Lévinu 8 - Kazambale lé Sebe Sauunu 1979

Arɔn valé a benu bɛ pale balebanle ta

¹ Gakelebale we fe Moizi lɛ yé é léma:

² Arɔn valé é benu koo, sɔnu koo, fɛ ’lɛdɔ nyɔnɔ koo, wenyané ’yibo dirigɔné koo, ’blagɔné fié koo, kyɛɛ nya do buru lé wo ’ka a kɛlɛ lɛ lévɛn nya lo koo, ’i wo si,

³ yé i munu faa laa léé, ’wo zén ékeva zén‐ékevasɔkɔn ’léé.

⁴ We lé Gakelebale a fe, Moizi a kɛlɛ; munu faa zén ékeva zén‐ékevasɔkɔn ’léé.

⁵ Moizi lé zén‐ékeva munu lɛ léé: We lé Gakelebale a fe léé, ’ka kɛlɛ, yee lé ke ’ko.

⁶ Moizi Arɔn valé é benu bié yé é wo zuru.

⁷ É varɔ bɛ grɔgrɔ zén Arɔn ta yé é bɔn‐in kunsɔ dɔ a ta, yé é varɔ grɔgrɔ zén ’bɛ ta loru, yé é éfɔdi zén ’bɛ ta yé é éfɔdi gɔ polu dɔ a ta.

⁸ É golɛgiweblefɛ pa a ta yé é urim valé tumim vɔ a ta.

⁹ É nɔɔn koro wo a ’wuo ma, yé é baletakyan lɛlɛné dɔ nɔɔn koro ta a ’lɛzia, Gakelebale a fe Moizi lɛ fɛan zo, a zo.

¹⁰ Moizi fɛ’lɛdɔ nyɔnɔ si, yé é a gié fɛna sauun valé é gifɛnu faa ma, yé é wo ’lɛ dɔ.

¹¹ É nyɔnɔ nwɛɛn balebanna ta gɔnɔ sɔrafié, yé é a gié balebanna valé a ma nyanamapafɛnu faa ma, yé é a gié’wolikana valé é gane gi, wo ’lɛdɔle we gi.

¹² É fɛ’lɛdɔ nyɔnɔ zén Arɔn nwiin, a dɔle Balebanzan nya we gi.

¹³ Moizi Arɔn benu bié; é varɔ bɛ grɔgrɔ zén wo ta, yé é bɔn‐in kunsɔ dɔ wo bɔn‐in, yé é sɔkoro wo wo ’wuo ma, Gakelebale a fe Moizi lɛ fɛan zo, a zo.

¹⁴ É wenyané ’yibo dirigɔné bié, yé Arɔn valé é benu ’wo bɛ pla wenyané ’yibo dirigɔné ’wuo ta.

¹⁵ Moizi a bɔrɔ bo yé é a nyɛ si yé é bɛnwɔlɛ vɔ a va yé é a gié balebanna bélinu faa ma, yé é balebanna ’lɛ dɔ; é nyɛ zana balebanna punma yé é a ’lɛ dɔ wenyané ’yibole ana we gi.

¹⁶ A nyɔnɔ faa lé ke a bun‐annu ma koo, a bli fee blɛn koo, a kolimayere valé wo ma nyɔnɔ koo, é wo si yé é wo kyɛ ble balebanna ta.

¹⁷ Naa, dirigɔné kɔlɛ koo, a wi koo, a bonu koo, é wo kyɛ ble sɔkɔn dɔna gini ma, Gakelebale a fe Moizi lɛ fɛan zo, a zo.

¹⁸ Bale ban ’blagɔné lé wo dan a kyɛ ble lɛ, Moizi a bié, yé Arɔn valé é benu wo bɛ pla a ’wuo ta.

¹⁹ Moizi a bɔrɔ bo yé é a nyɛ zén balebanna ta fɛfaana.

²⁰ É ’blagɔné kini yé a ’wuo koo, a winu valé a nyɔnɔ koo, é wo kyɛ ble.

²¹ É a bun‐annu valé a mɛnnu ma saa, yé é ’blagɔné faa kyɛ ble balebanna ta; balebanwi lé wa kyɛ blé, yee lé; saraka lé wa kyɛ ble, ’té Gakelebale a gin sié néné, yee lé, Gakelebale a fe Moizi lɛ fɛan zo, a zo.

