WENÉNÉ LÉ LUK A GYE (Évangile selon Luc) 12 - Kazambale lé Sebe Sauunu 1979

Té mi ébo drɔ lo

¹ ’Bɛ bléyi ’ko wuo, mi wuru é wuru boen zén ékeva, yé é vo sɛ yé wo wo ke zɔn wo gane nya, yé Jézu kun wefele ma é zuomunu lɛ é vinin yé é léé: ’Ka yuɛ pa kabozen va, Farizimunu lé lévɛn lé é ke mi lé ’ébo drɔle nya, alé we ma.

² Fɛ lé ke é yɔɔle yé a ta ’ka dan bɔra lɛ lo, ’bɛ fɛ ’ka lo, yé kyeengiwe lé, ’bɛ ’ka dan bɔra lɛ lo, ’bɛ ’ka lo.

³ Bɛwemalé we faa lé ka fé é béli, é dan kɛlɛ lɛ yiéyi we nya, yé we lé ka fé mi tɔné gi kɔnmi zi, wo dan siaa lɛ a nya kɔn nwiin.

Mi kanamazan

⁴ ’Kaa lé ka ke an béénu nya, maa lé ka lɛ léé, wo lé woo mi kɔlɛ gya, yé ’bɛ zuo wo ’ka bɔa we bɛ kɛlɛle lɛ lo, té ka kana wonu lee lo.

⁵ Mi lé é a lé ka kana a lee, maa dan ’bɛzan nagɔɔn lɛ ka lɛ. Mi lé dé é mi kɔlɛ gyɛ faa, a vulile jéɛna kyɛ va se ke a lɛ, a lee lé ’ka kana ma; iin, maa lé ka lɛ léé, mi lé é a lé ka kana a lee, yee lé é ke bɛ.

⁶ Wo ’ka gbé soru daan su fié va loo? Naa, Kazambale gi ’ka é sanle wo va gbé do kpen ma lo.

⁷ Yé ka nwun gɔ faa a é nɔnɔle. Bɛwemalé té ka kana lo; ka wea é mini gbé kiɛre ta.

Krist tɔ bɔrale munu va

⁸ Maa lé ka lɛ léé, mian é an tɔ bɔraan munu va, maa blami Be maa dan a tɔ bɔra lɛ é ziin Kazambale lé lanjenu va;

⁹ naa, mi lé é an tɔ yɔɔan munu va, maa dan ’bɛzan tɔ yɔɔ lɛ Kazambale lé lanjenu va.

¹⁰ Dé mian wenaané fe maa blami Be ma, Bale é dan a ma we vo lɛ; naa, mian é Léli Sauun sɔnɔ, Bale ’ka dan a ma we vo lɛ lo.

¹¹ Dé wo go ka nya bazorokɔnzannu koo, mi segelenu koo, minwiinmunu koo, wo ’lɛ, dére lé ka dan a fe lɛ, é valé kalé wefebɛ, té ka ’bɛ gi bɔrɔ pa lo.

¹² We lé é a lé ka a fe, Léli Sauun ɛ dan a pa lɛ ka ’léé ’bɛ bléyi va.

Fuablezan lé é ke ’tugyɛzan nya, a ma gɔné vɔle

¹³ Mi gu va mi do lé Jézu lɛ léé: Anzan, ’bé fe an bwe lɛ léé, zarafɛnu lé wo vo ko lee, ’é a guli maa valé yee ma.

¹⁴ Jézu lé a lɛ léé: Gɔnézan, de ɛ an dɔ kalé weblezan valé kalé fɛgulizan nyaa?

¹⁵ A zuo é lé wo lɛ léé: ’Ka yuɛ pa kabozen va é zima blibɔle fɛnu ma lé we ma. Dé mi lé fɛnu a dioo, a vole é yuɛma ’ka sié ’bɛ va lo.

¹⁶ Yé é gɔné do vɔ wo lɛ yé é léé: Fuablezan do lé féi fɛ kɛlɛ di.

¹⁷ Yé é ’wuo gi bɔrɔ yé é léé: Maa kɛla kaa? Naa, anlé féifɛnu zénna ’ka lo.

¹⁸ Yé é léé: Maa kɛla ’ko zo: an dan anlé fɛ?-?tadɔkɔnnu ’wii lɛ, yé an dan kɔn blɛnnu dɔ lɛ; an dan anlé féifɛnu faa valé anlé fuafɛ bɛnu faa zén lɛ wo gi,

¹⁹ yé maa dan a fe lɛ anboen lɛ léé: Anboen, ilé fɛnu ta a é dɔle lɛɛ kiɛre zé nya; ’i nyana, ’i fɛ ble, ’i fɛ mini, i gi ’é nana ma.

²⁰ Naa, Kazambale lé a lɛ léé: ’Tugyɛzan, kyɔ é béli ’ko, maa dan i laa lɛ; yé fɛnu lé i wo tadɔ bɛ, wo dan kɛlɛ lɛ de ɛ zé nyaa?

