Lévinu 5 - Kazambale lé Sebe Sauunu 1979

We nyaa saraka

¹ Dé mi do kɛlɛ wenayezan nya yé é bɛ nwa ’bɛ we ma, yé we lé é a ye, ’é valé we lé é a gi dɔɔ, yé é ’ka a fe lɛ lo, yé ’bɛ we ma é wenyané kɛlɛ, ’té we a a nwiin.

² Dé mi do mane fɛ tiridɔle ma, dé wi tiridɔle gale léé? dé é a bwi gi wi gale nyaoo, dé é a flawi gale nyaoo, dé é a tawoplɛlawi gale nyaoo, ’té é ’ka a gi dɔɔa lo, yeebozen ’ka tegele lo é ziin, ’té we a a nwiin é dɔle.

³ Dé é a mi tiridɔfɛofɛan nya, dé mi do mane a ma ’é ma trɔnné va, yé ’bɛ zuo faa yé é a gi dɔɔ, ’té we a a nwiin.

⁴ Dé mi do a ébo glewona yé é léé, ’é dan wezin kɛlɛ lɛ, taa, dé é a fe léé, ’é dan wenyané kɛlɛ lɛ, yé é bɛ nwa ’bɛ we ma, yé é voéla yé a sele dɔ a gi, ’té we a a nwiin é dɔle.

⁵ Mi lé é we dɔ ’é nwiin we ’konu va we do kɛlɛle nya, ’é da ’élé wenyané fe.

⁶ ’Bɛ zuo, ’é wenyaa saraka bo trubɛda nya Gakelebale lɛ, wenyané lé é a kɛlɛ bɛ, a we ma; dé ’blada léé, dé bolida léé, ’é yee ɛ nɔ wenyané ’yibofɛ nya. Yé Balebanzan é dan alé wenyané ’yibo lɛ a nya.

⁷ Dé ’blada valé bolida mafɛ ’ka a lee lo, é dan wenyaa saraka bo lɛ Gakelebale lɛ plala fié nya, dé ’bɛ kaan lo, ’é a bo plawuo sua fié nya, a do a wenyané ’yibofɛ nya yé a do a balebanwi lé wa kyɛ blé, a nya.

⁸ É dan da lɛ wo nya Balebanzan va yé yee lé ke wenyané ’yibofɛ nya, é dan saraka bo lɛ ’bɛ nya é vinin. Balebanzan é dan a bɔrɔ bo lɛ é sɔnéwɔlɛ nya a ’wuo sɔnɔ, naa, té a ’wuo ’é so a ’léé lo;

⁹ é dan wenyané ’yibofɛ nyɛ puo lɛ balebanna bɛ do la yé é dan a nyɛ pɔné zén lɛ a punma; wenyané ’yibo saraka lé.

¹⁰ É dan miané koɛzan nɔ lɛ balebanwi lé wa kyɛ blé, a nya, é kɛlɛbɛ yɛrama. ’Bɛ zo lé Balebanzan é dan mi ’ko lé wenyané ’yibo lɛ yé Bale é dan a ma we vo lɛ.

¹¹ Dé plala fié valé plawuo sua fié mafɛ ’ka a lee lo, é dan da lɛ élé wenyané ma ban nya burupun zima suoné do nya, yé ’bɛ kɛlɛ wenyané ’yibo saraka nya; té é nyɔnɔ zén a ma lo, té é lasikɔrɔ po pa a va lo, naa, wenyané ’yibofɛ lé, azama.

¹² É dan da lɛ a nya Balebanzan va, yé Balebanzan é dan a koli lɛ bɛ nya do we seledɔmigifɛ nya, yé é dan a kyɛ ble lɛ balebanna ta, woo winu kyɛ blé Gakelebale lɛ fɛan zo, a zo; wenyané ’yibofɛ lé.

¹³ Mi lé é we ’konu va we do kɛlɛ, ’bɛ zo lé Balebanzan é dan alé wenyané ’yibo lɛ, yé Bale é dan a ma we vo lɛ. Balebanfɛ pɔné lé é vo, ’bɛ a Balebanzan zé nya, bélé Gakelebale lé fɛblele lé we zo.

