Lévinu 14 - Kazambale lé Sebe Sauunu 1979

Pantɛn sile mi ma lé we

¹ Gakelebale we fe Moizi lɛ yé é léé:

² Wo dan pantɛngyɛzan lé we kɛlɛ lɛ fɛan zo, a nwiinfoliyi nya, yee lé ke ’ko:

³ Wo dan da lɛ a nya Balebanzan va. Balebanzan é dan si lɛ fla yé é dan pantɛngyɛzan ma gini lɛ. Dé pantɛngyɛzan béli,

⁴ Balebanzan é dan a fe lɛ léé, ’wo da a nwiinfolifɛnu nya. Miané yuɛmale zinzin fié koo, sɛdrɛyili koo, sɔ sɔɔn koo, izopéyilibɛ koo, ’wo da wo ɛ nya.

⁵ Balebanzan é dan a fe lɛ léé, ’wo ’yiyoro koli yé ’wa zén tɛrɛbɔ gi, yé ’wo miané do bɔrɔ bo yé wa nyɛ zén a va.

⁶ Miané yuɛmale koo, sɛdrɛyili koo, sɔ sɔɔn koo, izopéyilibɛ koo, é dan wo si lɛ yé é dan wo vɔ lɛ, miané lé wa bɔrɔ bo lao yé wa nyɛ zén ’yi va bɛ, a nyɛ va.

⁷ É dan nyɛ nwɛɛn lɛ gɔnɔ sɔrafié, pantɛngyɛzan lé é dan ’é nwiin foli lɛ, a ta. ’Bɛ zuo é dan a fe lɛ léé, é kɛlɛ tegele, yé é dan daan lɛ miané yuɛmale ma yé ’bɛ é go bwii.

⁸ Mi lé é da é nwiin foli lɛ, é dan élé sɔ zuru lɛ, é dan é ma kyɛɛ faa bo lɛ, yé é dan zuru lɛ yé a gi é bɔ. ’Bɛ zuo, a se a a lɛ léé, é go fla, naa, té é go élé kɔn gi lo, fɔɔ yi sɔrafié.

⁹ A yi sɔrafiézan nya, é dan é kɔlɛ faa ma kyɛɛ bo lɛ, a nwin koo, a puomagun koo, a yuɛlagɔɔn koo, a kyɛɛ faa lé; é dan élé sɔnu zuru lɛ yé é dan zuru lɛ yé é kɛlɛ tegele.

¹⁰ A yi sɔraazan nya, ’blané fié lé fɛ do kpen ’ka wo ma lo koo, lɛɛ do ’blada lé fɛ do kpen ’ka a ma lo koo, suo nya do burupun zin lé wa vɔɔ nyɔnɔ nya yé é kɛlɛ balebanfɛblele nya, ’bɛ koo, nyɔnɔ litré buu koo, é dan wo si lɛ.

¹¹ Balebanzan lé é dan mi ’ko nwiin foli lɛ, é dan da lɛ gɔné ko valé fɛ ’konu faa nya Gakelebale ’lɛ, zén‐ékevasɔkɔn ’léé.

¹² Balebanzan é dan ’blané do valé nyɔnɔ litré buu si lɛ yé é dan wenyaa saraka bo lɛ a nya; é dan a dia lɛ ’é bɛ fié la Gakelebale ’lɛ.

¹³ Fɛana lé wenyané ’yibo sarakawi valé balebanwi lé wa kyɛ blé, woo wo bɔrɔ boo, ana lé wo dan ’blané ’ko bɔrɔ bo lɛ, fɛna sauun na; naa, wenyaa saraka a bélé wenyané ’yibo saraka zo, a wi a Balebanzan zé nya; é a Bale ’lɛfɛ nya.

¹⁴ Balebanzan é dan wenyaa sarakawi nyɛ si lɛ; yé mi lé é da ’é nwiin foli lɛ bɛ, é dan a pa lɛ a bɛyila tɔné bɛné koo, a bɛyi bɛnwɔlɛ gɔné koo, a bɛyi ganewɔlɛ gɔné koo, wo ma.

¹⁵ Balebanzan é dan nyɔnɔ litré buu si lɛ yé ’é a zén é bɛbo lee guru la.

¹⁶ Balebanzan é dan é bɛyi bɛnwɔlɛ vɔ lɛ nyɔnɔ lé ke é bɛbo lee, a va, yé é dan a nwɛɛn lɛ gɔnɔ sɔrafié Gakelebale ’lɛ.

¹⁷ Nyɔnɔ lé é vo Balebanzan lee bɛ, é dan a pa lɛ, mi lé é da ’é nwiin foli lɛ, a bɛyila tɔné bɛné koo, a bɛyila bɛnwɔlɛ gɔné koo, a bɛyila ganewɔlɛ gɔné koo, wo ma, wenyaawi nyɛ ta loru.

