WENÉNÉ LÉ LUK A GYE (Évangile selon Luc) 16 - Kazambale lé Sebe Sauunu 1979

Mi leezan ple ma gɔné vɔle

¹ Jézu lé é ziin é zuomunu lɛ léé: Mi do lé é ke fuablezan nya, a leezan do ana, yé wo ’bɛ tɔ fe a lɛ léé, ’bɛ alé fɛnu sɛra.

² É a laa yé é lé a lɛ léé: Mɛ we lé maa a maan i ma bɛɛ? Anlé fɛnu faa lé é ke i lee, ’ko nɔnɔ; i ’ka dan kɛlɛ lɛ an leezan nya é dɛrɛ lo.

³ A leezan lé é bli gi léé: Sin, anzan a an nwana élé fɛnu ta; maa dan a kɛlɛ lɛ kaa? An nyanama pa an bɛ nyaa? An ’ka bɔa ’bɛ lɛ lo. An go doro paa? ’Bɛ an gya yara nya.

⁴ Dé wo anlé nyanama si an lee, we lé maa dan a kɛlɛ lɛ, yé munu é dan nyanana nɔ lɛ an lɛ, maa a gi dɔɔ.

⁵ Yé munu lé azan lé vɛɛn ke wo ma, é wo faa laa do do yé é lé a vininzan lɛ léé: Anzan lé mɛ vɛɛn ɛ ke i maa?

⁶ ’Bɛ lé a lɛ léé: Nyɔnɔ ’bali vu ta sɔraa lé. Yé é lé ’bɛ lɛ léé: ’Ilé sɛbɛ si, ’i nyana fiéfié, bé gyɛ sɔraziɛn.

⁷ A zuo é lé a do lɛ léé: Yé bii, alé mɛ fɛ vɛɛn ɛ ke i maa? ’Bɛ léé: Buruwɔlɛ bɔlɔ wuru fié yɔ soru lé. Yé é lé ’bɛ lɛ léé: ’Ilé sɛbɛ si, bé gyɛ wuru fié.

⁸ Kɔnzan é leegɔné ple ’ko tɔ zin fe léé, a gi kini. Naa, tɛrɛ ’ko lamunu gi kini wozé bléyi va é mini munu lé wo va ke é kinile, wo ta.

⁹ Yé maa lé ka lɛ léé: ’Ka béé bɛ ble kalé tɛrɛlafua nya, yé dé a ’ko vuru ka ma yian nya, nyanana lé é ’ka sɛra monomono lo, ka dan a ye lɛ a mun va.

¹⁰ Mian éé yara paan we kiiéné kɛlɛle ta, éé yara paan é ziin we blɛn kɛlɛle ta, yé mian é ’ka é yara paan we kiiéné kɛlɛle ta lo, é ’ka é yara paan we blɛn kɛlɛle ta lo é ziin.

¹¹ Dé i ’ka i yuɛ pa lɛ dabli kɛlɛ fua va tegele lo, de ɛ dan fuabozen bɛ pa lɛ i lee?

¹² Fɛ lé wa bɛ pa i lee, dé i ’ka i yuɛ pa lɛ a va lo, de ɛ dan fɛ nɔ lɛ i lɛ ibozen zé nyaa?

¹³ Mi do kpen ’ka bɔa kɛlɛle lɛ mi fié wuozan nya lo. Naa, a do za é dan vo lɛ a gi yé a koɛzan é dan sɔ lɛ a lɛ; é dan nana lɛ a do va yé é dan a koɛzan ye lɛ boami nya. Kazambale koo, tɛrɛlafua koo, ka ’ka bɔa kɛlɛle lɛ wo fiénu wuozannu nya lo.

Jézu lé wepaale kenu

¹⁴ Gɔɔli sɔ Farizimunu lɛ é baba, amalé wo ’bɛ we ’ko faa ’ma aan wo, wo Jézu ma we nana.

