Lévinu 10 - Kazambale lé Sebe Sauunu 1979

Bale lé kyɛ Arɔn be fié ble

¹ Arɔn benu Nadab valé Abiu, wo kyɛnyɛsibɔ si do do yé wo kyɛ zén a gi, yé wo lasikɔrɔ pa a ta; yé wo go kyɛ ’ko nya Gakelebale ’lɛ, ’té Bale ’ka ’bɛ fe lɛ wo lɛ ’bɛ zo lo.

² Yé kyɛ si Gakelebale va yé é wo ble; wo ga Gakelebale ’lɛ.

³ Moizi lé Arɔn lɛ léé: We ’koan Gakelebale a fe yi la loo? É ’ka a fe lɛ léé, mi lé é bié ’é va, ’é kana ’é lee, yé é ’é tɔ kɛlɛ blɛn munu faa yuɛ va loo? Arɔn ta vo é dɔle.

⁴ Yé Moizi Arɔn ti bwe Uziɛl benu, Misaɛl valé Elsafan laa, yé é lé wo lɛ léé: ’Ka bié, ’ka bwenu gale si fɛna sauun ma baa, yé ’ka go wo nya sɔkɔn dɔna gini ma.

⁵ Wo bié yé wo wo si yé wo go wo nya sɔkɔn dɔna gini ma, ’té wolé varɔ grɔgrɔ a wo ta, Moizi a fe fɛan zo, a zo.

⁶ Arɔn koo, a benu Éléazaa valé Itamaa koo, Moizi lé wo lɛ léé: Té ka sɔkoro si ka ’wuo ma lo, té ka kalé sɔnu fia lo, dé ka da ga yé Gakelebale bli é da fli munu faa ma. Ka bwenu, Izraɛl munu faa, ’é vo wuvɔna, kyɛ lé Gakelebale a vɔ bɛ, a we ma.

⁷ Té ka bɔra zén‐ékevasɔkɔn gi lo, dé ka da ga; naa, Gakelebale ’lɛnyɔnɔ a é zénle ka nwiin. We lé Moizi a fe, wa kɛlɛ.

Wenu lé é a lé Balebanmunu a kɛlɛ

⁸ Gakelebale we fe Arɔn lɛ yé é léé:

⁹ Bii valé i benu, dé ka a gona wɔrana zén‐ékevasɔkɔn gi, té ka nwɛ valé migyɛdɔrɔ mini lo, dé ka da ga; é dan kɛlɛ lɛ bélidɔwe lé a glɛ ’ka lo, a nya, ka kulunu zé nya.

¹⁰ É a lé ka baleban?-?lafɛnu valé fɛ planu dɔɔ; é a lé, fɛ lé a tiri ke, yé fɛ lé a tiri ’ka lo, ka wo dɔɔ;

¹¹ yé bélidɔwenu faa lé Gakelebale a pa Moizi ’léé Izraɛl lé nénu zé nya, é a lé ka wo paa wo gi; bɛwemalé wo léé, té ka nwɛ mini lo.

¹² Arɔn be fié lé wo vo é lee, Éléazaa valé Itamaa, Moizi lé wo valé Arɔnu lɛ léé: Balebanfɛblele lé wa kyɛ ble Gakelebale ’lɛ, a pɔné lé é vo, ’ka ble balebanna sɔnɔ. Té lévɛn ’é kɛlɛ a va lo. Naa, Bale ’lɛfɛ lé.

¹³ ’Ka a ble fɛna plɛplɛ na; balebanfɛ lé wa kyɛ blé Gakelebale ’lɛ, a vafɛ ’ko a bii valé i benu dɔna nya. Naa, ’bɛ zo lé Bale a fe an lɛ.

¹⁴ A tɔn lé wa diaan bɛ fié la koo, a bɛ lé wa nɔ a nwale valé a tuale nya koo, bii valé i benu valé i lunu, ka dan ’bɛ ble lɛ é ziin fɛna plɛplɛ na; naa, bɔvɔ sarakanu lé Izraɛl lé nénu a boo, a vafɛ lé wa nɔ ka lɛ, ’té é ke bii valé i benu dɔna nya, yee lé ke bɛ.

¹⁵ A bɛ lé wa no a nwale valé a tuale nya, é valé a tɔn lé wa diaan a bɛ fié la Gakelebale ’lɛ, ’bɛ a bii valé i benu zé nya, bélidɔwe lé a glɛ ’ka lo, a nya, Gakelebale a fe fɛan zo, a zo. Wo dan da lɛ yee valé a nyɔnɔ lé wa kyɛ blé, wo nya ékeva.

¹⁶ Moizi wenyané ’yibo boligɔné nagini, yé bé ye, wa kyɛ ble. Yé a bli fli Arɔn be fié lé wo vo, Éléazaa valé Itamaa, wo ma,

¹⁷ yé é léé: Mɛmalé ka ’ka wenyané ’yibowi ble lɛ fɛna plɛplɛ na loo? É a bale ’lɛfɛ nya; yé Gakelebale a nɔ ka lɛ léé, ka munu lé wenyané kɔné si, kalé wolé wenyané ’yibole Gakelebale ’lɛ we gi.

¹⁸ Bé ye, ka ’ka go lɛ wi nyɛ nya fɛna sauun na lo; é a lé ka ble fɛna sauun na, wa fe an lɛ fɛan zo, a zo.

¹⁹ Arɔn lé Moizi lɛ léé: Wo ’wolé wenyané ’yibo saraka bo kyɔ, yé wo ’wolé balebanwi kyɛ ble Gakelebale ’lɛ; yé we lé é bɔ an ma kyɔ ’ko, dé maa wenyané ’yibowi ble ’bɛ zo, ’bɛ é dan kɛlɛ lɛ é zima Gakelebale yuɛ gii?

²⁰ Moizi dére ’ko ’ma yé é dɔ a ta.