Lévinu 13 - Kazambale lé Sebe Sauunu 1979

Pantɛngyɛ lé we

¹ Gakelebale we fe Moizi valé Arɔn lɛ yé é léma:

² Dé mi do kɔlɛ ma baa, ɛɛ, dé a ma kɔlɛ dɔ, ɛɛ, dé sonné bɔra a ma bélé pantɛn zo, ’wo da a nya Balebanzan Arɔn va, dé ’bɛ ’kaan lo, ’wo da a nya, Arɔn be do lé ke Balebanzan nya, a va.

³ Balebanzan é dan a kɔlɛ ma gyɛ nagini lɛ. Dé yee gyɛ gi kyɛɛ a fu, dé yee gyɛ go a kɔlɛ wuo, ’té pantɛn lé; Balebanzan lé é mi ’ko ma gini bɛ, é dan a fe lɛ léé, a tiri a é dɔle.

⁴ Dé sonné bɔra a kɔlɛ ma, yé é ’ka goo a kɔlɛ wuo lo, yé a gi kyɛɛ ’ka fu lo, mi lé fɛ ’ko ke a ma, Balebanzan é dan a vɔ lɛ kɔn gi yi sɔrafié.

⁵ Balebanzan é dan a ma gini lɛ a yi sɔrafiézan nya. Dé é a ye léé, gyɛ ’ko yuɛi ’ka bɔrana lo, ’té a lɛ ’ka sina lo, é dan a vɔ lɛ é ziin kɔn gi yi sɔrafié a gɔnɔ fiézan nya.

⁶ Balebanzan é dan a ma gini lɛ a gɔnɔ fiézan nya yi sɔrafiézan nya. Dé é a ye léé, gyɛ ’ka bina planplan lo, yé a lɛ ’ka sina a kɔlɛ ma lo, Balebanzan é dan a fe lɛ léé, mi ’ko gi a é bɔle. A ma kɔlɛ pla ɛ dɔ; é dan ’élé sɔ zuru lɛ yé a gi é dan bɔ lɛ.

⁷ Naa, dé Balebanzan a ma gini yé é a fe léé, a gi bɔ, ’bɛ zuo, fɛ lé é dɔra a kɔlɛ ma, dé a lɛ si, ’é go Balebanzan va a gɔnɔ fiézan nya, ’bɛ a ma gini.

⁸ Dé Balebanzan a ma gini, dé é a ye léé, fɛ lé é dɔra a kɔlɛ ma, a lɛ si, é dan a fe lɛ léé, a tiri a; pantɛn lé.

⁹ Dé pantɛn mi do gyɛ, ’wo go a nya Balebanzan va.

¹⁰ Balebanzan é dan a ma gini lɛ. Dé a kɔlɛ ma baa fu, a kɔlɛ baale ’ko, dé a ma kyɛɛ a fu, dé é fɔn,

¹¹ ’té pantɛn lé é ’ka nyaan lo, ’té yee ɛ vɔ gɔnézan ’ko kɔlɛ ma. Balebanzan é dan a fe lɛ léé, a tiri a; é ’ka dan a vɔ lɛ kɔn gi lo, a tiri a, azama.

¹² Dé pantɛn kɛlɛ a kɔlɛ ma fɛfaana, dé Balebanzan a ma gini fɛfaana, é sia a nwiin fɔɔ yé é bɔ a gane ma,

¹³ yé dé é a ye léé, pantɛn nyaa a kɔlɛ ma yé a pagi vo fu, é dan a fe lɛ léé, pantɛngyɛzan gi bɔ. A kɔlɛ faa kɛlɛ fu, amalé a gi bɔ.

¹⁴ Naa, dé wo manɔn ye a ma yioyian nya, a tiri dɔ.

¹⁵ Manɔn a fɛ tiridɔle nya, pantɛn lé. Dé Balebanzan manɔn ye, é dan a fe lɛ léé, a tiri dɔ.

