WENÉNÉ LÉ LUK A GYE (Évangile selon Luc) 18 - Kazambale lé Sebe Sauunu 1979

Gyɛzarale valé weblezan ma gɔné vɔle

¹ Jézu gɔné do vɔ wo lɛ a gɔɔnle wo lɛ we gi léé, é a lé ’wo bazoro yifaama, té wo daan a ma lo.

² É léé: Weblezan do a fla do la; é ’ka kanaan Bale lee lo, yé mi do kpen lé we ’ka a yuɛ gi bɔa lo.

³ Yé gyɛzara le do a é ziin yee fla duo ta, ’té ’bɛ éé dan a va, ’té ’bɛ a fé a lɛ léé: ’I maa valé an nyanézan lé we ble.

⁴ Gɔnɔ kiɛre nya é ’ka a nyi si lɛ lo. Naa, ’bɛ zuo é lé é bli gi léé: Dé an ’ka kanaan Bale lee looo, dé mi do kpen lé we ’ka an yuɛ gi bɔa looo,

⁵ maa ’ka flina yena le ’ko lee lo, bɛwemalé maa dan alé we ble lɛ, dé é da vo dana an va yifaama yé an wɔlɛ gi é nyaa.

⁶ Mizan we taa fe, yé é léé: We lé weblezan ple ’ko ke a fena, ’ka ’ma ma.

⁷ Yé munu lé Bale wo si a va ézé nya, ’té woo siaan a lɛ bladi nyanadi, é ’ka dan wo nyanémunu lé we ble lɛ loo? É dan mɔn lɛ faa ’lɛ yé é wolé we blee?

⁸ Maa lé ka lɛ léé, é dan ’bɛnu lé we ble lɛ é kele. Naa, dé maa blami Be da, dé an dan bɔ lɛ blipamunu ma tɛrɛ laa?

Farizimi valé vagɔɔlisizan ma gɔné vɔle

⁹ Yé é gɔné do vɔ é ziin, mi kenu lé é a wo gi léé, ’wa tegele ’té wo ’ka mi bɛnu yé mi nya wo yuɛ gi lo, wolé we ma.

¹⁰ É léé: Mi fié go bazoro lɛ Balebangikɔn gi; a do a Farizimi nya, yé a do a vagɔɔlisizan nya.

¹¹ Yee lé ke Farizimi nya, é dɔ loru, yé é bazoro ébo lɛ ’ko zo, léé: Oo Bale, maa i bɔ vɔa léé, maa ’ka bélé mi pɔnénu lé wo ke mitablezannu koo, mi plenu koo, leginizannu koo, é ziin vagɔɔlisizan ’ko koo, wo zo lo;

¹² maa lɔrɔ sɔn‐o flɛyi do gɔnɔ fié; fɛnu faa lé maa wo yé, maa wo vuzan no i lɛ.

¹³ Mi lé ’bɛ ke vagɔɔlisizan nya, ’bɛ dɔ baa, yé é ’ka dɔ lɛ ’bɛ gi boenwo lé é yara nwa la gi zia lo; naa, é kun é ’wuo ma ’té éé a fé léé: Oo, Kazambale, ’i nyanai zén maa wenyanékɛlɛzan ta.

¹⁴ Maa lé ka lɛ léé, mi ’ko go élé kɔn ’léé mi tegele nya, é mini é bɔluzan ta. Naa, dé mian ébo nwaan blɛn wo dan a tua lɛ, yé mi lé ébo tuaan wo dan a nwa lɛ blɛn.

Jézu nénu drɔɔ vo

¹⁵ Munu da é ziin né liinénu nya Jézu va, léé, ’é bɛ mane wo ma. Naa, a zuomunu we ’ko ye aan wo, wo we ble munu lé wo da nénu nya, wo va.

¹⁶ Yé Jézu nénu laa ’wo da é va, yé é léma: ’Ka nunukénénénu vo, ’wo da an va. Té ka wo dale an va yi ga lo; naa, munu lé wo ke bélé nénu zo, Kazambale a é plale wo nwiin.

¹⁷ Maa fe ka lɛ webozen nya léé, dé miomian é ’ka Kazambale plale é nwiin nyi sié bélé né kiéné zo lo, é ’ka dan wɔra lɛ Bale va lo.

Fuablezan lé we

¹⁸ Minwiinzan do we laa Jézu lee léé: Anzan zin, maa kɛla kaa yé an vo é yuɛma lɛɛfaama yé a glɛ ’ka dɔa loo?

¹⁹ Yé Jézu lé a lɛ léé: Mɛmalé i an laan mi ziin? Kazambale do kpen ɛ ke é zin.

