WENÉNÉ LÉ LUK A GYE (Évangile selon Luc) 2 - Kazambale lé Sebe Sauunu 1979

Jézu yaale

¹ ’Bɛ yinu la, Sézaa Ogisi bélidɔwe fe léé, ’wo tɛrɛlamunu faa nɔnɔ.

² Bléyian va lé Kiriniu a Siri munu lé gbɔrɔnama nya, a bléyi nya lé wo munu nɔnɔle vininzan ’ko kɛlɛ.

³ Munu faa go wo tɔ gyɛ lɛ ’wobo lé fla.

⁴ Jozɛfu a David kululazan nya David lé kɔn gi, amalé é si Galilé tɛrɛ la, fla lé wa laama Nazarɛt, a ta, yé é go Judé tɛrɛ la David lé fla lé wa laama Bɛtléɛm, a ta, é tɔ gyɛle we gi,

⁵ yee valé é na Mari nya, ’té ’bɛ bɔn a é ma.

⁶ Wa ’bɛna aan wo, Mari lé néyaabléyi bɔ,

⁷ yé é élé blɛn la né yaa gɔné nya. Wo ’ka nyanana ye lɛ kɔnnu gi lo, amalé é sɔ vuru a ma, yé é a yia winu lé fɛble kɛsu gi.

’Blatabinmunu valé lanjenu

⁸ ’Bɛna mi, ’blatabinzannu éé yiié féi, yuɛpale wolé trubɛnu va we gi é béli.

⁹ Yé Mizambale lé lanje do da wo va yé Mizambale lé fuasan diri wo zi. Wo gi nyɛ blɛn kini.

¹⁰ Naa, lanje lé wo lɛ léé: Té ka kana monomono lo; naa, wenéné lé é dan munu faa gi nana lɛ é baba, an da a fe lɛ ka lɛ.

¹¹ Yee lé é ke ’ko: Mibélizan lé ke Krist nya, Mizan nya, waa yaa ka lɛ kyɔ, David lé fla.

¹² Tɔmasean ka dan a dɔɔ lɛ a ma, yee lé é ke ’ko: ka dan né dɛrɛ do ye lɛ é yiale winu lé fɛble kɛsu gi, ’té sɔ a é vurule a ma.

¹³ Tɔɔn, lai sunya gu da lanje va Kazambale tɔ zin fele nya, yé wo léé:

¹⁴ ’Wo fua nɔ Kazambale lɛ fɛna loru baa mi, Yé munu lé wo sɔ a lɛ, ’wo vo drɔɔ tɛrɛ la ma.

¹⁵ Lanjenu si aan wo ’blatabinmunu va yé wo go la gi, ’blatabinmunu lé ’wo ke lɛ léé: Kaa go Bɛtléɛm yé we lé é bɔ yé Mizambale a fe kaa lɛ, kaa ye.

¹⁶ Wo go fiéfié, yé Mari koo, Jozɛfu koo, né dɛrɛ lé é ke é yiale winu lé fɛble kɛsu gi koo, wo wo ye.

¹⁷ Dé wa ye faa, we lé wa fe wo lɛ né dɛrɛ lé we ma, wa zuo fe mi bɛnu lɛ.

¹⁸ Wean ’blatabinmunu a fe, munu a ’ma aan wo, wo gi vuru.

¹⁹ Mari we ’konu faa ta dɔ é bli gi, ’té éé wo bɔrɔan é bɔn‐in.

²⁰ Yé ’blatabinmunu diéra wo pa gi, Kazambale tɔ bɔle valé a tɔ zin fele nya, we faa lé wa ’ma yé wa ye, a ma, yé é kɛlɛ fɛan zo lé wa fe wo lɛ, a zo.

Wo Jézu gane dɔ yé wa nagɔɔn Balebangikɔn gi

²¹ Né dɛrɛ yi sɔraazan bɔ aan wo, wo go a gane dɔ lɛ, yé wa tɔ pa Jézu, tɔ lé lanje a fe a bu lɛ a bɔn sile ’lɛ, a nya.

²² Dé né vla bole nyaa Moizi lé bélidɔwe yɛrama, Jozɛfu valé Mari go a nya Jérusalɛm a nagɔɔnle Mizambale lɛ we gi,

²³ fɛan zo lé é ke é gyɛle Mizambale lé bélidɔwe nya, a zo; wo léé: ’Wo négɔné vininnu faa pa é yɛrama Mizambale zé nya.

²⁴ É ziin, wo go Bale ban lɛ, dé plala fié léé? dé fla plawuo boroné fié léé? wo nya, fɛan zo lé Mizambale lé bélidɔwe a fe, a zo.

²⁵ Yé bé ye, mi do a Jérusalɛm wa laama Siméɔn. Mi ’ko a mi tegele valé Bale bɔzan nya, yé é a Izraɛl tɔrɔpaazan lɛbɛnna, yé Léli Sauun a a ta.

²⁶ Léli Sauun a gɔɔn a lɛ léé, dé i ’ka tan Mizambale lé Krist ye lɛ lo, i ’ka gaan lo.

