WENÉNÉ LÉ LUK A GYE (Évangile selon Luc) 19 - Kazambale lé Sebe Sauunu 1979

Jézu valé Zasé

¹ Jézu bɔra Jériko yé é a giéna aan wo,

² fuablezan do a ’bɛna, wa laama Zasé. É a vagɔɔlisimunu nwiinzan nya;

³ é a kwa kulina léé, mi lé é ke Jézu nya ’é a ye. Mi gu lé we ma é ’ka bɔa lɛ lo; é a tégéléné, ’bɛzama.

⁴ É vlan buru zi ’lɛ yé é vɔ sikomɔyili nwiin, Jézu yele we ma; é a gi dɔɔ léé, Jézu é dan gié lɛ ’bɛna, azama.

⁵ Jézu bɔ aan wo ’bɛna, é yara nwa loru yé é léé: Zasé, ’i zun é kele, é a lé maa go yii ilé kɔn gi kyɔ.

⁶ Zasé zun é kele yé é Jézu bɛn si gi nanale nya.

⁷ Munu we ’ko ye aan wo, wo faa vo gun gyɛna yé wo léé: É go yii lɛ wenyanékɛlɛzan va.

⁸ Naa, Zasé dɔ Mizan ’lɛ yé é lé a lɛ léé: Mizan, maa dan anlé fuafɛ lɛ do nɔ lɛ nyanégyɛmunu lɛ, yé dé maa mian kyeenwo, maa dan a lɛgi nɔ lɛ a lɛ gɔnɔ ziɛn.

⁹ Jézu lé a lɛ léé: Mi ’ko a é ziin Abraam gɔnɔlazan do nya, bɛwemalé mi éé sié we gi kyɔ kɔn ’ko gi.

¹⁰ Naa, maa blami Be da fɛ sanle naginile valé a sile we gi we ma.

Miné vu ma gɔné vɔle

¹¹ Wo ke aan wo ’wo tɔné dɔna we ’konu lɛ, Jézu gɔné do vɔ é ziin; é a Jérusalɛm sɔnɔ yé é dɔ munu gi léé, Kazambale é dan pla lɛ munu nwiin laoɛ, amalé é gɔné ’ko vɔ.

¹² Yé é léé: Mi do lé wa yaa minwiinzannu gɔnɔ gi, é a gona tɛrɛ baa do la, plale mi nwiin se ginile we gi, ’bɛ zuo yé ’é da é pa gi.

¹³ Bɛwemalé é wuomunu vu laa yé wolé gɔɔli lé wa laama miné, ’té wa yé moné yaa nyanama ma, é a do do nɔ wo lɛ yé é lé wo lɛ léé: ’Ka go yaawo a nya fɔɔ yé an da.

¹⁴ A za a élé tɛrɛlamunu gi, amalé dé é go faa wo munu nwunvɔ a zuo a fele we gi léé: Mi ’ko plale ko nwiin ’ka sɔ lɛ ko lɛ lo.

¹⁵ Dé wo alé plale mi nwiin se kɛlɛ a lɛ faa, é da, yé a wuomunu lé é gɔɔli nɔ wo lɛ, é wo laa léé, ’wo da, yé dé tɔnɔ lé wa ye élé gɔɔli ma, ’wa ’léé fe ’é lɛ.

¹⁶ A vininzan da yé é léé: Anzan, ilé miné do pa a ma vu.

¹⁷ Azan lé a lɛ léé: An wuozan zin, ’bɛ a é zima. I yara pa we kiene kɛlɛle ta, amalé maa i pla fla vu nwiin.

¹⁸ A fiézan da yé é léé: Anzan, ilé miné do pa a ma soru.

¹⁹ Yé é lé ’bɛ lɛ léé: Bii é ziin, maa i pla fla soru nwiin.

²⁰ A koɛzan da yé ’bɛ léé: Anzan, ilé miné do lo; maa a yɔɔ sɔ gi;

²¹ i wɛwɛ a, amalé an kana i lee; fɛ lé i ’ka a pla lɛ lo, yee lé bé sian, yé fɛ lé i ’ka a vɔ lɛ lo, yee lé bé gya.

²² Wozan lé a lɛ léé: An wuozan naané, maa dan ilé we ble lɛ i ’léé dére ta; bé gi dɔɔ léé, an wɛwɛ a; fɛ lé maa ’ka a pla lɛ lo, yee lé maa sian, yé fɛ lé maa ’ka a vɔ lɛ lo, yee lé maa a gya;

²³ mɛmalé i ’ka anlé gɔɔli pa lɛ banké ta yé dé an da yé maa yee valé é tɔnɔ si loo?

