WENÉNÉ LÉ LUK A GYE (Évangile selon Luc) 11 - Kazambale lé Sebe Sauunu 1979

We lé Jézu a fe bazorole ma

¹ Jézu a bazorona yi do nya fɛdona. É nyaa aan wo a zuomi do lé a lɛ léé: Mizan, ’i bazorole paa ko gi, bélé fɛan zo lé Jan a paa é zuomunu gi, a zo.

² É lé wo lɛ léé: Dé ka a bazorona, ’ka fe ’ko zo: Ko Ti, munu ’é kana i tɔ ma ma; ilé plale munu nwiin ’é da ma.

³ ’I yi do zé fɛblele nɔ ko lɛ yi faa do do ma;

⁴ ’i ko ma we vo, naa, ko é ziin, dé miomian éé wenyané kɛla ko lɛ, ko ’bɛzan ma we voo; té i go ko nya ko gi danna lo.

⁵ Jézu lé é ziin wo lɛ léé: Dé ka va mi do béé a, yé é go a va tu la yé é lé a lɛ léé: An béé, ’i buru yaa drɔn pa an ma,

⁶ naa, an béé do si ta la yé é da an va yé fɛ do kpen ’ka an lee yé maa nɔ a lɛ lo;

⁷ yé dé a béé ’ko lé a lɛ é yiana mi léé, té i an ma kyɛ dɔ lo, an kɔn lɛ tan é kwakwa yé maa valé anlé nénu yia, maa ’ka bɔa nwale lɛ yé an buru nɔ i lɛ lo,

⁸ dé é a fe a zo, maa lé ka lɛ léé, dé é ’ka nwaan yé é buru nɔ a lɛ a kɛlɛle a béé nya we ma lo, é dan nwa lɛ a ma kyɛdɔle we ma, yé fɛ faa lé ’bɛ mawe ke a gi, é dan a nɔ lɛ ’bɛ lɛ.

⁹ Yé maa lé ka lɛ léé: ’Ka fɛ laa yé wo dan a nɔ lɛ ka lɛ; ’ka fɛ gini, yé ka dan a ye lɛ; ’ka duoli gyɛ, yé wo dan kɔn lɛ so lɛ ka lɛ.

¹⁰ Naa, dé miomian éé fɛ laan, woo fɛ no a lɛ; mi lé éé fɛ ginian, éé fɛ yé, yé woo kɔn lɛ soo mi lé éé duoli gya, a lɛ.

¹¹ Ka va mi kyɛn ɛ be ke yé dé a be buru laa a lee yé é gɔlɛ nɔ ’bɛ lɛɛ? Yé dé a be pɔ laa a lee yé é méné nɔ ’bɛ lɛɛ?

¹² Yé dé ’bɛ manenyɛné laa a lee, yé é zɛnɛa nɔ ’bɛ lɛɛ?

¹³ Naa, ka‐an ka ke é naané, dé ka fɛ zin nɔle gi dɔɔ kalé nénu lɛ, ka Lagi Ti ’ka dan Léli Sauun nɔ lɛ munu lé wa laan a lee, wo lɛ loo?

Jézu valé Béɛlzébul

¹⁴ Jézu bobogyɛ yo si mi do gi; yo si aan wo mi ’ko gi yé é we fe yé munu Jézu ze vɔ.

¹⁵ Naa, mi kenu léé: Yonufaatagɔné Béɛlzébul lé plɛplɛ nya lé éé yonu sié munu gi.

¹⁶ A gi danle we gi, mi kenu lé a lɛ léé, ’é tɔmase do si ’wo lɛ la gi.

¹⁷ Jézu wo ’wuogiwenu dɔɔ yé é lé wo lɛ léé: Tɛrɛ faa lé alé munu ke é kinile ékema, alé kɔn gurunu é dan dia lɛ é ke ta nuu yé é vo é ’bin nya.

¹⁸ Ka léé, Béɛlzébul lé plɛplɛ nya lé maa yonu sié munu gi, ’naan, dé Satan kini ékema é ziin, alé tɛrɛ é dan vo lɛ ana kaa?

¹⁹ Yé dé maa yonu si munu gi Béɛlzébul lé plɛplɛ nya, ka benu ’wozé sié munu gi de ɛ lé plɛplɛ nyaa? Amalé ka benu é dan kɛlɛ lɛ kalé weblezannu nya.

