Lévinu 12 - Kazambale lé Sebe Sauunu 1979

Né yaale zuowe

¹ Gakelebale we fe Moizi lɛ yé é léma: Bé fe Izraɛl lé nénu lɛ léma:

² Dé le do bɔn si yé é né yaa gɔné nya, é dan a vla bo lɛ yi sɔrafié; le ’ko ’ka tegele lo, alé vɔle le va bléyi zo.

³ A yi sɔraazan nya, ’wo né gane dɔ.

⁴ É dan vo lɛ ’élé fɛna é ziin yi yɔ do wɔlɛ vu ta yaa, a gi bɔle we ma; té é mane fɛ sauun ma lo, té é go Bale lé kɔn gi lo, fɔɔ yé a gibɔyinu lɛ é sɔɔ.

⁵ Dé é né yaa le nya, é dan vla bo lɛ flɛyi fié, alé vɔle le va bléyi zo; é dan vo lɛ ’élé fɛna yi yɔ yaa wɔlɛ suiɛdo, a gibɔle we ma.

⁶ Né lé é a yaa bɛ, dé négɔné léoo, dé néle léoo, dé a gibɔyinu lɛ sɔɔ, é dan Bale ban lɛ; é dan lɛɛ do ’blané si lɛ, balebanwi lé wa kyɛ blé, a nya, yé dé plawuo sua léé, ɛɛ, dé plala léé, é dan ’bɛ si lɛ wenyané ’yibo saraka nya, yé é go wo nya Balebanzan lɛ, zén‐ékevasɔkɔn ’léé.

⁷ Balebanzan é dan saraka bo lɛ Gakelebale lɛ wo nya, yé é dan alé wenyané ’yibo lɛ yé é dan kɛlɛ lɛ tegele. Dé le négɔné yaa, ɛɛ, dé néle léé, alé wenyaabɛ lé ke bɛ.

⁸ Dé ’blané mafɛ ’ka lezan lee lo, é dan plala fié si lɛ, ɛɛ, dé ’bɛ kaan lo, ’é plawuo sua fié si, a do ’é kɛlɛ balebanwi lé wa kyɛ blé, a nya, yé a do ’é kɛlɛ wenyané ’yibo saraka nya. Balebanzan é dan alé wenyané ’yibo lɛ, yé lezan é dan kɛlɛ lɛ tegele.