Lévinu 24 - Kazambale lé Sebe Sauunu 1979

Fintran valé Bale ’lɛburu lé we

¹ Gakelebale we fe Moizi lɛ yé é léé:

² Bé fe Izraɛlnu lɛ léé, ’wo da fintran zé nyɔnɔ nya i lɛ, ɔliviwɔlɛ lé wa zɔn, a nyɔnɔ bozen nya, kyɛbɔ bile yifaama we gi.

³ Arɔn é dan a ma’lɛrɛ lɛ zén‐ékevasɔkɔn gi, sɔ lé ke wenayefɛ ’lɛ é dɔle, a ’lɛ zia, kyɛbɔnu bile bléyi faa va we gi Gakelebale yara, nyanadi fɔɔ yé bladi é pa. É a bélidɔwe lé a glɛ ’ka lo, a nya, ka kulunu zé nya.

⁴ É dan kyanfintran nɛnɛnu ma’lɛrɛ lɛ a bile yifaama we ma Gakelebale ’lɛ.

⁵ I dan burupun zima si lɛ yé i dan buru vu ta fié kɛlɛ lɛ; buru do burupun suoné nya fié.

⁶ I dan wo pla lɛ é ke ta lɛ fié, a lɛ do ’é kɛlɛ suiɛdo, yé a do ’é kɛlɛ suiɛdo, tablé lé ke kyan nya Gakelebale ’lɛ, a ta.

⁷ ’I lasikɔrɔpo tegele zén a lɛ fiénu ta, yé é dan kɛlɛ lɛ weseledɔmigifɛ nya buru ta, saraka lé wa kyɛ blé Gakelebale ’lɛ, a nya.

⁸ Flinyi do do faa ma wo dan buru ’konu pla lɛ Gakelebale ’lɛ; é a gipawe lé é ’ka nyaan lo, a nya, yé Izraɛl lé nénu é dan a tawe kɛlɛ lɛ.

⁹ Buru ’ko a Arɔn valé é benu zé nya yé wo dan wo ble lɛ fɛna plɛplɛ do na; é a wolé Bale ’lɛfɛ plɛplɛ nya, sarakanu lé wa kyɛ blé Gakelebale ’lɛ, é a wo va fɛ do nya. É a bélidɔwe lé é ’ka nyaan lo, a nya.

Balesɔnɔzan valé migyɛzan gi we lɛdɔle

¹⁰ Gɔné do lé a bu ke Izraɛl le nya yé a ti a Éjipiti gɔné nya, é da Izraɛlnu va yé é we sia Izraɛl mi do va fla.

¹¹ Izraɛl le be ’ko, é Bale sɔnɔ yé é Bale tɔ sauun sɔnɔ. Wo goan Moizi va. Wa bu laama Dibri lu Sélomit; Dan bɛn gi le lé.

¹² Wa vɔ kɔn gi, fɔɔ yé dé Gakelebale é dan a fe lɛ fɛan zo, yé Moizi a fe.

¹³ Yé Gakelebale lé Moizi lɛ léé:

¹⁴ ’Ka Balesɔnɔzan ’ko bɔra fla gini ma; munu faa lé wo dére ’ko ’ma, wo dan ’wo bɛ pla lɛ a nwiin, yé munu faa é dan gɔlɛ vuli lɛ a va yé ’é ga.

¹⁵ ’I we fe Izraɛlnu lɛ léé: Dé miomian bale pa élé Bale ma, ’té é wenyané dɔ ébo nwiin.

¹⁶ Mi lé é Gakelebale tɔ sɛrɛ, wo dan ga dɔ lɛ a nwiin; munu faa é dan gɔlɛ vuli lɛ a va. Dé é a bɛn bɛ gi mi nyaoo, dé é a flazan nyaoo, é dan ga lɛ; é Bale tɔ sɛrɛ, azama.

¹⁷ Mi lé é mi gyɛ, wo dan a gyɛ lɛ.

¹⁸ Mi lé é mi bɛ lé wi do gyɛ, é dan a lɛgi nɔ lɛ; fɛ yuɛmale faa valé é lɛgi pale lé.

¹⁹ Dé mi do é bɔluzan tuo, é a lé wa é tuo a zo;

²⁰ ’wo wɔlɛ yélile lɛi pa wɔlɛ yélile nya; ’wo yuɛ lɛi pa yuɛ nya, ’wo suiɛ lɛi pa suiɛ nya; fɛan zo lé mi é bɔluzan tuo, a bɛ duo gi lé wo dan a kɛlɛ lɛ yee é lɛ.

²¹ Mi lé é wi gyɛ, ’é a lɛi nɔ, naa, mi lé é mi gyɛ, wo dan a gyɛ lɛ.

²² Bɛn bɛ mi valé flazan lé bélidɔwe a do; naa, maa a Gakelebale, kalé Bale nya.

²³ Moizi we fe Izraɛl lé nénu lɛ; wo Balesɔnɔzan si fla yé wo gɔlɛ vuli a va. We lé Gakelebale a fe Moizi lɛ, Izraɛl lé nénu a kɛlɛ.