²⁰ Naa, dé Kazambale bɛnwɔlɛ nya lé maa yonu sié munu gi, ’té Kazambale lé plale mi nwiin da ka va.

²¹ Mi plɛplɛ lé, gulidanfɛ kiɛre ke a lee, dé é a élé kɔn tabinna, alé fɛnu ta béli a é dɔle.

²² Naa, mian ’bɛ plɛplɛ mini a ta, dé ’bɛzan da, dé ’bɛ a kele, alé gulidanfɛnu faa lé a bli ke wo lɛ bɛ, ’bɛ éé wo sié yé ’bɛ éé a pagifɛnu gulian gulizara nya.

²³ Mi lé é ’ka an va lo, é a an mazan nya, yé mi lé é ’ka fɛ tééan an va lo, éé fɛ nwɛɛn‐an.

Yo tiridɔle éé nɔlaan é pa gi

²⁴ Dé yo tiridɔle si mi gi, éé goo flinna gini lɛ fɛna galenu na, yé é ’ka a yé lo, yé é léé: Anlé kɔn lé maa si a gi bɛ, maa dan nɔla lɛ ana an pa gi.

²⁵ Yé dé é bɔ ana éé a yé léé, ana a é siale, ’té a guru ma nyɔɔ a é gyɛle.

²⁶ Yé éé goo yé yo bɛ sɔrafié lé ’bɛnu naané mini yee ta, éé ’bɛnu paan ’é va yé woo wɔraan kɔn gi, yé woo nyanaan kli. Yé gɔnézan ’ko dɔbɛ voéla éé kɛla lɛrɛlɛrɛ yé é mini a vininzan ta.

Drɔɔ vole bozen

²⁷ Bléyian va lé Jézu ke dére ’konu fena, le do é dére bié mi gu méléna yé é léé: Le lé é i bɔn kɔné si yé é nyɔ dɔ i ’léé, azé a néné.

²⁸ Yé Jézu a zi pa a lɛ léé: Gba, munu lé woo tɔné dɔa Kazambale dére lɛ, ’té woo a ta tawoo, wo ɛ zé ke néné.

Mi lɛrɛlɛrɛnu ɛ tɔmase ma laa

²⁹ Munu kiɛre zén ékeva yé Jézu kun wefele ma yé é léé: Bléyi ’ko vamunu a mi kulu lɛrɛlɛrɛ nya; woo tɔmase ma laan; naa, Jonas lé tɔmase do kpen lé wo dan a gɔɔn lɛ wo lɛ, a bɛ kaan lo.

³⁰ Naa, fɛan zo lé Jonas kɛlɛ tɔmase nya Ninive munu lɛ, a zo duo lé maa blami Be an dan kɛlɛ lɛ tɔmase nya bléyi ’ko vamunu lɛ.

³¹ Webleyi nya yirinwana bɛyilazia munu nwiin fuale é dan nwa lɛ bléyi ’ko vamunu ma yé é dan we dɔ lɛ wo nwiin, naa, é si tɛrɛ glɛ sina Salomɔn lé wedɔɔle ’male we gi, yé ka ye, mi lé ’bɛ mini Salomɔn ta, ’bɛ a ’ko.

³² Webleyi nya Ninive munu é dan nwa lɛ bléyi ’ko vamunu ma yé wo dan we dɔ lɛ wo nwiin, naa, Ninive munu bli nɔla Jonas dére ma, yé ka ye, mi lé ’bɛ mini Jonas ta, ’bɛ a ’ko.

Mi kɔlɛ lé kyɛbɔ

³³ Mi lé éé kyɛbɔ bié ’té éé a yɔɔan, dé ’bɛ kaan lo, ’té éé bɔ buaan a ta, ’bɛzan ’ka lo, naa, wa dɔraan kyɛbɔ dɔrana, munu lé woo dan ana, wolé a san yele we gi.

³⁴ I yuɛwɔlɛ a i kɔlɛ lé kyɛbɔ nya. Dé i yuɛ fuu a é ta ’té i kɔlɛ faa va a é kinile; naa, dé i yuɛ fuu ’ka é ta lo, ’té i kɔlɛ a gunuti va.

³⁵ Bɛwemalé ’i yuɛ pa ibozen va léé, san lé é ke i gi, té é kinin gunutinu nya lo.

