WENÉNÉ LÉ LUK A GYE (Évangile selon Luc) 14 - Kazambale lé Sebe Sauunu 1979

Jézu ziigyɛzan béli

¹ Flinyi do nya, Jézu wɔra Farizimi segele do lé kɔn gi fɛblele ’bɛ va we ma, ’té Farizimunu a naginian.

² ’Té mi do lé ziigyɛ ke a ma, ’bɛ a é dɔle a yara zia.

³ Jézu lé bélidɔwedɔɔmunu valé Farizimunu lɛ léé: A se a mi lɛ léé, ’é mi béli flinyi nya laa, taa, a se ’ka a lɛ loo?

⁴ Yé wo vo é tadɔle. Yé Jézu kun mi ’ko ma yé é a béli yé é a pa zia.

⁵ A zuo é lé wo lɛ léé: Ka va mi kyɛn lé, dé é a a be nyaoo, dé é a alé diri nyaoo, dé é vɔ ’yiguru gi flinyi nya, é ’ka dan a si lɛ a gi loo?

⁶ ’Bɛ zi pa dére ’ka ye lɛ wo lee lo.

Dé wo i laa fɛti ma, bé kɛla fɛan zo

⁷ Jézu a ye aan wo léé, munu lé wo wo laa fɛblele ma wo nyana zi ’lɛ, é gɔné do vɔ wo lɛ yé é léé:

⁸ Dé wo i laa lesile lé fɛti kɛlɛle ma, té i nyana zi ’lɛ blin ta lo. Mi lé a blɛn mini i lɛ, dé wo ’bɛ laa mii?

⁹ Dé fɛtizan da yé é lé i lɛ léé: ’I blin ’ko nɔ mi ’ko lɛ, ’té yara é dan i gyɛ lɛ nyanale zuozia we ma.

¹⁰ Naa, dé wo i laa fɛti kɛlɛle ma, ’i go, ’i nyana zuozia blin ta yé dé fɛtizan da é dan a fe lɛ i lɛ léé: An béé, ’i nyana zi ’lɛ mun. Yé ’bɛ ɛ dan i kɛlɛ lɛ mi blɛn nya munu lé ka ke é nyanale fɛblele zi wo nya bɛ, wo yuɛ gi.

¹¹ Naa, dé mian ébo nwaan blɛn wo dan a tua lɛ, yé mi lé ébo tuaan wo dan a nwa lɛ blɛn.

¹² Jézu lé é ziin é laazan lɛ léé: Dé i yiéyi fɛ kɛlɛoo, dé i nyanadi fɛ kɛlɛoo, i béénu koo, i bwenu koo, i lelenu koo, i bɔlu fuablezannu koo, té i wo do kpen laa lo, dé wo da i laa é ziin yé wa lɛgi kɛlɛ i lɛ.

¹³ Naa, dé i a fɛti kɛlɛna, nyanégyɛmunu koo, gane valé bɛgazannu koo, tunbozannu koo, yuɛwiizannu koo, ’i wo ɛ laa.

¹⁴ Wo ’ka bɔa a lɛgi kɛlɛle lɛ i lɛ lo, naa, Bale é dan a lɛgi kɛlɛ lɛ i lɛ mi tegelenu nwayi nya gale va, amalé i gi é dan nana lɛ ’bɛ yi la.

Fɛti blɛn ma gɔnévɔle

¹⁵ Munu lé wa fɛ zi, wo va mi do dére ’konu ’ma aan wo, é lé Jézu lɛ léé: Mi lé é dan fɛble lɛ Kazambale lé fuatɛrɛ la, ’bɛzan zé a é zima.

¹⁶ Jézu lé a lɛ léé: Mi do fɛti blɛn kɛlɛ yé é munu kiɛre laa.

¹⁷ Fɛblebléyi bɔ aan wo, yé é ’é leezan nwunvɔ, a fele we gi munu lé é wo laa, wo lɛ léé: ’Ka da, fɛ kɛlɛle nyaa.

