Lévinu 27 - Kazambale lé Sebe Sauunu 1979

Balekunlenu valé fɛvuzannu

¹ Gakelebale we fe Moizi lɛ yé é léé:

² Bé fe Izraɛl lé nénu lɛ léma: Dé mi do Bale kun, dé é a mi lé we nya, é dan kɛlɛ lɛ Gakelebale zé nya, é dɔ Moizi gi fɛan zo, a yɛrama.

³ Dé é a gɔné lé a lɛɛ bɔ yɔ do valé yɔ yaa méléna, a mafɛ a gɔɔlifu sikla yɔ fié wɔlɛ vu, fɛna sauun lé sikla yɛrama;

⁴ dé é a le nya, bé mafɛ fe sikla yɔ do wɔlɛ vu.

⁵ Nénu lé wo lɛɛ éé bɔa soru valé yɔ do méléna, ’i gɔnézan mafɛ fe sikla yɔ do, yé ’i le zé fe sikla vu.

⁶ Dé wo lɛɛ ’ka tan bɔ lɛ soru lo, ’i gɔnézan mafɛ fe gɔɔlifu sikla soru, yé ’i le zé kɛlɛ gɔɔlifu sikla yaa.

⁷ Dé wo lɛɛ gié yɔ yaa ta, ’i gɔné mafɛ fe sikla vu ta soru, yé ’i le zé fe sikla vu.

⁸ Gɔɔli ’léé lé bé fe bɛ, dé a banwofɛ ’ka Balekunzan lee lo, wo dan da lɛ a nya Balebanzan va yé ’bɛ é ban dɔ a nwiin, yé ’bɛ é dan a mafɛ fe lɛ, gɔɔli lé ke gɔnézan ’ko lee, a yɛrama.

⁹ Dé é a Gakelebale banwinu lé we nya, wi faa lé wa no Gakelebale lɛ, é a fɛ plɛplɛ lé a ’lɛ ke, a nya.

¹⁰ Wo ’ka wo tavɔɔan lo, wo ’ka a nyané dɔa a zin pai lo, yé wo ’ka a zin dɔa a nyané pai lo; dé wo wi tavɔɔwi nɔ, wo fiénu a fɛ plɛplɛ lé a ’lɛ ke, a nya.

¹¹ Dé é a wi tiridɔlenu lé wo ’ka Gakelebale baan wo nya lo, wolé we nya, ’wo da ’bɛ wi nya Balebanzan lɛ,

¹² yé é dan a mafɛ fe lɛ a zin valé a nyané yɛrama, yé gɔɔli ’lééan Balebanzan a fe bɛ, wo dan a nɔ lɛ.

¹³ Dé é sɔ wo lɛ léé, wa tabo, ’wo gɔɔli ’léé ’ko soruzan pa a ma.

¹⁴ Dé mi do élé kɔn pa é yɛrama Gakelebale zé nya, Balebanzan é dan a mafɛ fe lɛ a zin valé a nyané yɛrama, yé wo dan dɔ lɛ Balebanzan dére ta.

¹⁵ Mi lé élé kɔn nɔ Bale lɛ bɛ, dé é sɔ a lɛ léé, ’é a tabo, ’é gɔɔli ’léé ’ko soruzan pa a ma, yé kɔn é dan kɛlɛ lɛ azé nya.

¹⁶ Dé mi do élé féi do pa é yɛrama Gakelebale zé nya, i dan a mafɛ fe lɛ, fɛwɔlɛ lé wa vɔ yee féi ta, a yɛrama, sɔnmléwɔlɛ vlekyɛɛ vu, gɔɔlifu sikla yɔ fié wɔlɛ vu.

¹⁷ Dé é ’élé féi pa é yɛrama Bale zé nya lɛɛ nyané gi, wo dan dɔ lɛ a ’léé lé Balebanzan a fe, a ta;

¹⁸ dé é ’élé féi pa é yɛrama lɛɛ nyané zuo, Balebanzan é dan a mafɛ fe lɛ, lɛɛ lé é vo fɔɔ yé lɛɛ nyané é bɔ, a yɛrama, yé a mafɛ ’léé lé é a fe bɛ, é dan a ke si lɛ a ta.

