WENÉNÉ LÉ LUK A GYE (Évangile selon Luc) 10 - Kazambale lé Sebe Sauunu 1979

Jézu mi yɔ yaa wɔlɛ vu nwunvɔ

¹ ’Bɛ zuo Mizan mi yɔ yaa wɔlɛ vu si a va yé é wo dɔ é ziin é zuomunu nya, yé é wo nwunvɔ mi fié mi fié é ’lɛ, fla faa valé fɛ faa lé é dan go lɛ wona bɛ, ana.

² É lé wo lɛ léé: ’Sa tana kiɛre yé a gyɛmunu ’ka di lo. Amalé ’ka zanté vɔ ’sazan lɛ léé, ’é nyanamapazannu pa zia yé ’wo alé ’sa gyɛ.

³ ’Ka go; maa a ka nwunvɔna bélé ’blanénu zo glaunu méléna.

⁴ Gɔɔlipabala koo, bala koo, sawala koo, té ka go wo do kpen nya ka lee lo, yé té ka we mi do kpen va zia lo.

⁵ Dé ka bɔ kɔn‐an ’léé, ’ka fe é vinin léé: Kɔn ’ko ’é vo drɔɔ ma.

⁶ Yé dé ka mian ye ana mi drɔɔ nya, kalé a drɔɔ vole é dan vo lɛ a ta; dé ’bɛ kaan lo, kalé a drɔɔ vole é dan si lɛ a ta é ziin.

⁷ ’Ka vo kɔn ’ko ’léé, yé fɛ lé wa nɔ ka lɛ, ’ka ble; naa, a yara léé, nyanamapazan ’é gooli ye. Té ka go gole nya kɔnnu gi lo.

⁸ Dé ka bɔra flaofla‐an ta yé wo ka bɛn si, fɛ lé wa nɔ ka lɛ, ’ka ble,

⁹ ’ka ana gyɛgyɛmunu béli yé ’ka fe wo lɛ léé: Kazambale lé plale munu nwiin bɔ ka lɛ é pu.

¹⁰ Naa, dé ka bɔra flaofla‐an ta yé wo ’ka ka si lɛ bɛn nya lo, ’ka go vuun la yé ’ka fe léé:

¹¹ Kalé fla vungoi lé é zén ko gane ma, ko a nwɛɛn ka ta ko gane ma puole nya; naa, a sele é dɔ ka gi léé, Kazambale lé plale mi nwiin bɔ é pu ma.

¹² ’Bɛ yi nya fla ’ko zé kleblele é dan mini lɛ Sɔdɔm zé ta. Maa fe ka lɛ.

Flanu lé wo lamunu ’ka ’wo bli nɔlaan lo

¹³ Korazɛn munu, ka gale nyɔ. Bɛtsaida munu, ka gale nyɔ. Gyɛzorowenu lé maa a kɛlɛ ka méléna, dé é vo léé, maa a kɛlɛ Tii valé Sidɔn, ’té ana munu wo bli nɔla namɔn é kwakwa ’plawuli valé kyɛyee zénle nya wo ta.

¹⁴ Bɛwemalé webleyi nya kazé kle é dan mini lɛ Tii valé Sidɔn zé ta.

¹⁵ Yé bii Kapɛnaum, i dan nwa lɛ fɔɔ la gii? Gba, wo dan i zun lɛ fɔɔ gamunu nyanana.

¹⁶ Mi lé éé tɔné dɔa ka lɛ, éé tɔné dɔa an lɛ, yé mi lé éé sɔn vɔa ka ma, éé sɔn vɔa an ma; yé mi lé éé sɔn vɔa an ma, éé sɔn vɔa mi lé é an pa zia, a ma.

Mi yɔ yaa wɔlɛ vu da wo pa gi

¹⁷ Mi yɔ yaa wɔlɛ vu da é ziin gi nanale nya yé wo léé: Mizan, yonu é ziin wo pla ko wuo i tɔ ma.

¹⁸ Jézu lé wo lɛ léé: Maa Satan ye sina la gi yé é zun bélé lɛɛ yuɛ wuovɔle zo.

¹⁹ Ka ye, maa tawole ménénu valé zɛnɛanu ta se kɛlɛ ka lɛ, yé maa plɛplɛ nɔ ka lɛ léé, ka pla mi nyanézan lé plɛplɛ faa nwiin; yé fɛan é bɔa wenyané kɛlɛle lɛ ka lɛ, ’bɛ fɛ do kpen ’ka lo.

²⁰ Naa, té ka gi é nana léé, yonu a é plale ka wuo lo; naa, ka gi ’é nana léé, ka tɔ a é gyɛle la gi.

Jézu gi nana

²¹ A bléyi duo nya Léli Sauun Jézu fan gi nanale nya yé é léé: An Ti, Lazan valé Tɛrɛzan, maa i tɔ zin fé léé, i we ’konu yɔɔ wedɔɔzannu valé ’wuoatazannu ma yé i wo nagɔɔn nénu lɛ. Iin, an Ti, maa i tɔ zin fé léé, bii a a va léé, ’é kɛlɛ ’bɛ zo.

