Lévinu 9 - Kazambale lé Sebe Sauunu 1979

Saraka vininnu lé Arɔn valé ’é benu a bo

¹ A yi sɔraazan nya, Moizi Arɔn valé é benu valé Izraɛl mi segelenu laa.

² É lé Arɔn lɛ léé: ’I dirigɔnéné si wenyané ’yibo saraka nya, yé ’i ’blagɔné si balebanwi lé wa kyɛ blé, a nya, yé ’i Gakelebale ban wo nya. Té we do kpen é kɛlɛ wo fiénu ma lo.

³ Bé fe Izraɛl lé nénu lɛ léma: ’Ka boligɔné si wenyané ’yibo saraka nya, dirigɔnéné valé ’blané lé, wo lɛɛ kɛlɛ do yé we do kpen ’ka wo ma lo, ’ka wo si balebanwi lé wa kyɛ blé, a nya.

⁴ ’Ka dirigɔné valé ’blagɔné si bɔvɔ saraka nya, yé ’ka Gakelebale ban wo nya; blɛ lé wa vɔɔ nyɔnɔ nya, ’ka ’bɛ si é ziin. Naa, Gakelebale é dan bɔra lɛ ka va kyɔ.

⁵ Fɛnu lé Moizi a fe, wo da wo nya zén‐ékevasɔkɔn ’lɛ; yé munu faa bié yé wo dɔ Gakelebale ’lɛ.

⁶ Moizi léé: We lé Gakelebale a fe, ’ka kɛlɛ, yé Gakelebale lé fuasan é dan bɔra lɛ ka va.

⁷ Moizi lé Arɔn lɛ léé: ’I bié balebanna sɔnɔ; ’i wenyané ’yibo saraka bo yé balebanwi lé wa kyɛ blé, bé nɔ, bii valé munu lé wenyané ’yibole we gi; ’i munu lé saraka bo é ziin yé ’i wolé wenyané ’yibo, Gakelebale a fe fɛan zo, a zo.

⁸ Arɔn bié balebanna ma, yé é wenyané ’yibo dirigɔnéné bɔrɔ bo.

⁹ Arɔn benu a nyɛ nɔ Arɔn lɛ; é bɛnwɔlɛ wɔra a nyɛ va yé é a gié balebanna bélinu ma, yé é a nyɛ zana balebanna punma.

¹⁰ Wenyané ’yibowi nyɔnɔ koo, a kolimayerenu koo, a bli fee blɛn koo, é wo kyɛ ble balebanna ta, Gakelebale a fe Moizi lɛ fɛan zo, a zo.

¹¹ Naa, é a wi valé a kɔlɛ kyɛ ble sɔkɔn dɔna gini ma.

¹² Balebanwi lé wa kyɛ blé, é ’bɛ bɔrɔ bo. Arɔn benu a nyɛ nɔ é lɛ, yé é a zén balebanna ta fɛfaana.

¹³ Balebanwi lé wa kyɛ blé, a wi koo, a ’wuo koo, wa nɔ Arɔn lɛ yé é a kyɛ ble balebanna ta.

¹⁴ É a bun‐annu valé a mɛnnu ma saa yé é wo kyɛ ble balebanna ta loru.

¹⁵ ’Bɛ zuo, é munu lé saraka bo. É munu lé wenyané ’yibo boligɔné si yé é a bɔrɔ bo wolé wenyané ’yibole we ma, é a vininzan gyɛ fɛan zo, a zo.

¹⁶ Balebanwi lé wa kyɛ blé, é ’bɛ nɔ, yé é saraka bo a nya, a nɔbɛ gi.

¹⁷ É balebanfɛblele gɔɔn yé é a si bɛ nya do yé é a kyɛ ble balebanna ta; balebanwi lé wa kyɛ blé bladi, é a nɔ ’bɛ taa nya.

¹⁸ É munu lé bɔvɔ saraka lé dirigɔné valé ’blagɔné bɔrɔ bo. Arɔn benu a nyɛ nɔ Arɔn lɛ yé é a zén balebanna ta fɛfaana.

¹⁹ Dirigɔné valé ’blagɔné nyɔnɔ koo, wo wolinu koo, wo bun‐annu ta nyɔnɔ koo, wo kolimayerenu koo, wo bli fee blɛnnu koo, wo wo nɔ a lɛ;

²⁰ wa nyɔnɔ pa wo tɔnnu ta, yé é a nyɔnɔ kyɛ ble balebanna ta.

²¹ Arɔn a tɔnnu valé a bɛyilabɛ dia é bɛ fié la Gakelebale ’lɛ, Moizi a fe fɛan zo, a zo.

²² Arɔn é bɛ nwa munu vazia, yé é wo drɔɔ vo. Dé é nyaa wenyané ’yibo saraka valé balebanwi lé wa kyɛ blé, ’é valé bɔvɔ sarakanu bole nya, ’bɛ zuo yé é zun.

²³ Moizi valé Arɔn wɔra zén‐ékevasɔkɔn gi. Dé wo bɔra wo munu drɔɔ vo. Yé Gakelebale lé fuasan bɔra munu faa va.

²⁴ Kyɛ si Gakelebale va yé é balebanwi valé winyɔnɔ ble balebanna ta. Munu faa ’bɛna ye; yé wo siaa ginanale nya, yé wo dia ’wo yara.