²⁷ Kazambale Léli a nyunu léé, ’é go Balebangikɔn gi. Yé dé Jézu yaazannu da Jézu liiné nya bélidɔwe lɛsɔɔle a vazia we gi,

²⁸ tɔɔn, Siméɔn a si é bɛ gi, yé é Kazambale tɔ zin fe, yé é léé:

²⁹ Anzan, ’i daan maa i wuozan ma sin, yé ’an go drɔɔ, dére lé bé fe an lɛ, a yɛrama.

³⁰ Naa, an yuɛ ilé mibélizan ye,

³¹ mi lé bé kɛlɛ mibélizan nya munu faa yuɛ va, maa a ye.

³² É a bɛnnu vakinisan nya, ilé munu Izraɛl tɔbɔle nya yé maa a ye an yuɛ nya.

³³ Wenu lé Siméɔn ke a fena né lé we ma, a ti valé a bu gi vuru wo ma.

³⁴ Siméɔn wo drɔɔ vo yé é lé né bu Mari lɛ léé: Bé ye, Bale né ’ko dɔ Izraɛl mi kiɛre saanzan valé wo drɔ?-?zan nya é ziin, yé é a dɔ tɔmase lé wo dan za vɔ lɛ a ta, a nya,

³⁵ mi kiɛre bɔn‐in bɔrɔwe ta bɔrale we gi, yé we lé é dan bɔ lɛ a ma, biibozen, é dan yaa lɛ i bɔn‐in bélé kyɛ zo.

³⁶ Balelaye le do ana é ziin, é a Azɛɛ mi Fanuɛl lu Ane nya. É a leblané nya; é bo si aan wo é vo bofla lɛɛ sɔrafié.

³⁷ ’Bɛ zuo yé é vo gyɛzarale nya, yé a lɛɛ a yɔ ziɛn wɔlɛ ziɛn. É ’ka sié Balebangikɔn gi lo, ’té é Kazambale bɔa lɔrɔ sɔnle valé bazorole nya, bladi nyanadi.

³⁸ Yee é ziin, é da yee bléyi duo nya yé é Kazambale tɔ zin fe, yé munu faa lé wo ke Jérusalɛm munu vole woboma lɛbɛnna, é Jézu lé we fe wo lɛ.

Wo go Nazarɛt

³⁹ Jozɛfu valé Mari nyaa aan wo Mizambale lé bélidɔwe faa lɛsɔɔle nya, wo go ’wolé fla Nazarɛt, Galilé tɛrɛ la.

Pɛniɛné Jézu a Balebangikɔn gi

⁴⁰ Yé né tin yé é dɔ plɛplɛ, É a é fanle wedɔɔle nya, yé Kazambale bɛ zin a a ta.

⁴¹ Jézu yaamunu éé goo Taboyi lé fɛti kɛlɛ lɛ lɛɛ faa do do ma Jérusalɛm.

⁴² Jézu lɛɛ bɔ aan wo vu ta fié wo go ’bɛna fɛti kɛlɛ lɛ a kɛlɛbɛ kyɛn yɛrama.

⁴³ Fɛti kɛlɛle nyaa aan wo, dé wa gona ’wo pa gi é ziin, pɛniɛné Jézu vo zi zuo Jérusalɛm. A ti valé a bu ’ka ’bɛ gi dɔɔa lo.

⁴⁴ É dɔ wo gi léé, é a munu lé wo ke tawona ékeva wo nya zia, wo va, yé wo tawo yi do yé wa nagini ’wo lelenu valé ’wo dɔɔzannu va.

⁴⁵ Naa, wo ’ka aan wo a ye lɛ lo, wo diéra wo pa gi Jérusalɛm a naginile we gi.

⁴⁶ Yi yaazan nya é nyanadi, wa ye Balebangikɔn gi, é nyanale bélidɔwedɔɔmunu méléna, ’té éé tɔné dɔa wo lɛ, ’té éé we laan wo lee.

⁴⁷ Munu lé wa dére ’ma, wo faa ’léé ma wo ma a gi kinile valé alé we zi pale ma.

⁴⁸ A yaamunu a ye aan wo, wo gi vuru yé a bu lé a lɛ léé: Anlé né, mɛmalé i we ’ko zoɛ kɛlɛ ko lɛɛ? I a yé loo? I ti valé maa, ko a i ginina ko zuru va nyɛ kinile blɛn nya.

⁴⁹ É lé wo lɛ léé: Mɛmalé ka a an gininaa? Ka ’ka a gi dɔɔa léé, maa dan kɛlɛ lɛ an ti lé kɔn gi loo?

⁵⁰ Naa, we lé é a fena wo lɛ, wo ’ka a gi ’ma lɛ lo.

⁵¹ ’Bɛ zuo é go wo va Nazarɛt, yé é pla wo wuo. We ’konu faa vo a bu bli gi.

⁵² Yé Jézu tin wedɔɔle koo, é kɔlɛ koo, Bale lé zin koo, wo gi, Kazambale valé munu yuɛ va.