²² É ’blagɔné koɛ bié, yee lé ke mi bɛ pale balebanle ta ’blagɔné nya, yé Arɔn valé é benu wo bɛ pla ’blagɔné ’wuo ta.

²³ Moizi ’blagɔné bɔrɔ bo, yé é a nyɛ si yé é a gié Arɔn bɛyila tɔnébɛné koo, a bɛyila bɛnwɔlɛgɔné koo, a bɛyila ganewɔlɛgɔné koo, wo ma.

²⁴ É Arɔn benu bié, yé é a nyɛ gié wo bɛyila tɔnébɛnénu koo, wo bɛyila bɛnwɔlɛgɔnénu koo, wo bɛyila ganewɔlɛgɔné koo, wo ma, yé é a nyɛ pɔné zén balebanna ta fɛfaana.

²⁵ A nyɔnɔ koo, a woli koo, a nyɔnɔ faa lé éé séli vɔa a bun‐annu ma koo, a bli fee blɛn koo, a kɔlɛmayere valé é ma nyɔnɔ koo, a bɛyibɛ koo, é wo si;

²⁶ é ziin, buru lé lévɛn ’ka a va lo koo, buru kurukuruné lé wa vɔ nyɔnɔ nya koo, buru pɛtoropɛtoroné koo, é wo si, buru lé lévɛn ’ka a va lo, alé kyɛɛ lé ke é dɔrale Gakelebale ’lɛ, a gi, yé é wo pa winyɔnɔnu valé a bɛyilabɛ ta.

²⁷ É fɛ ’konu pa Arɔn valé é benu lee, yé wo wo dia é bɛ fié la Gakelebale ’lɛ.

²⁸ ’Bɛ zuo Moizi a si wo lee, yé é wo pa balebanwi lé wa kyɛ blé, a ta loru, yé é wo faa kyɛ ble balebanna ta; mi bɛ pale balebanle ta saraka lé, saraka lé wa kyɛ blé, ’té Gakelebale a gin sié néné, yee lé.

²⁹ Moizi mi bɛ pale balebanle ta ’blagɔné tɔn si yé é a dia é bɛ fié la Gakelebale ’lɛ; é a Moizi zé nya, Gakelebale a fe Moizi lɛ fɛan zo, a zo.

³⁰ Fɛ’lɛdɔ nyɔnɔ koo, nyɛ lé ke balebanna ta koo, Moizi wo si, yé é wo nwɛɛn Arɔn valé élé sɔnu koo, Arɔn benu valé wolé sɔnu koo, wo ta; yé Arɔn valé ’élé sɔnu koo, Arɔn benu valé ’wolé sɔnu koo, Moizi wo ’lɛ dɔ.

³¹ Moizi lé Arɔn valé a benu lɛ léé: ’Ka wi dɔne zén‐ékevasɔkɔn ’léé; ’bɛna lé ka dan a ble lɛ, mi bɛ pale balebanle ta buru lé ke kyɛɛ gi, a va, maa a fe fɛan zo, a zo; maa fe léé, Arɔn valé é benu wo dan a ble lɛ.

³² A wi valé a buru pɔné lé é vo, ka dan a kyɛ ble lɛ.

³³ Yi sɔrafié gi, té ka si zén‐ékevasɔkɔn ’léé lo, fɔɔ yé ka bɛ pale balebanle ta yinu lɛ é sɔɔ; naa, ka bɛ pale balebanle tawe a yi sɔrafié we nya.

³⁴ We lé ko kɛlɛ kyɔ ’ko, Gakelebale a fe léé, ’ko kɛlɛ, kalé wenyané ’yibofɛ nya.

³⁵ Amalé ’ka vo zén‐ékevasɔkɔn ’léé yi sɔrafié, é yiéyi valé é béli, yé ’ka Gakelebale sɔnné pa, té ka ga lo we gi; naa, ’bɛ zo lé Bale a fe an lɛ.

³⁶ We faa lé Gakelebale a pa Moizi ’léé, Arɔn valé é benu a tawe kɛlɛ.