Lévinu 7 - Kazambale lé Sebe Sauunu 1979

Sarakanu lé bélidɔwenu

¹ Wenyaa saraka lé bélidɔwe a ’ko zo: Bale ’lɛfɛ lé.

² Balebanwi lé wa kyɛ blé, wa bɔrɔ boo fɛana, ana duo lé wo dan wenyaa saraka lé wi bɔrɔ bo lɛ. Wo dan a nyɛ nwɛɛn lɛ balebanna ta fɛfaana.

³ Winyɔnɔ faa koo, a woli koo, a nyɔnɔ lé é séli vɔ a bun‐an ta koo,

⁴ a kolimayere fié valé wo ma nyɔnɔ koo, a koligi nyɔnɔ koo, a bli fee blɛn lé wa si a kolimayere sɔnɔ koo, wo dan a faa nɔ lɛ.

⁵ Balebanzan é dan a kyɛ ble lɛ balebanna ta Gakelebale ’lɛ, saraka lé kyɛ a blé, a nya. Wenyaa saraka lé.

⁶ Balebanzannu va gɔnénu faa é dan a ble lɛ; wo dan a ble lɛ fɛna plɛplɛ na; Bale ’lɛfɛ lé.

⁷ Wenyaa saraka a bélé wenyané ’yibo saraka zo; saraka fiénu ’ko lé bélidɔwe a do; sarakawi é dan kɛlɛ lɛ Balebanzan lé, é wenyané ’yibo a nya, azé nya.

⁸ Dé mi do Bale ban, balebanwi lé wa kyɛ blé, a nya, Balebanzan lé é Bale ban fɛ ’ko nya, balebanwi kɔlɛ é dan kɛlɛ lɛ azé nya.

⁹ Fɛblele lé wa dɔneé ’furu gi koo, yee lé wa gaan kɔrané ta koo, yee lé wa vɔa gbɛlɛ gi koo, a faa a Balebanzan lé é Bale ban wo nya, azé nya.

¹⁰ Fɛblele faa lé wa vɔɔan nyɔnɔ nya koo, ’é valé a pla koo, a faa a Arɔn benu faa zé nya, wo faa zé éé bɔa ékema.

¹¹ Bɔvɔ sarakanu lé wo dan wo bo lɛ Gakelebale lɛ, wolé bélidɔwe a ’ko zo:

¹² dé mi do a bo bɔvɔle nya é bli gi, é dan fɛ ’konu pa lɛ bɔvɔ saraka va: buru kurukuruné lé wa vɔɔan nyɔnɔ nya ’té lévɛn ’ka wo va lo koo, buru pɛtoropɛtoroné lé woo nyɔnɔ nwɛɛn‐an wo ma, ’té lévɛn ’ka wo va lo koo, buru kurukuruné lé wa kɛlɛ burupun zima sélile nya, ’té wa vɔɔan nyɔnɔ nya koo, woo lé;

¹³ é dan fɛblele ’ko taa pa lɛ buru lé lévɛn ke a va, a nya, yé ’é a nɔ bɔvɔ saraka lé é a bo bɔvɔle nya, a nya ékeva.

¹⁴ Wo dan fɛblele faa do do ke nɔ lɛ Gakelebale lɛ a nwale valé a tuale nya; Balebanzan lé é bɔvɔ saraka wi nyɛ nwɛɛn, é dan kɛlɛ lɛ azé nya.

¹⁵ Bɔvɔ saraka lé mi a bo bɔvɔle nya é bli gi, wo dan a wi ble lɛ a boyi nya; té a vafɛ do é vo yé tu é kini a ma lo.

¹⁶ Dé mi do saraka bo Bale kunle lɛsɔɔle we ma, ɛɛ, dé é a bo bli drɔɔ blɛ nya, wo dan saraka wi ble lɛ a boyi nya, yé fɛ lé é vo, dé tu kini, ’wo ’bɛ ble.

¹⁷ Dé a wi ke vo, wo dan a kyɛ ble lɛ a yi yaazan nya.

¹⁸ Dé é kɛlɛ léé, mi ’élé bɔvɔ saraka wi ble a yi yaazan nya, Kazambale ’ka dan ’é ban‐ɛn ble lɛ lo; wo ’ka dan a ye lɛ léé, mi ’ko é saraka bo lo; é sɛrɛ, yé dé miomian é a ble, we a ’bɛzan nwiin é dɔle.

¹⁹ Sarakawi lé é mane fɛ tiridɔle ma, té wa ble lo; ’wa kyɛ ble ma.