¹⁸ Nyɔnɔ pɔné lé é vo Balebanzan lee, é dan a zén lɛ gɔnézan lé é da ’é nwiin foli lɛ, a nwiin; yé Balebanzan é dan alé wenyané ’yibo lɛ Gakelebale ’lɛ.

¹⁹ ’Bɛ zuo, Balebanzan é dan wenyané ’yibo saraka bo lɛ, mi lé é da ’é nwiin foli lɛ, ’é kɛlɛle tegele we ma, azan zé nya.

²⁰ ’Bɛ zuo, balebanwi lé wa kyɛ blé, Balebanzan é dan a bɔrɔ bo lɛ. Balebanwi lé wa kyɛ blé, Balebanzan é dan yee valé balebanfɛblele nɔ lɛ balebanna ta; é dan mi ’ko lé wenyané ’yibo lɛ, yé ’é kɛlɛ tegele.

²¹ Dé mi ’ko a nyanégyɛzan nya yé fɛ’konu mafɛ ’ka a lee lo, é dan da lɛ ’blané do kpen nya, yé wo wenyaa saraka bo a nya, ’té dé wa dia é bɛ fié ta faa, ’bɛ nya lé wo dan alé wenyané ’yibo lɛ. É dan da lɛ burupun zima lé wa vɔɔ nyɔnɔ nya, a suoné do nya, yé ’bɛ é kɛlɛ balebanfɛblele nya; yé ’é da nyɔnɔ litré buu nya é ziin.

²² É dan plala fié si lɛ é ziin, dé ’bɛ kaan lo, plawuo sua fié, gɔɔli a a lee fɛan zo, a zo; yé a do ’é kɛlɛ wenyané ’yibofɛ nya, yé a koɛ ’é kɛlɛ balebanwi lé wa kyɛ blé, a nya.

²³ A yi sɔraazan nya, mi ’ko é dan da lɛ fɛ ’konu faa nya Balebanzan va, ’é nwiin folile we gi, zén‐ékevasɔkɔn ’léé, Gakelebale ’lɛ.

²⁴ Balebanzan é dan wenyaa saraka ’blané si lɛ, ’bɛ valé nyɔnɔ litré buu nya, yé é dan wo dia lɛ é bɛ fié la, Gakelebale ’lɛ.

²⁵ É dan wenyaa saraka ’blané bɔrɔ bo lɛ. Balebanzan é dan wenyaa ’blané nyɛ si lɛ yé ’é a pa, mi lé é da ’é nwiin foli lɛ, a bɛyila tɔné bɛné koo, a bɛyi bɛnwɔlɛ gɔné koo, a bɛyi ganewɔlɛ gɔné koo, wo ma.

²⁶ Balebanzan é dan nyɔnɔ zén lɛ é bɛbo lee guru la.

²⁷ Yé Balebanzan é dan é bɛnwɔlɛ vɔ lɛ nyɔnɔ lé ke a bɛbo lee, a va, yé ’é a nwɛɛn gɔnɔ sɔrafié Gakelebale ’lɛ.

²⁸ Nyɔnɔ lé ke Balebanzan lee bɛ, é dan a pa lɛ mi lé é da ’é nwiin foli lɛ bɛ, a bɛyila tɔnébɛné koo, a bɛyila bɛnwɔlɛ gɔné koo, a bɛyila ganewɔlɛ gɔné koo, wo ma, fɛana lé é wenyaa wi nyɛ gié, ana.

²⁹ Nyɔnɔ pɔné lé é vo Balebanzan lee, é dan a zén lɛ mi lé é da ’é nwiin foli lɛ, a nwiin, alé wenyané ’yibole Gakelebale ’lɛ we ma.

³⁰ ’Bɛ zuo, dé plala do léé, dé plawuo sua do léé, ’té é a ye bɛ, é dan saraka bo lɛ a nya;

³¹ a do é dan kɛlɛ lɛ wenyané ’yibo saraka nya, yé a koɛ é dan kɛlɛ lɛ balebanwi lé wa kyɛ blé, a nya, yé é dan balebanfɛblele nɔ lɛ é ziin; yé mi lé é da ’é nwiin foli lɛ, balebanzan é dan alé wenyané ’yibo lɛ Gakelebale ’lɛ.

³² Mi lé pantɛn a gyɛ, yé fɛ ’ka a lee kiɛre lo, é dan ’é nwiin foli lɛ fɛan zo, yee lé ke bɛ.

Kɔnguru ma pantɛn lé we.

³³ Gakelebale we fe Moizi valé Arɔn lɛ yé é léma:

³⁴ Dé ka bɔ Kanaan tɛrɛ lé maa dan a nɔ lɛ ka lɛ kazé nya, a ta, dé maa ana tɛrɛ la kɔn do gyɛ pantɛn gyɛ nya,

³⁵ kɔnzan é dan da lɛ Balebanzan va yé é dan a fe lɛ a lɛ léé, maa fɛ do ye anlé kɔn ma bélé gyɛ zo.

