Jérémi Lé Wuvɔ Sɛbɛ 3 - Kazambale lé Sebe Sauunu 1979

We lɛdɔle mi gi — bli nɔlale bli vole we lɛ

¹ Maa a mi lé Gakelebale wɛwɛ dɔ a ma, a nya. A wɛwɛ a bélé an bla vlewɔlɛ zo.

² É go an nya gunutinu va, É ’ka go lɛ an nya san va lo.

³ Maa do ma lé éé bɛ nwaan yifaama; Maa lé éé an blaan yifaama.

⁴ É an nɛ valé an kɔlɛ ble, É an wɔlɛnu yéli.

⁵ É guru bo an zi, É an zi lɛ sɔɔ migyɛlale valé nyanéblele nya.

⁶ É an nyana gunutinu va, Bélé munu lé wo gana mɔn é kyɛn, wo zo.

⁷ É guru diri an zi léé, té an bɔra lo, É gɔgɔbale bɛnzannu vɔ an ma;

⁸ Maa siaa plɛplɛ léé, mi do ’é bɔ an va, É ’ka anlé bazorole nyi si lɛ lo.

⁹ É anlé zi lɛ tan gɔlɛnu nya, É anlé zinu ga.

¹⁰ É kɛlɛ an lɛ bélé wi lé wa laama urisi, ’té éé mi ma vɔɔan, a zo, Bélé golizra lé é ke é yɔɔle, a zo.

¹¹ É an si anlé zi ta, é an wi kini ékema, É daan an ma, yé an vo é boa.

¹² Élé sa gana, yé é an dɔ Alé sa vulivazan nya.

¹³ Alé sawɔlɛnu lé éé wo sié é kɔlɛ gi, Wo vɔ an sowɔlɛ la.

¹⁴ Maa kɛlɛ anlé munu faa lé yérisiémazan nya; Yi faa do do ma, woo an tɔ vɔa lɛrɛ nya.

¹⁵ É an kan fɛ nyanale nya, É ziri’yi nɔ an lɛ minifɛ nya, yé é an gyɛ bélé nwɛ zo.

¹⁶ É an suiɛ yéli gɔlɛ nya, É kyɛyee zén an la.

¹⁷ É vole drɔɔ si an lee, Maa ’ka ginanale yé é dɛrɛ lo.

¹⁸ Yé maa léé: Anlé plɛplɛ nyaa, An bli ’ka é dɛrɛ Gakelebale lɛ lo.

¹⁹ Dé an bɔn‐in bɔrɔ anlé kleblele valé we tɔntɔn lé é bɔ an ma bɛ, wo ma, Yee valé ziri’yi valé migyɛlale ma,

²⁰ Dé a sele dɔ an gi boenwo, É an zuru dia an gi.

²¹ Wenu lé é sɔ an lɛ léé, an bɔn‐in bɔrɔ wo ma, Yé wo an blila dɔ plɛplɛ yé an bli é vo we lɛ, wo lé ke ’ko:

²² Gakelebale lé zin ’ka nyaan lo, A nyanai zénle glɛ ’ka lo.

²³ Woo bɔraan bladi faa do do ma we dɛrɛ nya, I yara pale we la glɛ ’ka lo.

²⁴ An boen léé: Gakelebale a anlé tɔnɔ nya, Bɛwemalé maa a a va léé, an bli ’é vo a lɛ.

²⁵ Mian a bli ke Gakelebale lɛ, Gakelebale a é zin a ma, Mi lé éé a naginian, ’bɛzan lé.

²⁶ Dé mi éé Gakelebale lɛbɛn‐é léé, é bɔ ’é va yé é vo é tadɔle, ’Bɛ a é zima.

²⁷ Dé mian ’wuo dɔ Gakelebale lé we vɔle ’é lