Lévinu 25 - Kazambale lé Sebe Sauunu 1979

Lɛɛ sɔrafiézannu

¹ Gakelebale we fe Moizi lɛ Sinai gɔ nwiin yé é léé:

² Bé fe Izraɛlnu lɛ léma: Dé ka bɔ tɛrɛ lé maa a nɔ ka lɛ, a ta, ana tɛrɛ é dan flin lɛ; é dan kɛlɛ lɛ flin lɛɛ nya, Gakelebale tɔ bɔle we gi.

³ Ka dan féi pa lɛ lɛɛ suiɛdo gi, yé ka dan kalé dɔrɔféi dɔrɔkwɛɛnu bɔi lɛ lɛɛ suiɛdo gi, yé ka dan wo poronu so lɛ.

⁴ Naa, a lɛɛ sɔrafiézan a flin lɛɛ nya, ’bɛ a tɛrɛ flin bléyi nya, Gakelebale tɔ bɔle we gi; té ka féi pa lo, té ka kalé dɔrɔféi dɔrɔkwɛɛnu bɔi lo.

⁵ Té ka ’sagɔi gyɛ lo; kalé dɔrɔ nénu lé wo nwa wo ma yé wo poro baa, té ka wo so lo; é a tɛrɛ lé flin lɛɛ nya.

⁶ Fɛ lé é dɔ kalé tɛrɛ flin bléyi va, é a kalé fɛblele nya; bii koo, i wuogɔné valé i wuole koo, ilé nyanamapazan valé bɛn lé ke é nyanale i va koo,

⁷ ilé trubɛnu valé winu lé ke ilé tɛrɛ la koo, é a kalé fɛblele nya; fɛ faa lé é dɔ, é a fɛblele nya.

Lɛɛ nyané lé we

⁸ ’Ka flin lɛɛ sɔrafié nɔnɔ, ’é kɛlɛ lɛɛ sɔrafié sɔrafié gɔnɔ sɔrafié, yé flin lɛɛ sɔrafié ’ko, a lɛɛ é dan kɛlɛ lɛ lɛɛ yɔ fié wɔlɛ sɔraziɛn nya.

⁹ Moné sɔrafié lé yi vuzan nya, ka dan bélinu fɛn lɛ yé a zuoi éé goo wele nya; wenyané ’yibo yi nya, ka dan béli fɛn lɛ kalé tɛrɛ faa la.

¹⁰ A lɛɛ yɔ fié wɔlɛ vuzan ’é kɛlɛ kalé lɛɛ nyané nya; ka dan vole éboma ’ko zana dɔɔ lɛ kalé tɛrɛ la munu faa lɛ; é a kalé lɛɛ nyané nya; ka faa do do é dan nɔla lɛ kalé fɛna; yé ka faa do do é dan nɔla lɛ kalé munu va.

¹¹ A lɛɛ yɔ fié wɔlɛ vuzan é dan kɛlɛ lɛ kalé lɛɛ nyané nya; té ka féi pa lo; fɛ lé é kɛlɛ féi é boan, té ka ’bɛ gyɛ lo; kalé dɔrɔ nénu lé wo nwa wo ma yé wo poro baa, té ka wo so lo.

¹² É a lɛɛ nyané nya, ’bɛzama; ’ka ye kalé fɛ plɛplɛ do nya. Ka dan kalé féifɛ ble lɛ.

¹³ Lɛɛ nyané ’ko gi, ka faa do do é dan nɔla lɛ kalé fɛna.

¹⁴ Dé ka fɛ dɔ ka bɔluzan lee, ɛɛ, dé ka fɛ dɔle si ka bɔluzan lee, té ka dabli kɛlɛ ka ke lɛ lo.

¹⁵ Dé i fɛ dɔle si i bɔluzan lee, lɛɛ nyané lé ’bɛ gié, ’i ’bɛ nɔnɔ, yé féipalɛɛ lé ’bɛ vo yé lɛɛ nyané é bɔ, ’i ’bɛ nɔnɔ, yé ’ka a ’léé fe ’bɛ yɛrama.

¹⁶ Dé lɛɛ vo kiɛre, ’ka a taa pa, dé lɛɛ vo sɛ, ’ka a vlɛ ke si a ta; naa, yee lé bé lɔ, ’bɛzama.

¹⁷ Té ka va mi do kpen é dabli kɛlɛ é bɔluzan lɛ lo, ’i kana ilé Bale lee; naa, maa a Gakelebale, kalé Bale nya.

Lɛɛ sɔrafiézan lé fɛblele

¹⁸ ’Ka tawo anlé bélidɔwenu ta, ’ka an dérenu lɛdɔma yé ’ka wo ta tawo, yé ka dan nyana lɛ ana tɛrɛ la duaa.