³⁶ Dé Balebanzan ’ka tan wɔra lɛ kɔn gi a naginile we gi lo, é dan a fe lɛ léé, ’ka fwi a gi, té a gifɛnu faa sɛrɛ lo we ma. ’Bɛ zuo Balebanzan é dan wɔra lɛ kɔn gi yé é a nagini.

³⁷ Balebanzan é dan gyɛ nagini lɛ. Dé é a ye léé, guru vɔ kɔnguru ma, ’té a gi a drandran valé kanakana, yé a guru vɔ kɔnguru gi baa,

³⁸ é dan bɔra lɛ yé dé é bɔ kɔn’léé yé é kɔn lɛ tan, yé ’é vo a zo yi sɔrafié.

³⁹ Balebanzan é dan da lɛ é ziin a yi sɔrafiézan nya. Dé é a ye léé, gyɛ gi gyɛ kɔnguru gi,

⁴⁰ é dan a fe lɛ léé, gɔlɛnu lé fɛ ’ko vɔ wo ma, ’wo wo si ana, yé ’wo wo vuli fla gini ma bwi gi, fɛna naané na.

⁴¹ É dan a fe lɛ léé, ’wo kɔnguru faa ma kaan, yé ’wo ana tɛrɛ si yé wa nwɛɛn bwi gi, fɛna naané na.

⁴² Wo dan gɔlɛ bɛnu si lɛ, yé ’wa pa a vininzannu pai; yé wo dan tɛrɛ bɛ gié lɛ kɔnguru ma.

⁴³ Dé wo gɔlɛnu si, dé wo kɔn ma kaan yé wa guru ma wo faa, ’bɛ zuo dé gyɛ da é ziin yé é bɔra kɔn ’ko ma,

⁴⁴ Balebanzan é dan nɔla lɛ é pa gi kɔn ’ko gi. Dé é a ye léé, fɛ ’ko gi gyɛ kɔnguru ma, ’té pantɛn lé é ’ka nyaa lo, ’té ’bɛ ɛ ke kɔn ’ko ma. É sɛrɛ.

⁴⁵ Wo dan kɔn ’wii lɛ; a gɔlɛnu koo, a yilinu koo, kɔn mawotɛrɛnu faa koo, wo dan go lɛ fɛ ’konu faa nya fla gini ma fɛna naané na.

⁴⁶ Bléyi faa va lé kɔn lɛ ke é tanle, mian é go yee kɔn gi, a tiri ’é dɔ fɔɔ nyanadi bléyi va.

⁴⁷ Mi lé é yi gyɛ kɔn ’ko gi, é a lé ’élé sɔnu zuru. Mi lé é fɛ ble kɔn ’ko gi, yee é ziin, é a lé ’élé sɔnu zuru.

⁴⁸ Dé Balebanzan da kɔn ma nagini lɛ é ziin, dé é a ye léé, a ma gyɛ gi ’ka gyɛ lɛ a mawole zuo lo, é dan a fe lɛ léé, kɔn vo é zima, naa, alé gyɛ si.

⁴⁹ Mianénu fié koo, sɛdrɛyili koo, kununu sɔɔn koo, izopéyili koo, Balebanzan é dan wo si lɛ kɔn vo é zima fɛ nya.

⁵⁰ É dan ’yiyoro koli lɛ yé é a zén tɛrɛbɔ gi yé é miané bɔrɔ bo tɛrɛbɔ ta, yé a nyɛ zén a va.

⁵¹ Sɛdrɛyili koo, izopé koo, sɔ sɔɔn koo, miané yuɛmale koo, é dan wo si lɛ yé é wo zua miané lé é a bɔrɔ bo é vinin, a nyɛ valé ’yi zin va, yé é dan a nyɛ nwɛɛn lɛ kɔn ta gɔnɔ sɔrafié.

⁵² ’Bɛ zo lé é dan kɔn vo lɛ é zima, miané nyɛ koo, ’yi zin koo, miané yuɛmale koo, sɛdrɛyili koo, sɔ sɔɔn koo, wo nya.

⁵³ ’Bɛ zuo é dan go lɛ miané yuɛmale nya fla gini ma yé ’é daan a ma yé é go bwi gi. ’Bɛ zo lé é dan kɔn ma wenyané ’yibo lɛ yé é kɛlɛ é zima.

⁵⁴ Pantɛn manɔn faa valé gyɛ koo,

⁵⁵ sɔ ma pantɛn valé kɔn ma pantɛn koo,

⁵⁶ kɔlɛ baale koo, mi ma kɔlɛ dɔle koo, sonné bɔrale mi ma koo, wolé we é dan kɛlɛ lɛ fɛan zo, a zo lé é ke bɛ.

⁵⁷ Dé fɛ sɛrɛoo, dé fɛ a tegeleoo, ’bɛ ma lé ka dan a gi dɔɔ lɛ. Pantɛn lé we é dan kɛlɛ lɛ fɛan zo, a zo lé é ke bɛ.