Lévinu 20 - Kazambale lé Sebe Sauunu 1979

We lɛdɔle mi gi

¹ Gakelebale we fe Moizi lɛ yé é léé:

² Bé fe Izraɛl lé nénu lɛ léma: Dé Izraɛl lé nénu va mi do léé, dé bɛn bɛ mi lé ke é nyanale Izraɛlnu va, dé yee léé, dé é ’élé né do kɛlɛ Mɔlɔk banfɛ nya, wo dan we lɛdɔ lɛ a gi ga nya. Ana tɛrɛ la munu é dan gɔlɛ vuli lɛ a va.

³ Yé maa, maa dan dɔ lɛ a ma yé maa dan a si lɛ élé munu va, ’élé nénu kɛlɛ Mɔlɔk banfɛ nya, yé é anlé fɛna sauun sɛrɛ yé é an tɔ plɛplɛ kɛlɛ tɔ pla nya, ’bɛzama.

⁴ Mi ’ko lé ’élé nénu kɛlɛ Mɔlɔk banfɛ nya, dé munu ’ka dɔ lɛ a ma yé wa gyɛ lo,

⁵ maabozen, é dan dɔ lɛ yee valé élé kɔngimunu ma yé maa dan a si lɛ élé munu va, yee valé munu faa lé woo goo Mɔlɔk zuo bélé bɔrɔdɛ le zo, bélé mi ’ko a kɛlɛ fɛan zo, a zo, wo nya.

⁶ Dé mi do go miléli laamunu valé ’monédɔmunu va, yé é wo kɛlɛwe kɛlɛ, maa dan dɔ lɛ a ma yé maa dan a si lɛ élé munu va.

⁷ Maa a Gakelebale, kalé Bale nya, amalé ’ka kabo pa é yɛrama yé ’ka kɛlɛ sauun.

⁸ ’Ka anlé bélidɔwenu kɛlɛ yé ’ka wo ta tawo. Maa a Gakelebale lé éé ka kɛla sauun, a nya.

⁹ Dé miomian bale pa é ti valé é bu ma, wo dan we lɛdɔ lɛ a gi ga nya; é bale pa é ti valé é bu ma; a nyɛ a ébo nwiin.

¹⁰ Dé mi do wenyané kɛlɛ gɔné na va, dé é wenyané kɛlɛ é bɔlu do na va, ’wo we lɛdɔ gɔnézan valé gɔné gini le gi ga nya.

¹¹ Dé mi do wenyané kɛlɛ é ti na va, dé é ’é ti na porole ye ’bɛ zo, ’wo we lɛdɔ gɔné ’ko valé le ’ko gi ga nya; wo nyɛ a wobo nwiin.

¹² Dé mi do yi gyɛ é be na va, ’wo we lɛdɔ wo fiénu gi ga nya; wo we vɔɔle kɛlɛ. Wo nyɛ a wobo nwiin.

¹³ Dé mi do yi gyɛ gɔné bɛ va bélé le zo, wo bozowe kɛlɛ; ’wo we lɛdɔ wo gi ga nya; wo nyɛ a wobo nwiin.

¹⁴ Dé mi do blɛnzan valé ’é bu si é nanu nya, ’bɛ a wenyané blɛn nya; gɔné ’ko koo, lomu ’ko koo, ’wo wo kyɛ ble, té wenyané blɛn ’ko zo é kɛlɛ ka va lo we gi.

¹⁵ Dé mi do yi gyɛ wi do va, ’wo we lɛdɔ a gi ga nya; yé ’ka wi gyɛ é ziin.

¹⁶ Dé lezan yi gyɛ wi va, ’ka yee le valé wi gyɛ; wo nyɛ a wobo nwiin.

¹⁷ Dé mi do é buru si, dé a ti lu léé, dé a bu lé néle léé, yé é ’bɛ porole ye yé ’bɛ a porole ye, ’bɛ a we dɛrɛdɛrɛ nya; wo dan wo si lɛ wolé munu yuɛ gi; é ’é buru poro, amalé é wenyané dɔ ébo nwiin.

¹⁸ Dé mi do yi gyɛ le lé é nɔla, a va, dé é a poro, dé é a nyɛ ta bɔra, dé lezan é nyɛ ta bɔra, wo dan wo fiénu si lɛ ’wolé munu va.

¹⁹ Té i bu buru poro lo, té i ti buru poro lo, naa, wa ibo lé munu nya; mi lé é ’bɛ kɛlɛ, é wenyané dɔ ébo nwiin.

²⁰ Dé mi do yi gyɛ é ti bwe na va, é ’é ti bwe na porole bɔra; wo wenyané dɔ wobo nwiin, wo dan vo lɛ sɔnzannu nya yé wo ga a zo.

²¹ Dé mi do é bwe na si, we tiridɔle lé; é ’é bwe na porole bɔra; wolé né ’ka dan ye lɛ lo.

²² ’Ka anlé bélidɔwenu faa valé an déretawenu faa lɛdɔma, yé ’ka wo ta tawo, léé, tɛrɛ lé maa a gona ka nya a ta yé maa ka nyana a ta kli, té é féé ka nya lo.

²³ Bɛnnu lé maa dan wo bin lɛ ka ’lɛ, té ka wo kɛlɛwe kɛlɛ lo; naa, wo we ’konu faa kɛlɛ, yé wa bélé bo zo an yuɛ gi.

²⁴ Maa a fe ka lɛ léé, wolé tɛrɛ é dan kɛlɛ lɛ kazé nya; maa dan a nɔ lɛ ka lɛ kazé nya; é a tɛrɛ nyɔnɔzan nya. Maa a Gakelebale, kalé Bale lé é ka valé bɛnnu kini ékema, a nya.

²⁵ É a lé ka wi zin valé wi tiridɔle worona dɔɔ, yé ka miané zin valé miané tiridɔle worona dɔɔ; winu koo, mianénu koo, tɛrɛvawi lé éé tawoo é plɛ ta koo, wo lé maa wo gɔɔn ka lɛ léé, wo tiri a é dɔle bɛ, té ka kabo tiri dɔ wo do nya lo.

²⁶ Maa, Gakelebale a sauun, amalé ’ka kɛlɛ sauun an lɛ; maa ka valé bɛnnu kini ékema léé, ’ka kɛlɛ anzé nya.

²⁷ Dé gɔné léé, dé le léé, dé woo migale léli laan, ɛɛ, dé woo ’moné dɔa, ’wo we lɛdɔ wo gi ga nya; ’wo wo gyɛ gɔlɛ nya; wo nyɛ a wobo nwiin.