WENÉNÉ LÉ LUK A GYE (Évangile selon Luc) 17 - Kazambale lé Sebe Sauunu 1979

I kɔlɛvafɛ do lé i vɔle wenyané gi

¹ Jézu lé é zuomunu lɛ léé: É ’ka kɛlɛ lɛ léé, diérawe ’ka kɛla lo lo, naa, mi lé é da diérawe nya, a gale nyɔ.

² Dé wo fɛzɔngɔlɛ yere ’bɛzan bɔrɔ ma yé wa vuli wɛyi va, ’bɛ fila vɔ é mini né kiénénu ’ko va né do ’wuo sɛrɛle ta.

³ ’Ka yuɛ pa kabozen va. Dé i bwe wenyané kɛlɛ, ’i we pla a lɛ; yé dé é bli nɔla, bé ma we vo.

⁴ Yé dé é wenyané kɛlɛ i lɛ yi do gɔnɔ sɔrafié, yé dé é da i va gɔnɔ sɔrafié a fele nya léé: Ilé zanté, bé nyi si.

I kolé blipale gi gyɛ

⁵ Nwunvɔzannu lé Mizan lɛ léé: ’I kolé blipale gi gyɛ.

⁶ Yé Mizan léé: Dé kalé blipale a bélé sénévéwɔlɛ do zo, ka dan a fe lɛ sikomɔyili ’ko lɛ léé: ’Ibozen soowɔla, yé ’ibo suru wɛyi va, yé é dan ka lɛdɔ lɛ a ma.

We lé é a lé mi wuozan a kɛlɛ

⁷ Dé ka wuozan do ana, dé é féi paan‐oo, dé é trubɛ tabin‐éoo, dé é si féi na, ka va mi kyɛn ɛ dan a fe lɛ a lɛ léé: ’I da, ’i fɛ ble é nya doo?

⁸ Ka ’ka dan a fe lɛ léé: ’Ilé sɔ gi vɔɔ, ’i anlé fɛ dɔne, yé ’i fɛ nɔ an lɛ ma ble, ’bɛ zuo faa yé izé ble, loo?

⁹ Ka wuozan lé ka lɛdɔmale ma lé é a lé ka a bɔ vɔɔ?

¹⁰ Ka é ziin, we faa lé wo ka béli dɔ a nya, dé ka a faa kɛlɛ, ’ka fe léé: Ko a mi wuomunu nya é pla. We lé kozan a fe, yee lé ko kɛlɛ.

Jézu pantɛn si mi vu ma

¹¹ Jézu a gona aan wo Jérusalɛm, é gié Samari tɛrɛ valé Galilé tɛrɛ glɛ la.

¹² É bɔ fla do punma tɔɔn, ’té pantɛngyɛzannu vu a dana a ’lɛ mi. Wo dɔ baa yé wo dére bié yé wo léé:

¹³ Jézu, Kozan, ’i nyanai zén ko ta.

¹⁴ É wo ye aan wo, é lé wo lɛ léé: ’Ka go kabo nagɔɔn Balebanmunu lɛ. Wa gona aan wo, wo béli.

¹⁵ Wo va mi do a ye aan wo léé, ’é béli, é da é pa gi ’té éé Kazambale tɔ bɔa é dére plɛplɛ nya.

¹⁶ É dia é bli la Jézu gane ma yé é a bɔ vɔ. Mi ’ko a Samari mi nya.

¹⁷ Jézu we fe yé é léé: Mi vuan wo béli loo? A sɔraziɛn pɔné a kyɛɛn?

¹⁸ Bɛn mi ’ko, yee do kpen ɛ da Kazambale tɔ bɔ lɛɛ?

¹⁹ A zuo yé é lé a lɛ léé: ’I nwa, ’i go. Ilé blipale ma lé i béli.

Kazambale plale mi nwiin dale

²⁰ Farizimunu we laa Jézu lee léé: Kazambale é dan pla lɛ munu nwiin mɛ yi laa? É lé wo lɛ léé: Wo ’ka Kazambale plale mi nwiin yé ’wo yuɛ nya lo.

²¹ Wo ’ka dan a fe lɛ léé: É a ’ko, ɛɛ, é a mun, lo. Naa, ka ye, Kazambale a é plale mi nwiin ka méléna.

²² É lé é zuomunu lɛ léé: A bléyi é dan bɔ lɛ, yé é dan sɔ lɛ ka lɛ léé, ka maa blami Be lé yinu va yi do ye, yé ka ’ka dan a ye lɛ lo.

²³ Wo dan a fe lɛ ka lɛ léé: I yua, é a ’ko, ɛɛ, é a mun. Té ka go ’bɛna lo; té ka vlan buru ’bɛ zuo lo.

²⁴ Naa, fɛan zo lé lɛɛ yuɛwuovɔle bile nyananyana éé sian la glɛ do la yé é bɔ a glɛ do la bɛ, a zo duo lé maa blami Be é dan kɛlɛ lɛ anzé yi la.

²⁵ Naa, é a lé an nyané ble kaii yé bléyi ’ko vamunu é sɔn vɔ an ma we ’konu bɔlɛ ’lɛ.

²⁶ Wean é bɔ Noé bléyi va, yee duo ɛ dan bɔ lɛ maa blami Be zé yinu ta.

²⁷ Munu éé fɛ blé, ’té woo fɛ minian, ’té woo le sié, ’té woo lunu no bo lɛ, fɔɔ yé é bɔ Noé wɔrayi ma ’yitagoro gi; lɛɛ blɛn da yé é wo faa gyɛ za ma.

²⁸ Yé wean é bɔ Lɔt bléyi va, yee duo ɛ dan bɔ lɛ é ziin. Munu éé fɛ blé, ’té woo fɛ minian, ’té woo fɛ lɔa, ’té woo fɛ daan, ’té woo féi paan, ’té woo kɔn dɔa;

²⁹ naa, yian nya lé Lɔt si Sɔdɔm, kyɛ valé povun si la gi yé wo dia bélé lɛɛ zo yé é wo faa gyɛ za ma.

³⁰ A zo duo lé é dan kɛlɛ lɛ maa blami Be nagɔɔn yi nya.

³¹ ’Bɛ yi la, mi lé é ke kɔn nwiin, ’té alé fɛnu ke kɔn gi, té é zun yé élé kɔngifɛnu si lo; yé é ziin, mi lé é ke féi, té é da fla lo.

³² Lɔt na sele ’é dɔ ka gi ma.

³³ Mi lé é ke kwa kulina léé, élé tɛrɛla ’é kɛlɛ blɛn, é dan vuru lɛ a gi, yé mi lé é vuru ézé gi, é dan a ye lɛ é ziin.

³⁴ Maa fe ka lɛ, ’bɛ yi la é béli, dé mi fié a é yiale yialafɛ do ta, wo dan a do si lɛ yé wa do vo.

³⁵ Dé le fié a fɛ zɔnna ékeva, wo dan a do si lɛ yé wa do vo.

³⁶ Dé mi fié a féi do la, wo dan a do si lɛ yé wa do vo.

³⁷ Zuomunu lé a lɛ léé: Mizan, ’bɛ é dan kɛlɛ lɛ fɛ kyɛnnaa? É lé wo lɛ léé: Fɛana lé fɛ gale ke, ana lé golanu é dan zén lɛ ékeva.