Lévinu 22 - Kazambale lé Sebe Sauunu 1979

Balebanwinu blele lé we

¹ Gakelebale we fe Moizi lɛ yé é léé:

² Bé fe Arɔn valé é benu lɛ léma: An ’lɛfɛnu lé Izraɛl lé nénu wo pa é yɛrama anzé nya, té wa ble lo; té wo an tɔ ’lɛzan kɛlɛ fɛ pla nya lo. Maa a Gakelebale nya.

³ Bé fe wo lɛ léma: Ka kulu valé ka gɔnɔgimunu faa lé wo bié Gakelebale ’lɛfɛnu lé Izraɛl lé nénu a pa é yɛrama Gakelebale zé nya, wo ma, ’té dé ’bɛzan ’ka é zima lo, ’bɛ mi ’ko, an dan ’bɛ si lɛ ana an yuɛi. Maa a Gakelebale nya.

^4-5 Arɔn gɔnɔ gi gɔné faa lé pantɛn gyɛ ke a ma, ɛɛ, dé frɔlɔgyɛ a a ma, té é fɛ plɛplɛ ’ko ble lo, fɔɔ ’té é kɛlɛ tegele. Mi lé é ’ka é zima lo ’é manele migale ma lé we ma koo, mi lé a ’yi so a ma koo, mi lé é mane tawoplɛlawi ma yé ’bɛ a kɛlɛ naané koo, dé fɛofɛan mi kɛlɛ naané, ’bɛzan koo, wolé we a yee bɛ duo gi.

⁶ Mi lé é mane fɛ ’konu ma, é ’ka é zima lo fɔɔ nyanadi; té é fɛ plɛplɛ ’konu ble lo, naa, ’é zuru;

⁷ yiri vɔle zuo é kɛlɛ tegele, ’bɛ zuo é dan fɛ plɛplɛ ’konu ble lɛ, naa, é a alé fɛblele nya.

⁸ Dé wi gale léé, dé wi lé a kɔlɛ ma mian, dé yee léé, té é a ble lo, dé ’bɛ é da a kɛlɛ naané. Maa a Gakelebale nya.

⁹ ’Wo anlé bélidɔwenu lɛdɔma, dé wo da wenyané dɔ wobo nwiin yé wo ga, fɛ plɛplɛ kɛlɛle fɛ pla nya we ma. Maa a Gakelebale nya, maa ɛ wo kɛlɛ segele.

¹⁰ Té bɛn do kpen é fɛ plɛplɛ ’ko ble lo; dé mi lé ke é nyanale Balebanzan va, ’bɛ valé alé nyanamapazan, té ’bɛnu é fɛ plɛplɛ ’ko ble lo.

¹¹ Naa, luu lé balebanzan a lɔ gɔɔli nya, ’bɛ é bɔaléé ’bɛ a ble, ’é valé mi lé wa yaa alé kɔn gi, ’bɛnu a ble; wo dan Balebanzan leefɛ ble lɛ.

¹² Balebanzan lu lé é mi pla si, Bale ’lɛfɛ plɛplɛ ’ko lé wa no a nwale valé a tuale nya, té é a ble lo.

¹³ Balebanzan lu lé é kɛlɛ gyɛzarale nya, ɛɛ, dé a zana a bɔra yé alé né ’ka lo, yé é da nyana lɛ é ti lé kɔn gi bélé é blɛnla zo, a se a a lɛ léé, ’é ’é ti leefɛ ble. Té bɛn do kpen a ble lo.

¹⁴ Dé mi do fɛ plɛplɛ do ble é tanyila, é dan fɛ plɛplɛ ma banwo lɛ Balebanzan lɛ, yé ’é a taa pa a soruzan nya.

¹⁵ Bale ’lɛfɛ plɛplɛnu lé Izraɛl lé nénu a nɔ Gakelebale lɛ wo nwale valé wo tuale nya, té Balebanzannu a kɛlɛ fɛ pla nya lo;

¹⁶ dé wa kɛlɛ, wo dan wenyané dɔ lɛ wobo nwiin Bale ’lɛfɛ plɛplɛ blele nya; naa, maa a Gakelebale nya, maa ɛ wo kɛlɛ mi segele nya.

