Lévinu 21 - Kazambale lé Sebe Sauunu 1979

Balebanmunu dɔbɛ

^1-2 Gakelebale lé Moizi lɛ léé: Bé fe Balebanzannu Arɔn benu lɛ léé: Dé é ’ka abo lé mi tegele nya lo, té Balebanzan ébo tiri dɔ élé munu va migale lé we ma lo; a bu koo, a ti koo, a be koo, a bwe koo,

³ a buru lé ke blɛn nya, ’té é ’ka tan bo si lɛ lo, ’té é ke é nyanale a va, ’bɛ koo, woo lé é mane wo gale ma.

⁴ É a élé munu va wo nwiinzan nya, amalé té ébo kɛlɛ bélé mi pla zo yé ébo kɛlɛ naané lo.

⁵ Té Balebanzannu ’wo nwin puiɛ lo, té wo ’wo puo ma gun ma gyɛ lo, té wo pɔɔ gyɛ ’wo kɔlɛ ma lo.

⁶ Wa é sile a va wolé Bale zé nya; té wo ’wolé Bale tɔ kɛlɛ fɛ pla nya lo; naa, sarakanu lé wa bo Gakelebale lɛ, ’té wa kyɛ blé yé é kɛlɛ wolé Bale blefɛ nya bɛ, ’wo ɛ a bo; wa segele.

⁷ Dé bɔrɔdɛ le léé, dé le sɛrɛle léé, té wa si lo; lezan lé a zana a bɔra, té wa si lo; naa, Balebanmunu a é sile a va wolé Bale zé nya, azama.

⁸ Balebanzan ɛ kalé Bale blefɛ no, amalé ’ka a ye mi segele nya; maa, Gakelebale lé maa ka pa é yɛrama, maa a sauun, amalé é dan kɛlɛ lɛ mi segele nya ka lɛ.

⁹ Dé Balebanzan lu ébo sɛrɛ gɔnéginile nya, ’té é ’é ti sɛrɛ. ’Wa kyɛ ble.

¹⁰ Balebanzan lé ke é bwenu ’lɛzan nya, ’té wo Bale ’lɛnyɔnɔ zén a nwiin bɛ, ’té wa pa é yɛrama yé é balebannasɔnu zén‐é ’é ta bɛ, té é sɔ si é ’wuo ma lo, té ’élé sɔnu fia lo.

¹¹ Té é bié migale ma lo; té ébo kɛlɛ naané lo, dé a ti léé, dé a bu léé, wolé we ma lo.

¹² Té é si fɛna sauun na lo, té ’élé Bale lé fɛna sauun kɛlɛ fɛna pla nya lo; naa, alé Bale ’lɛnyɔnɔ a a nwiin bélé tɔkoro zo. Maa a Gakelebale nya.

¹³ Le lé é ’ka tan gɔné dɔɔ lɛ lo, ’é ’bɛ si é na nya.

¹⁴ Gyɛzarale koo, le bɔrale koo, le sɛrɛle koo, bɔrɔdɛle koo, té é wo do kpen si é na nya lo; naa, alé munu va blɛnzan lé é ’ka tan gɔné dɔɔ lɛ lo, ’é ’bɛ si.

¹⁵ Té ’é kulu tɔ sɛrɛ élé munu va lo; naa, maa a Gakelebale nya; maa ɛ kɛlɛ segele.

¹⁶ Gakelebale we fe Moizi lɛ yé é léé:

¹⁷ Bé fe Arɔn lɛ léma: A gɔnɔ gi mi valé a kulu la mi do lé fɛ do bɔ wo kɔlɛ ma, té wo bié Bale lé fɛblele nɔle we ma lo.

¹⁸ Gɔné faa lé we do bɔ wo kɔlɛ ma, bale ’lɛnyanama pale se ’ka wo lɛ lo; yuɛwiizan koo, tunbozan koo, korogyɛzan koo, dé é a mɛn do minilɛzan nya koo,

¹⁹ mi lé a wɔlɛ ’ka drɔle tegele lo koo,

²⁰ kɔnɔgyɛzan koo, mɛn do siéizan koo, yuɛnédɔzan koo, kwɛgyɛzan koo, puɛpuɛgyɛzan koo, mi lé a wuofɛ ’wii koo, woo lé.

²¹ Balebanzan Arɔn gɔnɔ gi mi faa lé we do bɔ wo kɔlɛ ma, té ’wo bié saraka lé wa kyɛ blé, a bole we gi Gakelebale lɛ lo; fɛ do bɔ a kɔlɛ ma, bɛwemalé é ’ka bɔalɛ léé, é bié alé Bale lé fɛblele nɔle we gi lo.

²² A se a a lɛ léé, é ’ézé Bale lé fɛ ble; Bale ’lɛfɛ koo, ’bɛ lé wa pa é yɛrama Bale zé nya koo, ’é a ble.

²³ Fɛ do bɔ a kɔlɛ ma, amalé té é go kɔnmikɛlɛsɔ vazia lo, té é bié balebanna sɔnɔ lo; té é anlé fɛna sauunnu kɛlɛ fɛ planu nya lo; naa, maa a Gakelebale nya; maa wo ’lɛ dɔ.

²⁴ ’Bɛ zo lé Moizi we fe Arɔn valé é benu koo, Izraɛl lé nénu faa koo, wo lɛ.