²⁰ I bélidɔwenu dɔɔ: Té i le bɛ gini lo, té i mi gyɛ lo, té i kyeenwo lo, té i viéwo mi ma lo, i ti valé i bu lɛdɔma, woo lé.

²¹ Gɔnézan léé: An we ’konu faa kɛlɛle pélisia ’té maa a pɛniɛné nya.

²² Jézu ’bɛ ’ma aan wo yé é lé a lɛ léé: Ilé we do vo é ziin. ’Ilé fɛnu faa dan, yé bé mafɛ guli nyanégyɛmunu ma, yé i dan fɛwezan ye lɛ la gi. Dé i nyaa a nya faa ’i da an zuo.

²³ É fua ble é baba, bɛwemalé é dére ’konu ’ma aan wo a bli kyɛ dɔ.

²⁴ Jézu a ye aan wo léé, a bli kyɛ dɔ, é léé: Munu lé fuafɛnu ke wo lee, wo plale Kazambale wuo a wo ma tɔntɔn.

²⁵ Fuablezan plale Kazambale wuo a tɔntɔn é mini nyɔgɔmé wɔrale sɔ béé sééné yɛrɛ gi ta.

²⁶ Munu lé wo ke ’wo tɔné dɔna a lɛ, wo léé: De ɛ bɔalɛ léé, é si we gii?

²⁷ Jézu léé: We lé munu ’ka bɔa a kɛlɛle lɛ lo, Kazambale é bɔa a lɛ.

²⁸ Yé Piɛre léé: Bé ye, ko daan kolé fɛ faa ma yé ko da i zuo.

²⁹ Yé Jézu lé wo lɛ léé: Maa fe ka lɛ webozen nya léé, mian éé daan élé fɛnu ma, dé alé kɔn léé, dé a na léé, dé a bwenu léé, dé a lelenu léé, dé alé nénu léé, mi lé é daan wo ma Kazambale plale a nwiin lé we ma yé é ’ka wo lɛgi yé kiɛre yé é mini wo ta lao lo, ’bɛzan ’ka lo,

³⁰ yé alé tɛrɛla nyaale zuo é dan vo lɛ é yuɛma lɛɛfaama ’bɛ glɛ ’ka lo.

Jézu é gale fale vɔ a gɔnɔ yaazan nya

³¹ Jézu mi vu ta fié bié ’é sɔnɔ yé é lé wo lɛ léé: Ka ye, kaa a gona Jérusalɛm yé we faa lé balelayemunu a gyɛ maa blami Be lé we ma, a lɛ é dan sɔɔ lɛ.

³² Wo dan an nɔ lɛ bɛn bɛnu lɛ; wo dan an ma we nana lɛ; wo dan an sɔnɔ lɛ; wo dan ’wo ’lélibɔlɛ vɔ lɛ an ma,

³³ yé an blale wɛsɛné nya zuo wo dan an gyɛ lɛ; yé yi fié a yaazan nya an dan nwa lɛ gamunu va.

³⁴ Naa, wo ’ka we do kpen ’ma lɛ ’bɛ gi lo. ’Bɛ a wo ma we yɔɔle nya yé wo ’ka a dére gi ’ma lɛ lo.

Jézu yuɛwiizan béli Jériko sɔnɔ

³⁵ Jézu bɔ aan wo Jériko sɔnɔ, ’té yuɛwiizan do a é nyanale zi péli ta, ’té éé fɛ doro paan.

³⁶ É munu giéle vun ’ma aan wo yé é léé: Mɛ léé?

³⁷ Yé wo lé a lɛ léé: Nazarɛtzan Jézu ɛ ke giéna.

³⁸ Yé é siaa léé: David be Jézu, ’i nyanai zén an ta.

³⁹ Munu lé wo ke tawona zi ’lɛ, wo siaa a ta léé, ’é tadɔ. Naa, é siaa taawo plɛplɛ é ziin léé: David be, ’i nyanai zén an ta.

⁴⁰ Yé Jézu dɔ yé é lé munu lɛ léé, ’wo da a nya. É bié aan wo Jézu sɔnɔ yé ’bɛ a laa a lee léé:

⁴¹ É sɔ i lɛ léé, maa mɛ ɛ kɛlɛ i lɛɛ? É léé: Mizan, an yuɛ ’é fuo ma.

⁴² Jézu lé a lɛ léé: I yuɛ ’é fuo ma; ilé blipale ma lé i béli.

⁴³ ’Bɛna tɔɔn, a yuɛ fuo yé é go Jézu zuo Kazambale tɔ zin bɔle nya. Munu faa ’bɛna ye aan wo, wo Kazambale tɔ zin fe.