Balebanwi sile a va

¹⁷ Gakelebale we fe Moizi lɛ yé é léé:

^18-19 Bé fe Arɔn valé é benu koo, Izraɛl lé nénu faa koo, wo lɛ léma: Dé é a Izraɛl lé mi nyaoo, ɛɛ, dé é a wo va bɛn bɛ mi nyaoo, dé é léé, ’é Gakelebale ban, balebanwi lé wa kyɛ blé, a nya, dé diri léé, dé ’bla léé, dé boli léé, a gɔné lé we do kpen ’ka a ma lo, ’é yee ɛ si; dé bale kunle lɛsɔɔle léoo, dé bli drɔɔ blɛ léoo, a zo lé ’é a kɛlɛ, Bale lé é ban‐ɛn blele we gi.

²⁰ Wi lé fɛ a a ma, té ka ’bɛ nɔ lo; Bale ’ka ’bɛlé é ban‐ɛn blé lo.

²¹ Dé mi do a a va léé, ’é bɔvɔ saraka bo Gakelebale lɛ, dé diri léé, dé trubɛ léé, yee lé fɛ ’ka a ma lo, ’é da yee ɛ nya; dé bale kunle lɛsɔɔle léé, dé bli drɔɔ blɛ léé, a zo lé alé we ke, Bale lé ’é ban‐ɛn blele we gi; té we do kpen é kɛlɛ a ma lo.

²² Wi yuɛwiile koo, wi ganegale koo, wi tuole koo, wi lé manɔn ke a ma, ɛɛ, dé koo ɛ ke a ma, ɛɛ, dé a ma baa, ’bɛ wi koo, té ka bale ban wo do kpen nya lo; té ka wo do kpen pa balebanna ta, saraka lé kyɛ a blé Gakelebale ’lɛ, a nya lo.

²³ Dé diri léé, dé ’bla léé, dé a mɛn do a grɔgrɔ, ɛɛ, dé é a kpégéléne, i bɔalɛ léé, i bli drɔɔ blɛ kɛlɛ ’bɛ nya, naa, dé é a bale kunle lɛsɔɔle nya, ’bɛ nyi ’ka sié lo.

²⁴ Dé nyɛ dɔ wi wuofɛ ma, ɛɛ, dé é ’wii, dé wa si é wo a gi, ɛɛ, dé wi blale lé, té ka ’bɛ nɔ Gakelebale lɛ lo; té ka saraka bo ’bɛ wi nya kalé tɛrɛ la lo.

²⁵ Té ka ’bɛ zo wi si bɛn bɛ mi do lee, a nɔle kalé Bale lé fɛblele nya we gi lo; naa, tuo a wo ma, ’bɛzama; fɛ a wo ma; Bale ’ka dan ’é ban‐ɛn ble lɛ lo.

²⁶ Gakelebale lé Moizi lɛ léé:

²⁷ dé diri léé, dé ’bla léé, dé boli léé, dé é né yaa, a né é dan vo lɛ é bu va yi sɔrafié; é sia a yi sɔraazan ma, wa nyi sié léé, saraka lé kyɛ a blé, ’wo ’bɛ bo a nya Gakelebale lɛ.

²⁸ Dé é a diri nyaoo, dé é a ’bla nyaoo, té ka wi do valé élé né bɔrɔ bo yi do nya lo.

²⁹ Dé ka bɔvɔ saraka bo Gakelebale lɛ, ’ka bo é bobɛ gi yé é ban‐ɛn ble.

³⁰ ’Ka a wi ble a yi duo nya; té ka a wi do kpen vo fɔɔ yé tu é kini a ma lo. Maa a Gakelebale nya.

³¹ ’Ka anlé bélidɔwenu lɛdɔma, yé ka wo ta tawo. Maa a Gakelebale nya.

³² Té ka an tɔ ’lɛzan kɛlɛ tɔ pla nya lo, an kɛlɛle segele Izraɛl lé nénu méléna we gi.

³³ Maa a Gakelebale nya, maa ka pa é yɛrama yé maa ka si Éjipiti tɛrɛ la, kɛlɛle kalé Bale nya we gi. Maa a Gakelebale nya.