¹⁸ Naa, wo faa tere kun gba vɔle ma. A vininzan lé a lɛ léé: Ilé zanté, ’i an vo. An féi do lɔ yé é a lé an go a nagini.

¹⁹ A do léé: Ilé zanté, ’i an vo; maa dirigɔné vu lɔ yé maa a gona wo gi dan lɛ.

²⁰ Yé a do léé: Maa le si lao, amalé an ’ka bɔa gole lɛ lo.

²¹ Mi leezan da yé é we ’konu zuo fe ’ézan lɛ. Yé kɔnzan bli fli yé é lé é leezan lɛ léé: ’I go é nya do flɛgi valé flaworo dii yé ’i da nyanégyɛmunu koo, bɛ valé ganegazannu koo, yuɛwiizannu koo, tunbozannu koo, wo nya.

²² Mi leezan lé ézan lɛ léé: Anzan, we lé bé fe maa a kɛlɛ yé nyanana ke vo é ziin.

²³ Yé kɔnzan lé é leezan lɛ léé: ’I go zinu ta valé gɔrɔnu ma yé munu lé i wo ye, i wo ma kyɛ dɔ léé, ’wo da, yé wo anlé kɔn fan.

²⁴ Naa, maa lé ka lɛ léé, mi vininzannu lé maa wo laa fɛblele ma, wo va mi do kpen ’ka dan anlé fɛ lɛdan lɛ lo.

Gole Jézu zuo a fɛan zo

²⁵ Mi gu blɛn a gona zia Jézu va yé é yara nɔla wo ta yé é lé wo lɛ léé:

²⁶ Dé mian da an va yé a ti koo, a bu koo, a na koo, alé nénu koo, a bwenu valé a burunu koo, abozen lé tɛrɛla koo é ziin, dé wo za ’ka a gi lo, é ’ka bɔa kɛlɛle lɛ an zuozan nya lo.

²⁷ Yé mian é ’ka ébo lé yiliblan sian yé é da an zuo lo, é ’ka bɔa kɛlɛle lɛ an zuozan nya lo.

²⁸ Ka va mi kyɛn lé, dé é a a va léé, é kɔn torole zima dɔ, é ’ka nyanaan é vinin yé é a dɔgɔɔli ’léé nɔnɔ loo? yé dé a nyaagɔɔli a a lee?

²⁹ dé é da a gane vɔ faa yé a bɛ é nyaa a ma, yé munu faa lé wa ye yé wo kun a ma we nanale ma, ’té wa fé léé:

³⁰ Mi ’ko a dɔle sia yé a bɛ nyaa a ma.

³¹ Taa, minwiinzan kyɛn lé, dé é a gona guli dan lɛ minwiinzan bɛ va, é ’ka nyanaan yé é ’wuo gi bɔrɔ é vinin loo? Yé é léé, ’ézé munu a mi baa soru, yé mi lé é dan guli dan lɛ ’é va bɛ, azé munu a mi baa vu, dé ’é sɔa a nyaa?

³² Dé é ’ka bɔalɛ lo, dé minwiinzan bɛ ’ko a tan baa, é dan munu nwunvɔ lɛ ’bɛ va yɔfalo fu nya ’wo lee léé, ’wo vo drɔɔ.

³³ Bɛzamalé dé é a ka va miomian nya, dé é ’ka sɔn vɔa élé fɛnu faa ma lo, é ’ka bɔa kɛlɛle lɛ an zuozan nya lo.

Wɛ lé a néné si é ma

³⁴ Wɛ a fɛ zin nya; naa, dé wɛ néné si é ma, mɛ fɛ nya lé wa kɛla nénéé?

³⁵ É ’ka é zima tɛrɛ zé nya lo, yé é ’ka é zima wibo zé nya lo, amalé wa vulian é pla. Mi lé we ’ma tɔné ke a ’wuo ma, ’bɛzan a ’ma ma.