Lévinu 15 - Kazambale lé Sebe Sauunu 1979

Gɔné valé le kɛlɛle tegele lé we

¹ Gakelebale we fe Moizi valé Arɔn lɛ yé é léma:

² ’Ka fe Izraɛl lé nénu lɛ léma: Gɔné faa lé frɔlɔgyɛ vɔ wo ma, gyɛ ’ko é a kɛlɛ naané.

³ Frɔlɔgyɛ ’ko, é a kɛlɛ naané; dé a ’yi bɔraoo, dé a ’yi ’ka bɔra lɛ a gi looo, é kɛlɛ naané.

⁴ Fɛ faa lé éé yiaan wo ta, wo kɛlɛ naané; dé é nyana fɛofɛan ta, éé kɛla naané.

⁵ Dé mian mane alé yialafɛ ma, é dan élé sɔnu zuru lɛ, yé é dan éboen zuru lɛ, yé ’bɛzan é dan vo lɛ é naané fɔɔ yé nyanadi é pa.

⁶ Dé frɔlɔgyɛzan nyana fɛofɛan ta, dé mian nyana ’bɛ ta, é a lé élé sɔnu zuru yé é ’yi si yé éboen zuru yé é dan vo lɛ é naané fɔɔ yé nyanadi é pa.

⁷ Dé mian bɛ mane a kɔlɛ ma, é a lé élé sɔnu zuru yé é ’yi si yé éboen zuru, ’té é a duowo é naané fɔɔ yé nyanadi é pa.

⁸ Dé frɔlɔgyɛzan ’léli vɔ mi pla ma, mi ’ko é dan élé sɔnu zuru lɛ yé é ’yi si yé éboen zuru, yé é dan vo lɛ é naané fɔɔ yé nyanadi é pa.

⁹ Dé frɔlɔgyɛzan vɔ wi punu, a nyanalafɛ vo naané.

¹⁰ Dé fɛofɛan ke gɔné ’ko wuo, dé mian mane ’bɛ ma, ’bɛzan é dan vo lɛ é naané fɔɔ yé nyanadi é pa; yé mi lé é a nyanalafɛ sia, é dan élé sɔnu zuru lɛ yé ’é ’yi si yé éboen zuru, yé é vo é naané fɔɔ yé nyanadi é pa.

¹¹ Dé frɔlɔgyɛzan mane mian ma, ’té dé é ’ka é bɛ ma foli lɛ ’yi va é vinin lo, azan é dan élé sɔnu zuru lɛ yé ’é ’yi si yé éboen zuru yé é dan vo lɛ é naané fɔɔ yé nyanadi é pa.

¹² Tɛrɛbɔ faa lé frɔlɔgyɛzan mane a ma, wo dan a ’wii lɛ; yilibɔ faa lé é mane wo ma, wo dan wo zuru lɛ ’yi nya.

¹³ Dé alé gyɛ nyaa, ’é yi sɔrafié kɛlɛ, ’té é kɛlɛ tegele; é dan ’élé sɔnu zuru lɛ, yé é dan éboen zuru lɛ, ’yi lé éé yoroan, a va, yé é kɛlɛ tegele.

¹⁴ A yi sɔraazan nya, é dan plala fié si lɛ, dé ’bɛ kaan lo, é plawuo boroné fié si, yé ’é go wo nya Gakelebale ’lɛ, zén‐ékevasɔkɔn ’léé, yé ’é wo nɔ Balebanzan lɛ.

¹⁵ Balebanzan é dan Bale ban lɛ wo nya; a do é dan kɛlɛ lɛ wenyané ’yibo saraka nya, yé a koɛzan é dan kɛlɛ lɛ balebanwi lé wa kyɛ blé, a nya; yé Balebanzan é dan gɔnézan lé wenyané ’yi bo lɛ Gakelebale ’lɛ, a ’yi bɔrale we ma.

¹⁶ Mi lé a ’yi bɔra é pla, é dan ’yi si lɛ yé é kɔlɛ faa zuru, ’té é vo é naané duowo fɔɔ yé nyanadi é pa.