¹⁶ Dé manɔn nyaa yé a pai kɛlɛ fu, é dan go lɛ Balebanzan va;

¹⁷ Balebanzan é dan a ma gini lɛ, yé dé a manɔn kɛlɛ fu, Balebanzan é dan a fe lɛ léé, mi lé manɔn ’ko ke a ma, a gi bɔ. A gi a é bɔle.

¹⁸ Dé manɔn pla a mi do ma, dé é nyaa,

¹⁹ ’bɛ zuo yé a manɔn pɔlɛ bɔ fu, ɛɛ, dé é kɛlɛ sonné nya yé a gi kɛlɛ fu booéla, gɔnézan ’ko ’é go ’ébo nagɔɔn Balebanzan lɛ.

²⁰ Yé Balebanzan é dan a ma gini lɛ. Dé a sonné boro pa, yé a gi kyɛɛ kɛlɛ fu, Balebanzan é dan a fe lɛ léé, a tiri dɔ; ’té pantɛn ɛ bɔra a manɔn pɔlɛ gi bɛ.

²¹ Dé Balebanzan a ye léé, sonné gi kyɛɛ ’ka fu lo, yé sonné boro ’ka pa lɛ lo, yé é ’ka bina planplan lo, é dan mi ’ko vɔ lɛ kɔn gi yi sɔrafié.

²² Dé sonné gi gyɛ a kɔlɛ ma, Balebanzan é dan a fe lɛ léé, a tiri dɔ; pantɛn lé.

²³ Naa, dé sonné ’ko vo fɛdona yé a lɛ ’ka si lɛ lo, ’té manɔn pla lé. Balebanzan é dan a fe lɛ léé, a gi bɔ.

²⁴ Dé mi do kɔlɛ kyɛ ble, dé sonné do bɔra alé kyɛ pɔlɛ pai, dé a gi kɛlɛ fu, ɛɛ, dé a gi kɛlɛ fu booéla, Balebanzan é dan a ma gini lɛ.

²⁵ Dé sonné gi kyɛɛ kɛlɛ fu, dé a boro pa, ’té pantɛn ɛ bɔra kyɛ pɔlɛ pai bɛ; Balebanzan é dan a fe lɛ léé, mi ’ko tiri dɔ; pantɛn lé.

²⁶ Dé Balebanzan a ye léé, sonné gi kyɛɛ ’ka fu lo, yé a boro ’ka lo, yé é ’ka bina planplan lo, é dan mi ’ko vɔ lɛ kɔn gi yi sɔrafié.

²⁷ Balebanzan é dan a ma gini lɛ yi sɔrafiézan nya. Dé sonné lɛ si a kɔlɛ ma, Balebanzan é dan a fe lɛ léé, a tiri dɔ. Pantɛn lé ke bɛ.

²⁸ Naa, dé sonné ’ko vo fɛdona, yé a lɛ ’ka si lɛ a kɔlɛ ma lo, yé é ’ka vo lɛ planplan lo, ’té kyɛ pɔlɛ lé; Balebanzan é dan a fe lɛ léé, a gi bɔ, naa, kyɛ pɔlɛ lé.

²⁹ Dé gɔné do léé, dé le do léé, dé gyɛ a a nwiin, ɛɛ, dé é a a puo ma, Balebanzan é dan a ma gini lɛ.

³⁰ Dé é a ye léé, gyɛ ’ko vɔ a nɛ va, dé a gi kyɛɛ a kanakana kanmiinné, Balebanzan é dan a fe lɛ léé, mi ’ko tiri dɔ. Koo zén a ma; é a pantɛn gyɛ nya a nwiin, ɛɛ, a puo ma.

³¹ Dé Balebanzan a ye léé, koo ’ko ’ka vɔ lɛ a nɛ va lo, yé a gi kyɛɛ ’ka ti lo, ’é koogyɛzan ’ko vɔ kɔn gi yi sɔrafié.