³⁶ Dé i kɔlɛ faa a san gi yé a vafɛ do kpen ’ka gunutinu va lo, a va faa é dan kini lɛ, bɛan zo lé kyɛbɔ i va kinié é san nya, a zo.

Jézu sɛbɛgifemunu gi bɔra

³⁷ Jézu a wefena aan wo Farizimi do a laa léé, ’é go fɛ ble é va. É wɔra yé é nyana fɛ zi.

³⁸ Farizimi ’ko a ye léé, é ’ka zuru lɛ lo yé é nyana fɛ zi yé a gi vuru.

³⁹ Naa, Mizan lé a lɛ léé: ’Kaa Farizimunu, ka ’yiminikana valé fɛblekana lala folié, ’té ka bli a é fanle glawe valé we lɛrɛlɛrɛ nya.

⁴⁰ ’Tugyɛzannu! Mi lé é fɛ lala kɛlɛ, é ’ka a gi kɛlɛ lɛ é ziin loo?

⁴¹ Fɛ lé é ke kana gi, ’ka blɛ kɛlɛ nyanégyɛmunu lɛ a nya yé fɛnu faa gi é dan bɔ lɛ ka lɛ.

⁴² Farizimunu, ka gale nyɔ. Zian va blaanu lé wo ke mant valé ru nya, é valé ziannu koo, ka wo vuzan no, yé ka Kazambale lé we tegele valé é lɔrɔpale vo ka bɛ zuo; é a lé ’ka bɛnu é kɛlɛ, yé té ka a vininzannu kɛlɛle vo lo.

⁴³ Farizimunu, ka gale nyɔ. Bazorokɔn gi zi ’lɛ blinnu koo, munu wele ka va gɔrɔ la koo, wo sɔ ka lɛ.

⁴⁴ Ka gale nyɔ. Ka a bélé mi vunnu lé wo ’ka wo yé lo, ’té woo tawoo wo ta, ’té wo ’ka a gi dɔɔa lo, wo zo.

⁴⁵ Bélidɔwedɔɔmi do kun ézé fele ma yé é lé Jézu lɛ léé: Anzan, dé i a fena ’bɛ zo, ’té i a ko sɔnɔna é ziin.

⁴⁶ Jézu léé: Bélidɔwedɔɔmunu, ’kaa é ziin, ka gale nyɔ. Kɔné lé a sile ke tɔntɔn, ka a dɔa munu nwiin, yé kabozen ’ka ka bɛnwɔlɛ do kpen manean a ma lo.

⁴⁷ Ka gale nyɔ. Balelayemunu lé ka tranu wo gyɛ, ka fɛ dɔa wo vun ta.

⁴⁸ Naa, ka kɛlɛ kabo lé wenayezannu nya léé, ka ka tranu kɛlɛwenu nyi sié; wo balelayezannu gyɛ, ’té ka fɛ dɔa wo vun ta.

⁴⁹ Bɛwemalé Kazambale lé wedɔɔle léé: Maa dan balelayezannu valé nwunvɔzannu pa lɛ wo lɛ zia; wo dan a kenu gyɛ lɛ yé wo dan nyané pa lɛ a kenu ta,

⁵⁰ balelayemunu faa nyɛ lé wa zanale sia tɛrɛ bɔra bléyi va, a we dɔle bléyi ’ko vamunu nwiin we gi;

⁵¹ é sia Abɛl ma fɔɔ yé é bɔ Zakari lé wa gyɛ balebanna valé Balebangikɔn worona bɛ, a ma, wo nyɛ lé é zana bɛ, wo dan a we dɔ lɛ bléyi ’ko vamunu nwiin. Iin, maa fe ka lɛ.

⁵² Bélidɔwedɔɔmunu, ka gale nyɔ. Ka wedɔɔle lé lakléwɔlɛ sia; yé kabozen ka ’ka wɔrana ana lo, yé munu lé wa a va léé, ’wo wɔra ana, ka ’ka a nyi sina wo lɛ lo.

^53-54 Jézu si aan wo ’bɛna, sɛbɛgifemunu valé Farizimunu dia a zi we kiɛre laale nya a lee, ’té wa ma kyɛ dɔa léé, ’é we kiɛre fe, yé abo dére a gyɛ we nya.