¹⁹ Mi lé ’élé féi pa é yɛrama bɛ, dé é sɔ a lɛ léé, ’é a tabo, féi mafɛ lé bé fe bɛ, é dan a soruzan pa lɛ a ma a taa nya, yé féi é dan vo lɛ a lee.

²⁰ Dé é ’ka féi ’ko tabo lɛ lo, dé é a dan mi bɛ lee, wo ’ka bɔa a tabole lɛ é dɛrɛ lo.

²¹ Dé féilɔzan si a ta lɛɛ nyané nya, wo dan féi ’ko pa lɛ é yɛrama yé é vo bélé féi lé wa vo Gakelebale zé nya, a zo; é dan kɛlɛ lɛ Balebanzan zé nya.

²² Dé mi do féi do lɔ yé é ’ka alé fɛna nya é kyɛn lo, yé é sɔ a lɛ léé, ’é a nɔ Gakelebale lɛ,

²³ Balebanzan é dan a vlɛ fe lɛ, lɛɛnu lé é vo fɔɔ yé lɛɛ nyané é bɔ, a yɛrama, é dɔ i gi fɛan zo, a zo; yé mi ’ko é dan a banwo lɛ yee yi duo nya, a vlɛ lé wa fe, a nya, naa, é a é pale é yɛrama Gakelebale zé nya, azama.

²⁴ Lɛɛ nyané nya, féi é dan nɔla lɛ mi lé é a lɔ a lee, ’bɛzan lee, yé é dan kɛlɛ lɛ azé nya é pai.

²⁵ Fɛnu mafɛ faa lé bé fé, é dan kɛlɛ lɛ fɛna sauun lé sikla yɛrama; sikla do a géra yɔ do nya.

²⁶ Mi do kpen ’ka bɔa ’élé trubɛnu lé né vininnu pale lɛ é yɛrama lo, é a Gakelebale zé nya é kwakwa, a yaale né vininzan nya lé we ma. Dé é a diri nyaoo, dé é a ’bla nyaoo, é a Gakelebale zé nya.

²⁷ Dé é a wi tiridɔle lé we nya, wo dan ’bɛ tabo lɛ, bé ’léé fe fɛan zo, a zo, yé wa taa pa a ma a soruzan nya; dé wo ’ka a tabo lɛ lo, wo dan a dan lɛ, bé vlɛ fe fɛan zo, a va.

²⁸ Fɛ faa lé mi a no Gakelebale lɛ bale pale a ma nya élé fɛnu va, wo ’ka bɔa a danle lɛ lo, yé wo ’ka bɔa a tabole lɛ lo; dé mi léé, dé wi léé, dé alé fɛna va féi do léé, a zo lé alé we ke; fɛ faa lé wa no bale pale a ma nya, é a Gakelebale zé nya é ta lé kɔn‐an.

²⁹ Mi lé wa nɔ bale pale a ma nya, wo ’ka bɔa a tabole lɛ lo, ga ɛ ’bɛ nyaan.

³⁰ Tɛrɛ lé fɛvuzan faa, dé é a féifɛnu nyaoo, dé é a yiliporonu nyaoo, wa Gakelebale zé nya; é a fɛ do lé wa pa é yɛrama Gakelebale zé nya, a nya.

³¹ Dé é sɔ mi do lɛ léé, élé fɛvuzan do tabo, ’é a taa pa a soruzan nya.

³² Dé i a ilé winu nɔnɔna, wi faa lé éé giéan ilé ’blatabinyili wuo, dé diri léé, dé trubɛnu léé, a vuzan faa a Gakelebale zé nya.

³³ Wo ’ka dan a ma gini lɛ lo, dé a zin léé, dé a nyané léé, a yele we gi lo, yé wo ’ka a tavɔɔan lo; dé wo wi do nɔ wi bɛ pai, wo fiénu kɛlɛ fɛ plɛplɛ nya, yé wo ’ka wo taboo lo.

³⁴ Bélidɔwenu lé Gakelebale a nɔ Moizi lɛ Izraɛlnu zé nya Sinai gɔ nwiin, wo lé ke bɛ.