³² A yi sɔrafiézan nya Balebanzan é dan a ma gini lɛ. Dé koo lɛ ’ka sina lo, yé a gi kyɛɛ ’ka kanakana lo, dé é ’ka vɔ lɛ a nɛ va lo,

³³ mi lé koo ke a ma, é dan é puo ma gun bo lɛ, naa, fɛana lé koo ke, té é ’bɛna bo lo; yé Balebanzan é dan a vɔ lɛ kɔn gi a gɔnɔ fiézan nya yi sɔrafié.

³⁴ A yi sɔrafiézan nya, Balebanzan é dan a koo gini lɛ. Dé koo lɛ ’ka si lɛ a kɔlɛ ma lo, dé é ’ka vɔ lɛ a nɛ va lo, Balebanzan é dan a fe lɛ léé, a gi bɔ; é dan élé sɔ zuru lɛ yé a gi é dan bɔ lɛ.

³⁵ Naa, a gibɔle fele zuo, dé koo lɛ si a kɔlɛ ma, Balebanzan é dan a ma gini lɛ.

³⁶ Dé koo lɛ si a kɔlɛ ma, Balebanzan ’ka dan a gi gini lɛ léé, dé a gi kyɛɛ a kanakana? lo; a tiri dɔ.

³⁷ Dé é a ye léé, koo lɛ ’ka si lɛ lo, yé a gi kyɛɛ kɛlɛ ti, ’té koo nyaa; a gi bɔ, yé Balebanzan é dan a fe lɛ léé, a gi a é bɔle.

³⁸ Dé gɔné léé, dé le léé, dé fɛ bɔra a kɔlɛ ma é fu,

³⁹ Balebanzan é dan a ma gini lɛ. Fɛ lé é bɔra a kɔlɛ ma bɛ, dé a gi ’ka planplan lo, ’té fɛ pla ɛ kɛlɛ a kɔlɛ ma. A gi a é bɔle.

⁴⁰ Dé nwin ’ka mi do nwiin lo, ’té palogyɛzan lé; a gi a é bɔle.

⁴¹ Dé nwin ’ka mi bɛlo la lo, ’té palogyɛzan lé; a gi a é bɔle.

⁴² Dé a yara léé, dé a zuo zia léé, dé fɛ do bɔra ana yé a gi kɛlɛ fu booéla, ’té pantɛn lé é bɔra a palo pai bɛ, dé a yara léé, dé a zuo léé, ana.

⁴³ Balebanzan é dan a ma gini lɛ. Fɛ lé é baa a ’wuo ma bɛ, dé a yara léé, dé a zuo zia léé, dé a gi kɛlɛ fu booéla bélé pantɛn lé éé vɔa mi kɔlɛ ma, a zo,

⁴⁴ ’té pantɛngyɛzan lé; a tiri dɔ. Balebanzan é dan a fe lɛ léé, a tiri dɔ; ’té a ’wuo ma lé gyɛ ke.

⁴⁵ Yé pantɛngyɛzan é dan sɔ fiale zén lɛ ’é ta, yé a ’wuo vo é porole; é dan fɛ bua lɛ é lɔlu ta, yé é dan siaa lɛ léé, ’é tiri dɔ, ’é tiri dɔ!

⁴⁶ Bléyi faa lé gyɛ ke a ma, ’té a tiri a. A tiri a é dɔle, amalé é dan nyana lɛ é do. A nyanana é dan kɛlɛ lɛ fla gini ma.

⁴⁷ Dé sɔ do gi a blena pantɛn nya, dé ’blakyɛɛsɔ léé, dé lɛnsɔ léé,

⁴⁸ dé a koli ma zia léé, dé a gyéi ma zia léé, dé lɛn kununu léé, dé ’blakyɛɛ kununu léé, dé é a wikɔlɛ nyaoo, dé é a fɛ lé wa kɛlɛ wikɔlɛ nya, ’bɛ nyaoo, dé é a ’bɛ ma,

⁴⁹ dé a gyɛ ’ko yuɛɛ kɛlɛ drandran, ɛɛ, dé é kɛlɛ kanakana sɔ ma, dé a koli ma zia léé, dé a gyéi ma zia léé, dé wikɔlɛ léé, dé fɛofɛan wa kɛlɛ wikɔlɛ nya, dé ’bɛ léé, dé é kɛlɛ ’bɛnu ma, ’té pantɛn lé, yé é a lé wa gɔɔn Balebanzan lɛ.

