Lévinu 19 - Kazambale lé Sebe Sauunu 1979

Balebɔzi tawenu

¹ Gakelebale we fe Moizi lɛ yé é léé:

² Bé fe Izraɛl lé nénu faa lɛ léma: Maa Gakelebale, kalé Bale, maa a sauun, amalé ’ka kɛlɛ sauun.

³ Ka faa do do, ’ka ti valé ka bu lɛdɔma yé ’ka anlé flinyi lé we kɛlɛ. Maa a Gakelebale, kalé Bale nya.

⁴ Té ka go miyilinu zuo lo, yé té ka bale selelenu kɛlɛ kabo lɛ lo.

⁵ Dé ka bɔvɔ saraka bo Gakelebale lɛ, ’ka bo ’é bobɛ nya yé é ban‐ɛn ble.

⁶ ’Ka sarakabowi ble a boyi valé élé tu kinile nya. Yee lé é vo yé yi yaa bɔ ’bɛ ma, ’ka kyɛ ble.

⁷ Dé wa ble yi yaazan nya, ’té wo fɛ sɛrɛle ble. ’Té Bale ’ka dan ’bɛ saraka ban‐ɛn ble lɛ lo.

⁸ Mi lé é a ble, é wenyané dɔ ébo nwiin, naa, é Gakelebale ’lɛfɛ kɛlɛ fɛ pla nya; mi ’ko bɛ, wo dan a si lɛ élé munu va.

⁹ Dé ka a ’sa gyɛna kalé tɛrɛ la, ’ka kalé féi sun do ta ’sa vo, yé té ka ’sagɔi sia lo.

¹⁰ Dé ka a kalé dɔrɔporo sona, a pan lé ka yuɛ gié a ta, té ka a so é dɛrɛ lo; a poro lé é dia, té ka ’bɛ sia lo. ’Ka ’bɛ vo nyanégyɛzan valé bɛn bɛ mi zé nya. Maa a Gakelebale, kalé Bale nya.

¹¹ Té ka kyeenwo lo, té ka viéwo ka ke lɛ lo, té ka dabli kɛlɛ ka ke lɛ lo.

¹² Té ka bale ’nyɔɔn an tɔ nya vié nya lo, naa, dé bé kɛlɛ, ’té ilé Bale tɔ kɛlɛ fɛ pla nya. Maa a Gakelebale nya.

¹³ Té ka yaa ka bɔlunu ta lo, té ka fɛ do kpen sia gla nya lo. Té ilé nyanamapazan ban é yii i lee fɔɔ yé tu é kini a ma lo.

¹⁴ Té i bale pa tɔnéwiizan ma lo; té i fɛ do pla yuɛwiizan ’lɛ, yé é kɛlɛ a diafɛ nya lo; naa, ’i kana ilé Bale lee. Maa a Gakelebale nya.

¹⁵ Dé ka a we blena, té ka weple kɛlɛ lo; té ka dɔ nyanégyɛzan zuo nyané lé a gyɛle we ma lo, té ka mi blɛn lé we kɛlɛ é blɛn ma lo, naa, ’ka bɔluzannu lé we ble we tegele yɛrama.

¹⁶ Té ka mitɔsɛrɛwe nwɛɛn kalé munu va lo. Té ka nwa ka bɔluzannu ma wo nyɛ zanale we ma lo. Maa a Gakelebale nya.

¹⁷ Té i bwe za pa i bli gi lo; é a lé i we pla i bɔluzan lɛ, naa, té i wenyané dɔ ibo nwiin alé we ma lo.

¹⁸ Té ibo lé we lɛ gi pa lo, té ilé munu vawe pa i bli gi lo. I bɔluzan ’é sɔ i lɛ bélé biibozen zo. Maa a Gakelebale nya.

¹⁹ ’Ka anlé bélidɔwe lɛdɔma. Té ka nyanama pa wi gɔnɔ fié nya ékeva lo; té ka fɛwɔlɛ gɔnɔ fié vɔ kalé féi lo; té i kununu vɔɔle sɔ zén i ta lo.

