Lévinu 4 - Kazambale lé Sebe Sauunu 1979

Wenyané ’yibo saraka

¹ Gakelebale we fe Moizi lɛ yé é léé: Bé fe Izraɛl munu lɛ léma:

² We lé é ’ka lé mi a kɛlɛ lo, dé mi do a kɛlɛ yé é Gakelebale lé bélidɔwe do sɛrɛ é tanyila,

³ dé wenyanékɛlɛzan a Balebanzan lé wo nyɔnɔ zén a nwiin, a nya, yé we ’ko nya lé é we dɔ munu nwiin, é a lé ’élé wenyané ’yibo saraka bo Gakelebale lɛ, dirigɔné boroné lé we do kpen ’ka a ma lo, a nya; wenyané ’yibo saraka lé.

⁴ É dan da lɛ dirigɔné nya zén‐ékevasɔkɔn ’léé, Gakelebale ’lɛ; yé é dan é bɛ pla lɛ dirigɔné ’wuo la, yé é dan a bɔrɔ bo lɛ Gakelebale ’lɛ.

⁵ Balebanzan lé wo nyɔnɔ zén a nwiin bɛ, é dan dirigɔné nyɛ si lɛ yé é dan da lɛ a nya zén‐ékevasɔkɔn gi;

⁶ é dan é bɛnwɔlɛ vɔ lɛ a nyɛ va yé é dan a ma puo lɛ gɔnɔ sɔrafié Gakelebale ’lɛ, fɛna sauun na, sɔ lé wa kɛlɛ kɔnmi nya, a yara.

⁷ Balebanna lé woo Bale baan lasikɔrɔ nya a ta, ’té é ke Gakelebale ’lɛ zén‐ékevasɔkɔn gi, Balebanzan é dan a nyɛ boo lɛ ana bélinu ma; yé é dan dirigɔné nyɛ faa zana lɛ balebanna lé woo balebanwi kyɛ blé ana zen‐ékevasɔkɔn ’léé, a punma.

⁸ É dan wenyané ’yibo dirigɔné nyɔnɔ faa si lɛ; a nyɔnɔ lé é séli vɔ a bun‐an ta valé a nyɔnɔ lé ke a bun‐annu méléna koo,

⁹ a kolimayere fié koo, wo ma nyɔnɔ valé a kolimiligi nyɔnɔ koo, a bli fee blɛn lé wa si a kolimayere sɔnɔ koo, woo lé.

¹⁰ Balebanzan é dan fɛ ’konu si lɛ, woo fɛnu sié bɔvɔ saraka dirigɔné va fɛan zo a zo, yé é dan wo kyɛ ble lɛ balebanna lé woo balebanwi kyɛ blé ana, a ta.

¹¹ Naa, dirigɔné kɔlɛ koo, a wi faa valé a ’wuo koo, a ganenu koo, a bun‐annu valé a bonu koo, ’bɛ gi lé dirigɔné wi faa,

¹² é dan go lɛ a nya sɔkɔn dɔna gini ’lɛ ma, fɛna tinle do na, fɛana lé woo kyɛyee zanaan, ana, yé é dan a kyɛ ble lɛ kyɛ nya; kyɛyee zun ta lé é dan a kyɛ ble lɛ.

¹³ Dé é kɛlɛ léé, Izraɛl munu faa wenyané kɛlɛ ’wo tanyila yé wo ’ka a gi dɔɔa lo, yé we lé é ’ka lé mi a kɛlɛ lo, yé wa kɛlɛ yé wo Gakelebale lé bélidɔwe do sɛrɛ yé wo we dɔ ’wobo nwiin ’bɛ nya,

¹⁴ yé wenyané lé wa kɛlɛ yé a ta bɔra sin, é a lé munu wenyané ’yibo saraka bo dirigɔné boroné nya, yé wo da a nya zén‐ékevasɔkɔn ’lɛ.

¹⁵ Izraɛl mi segelenu é dan ’wo bɛnu pla lɛ dirigɔné ’wuo la Gakelebale ’lɛ yé wo dan dirigɔné bɔrɔ bo lɛ Gakelebale ’lɛ.

¹⁶ Balebanzan lé wo nyɔnɔ zén a nwiin, é dan go lɛ dirigɔné nyɛ nya zén‐ékevasɔkɔn gi;

¹⁷ é dan é bɛnwɔlɛ vɔ lɛ a nyɛ va yé é dan a ma puo lɛ Gakelebale ’lɛ gɔnɔ sɔrafié, sɔ lé wa kɛlɛ kɔnmi nya, a yara.

¹⁸ É dan a nyɛ boo lɛ balebanna lé ke Gakelebale ’lɛ zén‐ékevasɔkɔn gi, a bélinu ma; yé é dan nyɛ faa zana lɛ balebanna lé woo balebanwi kyɛ blé ana, zén‐ékevasɔkɔn ’léé, a punma.

