Lévinu 18 - Kazambale lé Sebe Sauunu 1979

Pɛnpɛnné gyɛli

¹ Gakelebale we fe Moizi lɛ yé é léé:

² Bé fe Izraɛl lé nénu lɛ léma: Maa a Gakelebale, kalé Bale nya.

³ We lé wa kɛla Éjipiti tɛrɛ lé ka nyana a ta bɛ, ana, té ka kɛlɛ lo; we lé wa kɛla Kanaan tɛrɛ lé maa a gona ka nya a ta bɛ, ana, té ka kɛlɛ lo; té ka wolé gɔnɔlawe kɛlɛ lo.

⁴ ’Ka an déretawe kɛlɛ, yé ’ka tawo anlé bélidɔwenu ta; ’ka wo lɛdɔma. Maa a Gakelebale, kalé Bale nya.

⁵ ’Ka anlé bélidɔwenu valé an déretawenu lɛdɔma; mi lé éé wo ta tawoo, é dan béli lɛ wo ma. Maa a Gakelebale nya.

⁶ Té ka va mi do kpen élé mi poro lo. Maa a Gakelebale nya.

⁷ Té i ti poro lo, té i bu poro lo. I bu lé, té bé poro lo.

⁸ Té i ti na poro lo. I ti zé bɛ.

⁹ Té i buru poro lo, dé i ti lé né léé, dé i bu lé né léé, dé wa yaa ka vaoo, dé wa yaa fɛ bɛnaoo, té bé poro lo.

¹⁰ Té i be lu poro lo, té i lu lé né le poro lo. Naa, ibo ma gɔɔnle lé.

¹¹ Né le lé i ti na a yaa i ti lɛ, té bé poro lo. I buru lé.

¹² Té i ti buru poro lo. I ti lé mi boen lé.

¹³ Té i bu buru poro lo. I bu lé mi boen lé.

¹⁴ Té i ti bwe poro lo. Té i bié a na ma lo. I bu lé.

¹⁵ Té i be na poro lo. I be na lé; té bé poro lo.

¹⁶ Té i bwe na poro lo. I bwe zé bɛ.

¹⁷ Té i le do valé é lu poro lo. Té i be lu valé i lu lé né le poro lo. Ibo lé mi lé wo nya. Tɛrɛgyɛwe lé.

¹⁸ Té i na buru si lo; té bé poro i na yuɛma bléyi va lo; ’bɛ éé dan we nya.

¹⁹ Té i bié le do va yé bé poro a nɔla bléyi va lo.

²⁰ Té i wenyané kɛlɛ i bɔlu bɛ na va lo, ’bɛ é dan i kɛlɛ lɛ é naané.

²¹ Té i Mɔlɔk banfɛ kɛlɛ ilé né do kpen nya lo; té ilé Bale tɔ sɛrɛ lo. Maa a Gakelebale nya.

²² Té i yi gyɛ gɔné va bélé le zo lo. Bozowe lé.

²³ Té i yi gyɛ wi va lo; ’bɛ i kɛlɛ naané. Té lezan é yi gyɛ wi va lo. ’Bɛ a bozowe nya.

²⁴ Bɛnnu lé maa dan wo bin lɛ ka ’lɛ, we ’konu faa nya lé wobo tiri dɔa; amalé té ka kabo tiri dɔ we ’konu do nya lo.

²⁵ Tɛrɛ boen tiri dɔ wo nya; maa dan we lɛdɔ lɛ a gi alé weplenu ma, yé tɛrɛ é dan féé lɛ é ta nyanazannu nya.

²⁶ ’Ka tawo anlé bélidɔwenu ta yé ’ka an déretawenu kɛlɛ; té ka bozowe ’ko do kpen kɛlɛ lo; dé flami léé, dé bɛn bɛ mi lé ke ka va, dé ’bɛ léé, té ka kɛlɛ lo.

²⁷ Munu lé wo nyana tɛrɛ ’ko la ka ’lɛ, wo bozowe ’konu faa kɛlɛ, yé tɛrɛ tiri dɔ.

²⁸ ’Ka yuɛ pa kabo va, dé tɛrɛ ’ko é da féé ka nya, fɛan zo lé é féé bɛnnu lé wo nyana ana ka ’lɛ, wo nya fɛan zo, a zo, ’té dé ka tɛrɛ tiri dɔ.

²⁹ Naa, munu faa lé wo bozowe ’konu va we do kɛlɛ, wo dan wo si lɛ wolé munu va.

³⁰ ’Ka an sɔnnénu pa, yé bozo gɔnɔlawenu lé woo wo kɛla ka ’lɛ, té ka wo do kpen kɛlɛ lo; té ka kabo tiri dɔ wo nya lo. Maa a Gakelebale, kalé Bale nya.