Lévinu 16 - Kazambale lé Sebe Sauunu 1979

Wenyané ’yibole lé fɛti

¹ Arɔn be fiénu lé wo da Gakelebale ’lɛ yé wo ga bɛ, wo gale zuo Gakelebale we fe Moizi lɛ é ziin.

² Gakelebale lé Moizi lɛ léé: Bé fe i bwe Arɔn lɛ léé, té é da sɔ zi Balekɔn gɔnɔma, nyanai zén mi la nyanana lé ke Bale lé kɛsu ta, a ’lɛ, bléyi faa ma lo, dé é da ga; naa, maa dan da lɛ nyanai zén mi la nyanana ta loru, lafu gi.

³ É a lé Arɔn ’é wɔra fɛna sauun tinle na fɛan zo, yee lé ke ’ko: É dan dirigɔné boroné si lɛ wenyané ’yibo saraka nya, yé é dan ’blagɔné si lɛ balebanwi lé wa kyɛ blé, a nya.

⁴ Balebannasɔ lé ke lɛnsɔ nya, ’té a bɛ ke grɔgrɔ bɛ, é a lé é ’bɛ zén ’é ta, yé kulili blɛnnu lé wa kini lɛnsɔ nya, ’é ’bɛ wo ’é ma; yé bɔn‐in kunsɔ lé wa kini lɛnsɔ nya, ’é ’bɛ dɔ a ta; ’é lɛnsɔ nɔɔn koro vuru ’é ’wuo ma; balebannasɔnu lé ke wo nya; dé é zuru faa é dan wo zén lɛ ’é ta.

⁵ É dan boligɔné fié ye lɛ Izraɛl lé nénu lee wenyané ’yibo saraka nya, yé é dan ’blagɔné do ye lɛ wo lee, balebanwi lé wa kyɛ blé, a nya.

⁶ Arɔn é dan wenyané ’yibo saraka bo lɛ élé dirigɔné nya, yé é dan kɛlɛ lɛ yee valé élé kɔngimunu lé wenyané ’yibofɛ nya.

⁷ É dan yee boligɔnénu fié si lɛ yé é dan wo dɔ lɛ Gakelebale ’lɛ, zén‐ékevasɔkɔn ’léé.

⁸ Arɔn é dan ’munnu zun lɛ boligɔné fié ’ko ma, ’munnu do a Gakelebale zé nya yé a do a bwiiboli zé nya.

⁹ Boligɔné lé wo ’munnu zun a ma Gakelebale tɔ nya, Arɔn é dan a bié lɛ yé é dan wenyané ’yibo saraka bo lɛ a nya.

¹⁰ Boligɔné lé wo ’munnu zun a ma bwiiboli tɔ nya, wo dan ’bɛ dɔ lɛ é yuɛma Gakelebale ’lɛ, léé, ’bɛ ’é kɛlɛ wenyané ’yibofɛ nya, yé wo dan a bin lɛ a gole bwi gi we ma.

¹¹ Arɔn é dan wenyané ’yibo saraka bo lɛ ’élé dirigɔné nya, yé é dan kɛlɛ lɛ yee valé ’élé kɔngimunu lé wenyané ’yibofɛ nya. É dan ’élé wenyané ’yibo dirigɔné bɔrɔ bo lɛ.

¹² É dan kyɛnyɛ si lɛ balebanna lé ke Gakelebale ’lɛ, a ta, yé ’é a fan kyɛnyɛsibɔ nya, yé lasikɔrɔ pun lé a gin ke é baba, é dan ’bɛ si lɛ bɛ nya fié; é dan go lɛ fɛ ’konu nya sɔ lé ke kɔnmi nya, a zi;

¹³ é dan lasikɔrɔ zén lɛ kyɛnyɛ ta Gakelebale ’lɛ, léé, a goi ’é sɔɔla nyanai zén mi la nyanana lé ke Bale lé kɛsu ta, a ta, yé é ’ka gaan lo.

¹⁴ É dan dirigɔné nyɛ si lɛ yé é dan a nwɛɛn lɛ é bɛnwɔlɛ nya nyanai zén mi la nyanana ’lɛ, yirinwanazia; é dan nyɛ nwɛɛn lɛ ’é bɛnwɔlɛ nya gɔnɔ sɔrafié nyanai zén mi la nyanana ’lɛ.

¹⁵ É dan munu lé wenyané ’yibo boligɔné bɔrɔ bo lɛ yé é dan go lɛ a nyɛ nya sɔ lé ke kɔnmi nya, a zi. É dan a kɛlɛ lɛ nyɛ ’ko nya fɛan zo lé é a kɛlɛ dirigɔné nyɛ nya, a zo; é dan a nwɛɛn lɛ nyanai zén mi la nyanana ta, ’é valé a ’lɛ.

¹⁶ ’Bɛ zo lé é dan saraka bo lɛ fɛna sauun zé nya, Izraɛl lé nénu lé tiridɔwenu valé wo ’é bélidɔwe sɛrɛlenu lé wo wenyané kɛlɛ a nya bɛ, wo we ma. É dan a kɛlɛ lɛ yee duo zo, zén‐ékevasɔkɔn lé we ma, ’té é ke wo va wolé tiridɔwenu méléna.