²⁰ Bɔvɔ sarakanu a Gakelebale zé nya; a zi a mi tegele faa lɛ léé, é saraka ’ko wi ble, naa, mi lé é ’ka tegele lo, dé é a ble, wo dan a si lɛ ’élé munu va.

²¹ Mi lé é mane fɛ tiridɔle ma, dé é a mi lé é ’ka tegele lo, a nyaoo, dé é a wi tiridɔle nyaoo, dé é a fɛofɛan lé a tiri ke é dɔle, a nyaoo, mi lé é mane ’bɛ ma yé é Gakelebale lé bɔvɔ saraka wi ble, wo dan azan si lɛ ’élé munu va.

²² Gakelebale we fe Moizi lɛ yé é léé:

²³ Bé fe Izraɛl lé nénu lɛ léma: Diri koo, ’bla koo, boli koo, té ka wo nyɔnɔ ble lo.

²⁴ Dé é a wi gale nyaoo, dé é a wi lé a ma mian, a nyaoo, dé é sɔ ka lɛ léé, ka kɛlɛ fɛan zo a nyɔnɔ nya, ’ka kɛlɛ, naa, té ka a ble lo.

²⁵ Winu lé woo wo kyɛ blé saraka nya Gakelebale lɛ, dé mian wo nyɔnɔ ble, wo dan azan si lɛ ’élé munu va.

²⁶ Dé é a miané nyaoo, dé é a wi nyaoo, dé ka nyana fɛofɛanna, té ka wo nyɛ ble lo.

²⁷ Dé é a fɛofɛan nyɛ nya, dé mian a ble, wo dan azan si lɛ ’élé munu va.

²⁸ Gakelebale we fe Moizi lɛ yé é léma:

²⁹ Bé fe Izraɛl lé nénu lɛ léma: Mi lé é bɔvɔ saraka bo Gakelebale lɛ, é dan Gakelebale zé si lɛ alé bɔvɔ saraka va yé ’é a nɔ Gakelebale lɛ.

³⁰ Fɛ lé wo dan a kyɛ ble lɛ Gakelebale ’lɛ, é dan da lɛ a nya ébozen bɛ nya; é dan da lɛ a nyɔnɔ valé a tɔn nya, yé é dan a tɔn dia lɛ a bɛyilazia valé a bɛbolazia Gakelebale ’lɛ.

³¹ Balebanzan é dan a nyɔnɔ kyɛ ble lɛ balebanna ta yé a tɔn é dan kɛlɛ lɛ Arɔn valé é benu zé nya.

³² Dé ka a bɔvɔ saraka bona, ka dan a bɛyila bɛ nɔ lɛ Balebanzan lɛ, a nwale valé a tuale nya.

³³ Arɔn be lé é bɔvɔ saraka nyɛ valé a nyɔnɔ nɔ, a bɛyilabɛ é dan kɛlɛ lɛ azé nya.

³⁴ Naa, bɔvɔ sarakanu lé Izraɛl lé nénu a boo, a tɔn lé wa diaan a bɛyilazia valé a bɛbolazia koo, a bɛ lé wa no a nwale valé a tuale nya koo, maa wo si yé maa wo nɔ Balebanzan Arɔn valé é benu lɛ; é a bélidɔwe lé é ’ka nyaan lo, a nya, yé é a lé Izraɛl lé nénu a lɛdɔma.

³⁵ Sarakanu lé woo wo kyɛ blé Gakelebale ’lɛ, a vafɛ lé wa no Arɔn valé é benu lɛ, yee lé ke bɛ; a péli é dan sia lɛ yian nya lé wo baleban nyanama pale péli sia an lɛ, a yi nya.

³⁶ É sia nyɔnɔ zén wo nwiin yi ma, fɛ lé Gakelebale Izraɛl lé nénu béli dɔ léé, ’wa nɔ wo lɛ, yee lé ke bɛ; é a bélidɔwe lé é ’ka nyaan lo, a nya, ka kulunu zé nya.

³⁷ Balebanwi lé wa kyɛ blé koo, balebanfɛblele koo, wenyané ’yibo saraka koo, wenyaa saraka koo, mi bɛ pale Bale banle ta koo, bɔvɔ saraka koo, wolé bélidɔwe lé ke bɛ.

³⁸ Gakelebale a fe Moizi lɛ Sinai gɔ nwiin, yian nya lé é a fe Izraɛl lé nénu lɛ léé, ’wo da Gakelebale ban Sinai bwi la, a yi nya.