¹⁴ Gakelebale we fe Moizi lɛ léma:

¹⁵ Fɛnu lé wa plaan Gakelebale zé nya, dé mi a nɔ yuɛgiblan nya yé é wenyané kɛlɛ é tanyila, é dan wenyaa saraka bo lɛ Gakelebale lɛ alé wenyané ma; gɔɔlifu sikla ’léé lé é dia a ma, fɛna sauun lé sikla nya, ’bɛ yɛrama ’blagɔné lé we do ’ka a ma lo, yee lé ’é a si trubɛ va, é dɔ i gi fɛan zo, a zo, yé ’é wenyaa saraka bo a nya.

¹⁶ É fɛna sauun table fɛan zo, é dan ’bɛ yɛrama gɔɔli nɔ lɛ Balebanzan lɛ, yé é dan a fɛsoruzan pa lɛ a ma. Balebanzan é dan alé wenyané ’yibo lɛ ’blagɔné lé é wenyaa saraka bo a nya, a nya, yé Bale é dan a ma we vo lɛ.

¹⁷ Dé mi do wenyané kɛlɛ, yé we lé Gakelebale lé bélidɔwe a yi ga, yé é a kɛlɛ é tanyila, a pagi lé, yé we a é dɔle a nwiin.

¹⁸ É dan da lɛ wenyaa saraka bofɛ nya Balebanzan lɛ. É dan da lɛ ’blagɔné lé we do kpen ’ka a ma lo, ’té wa si trubɛ va, a lɛi lé bé gɔɔn, a nya. Yé wenyané lé é a kɛlɛ é tanyila, Balebanzan é dan a ’yibo lɛ yé Bale é dan a ma we vo lɛ.

¹⁹ Wenyaa saraka lé, naa, we a mi ’ko nwiin Gakelebale yuɛ gi, azama.

²⁰ Gakelebale we fe Moizi lɛ léma:

²¹ Dé mi do wenyané kɛlɛ yé a yuɛi blan Gakelebale vazia, é dan élé we bɛ pa lɛ ékema. Dé a bɔluzan fɛ do yɔɔ a va, dé a bɔluzan fɛ do bɛ pa a lee yé é vié wo é bɔluzan lɛ we ’ko gi, ’bɛ a do; dé é fɛ do si kyeen nya, taa, dé é a si gla nya, yé é vié wo é bɔluzan lɛ we ’ko gi, ’bɛ a do;

²² dé é fɛ sanle do ye yé é vié wo we ’ko gi, ’bɛ a do; dé é Bale ’nyɔɔn vié nya, wenu lé woo mi gya we nya, a do gi, ’bɛ a do;

^23-24 dé é wenyané kɛlɛ we ’konu va we do kɛlɛle nya yé ébo gyɛ we nya, é dan élé we bɛ pa lɛ ékema. Dé é a fɛ lé é a si kyeen nya, a nyaoo, dé é a fɛ lé é a si gla nya, a nyaoo, dé é a fɛ lé wa bɛ pa a lee, a nyaoo, dé é a fɛ sanle lé é a ye, a nyaoo, dé é a fɛan ta lé é bale ’nyɔɔn vié nya, a nyaoo, é dan a nɔ lɛ é pa gi. É dan a lɛi nɔ lɛ é pa gi, yé é dan fɛsoruzan pa lɛ a ma, yé é dan a lɛi nɔ lɛ azan lɛ, yian nya lé é wenyaa saraka ’ko bo, a yi duo nya.

²⁵ Alé wenyané ma lé, ’blagɔné lé we do kpen ’ka a ma lo, ’té wa si trubɛ va, a lɛi lé bé gɔɔn, a nya, é dan a nɔ lɛ Balebanzan lɛ, wenyaa saraka nya, Gakelebale lɛ.

²⁶ Yé Balebanzan é dan alé wenyané ’yibo lɛ Gakelebale ’lɛ, yé dé weowean ke a nwiin, yé Bale é dan a ma we vo lɛ ’bɛ ma.