Lévinu 11 - Kazambale lé Sebe Sauunu 1979

Wi zinnu valé wi naanénu

¹ Gakelebale we fe Moizi valé Arɔn lɛ yé é lé wo lɛ léé: ’Ka fe Izraɛl lé nénu lɛ léma:

² Tɛrɛlawinu faa va winu lé ka dan a ble lɛ, wo lé ke ’ko:

³ Sɔnéwɔlɛwi faa lé wo sɔnéwɔlɛ blan ke, ’té woo puaan fɛ nya, ’ka wo ble.

⁴ Naa, a lɛ do lé ’bɛnu éé puaan, té ka ’bɛnu ble lo, yé a lɛ do lé wo sɔnéwɔlɛ blan ke, té ka ’bɛnu ble lo. ’Bɛ zo lé, nyɔgɔmé lé éé puaan fɛ nya, yé a sɔnéwɔlɛ blan ’ka lo, té ka ’bɛ ble lo; ’ka ’bɛ ye fɛ tiridɔle nya.

⁵ Wi lé wa laama daman, éé puaan fɛ nya, naa, é ’ka sɔnéwɔlɛwi nya lo, té ka a ble lo; ’ka ’bɛ ye fɛ tiridɔle nya.

⁶ Té ka gwené ble lo; éé puaan fɛ nya, naa, é ’ka sɔnéwɔlɛwi nya lo; ’ka ’bɛ ye fɛ tiridɔle nya.

⁷ Té ka suru ble lo; é a sɔnéwɔlɛwi nya, naa, é ’ka puaan fɛ nya lo; ’ka ’bɛ ye fɛ tiridɔle nya.

⁸ Té ka wo wi ble lo, té ka mane wo gale ma lo; ’ka wo ye fɛ tiridɔle nya.

⁹ ’Yi va winu faa lé ka dan wo ble lɛ, wo lé ke ’ko: fɛnu faa lé wo lalagan valé wo ma kɔlɛ ke, dé wa wɛyi vaoo, dé wa yuu vaoo, ’ka wo ble.

¹⁰ Naa, fɛ faa lé éé kɔɔan ’yi va, fɛ faa lé ke é yuɛma ’yi va, dé wa wɛyi vaoo, dé wa yuu vaoo, ’té wo lalagan valé wo makɔlɛ ’ka lo,

¹¹ ’ka wo ye fɛ naané nya; té ka wo wi ble lo; ’ka wo gale ye fɛ naané nya.

¹² Fɛ faa lé ke ’yinu va, ’té wo lalagan valé wo makɔlɛ ’ka lo, ’ka wo ye fɛ naané nya.

¹³ Mianénu va mianénu lé ka dan wo ye lɛ fɛ naané nya, ’té ka ’ka wo blé lo, wo lé ke ’ko: gola koo, vaa koo, wɛyi la gola koo, woo lé;

¹⁴ kwa koo, plén valé é bɔlunu koo,

¹⁵ kanwéi valé é bɔlunu faa koo,

¹⁶ miané lé duo koo, kurubéli koo, ’yilablaséi koo, gyɛɛnplén valé é bɔlunu koo,

¹⁷ banblégunbɛ koo, burulu valé pɔrɔkurubéli koo,

¹⁸ pɔblekuu koo, valusanbla valé ’yilagamian koo,

¹⁹ bwibalo koo, gyɛɛsunani valé é bɔlunu koo, daliwé koo, ban koo, woo lé. Té ka wo ble lo.

²⁰ Fɛ kénéné faa lé woo sié, ’té woo tawoo ’wo mɛn ziɛn ta, ’ka wo ye fɛ naané nya.

²¹ Naa, fɛ kénénénu lé woo sié, ’té woo tawoo ’wo mɛn ziɛn ta bɛ, wo va fɛnu lé ka dan a ble lɛ, wo lé wo gane bɔra wo ta loru, ’té woo fɔrɔan tɛrɛ ta, woo lé.

²² Wo lé ka dan wo ble lɛ, wo lé ke ’ko: flɛlɛ?-?gaan koo, poongaan koo, see koo, nyɔnɔsibwɛɛ koo, wo bɔlunu koo, woo lé.

²³ A pɔnénu lé woo sié, ’té woo tawoo ’wo mɛn ziɛn ta, ’ka wo faa ye fɛ naané nya.

²⁴ Wo dan ka tiri dɔ lɛ; dé miomian mane wo gale ma, azan tiri dɔ fɔɔ nyanadi,

²⁵ yé dé miomian wo gale sia, ’élé sɔnu zuru yé a tiri é dan vo lɛ é dɔle fɔɔ nyanadi.

²⁶ Sɔnéwɔlɛwi faa lé wo sɔnéwɔlɛ blan ’ka lo, ’té wo ’ka puaan fɛ nya lo, ’ka wo ye fɛ tiridɔle nya; dé miomian mane wo ma, a tiri é dan dɔ lɛ.