¹⁵ Jézu lé wo lɛ léé: Ka a a va léé, ’wolé we ’é kɛlɛ tegele munu yuɛ gi, naa, Kazambale ka bli dɔɔ; fɛ lé é ke fɛ blɛn nya munu yuɛ gi, é a bélé bo zo Kazambale yuɛ gi.

¹⁶ Bélidɔwe valé balelayemunu lé we vo ana fɔɔ Jan zé bléyi va; é sia ’bɛ bléyi va wo Kazambale plale mi nwiin lé we fe, yé mi faa do do éé wɔraan a gi gla nya.

¹⁷ Bélidɔwe gyɛwɔlɛ kiiéné sanle a va a plɛplɛ é mini tɛrɛ valé la giéle ta.

¹⁸ Mian é na bɔra yé é le bɛ si, é le bɛ gini é na va, yé mian é le bɔrale si, mi bɛ na ginizan lé.

Fuablezan valé Lazaa

¹⁹ Fuablezan do ana yé éé galunaa sɔ valé lɛnsɔ zima zén‐é é ta, ’té éé fɛ néné kiɛre blé yifaama.

²⁰ Nyanégyɛzan do ana wa laama Lazaa, ’bɛ a é yiale fuablezan lé kɔn ’léé, ’té ’bɛ kɔlɛ faa a é siale é ta manɔn nya.

²¹ Fɛnu lé woo zanaan fuablezan lé tablé bɔn ma, é sɔ a lɛ léé, ’é wo ble yé ’é kan; ’té blénnu éé dan a manɔn gi flan lɛ.

²² Yé yee nyanégyɛzan ga, yé lanjenu a sia yé wo goan yé wa vɔ Abraam bɛ gi. ’Bɛ zuo yé fuablezan ga yé wo ’bɛ pa.

²³ É a gamunu nyanana ’té éé nyané blé kaii, yé é yara dɔ loru yé é Abraam ye baa, ’té Lazaa a ’bɛ bɛ gi.

²⁴ Yé é siaa léé: An tra Abraam, maa a nyané blena kaii kyɛnéné va ’ko, amalé ’i nyanai zén an ta, yé ’i Lazaa pa zia léé, ’é da yé é bɛnwɔlɛ do wɔra ’yi va yé é an nɛnɛ la tua a nya.

²⁵ Abraam lé a lɛ léé: Anlé né, i ’ilé fɛ zinnu ye ilé tɛrɛla bléyi va, yé Lazaa nyané ye ézé bléyi va, ’bɛ saan i gii? Sin wa ’bɛ tɔrɔ paana ’ko, yé bii a nyané blena.

²⁶ Yé é ziin, guru blɛn lé a glɛ ’ka lo é a kaa méléna, léé, munu lé é sɔ wo lɛ léé, ’wo si ’ko yé wo go ka va wo ’ka bɔalɛ lo, yé munu lé é sɔ wo lɛ léé, ’wo si mi yé wo da ko va ’ko, wo ’ka bɔalɛ lo.

²⁷ Fuablezan léé: An tra Abraam, an bwenu a soru, amalé ilé zanté, ’i Lazaa nwunvɔ an ti lé kɔn ’léé,

²⁸ we ’konu zuo fele wo lɛ we gi léé, té wo da nyanéblena ’ko lo.

²⁹ Abraam lé a lɛ léé: Moizi valé balelayemunu dére a wo lee; ’wo wo dére ’ma ma.

³⁰ Yé é léé: Gba, an tra Abraam, naa, dé gamunu va mi do go wo va wo dan ’wo bli nɔla lɛ.

³¹ Yé Abraam lé a lɛ léé: Dé wo ’ka ’wo tɔné dɔ lɛ Moizi valé balelayemunu dérenu lɛ lo, dé mi nwa gale vaoo, wo ’ka dan ’wo bli nɔla lɛ ’bɛzan dére ta lo.