Jérémi Lé Wuvɔ Sɛbɛ 4 - Kazambale lé Sebe Sauunu 1979

Jérusalɛm kelele zuo

¹ Yé ’té mɛ léé? Kyan ’ka bié nyananyana é dɛrɛ lo; Wo kyan tegele vɔɔ fɛ bɛnu nya. Wo fɛna sauun lé gɔlɛnu fwila Yé wo wo nwɛɛn zi blannu faa ta.

² É vinin, woo Siɔn munu tɔbɔle yé Bélé kyan tegele zo, Naa, sin, woo wo yé bélé tɛrɛbɔnu lé Bɔdɔzan a dɔ, a zo.

³ Gwenu bozen woo nyɔ dɔa Wolé nénu ’léé, ’té woo nyɔ minian; Naa, anlé munu a gi pɔnpɔnzannu nya, Bélé miané lé duo zo bwi gi.

⁴ Nyɔ ma nénu nɛnɛ kua ’wo lagolo ma; Wo lagolo ma ga ’yiminilɔrɔ nya; Nénu éé fɛblele ma laan Yé mi do ’ka a no wo lɛ lo.

⁵ Munu lé woo fɛ zinnu blé, Woo zamaga woo zinu ta; Yé munu lé wo tin fɛn zinnu nya, Woo yiaan bli vulina.

⁶ We lɛdɔle anlé munu gi a blɛn, É mini Sɔdɔm zé ta, É sɛrɛ tata bléyi do nya, ’Té mi do ’ka é bɛ mane lɛ a ma lo.

⁷ A nwiinzannu kɔlɛ éé bié é mini tɔrɛ ta, A fu mini dirinyɔyi ta. Wo kɔlɛ a sɔɔn, kɔlɛ lé wa vɔ zéri’yi va, a zo. Wo yara a bélé safiigɔlɛ zo.

⁸ Sin, wo faa vo wuruluu, Wo ’ka wo ma kunna dɔɔa zi gi lo; Wo kwéé, wo vo wo wɔlɛ saa nya Bélé kannan zo.

⁹ Munu lé woo zamaga wo gwɔun lee, wozé néné mini Munu lé wo zamaga wo lɔrɔ lee, ’Té gyɛ bɛ ’na wo gi, ’Té féifɛ ’ka wo lee lo, wozé ta.

¹⁰ Né bunu lé wo nyanai éé zén‐é turu wolé nénu ta, Sin woo wolé nénu dɔneé Yé woo wo kɛla wolé fɛblele nya, Dunuzénmitawe lé é bɔ anlé munu ma bɛ, azama.

¹¹ Gakelebale élé bliflile nwɛɛn Siɔn munu ta, É kyɛ bi Siɔn, Yé kyɛ a gane vɔna ble. Sin, a wɛwɛ dɔle nyaa.

¹² Tɛrɛla mi blɛnnu koo, Tɛrɛlamunu koo, é ’ka dɔ lɛ wo va mi do kpen gi kɔɔn léé, Jérusalɛm mazan, a nyanézan é dan wɔra lɛ É gɔrɔ gi lo.

¹³ Alé balelayezannu lé wenyanénu ma ban lo, Alé Balebanzannu lé Wo mi tegelenu nyɛ zana A méléna, wolé weplenu ma ban lo.

¹⁴ Woo nɔɔan zinu ta bélé yuɛwiizannu zo, ’Té nyɛ wo tiri dɔ; Wo ’ka bɔa manele lɛ Wolé varɔnu ma lo.

¹⁵ Wo siaa wo ta léé: Ka lé ka tiri ke, ’ka si ana baa! ’Ka si ana baa, ’ka gyɛ ka zuo baa, té ka mane ko ma lo. Wo fwi, wo vo nɔɔna ’ko valé ’ko. Wa fé bɛnnu méléna léé: Wo nyanana ’ka é dɛrɛ lo.

¹⁶ Gakelebale bli fli yé é wo fwila, É ’ka nɔlaan é dɛrɛ yé é yuɛ vɔ wo la lo; Balebanzannu ’ka wo nyanézannu yuɛ gi bɔa lo, Wo nyanai ’ka zén lɛ mi kwanu ta lo.

¹⁷ Ko yuɛ pɛ ga é gi é ziin, Ko ko bɔavazannu lɛbɛn é pla. Ko vo a naginina, ’té ko bli a a lɛ léé, Bɛn do é dan ko si lɛ we gi, naa, ’bɛ ’ka lo.

¹⁸ Ko nyanézannu ko pa bo, Léé, té ko bɔra kolé vuun la lo, Kozé bɔ nyaana, kolé yinu lɛ sɔɔ, Kozé nyaa.

¹⁹ Munu lé woo nyané paan ko ta, Wolé vlanburule mini la gi gola sile ta, Wo ko zuo bin gɔnu nwiin, Wo sannu pla ko wuo bwi gi.

²⁰ Mi lé Gakelebale nyɔnɔ zén a nwiin, a pli zi lé ko voo é yuɛma, É vɔ wolé séli gi, Mi lé alé we ma lé ko fé léé: Ko voo é yuɛma a furɔ wuo bɛnnu méléna, yee lé.

²¹ Édom munu, Usi tɛrɛ lamunu, Ka gi ’é nana é bléyi, ka a ka tanyila, Yee we duo é dan bɔ lɛ ka ma, Ka dan kle ble lɛ a gi, yé wo dan ka poro lɛ.

²² Siɔn munu, wo kalé weple ’yibo; É ’ka dan go lɛ ka nya luu gi é dɛrɛ lo. Édom munu, é dan we lɛdɔ lɛ ka gi kalé weplenu ma, É dan kalé wenyanénu bɔra lɛ gɔrɔ la.