¹⁹ Tɛrɛ é dan baa lɛ ka lɛ, ka dan fɛ ble lɛ yé ka kan, yé ka dan nyana lɛ ana duaa.

²⁰ Dé ka fe léé, dé ko ’ka féi pa lɛ yé ko fɛ gyɛ lo ’naan, ko dan mɛ fɛ ble lɛ lɛɛ sɔrafiézan nyaa?

²¹ maa dan kalé lɛɛ suiɛdozan drɔɔ vo lɛ, yé ’bɛ lɛɛ gi kalé fɛ é dan dɔ lɛ lɛɛ yaa zé nya.

²² Ka dan féi pa lɛ a lɛɛ sɔraazan nya, ’té ka fɛ kwa blé; fɔɔ yé é bɔ a lɛɛ sɔraziɛnzan ma yé kalé féifɛ dɛrɛ é bɔra, ’té ka fɛ kwa blé.

Fɛ nɔle ézannu lɛ

²³ Té ka tɛrɛ dan monomono lo; naa, tɛrɛ a anzé nya, yé ka a an va bélé bɛn zo, bélé fɛginizannu zo.

²⁴ Tɛrɛ faa lé é dan kɛlɛ lɛ kazé nya, é a lé ka tɛrɛ tabole se kɛlɛ munu lɛ.

²⁵ Dé i bwe kɛlɛ nyanégyɛzan nya yé élé tɛrɛ buru do dɔ, mi lé a tabole se ke a lɛ, ’té é ke a gɔnɔlazan nya, ’bɛ é dan fɛ lé a bwe a dɔ, a tabo lɛ.

²⁶ Dé mi lé a tabole se ke a lɛ, dé ’bɛ ’ka lo, dé yeebozen a tabofɛ ye,

²⁷ é fɛ dɔ bléyian va, ’bɛ lɛɛ lé ’bɛ gié, ’é ’bɛ nɔnɔ, yé yee lé é vo, ’é a mafɛ nɔ a dɔleezan lɛ, yé fɛ é dan nɔla lɛ azé nya.

²⁸ Dé é ’ka a tabofɛ ye lɛ lo, fɛ lé é a dɔ bɛ, é dan vo lɛ a dɔleezan lee, fɔɔ yé lɛɛ nyané é bɔ; lɛɛ nyané nya, alé féi é dan vo lɛ a lee, yé a dɔleezan é dan si lɛ ana.

²⁹ Fla lé gɔrɔ ke é bole a zi, dé mi do é nyanakɔn dɔ mi do lɛ ’bɛna, é sia a dɔbléyi ma, yé é bɔ lɛɛ do, a tabole se a a lɛ; a tabole se a a lɛ lɛɛ do ’ko nya.

³⁰ Naa, kɔn ’ko lé ke fla lé gɔrɔ ke é bole a zi, a ta, é sia a dɔbléyi ma, dé lɛɛ do lɛ sɔɔ yé wo ’ka a tabo lɛ lo, é dan vo lɛ lɛɛfaama a dɔleezan valé élé nénu lee; é ’ka dan bɔra lɛ a gi lɛɛ nyané nya lo.

³¹ Fla lé gɔrɔ ’ka é bole a zi lo, alé kɔnnu a bélé féi zé zo; ’bɛ tabole se a, yé a dɔleezan é dan si lɛ a gi lɛɛ nyané nya.

³² Dé é a Lévinu lé flanu valé wolé kɔnnu nya, a tabole se a Lévinu lee, glɛ ’ka ’bɛ gi lo.

³³ Mi lé é kɔn lɔ Lévi mi lee, é dan si lɛ a gi lɛɛ nyané nya, yé é dan si lɛ yee fla boen ta; naa, Lévinu lé flanu valé wolé kɔnnu a wozé fɛna nya Izraɛl munu va.

³⁴ Féinu lé ke Lévinu lé flanu zi, wo ’ka ’bɛ dɔa lo; naa, wa Lévinu zé nya lɛɛfaama, ’bɛ glɛ ’ka lo.

Fɛ drɔn pale nyanégyɛzan ma

³⁵ Dé nyané i bwe gyɛ i sɔnɔ yé a bɛwɔlɛi ’ka a ma lo, ’i bɔ a va; mi lé ke i va bɛn nya, bé kɛlɛ a lɛ yee duo zo, a vole é yuɛma i va we gi.

³⁶ Té i fɛpamale valé fɛ taa si a lee lo; ’i kana ilé Bale lee yé i bwe é dan vo lɛ é yuɛma i va.