²⁰ Luudané lé a bwɛ ke, ’té wo ’ka a tabo lɛ lo, yé wo ’ka a vo lɛ éboma lo, dé mi bɛ wenyané kɛlɛ le ’ko va, wo dan we lɛdɔ lɛ wo gi, naa, té ’wo wo gyɛ lo, lezan ’ka éboma lo, azama.

²¹ Gɔné ’ko é dan da lɛ élé saanle ma ’blagɔné do nya wenyaa saraka bofɛ nya Gakelebale lɛ, zén‐ékevasɔkɔn ’léé.

²² Wenyané lé é a kɛlɛ bɛ, balebanzan é dan a ma wenyané ’yibo lɛ Gakelebale ’lɛ, wenyaa saraka ’blagɔné nya, yé wenyané lé é a kɛlɛ bɛ, wo dan a ma we vo lɛ.

²³ Dé ka bɔ ana tɛrɛ la, dé ka yili gɔnɔ faa suru, ka dan wo poronu ye lɛ bélé mi lé a gane ’ka é dɔle lo, a zo; lɛɛ yaa gi é dan kɛlɛ lɛ ka lɛ a zo; té ka wo poro ble lo.

²⁴ A lɛɛ ziɛnzan gi, ’wo wo poro faa pa é yɛrama Gakelebale zé nya, ’té ka gi éé nanaan.

²⁵ A lɛɛ soruzan nya, ka dan wo ble lɛ, yé ka dan vo lɛ wo sona. Maa a Gakelebale, kalé Bale nya.

²⁶ Té ka fɛ do kpen ble é nyɛ nya lo. Té ka ’moné dɔ fɛ do kpen nya lo.

²⁷ Té ka nwin bo koro ma lo; té ka puo ma gun ma gyɛ lo.

²⁸ Té ka kɔlɛ ma mian migale lé we ma lo; té ka kɔlɛ ma nyɔɔ gyɛ lo. Maa a Gakelebale nya.

²⁹ Té i lu vo léé, ’é kɛlɛ bɔrɔdɛ le nya lo, dé lomu faa é da kɛlɛ bɔrɔdɛ lomu nya, yé tɛrɛ é fan tɛrɛgyɛwe nya.

³⁰ ’Ka anlé flinyinu kɛlɛ yé ’ka anlé fɛna sauun ye fɛ blɛn nya. Maa a Gakelebale nya.

³¹ Té ka go miléli laamunu valé ’monédɔzannu va lo; te ka we laa wo lee lo, dé wo da ka tiri dɔ. Maa a Gakelebale, kalé Bale nya.

³² Dé nwanabɔzan bɔ i ma é nyanale, ’i nwa; ’i mi segele lɛdɔma. ’I kana Bale lee. Maa a Gakelebale nya.

³³ Dé bɛn bɛ mi da nyana lɛ ka va kalé tɛrɛ la, té ka yaa a ta lo.

³⁴ Bɛn bɛ mi lé ke é nyanale ka va, ’ka alé we kɛlɛ bélé kalé flami zo; ’é sɔ ka lɛ bélé kabozen zo, naa, ka a bɛnnu nya é vinin Éjipiti tɛrɛ la. Maa a Gakelebale, kalé Bale nya.

³⁵ Té ka we ple kɛlɛ weblele koo, fɛ sangi valé a ’wuola danle koo, fɛ danle kilo la koo, fɛ danle fɛdankana‐né gi koo, wolé we gi lo.

³⁶ Kalé fɛdanfɛ koo, kalé kilonu koo, kalé fɛdangifɛ éfa koo, kalé litré koo, ’wo kɛlɛ tegele. Maa a Gakelebale, kalé Bale lé é ka si Éjipiti tɛrɛ la, a nya.

³⁷ ’Ka anlé bélidɔwenu faa lɛdɔma, ’ka an déretawenu faa kɛlɛ, yé ’ka wo ta tawo. Maa a Gakelebale nya.