²⁴ A zuo é lé ana munu lɛ léé: ’Ka miné do si a lee, yé ’ka a nɔ miné vuzan lɛ.

²⁵ Wo lé a lɛ léé: Kozan, miné vu a ’bɛ lee.

²⁶ É léé: Maa fe ka lɛ, mi lé fɛ ke a lee, wo dan fɛ nɔ lɛ a lɛ, naa, mi lé azé ’ka lo, fɛ lé é ke a lee, wo dan a si lɛ a lee.

²⁷ Naa, an nyanézannu lé an plale wo nwiin ’ka sɔ lɛ wo lɛ lo, ’ka da wo nya ’ko, yé ’ka wo bɔrɔ bo an yuɛ va.

Jézu bɔra Jérusalɛm minwiinzan nya

²⁸ We ’ko fele zuo Jézu go é ’lɛ, Jérusalɛm zia.

²⁹ É bɔ aan wo Bɛtfajé valé Bétani sɔnɔ, Ɔlivi gɔ ma zia, Jézu é zuomi fié nwunvɔ a fele nya léé:

³⁰ ’Ka go fla lé ke ka ’lɛ bɛ, a ta; dé ka bɔ ’bɛna ka dan sokofale boroné do ye lɛ, é polu nya é dɔle, ’té mi vinin ’ka tan nyana lɛ a ta lo; ’ka a polu so yé ’ka da a nya.

³¹ Dé mi do we laa ka lee léé: Mɛmalé ka polu soo? ’ka fe a lɛ léé: Mizan mawe a a gi.

³² Nwunvɔmunu go, yé we lé Jézu a fe wo lɛ, wa ye a zo.

³³ Wa sokofale boroné polu sona tɔɔn azannu lé wo lɛ léé: Mɛmalé ka a sokofale boroné polu sonaa?

³⁴ Yé wa zi pa léé: Mizan mawe a a gi.

³⁵ Wo da sokofale boroné nya Jézu lɛ, yé wo ’wolé sɔnu pla a punu yé Jézu nyana a ta.

³⁶ Wa gona aan wo, munu ’wolé sɔnu fwila zia.

³⁷ Wo bɔ aan wo Ɔlivi gɔ zunna, a zuomunu gu gi nanale sia yé wo kun Kazambale tɔ zin fele ma dére plɛplɛ nya, gyɛzorowenu faa lé wo wo ye, wolé we ma,

³⁸ yé wo léé: Minwiinzan lé é da Mizambale tɔ gi, a drɔɔ ’é vo ma. Lagi ’é vo drɔɔ, yé fuasan ’é kɛlɛ fɛna loru baa mi.

³⁹ Farizimi kenu a mi gu va yé wo lé Jézu lɛ léé: Kozan, ’bé fe i zuomunu lɛ léé, ’wo tadɔ.

⁴⁰ Yé Jézu léé: Dé wo tadɔ, gɔlɛnu é dan siaa lɛ. Maa fe ka lɛ.

⁴¹ Wo bɔ aan wo fla sɔnɔ Jézu fla ye, yé é kun wuvɔle ma alé we ma,

⁴² yé é léé: Kyɔ yi ’ko nya, bii ’ka i vole drɔɔ zi dɔɔa lo baa? Naa, ’bɛ a é yɔɔle i ma.

⁴³ A yi é dan bɔ lɛ, yé i nyanézannu é dan guru bo lɛ i zi, yé wo dan i zi lɛ sɔɔ lɛ yé wo dan i tunu lɛ bɛ faa ma.

⁴⁴ Wo dan i guru zana lɛ a gi tata, bii valé i ta munu nya. Bléyian va lé an da ka va, ka ’ka a gi dɔɔ lɛ lo, amalé wo ’ka dan i gɔlɛ do kpen vo lɛ é ke ta lo.

Jézu Balebangikɔn ’lɛrɛ

⁴⁵ É wɔra Balebangikɔn gi, yé é kun yaawomunu bɔrale ma yé é lé wo lɛ léé:

⁴⁶ É a é gyɛle sɛbɛ gi léé: Anlé kɔn é dan kɛlɛ lɛ bazorokɔn nya, naa, ka a kɛlɛ kyeenwozannu lé yɔɔkɔn nya.

⁴⁷ É a we paana munu gi Balebangikɔn gi yi faa do do ma. Naa, Balebanmunu segelenu koo, sɛbɛgifemunu koo, munu segelenu koo, wa kwa kulina léé, ’wa gya,

⁴⁸ naa, a dére do kpen ’ka gié lɛ munu tɔné la lo, amalé wo ’ka zi ye lɛ, wa kun lo.