³⁷ Té i gɔɔli drɔn pa a ma, a pamale yele we ma lo; té i vɛɛn pa a ma a taa yele we ma lo.

³⁸ Maa a Gakelebale, kalé Bale nya; maa ɛ ka si Éjipiti tɛrɛ la, Kanaan tɛrɛ nɔle ka lɛ yé an kɛlɛ kalé Bale nya we gi.

Luunu vole ’woboma

³⁹ Dé nyané i bwe gyɛ i sɔnɔ yé ébo dɔ i lee, té i luu panyanama nɔ a lɛ lo.

⁴⁰ ’É vo i va bélé nyanamapazan zo, bélé mi lé é nyana i lee, a zo; é dan vo lɛ ilé nyanama pana fɔɔ yé lɛɛ nyané ’é bɔ.

⁴¹ ’Bɛ yi nya lé é dan si lɛ i va, yee valé ’élé nénu nya, yé é dan go lɛ élé munu va, ’é tranu lé fɛna.

⁴² Naa, wa an wuomunu lé maa wo si Éjipiti tɛrɛ la, wo nya. Té ’wo wo dan bélé woo lunu daan fɛan zo, a zo lo.

⁴³ Té i pla a nwiin plɛplɛ lo; ’i kana ilé Bale lee.

⁴⁴ Bɛn bɛnu lé ke ka zi, ’bɛna lé ka dan kalé luugɔné valé luudané si lɛ yé wo dan kɛlɛ lɛ izé nya; wo va lé i dan luugɔné valé luudané lɔ lɛ.

⁴⁵ Bɛn bɛnu lé ke é nyanale ka va, i bɔalɛ léé, i wolé nénu lɔ é ziin; bɛn bɛnu lé nénu lé wo dan wo yaa lɛ kalé tɛrɛ la, ’ka ’bɛnu lɔa yé ’wo kɛlɛ kazé nya.

⁴⁶ Wo dan vo lɛ kalé zarafɛnu nya, kalé nénu zé nya ka zuo; wo dan vo lɛ kalé luunu nya lɛɛfaama, ’bɛ glɛ ’ka lo. Naa, dé é a ka bwenu Izraɛlnu nya, té ka va mi do kpen é pla é bwe nwiin plɛplɛ lo.

⁴⁷ Bɛn bɛ mi do lé ke é nyanale ka va, dé é kɛlɛ fua nya, yé i bwe lé ke é nyanale a sɔnɔ, dé ’bɛ kɛlɛ nyanégyɛzan nya yé ’bɛ ébo dɔ bɛn lé ke é nyanale ka va, a lee, dé ’bɛ kaan lo, dé ébo dɔ a lele do lee,

⁴⁸ a tabole se ana, abo dɔle zuo; a bwenu é bɔalɛ léé, wa tabo.

⁴⁹ Dé a ti bwe valé a ti zuan léé, dé a ti bwe valé a zuan be léé, dé wo gɔnɔlazan do léé, ’bɛ é bɔalɛ léé, ’bɛ a tabo; dé ’bɛ kaan lo, dé abozen fɛ ye, é bɔalɛ léé, ébo tabo.

⁵⁰ É sia abo dɔ lɛɛ ma, fɔɔ yé é bɔ lɛɛ nyané ma, yee valé é dɔleezan é dan ’bɛ lɛɛnu nɔnɔ lɛ; wo dan a tabo gɔɔli ’léé dɔɔ lɛ a lɛɛnu ’léé yɛrama; wo dan a gɔɔli nɔnɔ lɛ nyanamapazan lé gɔɔli zo.

⁵¹ Dé a lɛɛnu a tan di, wo dan a tabo gɔɔli nɔ lɛ ’bɛ yɛrama, ’té a dɔ?-?vagɔɔli ’léé ginin a wo gi.

⁵² Dé a lɛɛ vo sɛ yé lɛɛ nyané é bɔ, wo dan ’bɛ nɔnɔ lɛ, yé wa tabo ’bɛ lɛɛnu ’léé yɛrama.

⁵³ É dan kɛlɛ lɛ bélé lɛɛmazan lé ke nyanama pana, a zo; mi lé é ke a va bɛ, té ’bɛ é pla a nwiin plɛplɛ ka yuɛ va lo.

⁵⁴ Dé a tabozan do kpen ’ka ye lɛ lo, é dan bɔra lɛ lɛɛ nyané gi, yee valé é nénu nya.

⁵⁵ Naa, Izraɛlnu a maa ɛ lé luu nya, ’bɛzama; wa anlé luunu lé maa wo si Éjipiti tɛrɛ la, wo nya. Maa a Gakelebale, kalé Bale nya.