¹⁹ É dan dirigɔné nyɔnɔ faa si lɛ yé ’é a kyɛ ble balebanna ta.

²⁰ Wo wenyané ’yibo dirigɔné zé kɛlɛ fɛan zo, a zo duo lé wo dan dirigɔné ’ko zé kɛlɛ lɛ; wo fiénu kɛlɛbɛ a do. ’Bɛ zo lé Balebanzan é dan wolé wenyané ’yibo lɛ yé Bale é dan wo ma we vo lɛ.

²¹ É dan go lɛ dirigɔné nya sɔkɔn dɔna gini ’lɛ ma, yé é dan a kyɛ ble lɛ bélé dirigɔné vinin zo. É a munu faa lé wenyané ’yibo saraka nya.

²² Dé é kɛlɛ léé, munu nwiinzan do wenyané kɛlɛ yé we lé é ’ka lé mi a kɛlɛ lo, é a kɛlɛ é tanyila, yé é Gakelebale lé bélidɔwe sɛrɛ yé é we dɔ ébo nwiin ’bɛ nya,

²³ yé é da ’élé wenyané ta bɔra lɛ, é dan saraka bo lɛ boligɔné lé we do kpen ’ka a ma lo, a nya.

²⁴ É dan ’é bɛ pla lɛ boligɔné ’wuo la yé é dan a bɔrɔ bo lɛ, balebanwi lé wa kyɛ blé, woo wo bɔrɔ boo Gakelebale ’lɛ fɛana, ana. Wenyané ’yibo saraka lé.

²⁵ Balebanzan é dan é bɛnwɔlɛ vɔ lɛ wenyané ’yibo saraka wi nyɛ va, yé é dan a boo lɛ balebanna lé woo balebanwi kyɛ blé a ta, a bélinu ma, yé é dan a nyɛ zana lɛ balebanna lé woo balebanwi kyɛ blé a ta, a punma.

²⁶ É dan a nyɔnɔ faa kyɛ ble lɛ balebanna ta, woo bɔvɔ saraka lé winyɔnɔ zé kɛla fɛan zo, a zo. ’Bɛ zo lé Balebanzan é dan minwiinzan lé wenyané ’yibo saraka bo lɛ yé Bale é dan a ma we vo lɛ.

²⁷ Dé é kɛlɛ léé, munu va mi do wenyané kɛlɛ é tanyila yé we lé é ka lé mi a kɛlɛ lo, yé é a kɛlɛ yé é Gakelebale lé bélidɔwe sɛrɛ yé é we dɔ ébo nwiin ’bɛ nya,

²⁸ yé é da ’élé wenyané ta bɔra lɛ, é dan saraka bo lɛ bolida lé we do kpen ’ka a ma lo, a nya; alé wenyané ma saraka lé.

²⁹ É dan é bɛ pla lɛ wenyané ’yibowi ’wuo la, yé é dan a bɔrɔ bo lɛ Balebanwi lé wa kyɛ blé, woo wo bɔrɔ boo fɛana, ana.

³⁰ Balebanzan é dan ’é bɛnwɔlɛ vɔ lɛ wi nyɛ va yé é dan a boo lɛ balebanna lé woo balebanwi kyɛ blé a ta, a bélinu ma, yé é dan a nyɛ faa zana lɛ balebanna punma.

³¹ Balebanzan é dan a nyɔnɔ faa si lɛ, woo bɔvɔ sarakawi nyɔnɔ sié fɛan zo, a zo, yé é dan a kyɛ ble lɛ balebanna ta, yé Gakelebale é dan a gin si lɛ néné. ’Bɛ zo lé Balebanzan é dan mi ’ko lé wenyané ’yibo lɛ, yé Bale é dan a ma we vo lɛ.

³² Dé é ’blané nɔ wenyané ’yibofɛ nya, ’blada lé we do kpen ’ka a ma lo, ’é yee ɛ nɔ.

³³ É dan ’é bɛ pla lɛ wi ’wuo la yé é dan a bɔrɔ bo lɛ wenyané ’yibo saraka nya, Balebanwi lé wa kyɛ blé, woo wo bɔrɔ boo fɛana, ana.

³⁴ Balebanzan é dan ’é bɛnwɔlɛ vɔ lɛ wi nyɛ va yé é dan a boo lɛ, balebanna lé woo balebanwi kyɛ blé a ta, a bélinu ma, yé é dan a nyɛ faa zana lɛ balebanna punma.

³⁵ Balebanzan é dan a nyɔnɔ faa si lɛ, woo bɔvɔ saraka ’blané nyɔnɔ sié fɛan zo a zo, yé é dan a kyɛ ble lɛ balebanna ta, saraka lé kyɛ a blé Gakelebale ’lɛ, a nya. ’Bɛ zo lé Balebanzan é dan mi ’ko lé wenyané ’yibo lɛ, yé Bale é dan a ma we vo lɛ.