²¹ Mi lé éé fɛwezannu zun dɔa ébo zé nya, yé é ’ka fɛwezannu tadɔa Kazambale va lo, a zo lé alé we ke.

Gibɔrɔpale

²² A zuo Jézu lé é zuomunu lɛ léé: Bɛwemalé maa lé ka lɛ léé, té ka kalé tɛrɛla gi bɔrɔ pa lo, dé ka dan mɛ fɛ ble lɛɛ? Té ka ka kɔlɛ gi bɔrɔ pa lo, dé ka dan mɛ fɛ zén lɛ ka taa?

²³ Mi lé tɛrɛla mini fɛblele ta yé mi kɔlɛ mini sɔnu ta.

²⁴ ’Ka kanwéinu nagini do. Wo ’ka fɛ do féi paan lo, yé wo ’ka fɛ do kulian lo, wolé ’saboo valé wolé ’sakɔn ’ka lo; yé Kazambale éé blefɛ no wo lɛ. Ka we ’ka mini lɛ mianénu lɛ loo?

²⁵ Ka va mi kyɛn ɛ bɔalɛ yé alé gi bɔrɔ pale a yi do zén a vaa?

²⁶ Amalé dé ka ’ka bɔa we kiiéné kɛlɛle lɛ lo, mɛmalé ka we koɛnu gi bɔrɔ paan?

²⁷ Bolu lé goo éé tin‐é fɛan zo, ’ka gi bɔrɔ ’bɛ ma do. Wo ’ka nyanama paan lo yé wo ’ka kununu zunwo lo. Naa, maa fe ka lɛ, Salomɔn bozen lé fua faa gi é ’ka sɔ zima zén lɛ é ta bélé bolu lé goo vwi zo lo.

²⁸ Bli pa Bale lɛ kiiéné zannu. Dé Kazambale éé sɔ zén‐é féi lunu ta ’bɛ zo, woo lé wo ke ana kyɔ yé tɛlɛ wo wo vuli ’furu gi, é ’ka dan kazé mini lɛ wozé ta loo?

²⁹ Yé ’kaa, té ka blefɛ valé minifɛ nagini lo, yé té ka wo gi bɔrɔ pa lo.

³⁰ Fɛ ’konu faa lé kwa lé tɛrɛlamunu ke a kulina. Naa, ka Ti a gi dɔɔ léé, ka mawe a wo gi.

³¹ Naa, ’ka kwa kuli léé, ’ka kɛlɛ munu lé Kazambale ke é plale wo nwiin, wo vazannu nya yé Kazambale é dan fɛ ’konu faa nɔ lɛ ka lɛ ’bɛnu ta loru.

Lagi fɛwezannu

³² ’Bla palu kiéné, té ka kana monomono lo, fuatɛrɛ nɔle ka lɛ sɔ ka Ti lɛ é baba.

³³ ’Ka ka leefɛnu dan yé ’ka a ma gɔɔli nɔ nyanégyɛmunu lɛ. Gɔɔli pa balanu lé wo ’ka sɛra lo, ’ka wo kɛlɛ kabo zé nya, yé fɛwezan lé é ’ka nyaan lo, ’ka wo téé la gi, fɛana lé kyeenwozan ’ka wɔraan lo, yé gyan ’ka vɔa fɛ ma lo, ana.

³⁴ Naa, fɛana lé kalé fɛwezan ke, ana duo lé ka bli ke.

Mi wuomunu lé wo vo é yuɛma

³⁵ ’Ka sɔ vɔ ka tɛrɛla ma, yé kalé kyɛbɔ ’é bi ma.

³⁶ Munu lé wozan go lesile lé fɛti kɛlɛ lɛ yé wo vo a lɛbɛnna, léé, dé é da yé é duoli gyɛ tɔɔn ’wo kɔn lɛ so a lɛ, ’ka kɛlɛ bélé wo zo ma.

³⁷ Wuomunu lé wozan é dan bɔ lɛ wo ma é yuɛma, wozé é dan kɛlɛ lɛ é zima. Maa lé ka lɛ webozen nya léé, wozan é dan sɔ vɔ lɛ é tɛrɛla, yé é dan wo nyana lɛ tablé zi, yé é dan fɛ nɔ lɛ wo lɛ.

³⁸ Dé é bɔa tu laa? taa, dé é bɔa manegɔné vinin wele nyaa? Dé é bɔ é wuomunu ma é yuɛma, a wuomunu ’ko, wozé é dan kɛlɛ lɛ é zima.

³⁹ ’Ka we ’ko gi dɔɔ é zima ma, dé é kɛlɛ léé, kɔnzan kyeenwozan dabléyi dɔɔ, ’té é dan vo lɛ é yuɛma yé é ’ka dan a nyi si lɛ léé, ’wo wɔra élé kɔn gi lo.