¹⁷ Dé a ’yi zén fɛan ma, dé é a sɔ nyaoo, dé é a wikɔlɛ nyaoo, wo dan a zuru lɛ ’yi nya, ’té é a naané duowo fɔɔ yé nyanadi é pa.

¹⁸ Dé gɔné valé le yii, wo fiénu é dan zuru lɛ, ’té wa é naané duowo fɔɔ yé nyanadi é pa.

¹⁹ Dé lezan vɔ lomu va, ’té é a é naané fɔɔ yi sɔrafié. Dé miomian mane a ma, é dan vo lɛ é naané fɔɔ yé nyanadi é pa.

²⁰ Fɛ faa lé lezan ’ko yia a ta a nɔla bléyi va, wa é naané; dé é nyana fɛan ta, ’bɛ a é naané é ziin.

²¹ Dé miomian mane alé yialafɛ ma, é dan ’élé sɔnu zuru lɛ, yé ’é ’yi si yé éboen zuru yé ’té é a é naané duowo fɔɔ yé nyanadi é pa.

²² Dé miomian mane fɛ lé lezan nyana a ta, a ma, é dan ’élé sɔnu zuru lɛ yé ’é ’yi si yé éboen zuru yé ’té é a é naané duowo fɔɔ yé nyanadi é pa.

²³ Dé fɛofɛan ke yialafɛ ta, ɛɛ, dé fɛ do a alé nyanalafɛ ta, dé mian mane ’bɛ fɛ ma, azan é dan vo lɛ é naané fɔɔ yé nyanadi é pa.

²⁴ Dé gɔné yii lezan va é nɔla bléyi va, ’té é a é naané; gɔnézan é dan vo lɛ é naané duowo yi sɔrafié, yé dé é yia yialafɛan ta, ’té ’bɛ kɛlɛ é naané.

²⁵ Dé lezan nɔla ’élé moné ’lɛ, ɛɛ, dé alé sɔ zuru namɔn, é a é naané a nɔla bléyi faa va, bélé alé vɔle lomu va bléyi zo.

²⁶ Dé é yia fɛan ta ’élé sɔzurubléyi va, é a bélé fɛan é yia a ta é nɔla bléyi va, a zo; yé fɛ lé é nyana a ta, wo dan vo lɛ é naané bélé alé vɔ lomu va bléyi va zo.

²⁷ Dé miomian é mane wo ma, ’bɛzan a é naané; é dan ’élé sɔnu zuru lɛ yé ’é ’yi si yé éboen zuru yé ’té é a é naané fɔɔ yé nyanadi é pa.

²⁸ Dé alé sɔ zurule nyaa, ’é yi sɔrafié kɛlɛ yé é dan kɛlɛ lɛ tegele.

²⁹ A yi sɔraazan nya, é dan plala fié si lɛ, dé ’bɛ kaan lo, é dan plawuo boroné fié si lɛ yé é dan da lɛ wo nya Balebanzan lɛ, zén‐ékevasɔkɔn ’léé.

³⁰ Balebanzan é dan wenyané ’yibo saraka bo lɛ a do nya yé a do é dan kɛlɛ lɛ balebanwi lé wa kyɛ blé, a nya; yé Balebanzan é dan alé wenyané ’yi bo lɛ Gakelebale ’lɛ, a vɔle lomu va lé, é a kɛlɛ é naané, alé we ma.

³¹ Naa, anlé sɔkɔn lé ke Izraɛl lé nénu va bɛ, dé wa sɛrɛ wo dan ga lɛ, amalé é a lé ka Izraɛl lé nénu kɛlɛwe naanénu faa si wo ma.

³² Frɔlɔgyɛzan koo, mi lé a ’yi zana é pla koo,

³³ lezan lé é vɔ lomu va koo, gɔnénu valé lomu lé frɔlɔgyɛ ke wo ma koo, gɔnézan lé é yia lezan va a nɔla bléyi va koo, wolé we é dan kɛlɛ lɛ fɛan zo, yee lé ke bɛ.