⁵⁰ Balebanzan é dan a gyɛ nagini lɛ, yé fɛ lé gyɛ ’ko vɔ a ma, é dan a vɔ lɛ kɔn gi yi sɔrafié.

⁵¹ A yi sɔrafiézan nya é dan gyɛ nagini lɛ. Dé yee gyɛ gi gyɛ sɔ ma, dé a koli ma zia léé, dé a gyéi ma zia léé, dé wikɔlɛ léé, dé fɛofɛan lé wa kɛlɛ wikɔlɛ nya, dé ’bɛ léé, a ma, ’té pantɛn lé é ’ka nyaan lo, ’té yee lé. Fɛ ’ko tiri dɔ.

⁵² Dé ’blakyɛɛsɔ léé, dé lɛnsɔ léé, dé a koli ma zia léé, dé a gyéi ma zia léé, dé fɛofɛan lé wa kɛlɛ wikɔlɛ nya, yé gyɛ ’ko vɔ a ma, wo dan a kyɛ ble lɛ; é a pantɛn lé é ’ka nyaan lo, a nya, amalé wo dan a kyɛ ble lɛ.

⁵³ Dé Balebanzan a ye léé, gyɛ ’ko gi ’ka gyɛna sɔ ma, dé a koli ma zia léé, dé a gyéi ma zia léé, wo ma lo, dé é a wikɔlɛfɛofɛan nya, dé a gi ’ka gyɛna a ma lo,

⁵⁴ é dan a fe lɛ léé, fɛ lé gyɛ vɔ a ma bɛ, ’wa zuru, yé é dan a vɔ lɛ kɔn gi yi sɔrafié é ziin.

⁵⁵ A zurule zuo, Balebanzan é dan a nagini lɛ. Dé gyɛ ’ko vo é dɔbɛ duo gi yé a gi ’ka gyɛ lɛ lo, ’té a tiri a; wo dan a kyɛ ble lɛ; gyɛ ’ko a ble a yuɛɛ zin valé a yuɛɛ nyané ta.

⁵⁶ A zurule zuo, dé Balebanzan a ye léé, a gi kɛlɛ nyané, dé sɔ lé, dé a koli ma zia léé, dé a gyéi ma zia léé, dé wi kɔlɛ ma léé, é dan a gyɛ na bɔi lɛ.

⁵⁷ Dé é bɔra é ziin sɔ ma, dé a koli ma zia léé, dé a gyéi ma zia léé, a ma, dé é bɔra wikɔlɛfɛ ma, ’té pantɛn ɛ bɔra a ma bɛ. Fɛ lé gyɛ ’ko vɔ a ma, wo dan a kyɛ ble lɛ.

⁵⁸ Dé sɔ lé, dé a koli ma zia léé, dé a gyéi ma zia léé, dé wikɔlɛfɛ léé, dé wa zuru yé gyɛ ’ko si ana, wo dan a zuru lɛ a gɔnɔ fiézan nya, yé a gi é dan bɔ lɛ.

⁵⁹ Dé é a ’blakyɛɛsɔ nyaoo, dé é a lɛnsɔ nyaoo, dé sɔkoli ma zia léé, dé a gyéi ma zia léé, dé é a wikɔlɛfɛofɛan nyaoo, dé pantɛn gyɛ vɔ wo ma, wozé we ’léé lé ke bɛ. Wo dan a gibɔle valé a tiridɔle fe lɛ bɛan zo, yee lé ke bɛ.