⁴⁰ Bléyian va lé é ’ka dɔa ka gi léé, maa blami Be é dan lo, an dan da lɛ ’bɛ bléyi va, amalé ’ka vo kabo ma’lɛrɛle nya.

Mi leezan zima valé mi leezan naané

⁴¹ Piɛri lé a lɛ léé: Mizan, ko ma gɔné lé bé vɔ laa, munu faa ma gɔné léé?

⁴² Yé Mizan léé: Mi leezan yarapawelazan gi kinizan lé azan a plaan élé kɔngimunu nwiin léé, ’é wolé fɛblele nɔ wo lɛ a nɔbléyi nya, de léé?

⁴³ Mi leezan lé azan bɔ a ma we ’ko zo kɛlɛna, azé é dan kɛlɛ lɛ é zima.

⁴⁴ Maa lé ka lɛ webozen nya léé, é dan élé fɛnu faa bɛ pa lɛ a lee.

⁴⁵ Naa, dé a leezan ’ko a fe é bli gi léé: Anzan a mɔnna, yé é kun wuogɔnénu valé wuolomu blale koo, fɛblele koo, fɛminile koo, nwɛ tanle koo, wo ma,

⁴⁶ yian nya lé é ’ka ézan lɛbɛnna lo, yé bléyian va lé é ’ka a gi dɔɔa léé, ézan é dan lo, mi leezan ’ko, azan é dan da lɛ a bléyi nya, yé ’bɛ é dan a wi kini lɛ ékema, yé ’bɛ é dan azé kɛlɛ lɛ bélé tɔnégiplɛplɛzannu zé zo.

⁴⁷ Mi leezan lé ézan lé blibɔmawe dɔɔ, yé é ’ka fɛ do kpen ma’lɛrɛ lɛ lo, yé é ’ka alé blibɔmawe kɛlɛ lɛ lo, wo dan ’bɛzan bla lɛ kaii.

⁴⁸ Naa, mi lé é ’ka a gi dɔɔa lo, yé wenu lé é a lé wa bla a ma, yé é wo kɛlɛ bɛ, wo dan a bla lɛ sɛ. Mi lé wo fɛ nɔ a lɛ kiɛre, a lee lé wo dan fɛ kiɛre laa lɛ, yé wo dan a taa laa lɛ, mi lé wo fɛ kiɛre bɛ pa a lee, ’bɛzan lee.

Jézu éé munu kinié ékema

⁴⁹ Maa da kyɛ dia lɛ tɛrɛ la yé dé é nyaa bile nya ’naan, ’té maa a mɛ fɛ va é ziin?

⁵⁰ É a lé wo an batizéwo batizéwo bɛ do nya, yé maa a ’bɛ lɛsɔɔle lɛbɛnna nyanéblele kaii nya.

⁵¹ É dɔ ka gi léé, an da munu vo lɛ ékeva drɔɔ tɛrɛ laa? Maa lé ka lɛ léé, gba. An da munu kini lɛ ékema.

⁵² É sia bléyi ’ko va, dé mi soru a kɔn do gi, wo dan kini lɛ ékema; mi yaa péli é dan vɔ lɛ mi fié ma, yé mi fié péli é dan vɔ lɛ mi yaa ma.

⁵³ Yé mi é dan nwa lɛ é be ma, yé a be é dan nwa lɛ a ma, yé lezan é dan nwa lɛ é lu ma, yé a lu é dan nwa lɛ a ma, yé lezan é dan nwa lɛ é be na ma, yé a be na é dan nwa lɛ a ma.

Bléyi dɔɔle

⁵⁴ É lé é ziin mi gu lɛ léé: Dé ka lati ye nwana yirivɔnazia tɔɔn yé ka léé: Lɛɛ é dan da lɛ. Yé é kɛlɛ a zo.

⁵⁵ Dé yirinwana bɛyilazia fu a giéna yé ka léé: Kyɛyee é dan bɔ lɛ. Yé é kɛlɛ a zo.

⁵⁶ Bodrɔzannu, ka tɛrɛ la valé lagi tɔmasenu dɔɔ yé é kɛlɛ kaa yé ka ’ka bléyi ’ko zé dɔɔa loo?

Ilé we bɛ pa ékema i nyanézan va zia

⁵⁷ Dé we a tegeleoo, dé é ’ka tegele looo, mɛmalé kabozen ’ka a va sina dɔɔa loo?

⁵⁸ Dé bii valé i nyanézan a gona minwiinzan va, ’i kwa kuli yé ilé we bɛ pa ékema a va zia, dé é da go i nya weblezan va, yé weblezan i pa sunyanu lee, yé sunyanu i vɔ bokɔn gi.

⁵⁹ Maa fe i lɛ, i ’ka dan bɔra lɛ ’bɛna lo, fɔɔ ’té bélé gɔɔli faa nɔ ɛ wo, ’té alé su do kpen ’ka vo lɛ i lee lo.