¹⁷ Bléyian va lé é dan wɔra lɛ fɛna sauun na, wenyané ’yibole we ma, té mi do kpen é kɛlɛ zén‐ékevasɔkɔn gi lo, fɔɔ ’té é bɔra. Yeebozen koo, alé kɔngimunu koo, Izraɛl munu faa koo, é dan wolé wenyané ’yibo lɛ.

¹⁸ Dé é bɔra é dan go lɛ balebanna lé ke Gakelebale ’lɛ, ana, yé é dan saraka bo lɛ balebanna zé nya; é dan dirigɔné nyɛ valé boligɔné nyɛ si lɛ, yé ’é a gié balebanna bélinu faa ma.

¹⁹ É dan a nyɛ nwɛɛn lɛ gɔnɔ sɔrafié balebanna ta; é dan a taa pa lɛ yé a ’lɛ ’é dɔ, Izraɛl lé nénu lé tiridɔwenu lé wa kɛlɛ, a ma.

²⁰ Fɛna sauun koo, zén‐ékevasɔkɔn koo, balebanna koo, dé é nyaa wo ma saraka bole nya, é dan bié lɛ boligɔné yuɛmale nya.

²¹ Arɔn é dan é bɛ fiénu pla lɛ boli yuɛmale ta, yé Izraɛl lé nénu lé weplenu koo, wolé wenyané faa lé wa kɛlɛ bélidɔwenu sɛrɛle nya koo, é dan wo faa fe lɛ boligɔné ’wuo ta; é dan wo dɔ lɛ boligɔné nwiin, ’bɛ zuo é dan so lɛ a va, yé é dan a binle bɛ pa lɛ mi do lee, yé ’bɛ goan bwi gi.

²² Boligɔné é dan go lɛ wolé weplenu faa nya é nwiin, tɛrɛ lé mi do kpen ’ka a ta lo, ana; wo dan a bin lɛ yé é go bwi gi.

²³ Arɔn é dan wɔra lɛ zén‐ékevasɔkɔn gi; lɛnsɔnu lé é wo zén ’é ta é wɔra bléyian va fɛna sauun na, é dan wo si lɛ ’é ta, yé ’é wo pla ana mi.

²⁴ É dan zuru lɛ fɛna sauun na, yé é dan ’élé sɔnu zén lɛ é ta é ziin. ’Bɛ zuo é dan bɔra lɛ yé ’é Bale ban, balebanwi lé wa kyɛ blé, a nya, azé koo, munu zé koo, wo nya, yé é dan ébozen valé munu lé wenyané ’yibo lɛ.

²⁵ Yé é dan wenyané ’yibowi nyɔnɔ kyɛ ble lɛ balebanna ta.

²⁶ Boli lé wa bin bɛ, mi lé é go a zuo, é dan élé sɔ zuru lɛ yé é dan zuru lɛ; ’bɛ zuo é dan da lɛ fla.

²⁷ Wenyané ’yibo dirigɔné valé wenyané ’yibo boligɔné lé wo go wo nyɛ nya fɛna sauun na, wo dan go lɛ wo nya fla gini ma, yé wo kɔlɛ koo, wo wi koo, wo bonu koo, wo dan wo kyɛ ble lɛ ’bɛna.

²⁸ Mi lé éé wo kyɛ blé, é dan ’élé sɔnu zuru lɛ yé aboen é dan zuru lɛ; a zuo é dan da lɛ fla.

²⁹ Kalé bélidɔwe do lé a glɛ ’ka lo, yee lé ke ’ko: Moné sɔrafié lé yi vuzan nya, ka dan kabo kɛlɛ lɛ kiéné; té ka nyanama do kpen pa lo, flazan koo, bɛn bɛ mi lé éé nyanaan ka va koo, té wo nyanama pa lo.

³⁰ Naa, ’yi ’ko nya lé wo dan kalé wenyané ’yibo lɛ, ka kɛlɛle tata we ma. Wenyané faa lé ka kɛlɛ Gakelebale yuɛ va, ka dan kɛlɛ tata wo we ma.

³¹ É dan kɛlɛ lɛ kalé flinyi valé kabo kɛlɛle kiéné yi nya. É a bélidɔwe lé a glɛ ’ka lo, a nya.

³² Balebanzan lé wo nyɔnɔ zén a nwiin yé wa bɛ pa balebanle ta é ti pai, yee ɛ dan wenyané ’yibowe ’ko kɛlɛ lɛ. Balebannasɔnu lé ke lɛnsɔ nya, é dan wo zén lɛ ’é ta.

³³ Fɛna sauun tinle lé ke é pale é yɛrama koo, zén‐ékevasɔkɔn valé ana balebanna koo, é dan wo ma saraka bo lɛ; é dan balebanzannu valé munu faa lé wenyané ’yibo lɛ.

³⁴ É a kalé bélidɔwe do lé a glɛ ’ka lo, a nya; lɛɛ do do faa ma wo dan Izraɛl lé nénu lé wenyané ’yibo lɛ. We lé Gakelebale a fe Moizi lɛ, wa kɛlɛ.