²² An Ti fɛnu faa nɔ an lɛ, yé mi lé maa, a Be ke a nya, mi do kpen ’ka a dɔɔa lo, ’té dé é ’ka an Ti nya lo; yé mi lé an Ti ke a nya, mi do kpen ’ka a dɔɔa lo, ’té dé é ’ka maa, a Be nya lo; é valé mian é sɔ an lɛ léé, maa a nagɔɔn ’bɛzan lɛ, ’bɛ nya lo.

²³ É yara nɔla é zuomunu va yé é lé wo saa lɛ léé: We lé ka ke a yena, dé mi a ye, a yuɛ gi éé kɛla a ma néné.

²⁴ Fɛ lé ka ke a yena, balelayemunu kiɛre valé minwiinmunu kiɛre a a va léé, ’wo ’é a ye, yé wo ’ka a ye lɛ lo, yé we lé ka ke a ’mana, wa a va léé, ’wo ’é a ’ma, yé wo ’ka a ’ma lɛ lo. Maa fe ka lɛ.

Samarizan zin

²⁵ Bélidɔwedɔɔzan do nwa yé é Jézu gi dan a fele nya léé: Anzan, maa kɛla kaa yé an vo é yuɛma lɛɛfaama yé a glɛ ’ka dɔa loo?

²⁶ Jézu lé a lɛ léé: Wa gyɛ bélidɔwe gi kaa? Dé i a ’bɛ ta fena, i mɛ we ’ma a gii?

²⁷ Yé yee gɔnézan léé: Maa ’ma léé, ’i Mizan izé Bale lɔrɔ pa i bli faa koo, i boen faa koo, ilé plɛplɛ faa koo, i gi bɔrɔle faa koo, wo nya; yé ’i bɔluzan lɔrɔ pa bélé biibozen zo.

²⁸ Jézu lé a lɛ léé: Bé zi pa tegele; ’i ’bɛ kɛlɛ yé i dan vo lɛ é yuɛma.

²⁹ Naa, é sɔ gɔnézan lɛ léé, élé we ’é kɛlɛ néné Jézu yuɛ gi yé é léé: De ɛ ke an bɔluzan nyaa?

³⁰ Jézu lé a lɛ léma: Gɔné do si Jérusalɛm yé é a gona Jériko. Kyeenwozannu baa a ta zia, yé wo alé sɔnu si a ta, yé wa bla kaii, yé é zɔrɔ yé wa vo a zo yé wo go.

³¹ Yé é kɛlɛ léé, Balebanzan do zun yee zi duo ’léé; é mi ’ko ye aan wo, é paa a ma.

³² Lévi mi do bɔ fɛkona é ziin; é gɔnézan ’ko ye aan wo é paa a ma.

³³ Naa, Samarizan do lé é ke ta la, ’bɛ bɔ ana yé ’bɛ gɔnézan ye aan wo, ’bɛ nyanai zén a ta.

³⁴ ’Bɛ bié a ma yé ’bɛ nyɔnɔ valé dɔrɔ zén a tuonanu gi, yé ’bɛ sɔbɛ vuru wo ta; a zuo ’bɛ a vɔ ébozen lé sokofale ta yé ’bɛ go a nya otɛli ta yé ’bɛ a mawe kɛlɛ.

³⁵ ’Bɛ é tu kini, ’bɛ dénié fié si yé ’bɛ a nɔ otɛlizan lɛ a fele nya léé: ’I bɔ a va an lɛ, dé i gɔɔli bɛ sɛrɛ a we gi, dé maa da é ziin maa dan a lɛgi nɔ lɛ i lɛ.

³⁶ É dɔ i gi kaa? Mi yaa ’ko va mi kyɛn ɛ ke mi lé kyeenwomunu baa a ta bɛ, a bɔluzan nyaa?

³⁷ Bélidɔwedɔɔzan léé: Mi lé a nyanai zén a ta, yee lé. Yé Jézu lé a lɛ léé: ’I go, yé izé kɛlɛ a zo.

Jézu go we lɛ Maate valé Mari va

³⁸ Jézu valé é zuomunu a zia aan wo, wo bɔ fla do la, yé le do lé wa laama Maate, ’bɛ a si élé bɛn nya.

³⁹ A buru a, wa laama Mari; ’bɛ nyana Mizan gane ma, ’té ’bɛ éé tɔné dɔa a dére lɛ.

⁴⁰ ’Té Maate yuɛ gi kyɛ a é dɔle fɛ kɛlɛle nya yé é da yé é léé: Mizan, dé an buru an vo an do fɛ kɛlɛna, ’bɛ ’ka ’na i ma loo? ’Bé fe a lɛ léé, ’é bɔ an va.

⁴¹ Mizan a zi pa a lɛ léé: Maate, Maate, i yuɛ gi kyɛ a, yé i we kiɛre gi bɔrɔ paan.

⁴² Naa, we do kpen ɛ ke mi mawe nya. A zin lé Mari a si ézé nya, yé wo ’ka dan a si lɛ a lee lo.