkona yé é lé wo lɛ léé: ’Ka bazoro, té wo ka gi dan lo we ma.

⁴¹ Dé mi gɔlɛ vuli éé diaan fɛana, a zo lé Jézu si wo ma, yé é powuo zun yé é bazoro yé é léé:

⁴² An Ti, dé é sɔ i lɛ, ’i ’yiminikana ’ko si an lee. Naa, té é kɛlɛ an sɔlɛwe nya lo, ’é kɛlɛ i sɔlɛwe nya ma.

⁴³ Yé lanje do si la gi yé ’bɛ da a va a dɔle plɛplɛ we ma.

⁴⁴ É a nyané blena kaii, yé é bazoro plɛplɛ taa nya yé kyɛyee nyi bɔra a ma nyɛ nya yé é zana tɛrɛ va.

⁴⁵ É nyaa bazorole nya faa yé é nwa yé é go é zuomunu va yé é bɔ wo ma yigyɛna bli kyɛ nya.

⁴⁶ Yé é lé wo lɛ léé: Mɛmalé ka a yigyɛnaa? ’Ka nwa yé ’ka bazoro, té wo ka gi dan lo we ma.

Wo Jézu kun

⁴⁷ É a tan wefena aan wo, tɔɔn, mi gu bɔra wo ma yé mi lé wa laama Judas, ’té é ke mi vu ta fié va mi do nya bɛ, ’té é a wo ’lɛ. É bié Jézu ma a tuu gyɛle we gi.

⁴⁸ Yé Jézu lé a lɛ léé: Judas, i maa blami Be paan munu lee an tuu gyɛle nyaa?

⁴⁹ We lé é dan bɔ lɛ Jézu ma, a vamunu a ye aan wo yé wo léé: Mizan, ko wo gyɛ gwɔun nyaa?

⁵⁰ Yé wo va mi do Balebanmunu ’lɛzan wuozan bɛyila tɔné bɔi gwɔun nya.

⁵¹ Naa, Jézu léé: ’I dɔ do, ’bɛ sɔ. Yé é bɛ mane ’bɛ tɔné ma yé ’bɛ béli.

⁵² A zuo Balebanmunu segelenu koo, Balebangikɔn tabin sunya ’lɛzannu koo, mi segelenu koo, wo lé wo da Jézu kun lɛ bɛ, Jézu lé wo lɛ léé: Ka da gwɔunnu valé yilinu nya ka lee, bélé fɛan zo lé ka da kyeenwozan kun lɛ, a zoo?

⁵³ Maa a ka va yifaama Balebangikɔn gi yé ka ’ka an kun lɛ lo. Naa, bléyi ’ko a ka valé gunutinu lé plɛplɛ bléyi nya.

Piɛri sɔn vɔ Jézu ma

⁵⁴ Wo Jézu kun aan wo, wo go a nya Balebanmunu ’lɛzan lé kɔn gi. Piɛri vo dana a zuo baa, sɛné sɛné.

⁵⁵ Munu kyɛ sɔn gɔrɔ méléna yé wo nyana a zi. Piɛri nyana wo va.

⁵⁶ Wuole do a ye é nyanale kyɛ zi, yé é a nagini téiin yé é léé: Mi ’ko a a va é ziin.

⁵⁷ Naa, Piɛri léé, gba, yé é léé: Lezan, maa ’ka a dɔɔa lo.

⁵⁸ ’Bɛ zuo sɛ, mi bɛ a ye yé ’bɛ léé: Bii é ziin, i a wo va mi do nya. Yé Piɛri léé: Béé, maa kaan lo.

⁵⁹ ’Bɛ zuo, dé lɛrɛ do giéle zuo léé? mi bɛ yee duo fe yé ’bɛ léé: Webozen nya, mi ’ko a a va; é a Galilé tɛrɛ la mi nya.

⁶⁰ Piɛri a zi pa léé: Béé, we lé bé fé bɛ, maa ’ka ’bɛ maan lo. A bléyi duo nya, dé é a tan wefena, manegɔné we.

⁶¹ Mizan nɔla yé é Piɛri nagini. Yé dére lé Mizan a fe a lɛ léé: Kyɔ, dé manegɔné ’ka tan we lɛ lo, i dan a fe lɛ gɔnɔ yaa léé, ’é ’ka an dɔɔa lo, a sele dɔ Piɛri gi.

⁶² É bɔra béera yé é vo wuvɔna kaii.

Wo we nana Jézu ma yé wa bla

⁶³ Munu lé wo ke Jézu tabinna wo we nana a ma, ’té wa blaan.

⁶⁴ Wo sɔ vuru a yuɛ la yé wo we laa a lee léé: ’I balelawe fe. De ɛ fɛ duun i lɛɛ?

⁶⁵ Yé wa sɔnɔ bɛ kiɛre ma é ziin.

Wo go Jézu nya webolikinimunu va

⁶⁶ Tu kini aan wo, mi segelenu koo, Balebanmunu segelenu koo, sɛbɛgifemunu koo, wo zén ékeva yé wo da Jézu nya wolé webolikinimunu va.

⁶⁷ Wo léé: Dé bii a Krist nya, bé fe ko lɛ. Jézu lé wo lɛ léé: Dé maa fe ka lɛ, ka ’ka dan pa lɛ a ta lo;

⁶⁸ yé dé maa we laa ka lee, ka ’ka dan a zi pa lɛ an lɛ lo.

⁶⁹ É sia bléyi ’ko va, maa blami Be, an dan nyana lɛ Plɛplɛfaazan bɛyilazia.

⁷⁰ Wo faa léé: ’Té i a Kazambale Be nyaa? É lé wo lɛ léé: Yee lé ka a fe bɛ, maa ɛ ke a nya.

⁷¹ Yé wo léé: Ko mawe a wenayezan bɛnu gii? Kobozen, ko a ’léé dére ’ma.