WENÉNÉ LÉ LUK A GYE (Évangile selon Luc) 15 - Kazambale lé Sebe Sauunu 1979

’Bla sanle ma gɔné vɔle

¹ Vagɔɔlisimunu faa valé wenyanékɛlɛmunu bié Jézu ma alé we ’male we gi.

² Yé Farizimunu valé sɛbɛgifemunu gun gyɛ a ma yé wo léé: Mi ’ko éé wenyanékɛlɛzannu sié ’té éé fɛ blé wo va.

³ Naa, Jézu gɔné do vɔ wo lɛ yé é léé:

⁴ Ka va mi kyɛn lé, dé ’bla yɔ soru a a lee yé a do san a lee, é ’ka a yɔ ziɛn wɔlɛ vu ta sɔraziɛn voo bwi gi yé yee lé é san, yé é go a nagini fɔɔ yé é a ye loo?

⁵ Yé dé é a ye, éé a vɔa é bɔrɔ zi gi nanale nya;

⁶ yé dé é bɔ kɔn ’léé, yé é é béénu valé é punma munu laan yé é lé wo lɛ léé: Anlé ’bla lé é san an lee, maa a ye, amalé ka gi ’é nana an va ma. É ’ka yee ɛ zo loo?

⁷ A zo duo lé, maa lé ka lɛ léé, wenyanékɛlɛzan do kpen lé é bli nɔla, a ma gi nanale a blɛn la gi é mini mi tegele yɔ ziɛn wɔlɛ vu ta sɔraziɛn lé wo ma we ’ka ’wo bli nɔlale gi lo, wozé ta.

Gɔɔli sanle ma gɔné vɔle

⁸ Taa, le kyɛn lé, dé tanma vu a a lee yé a do san a lee, é ’ka kyɛbɔ bié ’té éé kɔn gi sian yé é vo a ginian yɛrɛlɛɛ, fɔɔ yé é a ye loo?

⁹ Dé é a ye, é é bwɛnénu valé é punma lomu laan, yé é léé: Tanma lé é san an lee, maa a ye, bɛwemalé ka gi ’é nana an va ma.

¹⁰ A zo duo lé, maa fe ka lɛ, dé wenyanékɛlɛzan do kpen é bli nɔla, la gi munu faa gi é dan nana lɛ Kazambale lé lanjenu va, alé we ma.

Mi be sanle ma gɔné vɔle

¹¹ É lé é ziin wo lɛ léé: Mi do be a fié.

¹² A voélazan lé é ti lɛ léé: An ti, i zara lé maa dan a ble lɛ, ’bé nɔ an lɛ é nya do. Yé a ti ’é zarafɛnu guli wo ma.

¹³ ’Bɛ zuo yi sɛ nya yé a voélazan élé fɛnu faa sia yé é go tɛrɛ baa la. ’Bɛna mi, é élé gɔɔli sɛrɛ wevɔnle kɛlɛle ma.

¹⁴ É nyaa élé gɔɔli faa sɛrɛle nya, yé lɔrɔ blɛn dɔ ’bɛ tɛrɛ la. É sia ’bɛ bléyi va, é nyané lé we dɔɔ.

¹⁵ É go nyanama gini lɛ flazan do va, yé ’bɛ a pa zia léé, ’é go suru tabin élé féi.

¹⁶ Mi do kpen ’ka fɛ no a lɛ lo, amale fɛ kɔlɛnu lé surunu a blé bɛ, é a a va léé, ’é ’bɛ ble yé ’é kan.

¹⁷ Sin, a ’wuo dɔ a ta yé é léé: An ti va nyanamapamunu a kiɛre; yé wolé fɛblele a di. Maa ’ko, ’té maa gaan lɔrɔ nya.

¹⁸ An dan nwa lɛ yé an go an ti va, yé maa dan a fe lɛ a lɛ léé: An ti, an wenyané kɛlɛ Bale valé bii lɛ.

¹⁹ A yara ’ka an yara léé, wo an laa i be é dɛrɛ lo. ’I an si ilé nyanamapazan do nya.

²⁰ Yé é nwa yé é ti va zi sia. Bléyian va lé é ke baa mi, a ti a ye, yé ’bɛ nyanai zén a ta, yé ’bɛ vlan si yé ’bɛ vɔ a bɔrɔ ma yé ’bɛ a tuu gyɛ.

²¹ A be lé a lɛ léé: An ti, an wenyané kɛlɛ Bale valé bii lɛ. A yara ’ka an yara léé, wo an laa i be é dɛrɛ lo.

²² Naa, a ti lé é wuozannu lɛ léé: Varɔ lé é ke é zima é mini varɔ faa ta, ’ka da a nya fiéfié, yé ’ka a nɔ a lɛ. Yé ’ka bɛmafɛ nɔ a lɛ, yé ’ka sawala nɔ a lɛ.

²³ Diriné bualeo, ’ka da a nya, ’ka a gyɛ. Kaa fɛ ble, kaa gi é nana.

²⁴ Naa, an be ’ko, é ga, yé é vuo; é san, yé é bɔra a gi. Yé wo kun zana gyɛle ma.

²⁵ ’Té a be vininzan a féi. ’Bɛ si féi aan wo, yé ’bɛ bɔ kɔn sɔnɔ, ’bɛ lɛrɛvɔle valé flin vun ma.

²⁶ É leezan do laa, yé é a gi laa ’bɛ lee léé, mɛ ɛ kɛlɛɛ?

²⁷ Yé nyanamapazan ’ko lé a lɛ léé: I zuané da é ziin, yé i ti a ye aan wo léé, a fuu a a ta, amalé é diriné bualeo gyɛ.

²⁸ Gɔnézan bli fli yé é ’ka a va léé, é wɔra kɔn gi lo. A ti bɔra yé ’bɛ zanté vɔ a lɛ léé, ’é wɔra.

²⁹ Naa, é lé é ti lɛ léé: Bé ye do, é bɔ lɛɛ kiɛre ma ’té an nyanama paan i lɛ, yé an ’ka sɔn vɔ lɛ i dére do kpen ma lo. Yé i ’ka tan boliné vinin do nɔ lɛ an lɛ yé an fɛti kɛlɛ a nya an béénu va monomono lo.

³⁰ Paka! Yé i be lé ke bɛ, é i zarafɛnu sia yé é wo sɛrɛ gɔnéginilomu ma, yé dé é da tɔɔn, yé i diriné bualeo gyɛ a lɛ.

³¹ A ti lé a lɛ léé: Anlé né, bii a yifaama an va, yé fɛ faa lé ke an lee, izé lé.

³² Naa, i zuané ’ko, é ga yé é vuo, é san, yé é bɔra a gi; amalé é a lé ko gi é nana a we ma yé ko fɛti kɛlɛ webozen nya.