Lévinu 6 - Kazambale lé Sebe Sauunu 1979

Balebanwinu lé wa kyɛ blé

¹ Gakelebale we fe Moizi lɛ yé é léma:

² ’I Arɔn valé é benu béli dɔ ’ko zo, yé bé fe wo lɛ léma: Balebanwi lé wa kyɛ blé, alé bélidɔwe a ’ko zo: Balebanwi lé wa kyɛ blé, é dan vo lɛ balebanna ta é béli fɔɔ yé tu é kini a ma, ’té kyɛ a blé balebanna ta.

³ Balebanzan é dan élé lɛnvarɔ bɛ grɔgrɔ zén lɛ ’é ta, yé é dan ’élé kulili blɛn wo lɛ ’é ma, yé balebanwi lé wa kyɛ blé, é dan a yee si lɛ balebanna ta, yé é dan a zana lɛ balebanna sɔnɔ.

⁴ É dan ’élé sɔnu si lɛ ’é ta, yé é dan sɔ bɛnu zén lɛ ’é ta, gole we gi kyɛyee nya sɔkɔn dɔna gini ’lɛ ma, fɛna tinle dona.

⁵ Kyɛ é dan vo lɛ bina balebanna ta, té é diri lo; bladi do do faa ma, Balebanzan é dan kyɛ zén lɛ a ta yé balebanwi lé wa kyɛ blé, é dan a pla lɛ a ta, yé é dan bɔvɔ sarakanu lé winyɔnɔ kyɛ ble lɛ.

⁶ Kyɛ é dan vo lɛ bina balebanna ta yifaama, té é diri lo.

⁷ Baleban fɛblele lé bélidɔwe a ’ko zo: Arɔn benu é dan da lɛ a nya Gakelebale ’lɛ, balebanna ’lɛ.

⁸ Balebanzan é dan burupun zima valé nyɔnɔ si lɛ bɛ nya do do, ’bɛ valé lasikɔrɔpo faa lé wa pa baleban fɛblele va, a nya, yé é dan a kyɛ ble lɛ balebanna ta, fɛ gin néné lé éé we sele dɔa Gakelebale gi, a nya.

⁹ Balebanfɛ pɔné lé é vo, Arɔn valé é benu é dan a ble lɛ; té wa ble lévɛn nya é va lo, ’wa ble fɛna plɛplɛ na, zén‐ékevasɔkɔn gɔrɔ gi lé wo dan a ble lɛ.

¹⁰ Té wa dɔne lévɛn nya é va lo. Sarakanu lé wa boo an lɛ, ’té wa kyɛ blé, wozé lé maa a nɔ wo lɛ bɛ. Fɛblele ’ko ’lɛ a é baba bélé wenyané ’yibo saraka valé wenyaa saraka zo.

¹¹ Arɔn lé négɔnénu faa é dan a ble lɛ; dé mian mane a ma, ’té azan kɛlɛ segele. Fɛblelenu lé wa kyɛ blé Gakelebale ’lɛ, alé bélidɔwe lé ke bɛ; é a ka kulunu lé bélidɔwe nya lɛɛfaama.

¹² Gakelebale we fe Moizi lɛ léma:

¹³ Yian nya lé wo dan Arɔn valé é benu dɔ lɛ Balebanzannu nya nyɔnɔ zénle wo nwiin nya, fɛblele lé wo dan Gakelebale ban lɛ a nya ’bɛ yi la, yee lé ke ’ko: burupun zima suoné do lé; lɛɛfaama balebanfɛ lé; ’wa lɛ do nɔ bladi yé wa pɔné nɔ nyanadi.

¹⁴ ’Wa vɔ gbɛlɛ gi nyɔnɔ nya, yé ’ka da a nya ’é male; ’ka a dɔne ’bɛ zo yé ’ka da a nya é kurunu nya, balebanfɛ lé Gakelebale a gin sié néné, a nya.

¹⁵ Arɔn be lé ke Balebanzan nya, ’té wo dan a bɛ pa lɛ balebanle ta é ti pa gi, é a lé é ’ézé balebanfɛ ’ko nɔ é ziin. ’Wa faa kyɛ ble; é a lɛɛfaama bélidɔwe nya Gakelebale ’lɛ.

¹⁶ Balebanfɛ faa lé Balebanzan a nɔ, ’wa faa kyɛ ble; té wa ble lo.

¹⁷ Gakelebale we fe Moizi lɛ léma:

¹⁸ Bé fe Arɔn valé ’é benu lɛ léma: Wenyané ’yibo saraka lé bélidɔwe a ’ko zo: Balebanwi lé wa kyɛ blé, wa bɔrɔ boo fɛana, ana duo lé wo dan wenyané ’yibo saraka lé wi bɔrɔ bo lɛ Gakelebale ’lɛ; fɛ ’ko a Bale ’lɛfɛ nya.

¹⁹ Balebanzan lé éé wenyané ’yibo wi no, é dan a ble lɛ; é dan a ble lɛ fɛna plɛplɛ na; zén‐ékevasɔkɔn gɔrɔ gi lé é dan a ble lɛ.

²⁰ Dé mian mane a nɛ ma, ’té é kɛlɛ Bale ’lɛzan segele nya. Dé a nyɛ zén sɔ do gi, wo dan ana zuru lɛ fɛna plɛplɛ na.

²¹ Tɛrɛbɔ lé wo wi ’ko dɔne a gi, wo dan a ’wii lɛ; dé wa dɔne zénébɔ gi wo dan a gi saa lɛ yé wa zuru ’yi nya.

²² Balebanzannu va gɔnénu faa é dan a ble lɛ. Wi ’ko a Bale ’lɛfɛ nya.

²³ Naa, wenyané ’yibo wi lé wo go a nyɛ nya zén‐ékevasɔkɔn gi wenyané ’yibole ’bɛna we ma, té wo ’bɛ wi ble monomono lo; ’wa kyɛ ble.