Lévinu 17 - Kazambale lé Sebe Sauunu 1979

Saraka bona

¹ Gakelebale we fe Moizi lɛ yé é léma: ’Bé fe Arɔn valé é benu koo, Izraɛl lé nénu faa koo, wo lɛ léma:

² We lé Gakelebale a fe ka lɛ, yee lé ke ’ko:

³ Dé diri léé, dé ’blané léé, dé boli léé, dé Izraɛl lé mi do a bɔrɔ bo, dé fla léé, dé bwii léé, ana,

⁴ yé é ’ka da lɛ a nya zén‐ékevasɔkɔn ’léé, Gakelebale banle we gi Gakelebale lé sɔkɔn ’lɛ lo, ’té nyɛwe a mi ’ko nwiin; é nyɛ zana é pla, amalé wo dan mi ’ko si lɛ ’élé munu va.

⁵ Wean ma lé Gakelebale a fe, é ’ka lé Izraɛlnu éé saraka boo féinu ta lo; é a lé ’wo da ’wolé balebanwi nya Balebanzan va Gakelebale ’lɛ, zén‐ékevasɔkɔn ’léé, yé ’wo bɔvɔ saraka bo Gakelebale lɛ wo nya.

⁶ Balebanzan é dan a nyɛ zana lɛ balebanna ta zén‐ékevasɔkɔn ’léé; é dan a nyɔnɔ kyɛ ble lɛ, yé Gakelebale é dan a gin si lɛ néné.

⁷ Yonu lé wo go wo zuo bélé bɔrɔdɛ le zo, té ’wo wo ban é dɛrɛ lo. É a bélidɔwe lé a glɛ ’ka lo, a nya, wo valé ’wo kulunu zé nya.

⁸ Amalé ’bé fe wo lɛ léma: Dé Izraɛl mi do léé, ɛɛ, dé bɛn bɛ mi lé ke é nyanale ka va, dé ’bɛ léé, balebanwi lé wa kyɛ blé, dé é a nɔ, ɛɛ, dé é balebanwi nɔ

⁹ yé é ’ka da lɛ Gakelebale ban lɛ a nya zén‐ékevasɔkɔn ’léé lo, mi ’ko, wo dan a si lɛ ’élé munu va.

Té ’wo wi nyɛ ble lo

¹⁰ Dé Izraɛl mi do léé, dé ka va bɛn bɛ mi do léé, dé é a fɛofɛan nyɛ nya, dé é a ble, maa dan an yara si lɛ ’bɛ nyɛblezan ta, yé maa dan a si lɛ ’élé munu va.

¹¹ Naa, nɛ bélifɛ lé ke nyɛ nya. Maa a nɔ ka lɛ balebanna ta, kalé wenyané ’yibole we ma, naa, bélifɛ lé ke nyɛ va, a nya lé woo kalé wenyané ’yiboo.

¹² Bɛwemalé maa fe Izraɛl lé nénu lɛ léé, té wo va mi do kpen é fɛ nyɛ ble lo, yé bɛn bɛ mi lé ke ka va, té wo nyɛ ble lo.

¹³ Dé é a Izraɛl mi nyaoo, dé é a wo va bɛn bɛ mi nyaoo, dé é a lu pana, yé wi valé miané lé wa blé, dé wa gyɛ, é dan a nyɛ zana lɛ yé é vun zén a ta.

¹⁴ Naa, nɛ faa bélifɛ a nyɛ lé ke a gi, a nya. Bɛwemalé maa a fe Izraɛl lé nénu lɛ léé, té wo fɛ do kpen nyɛ ble lo; naa, fɛ é vo é yuɛma é nyɛ nya; dé miomian a ble, wo dan a si lɛ élé munu va.

¹⁵ Dé flami léé, dé bɛn bɛ mi léé, mi faa lé wo wigale ble, ɛɛ, dé wi lé fɛ a kini ékema, dé mi do a ble, é dan élé sɔnu zuru lɛ yé ébozen zuru yé é dan vo lɛ duowo é naané fɔɔ nyanadi, ’bɛ zuo yé ’é kɛlɛ tegele.

¹⁶ Dé é ’ka élé sɔnu zuru lɛ lo, dé é ’ka éboen zuru lɛ lo, ’té we a a nwiin é dɔle.