²⁷ Winu faa lé woo tawoo ’wo bɛ la, ’ka wo ye fɛ tiridɔle nya; dé miomian mane wo gale ma, azan tiri dɔ fɔɔ nyanadi,

²⁸ yé dé miomian wo gale sia, ’élé sɔnu zuru yé a tiri é dan vo lɛ é dɔle fɔɔ nyanadi. ’Ka wo ye fɛ tiridɔle nya.

²⁹ Wi kiénénu lé woo tawoo tɛrɛ va, wo va winu lé ka dan wo ye lɛ fɛ tiridɔle nya, wo lé ke ko: wi lé wa laama top koo, ’moné valé wɔrɔ koo, wo bɔlunu koo,

³⁰ ’téli koo, yolu koo, kuli koo, toroko koo, kana koo, woo lé.

³¹ Wi kiénénu faa va, ’ka wo ye fɛ tiridɔle nya. Dé miomian mane wo gale ma, a tiri é dan dɔ lɛ fɔɔ nyanadi.

³² Fɛ faa lé wo mane wo gale ma, wo tiri dɔ; dé yilifɛ léé, dé sɔ léé, dé wikɔlɛ léé, dé bɔlɔ léé, dé fɛofɛan woo fɛ kɛla a nya, dé ’bɛ léé, ’ka wo vɔ ’yi va, yé ’wo vo ’wo tiri nya fɔɔ nyanadi; a zuo a gi é dan bɔ lɛ.

³³ Dé a vafɛ dia tɛrɛbɔ ta, a gifɛ faa tiri dɔ, yé ka dan bɔ ’wii lɛ.

³⁴ Blefɛ faa lé a ’yi zén a ta, a tiri dɔ; dé é a minifɛofɛan nya, dé é a bɔobɔan gi, a tiri dɔ.

³⁵ Fɛ faa lé wo gale vafɛ do dia a ta, a tiri dɔ; dé é a ’furu nyaoo, dé é a guni nyaoo, ka dan wo ’wii lɛ; wo tiri dɔ yé ka dan wo ye lɛ fɛ tiridɔle nya.

³⁶ ’Yibɔna valé ’yiguru lé, ’yi kiɛre ke a gi, ’bɛnu saa gi é dan vo lɛ é bɔle; naa, mi lé é mane wo gale ma, a tiri dɔ.

³⁷ Fɛwɔlɛ lé ka dan a vɔ lɛ, dé wo gale vafɛ do dia ’bɛ ta, a gi é dan vo lɛ é bɔle duowo;

³⁸ naa, dé wo fɛwɔlɛ ’ko vɔ ’yi va turu yé wo gale vafɛ do dia ’bɛ ta, ’ka ’bɛ ye fɛ tiridɔle nya.

³⁹ Dé ka blewi do ga, mi lé é mane ’bɛ gale ma, ’bɛzan tiri é dan dɔ lɛ fɔɔ nyanadi;

⁴⁰ mi lé é a gale ble, ’élé sɔnu zuru yé a tiri é dan vo lɛ é dɔle fɔɔ nyanadi, yé mi lé é a gale sia, ’élé sɔnu zuru yé a tiri é dan vo lɛ é dɔle fɔɔ nyanadi.

⁴¹ Wi kénénénu faa lé woo giéan tɛrɛ va, ’ka wo ye fɛ naanénu nya; té ka wo ble lo.

⁴² Wi kénénénu faa lé woo giéan tɛrɛ va, dé wo tawo ’wo plɛ laoo, dé wo tawo ’wo mɛn ziɛn taoo, dé wo tawo ’wo mɛn kiɛre laoo, té ka wo do kpen ble lo; naa, ’ka wo ye fɛ naanénu nya.

⁴³ Wi kénénénu lé woo giéan tɛrɛ va bɛ, té kabo kɛlɛ naané wo nya lo; té kabo gi sɛrɛ wo nya lo, té kabo tiri dɔ wo nya lo.

⁴⁴ Naa, maa a Gakelebale, kalé Bale nya; maa a sauun, amalé ’ka kabo pa é yɛrama, yé ’ka kɛlɛ sauun; té ka kabo gi sɛrɛ wi kénénénu faa lé woo giéan tɛrɛ va bɛ, wo nya lo.

⁴⁵ Naa, maa a Gakelebale lé é ka si Éjipiti tɛrɛ la, a nya, kɛlɛle kalé Bale nya we gi, ’bɛ valé ka kɛlɛle sauun we gi lé maa kɛlɛ; naa, maa a sauun.

⁴⁶ Winu koo, mianénu koo, fɛ yuɛmalenu lé woo giéan ’yi va koo, fɛ yuɛmalenu lé woo giéan tɛrɛ va koo, wolé we lé ma a fe ka lɛ, yee lé ke bɛ.

⁴⁷ Yee lé a tiri ke koo, yee lé a tiri ’ka lo koo, winu lé wa blé koo, winu lé wo ’ka wo blé lo koo, kalé a gi dɔɔle we ma lé maa wolé we fe ka lɛ.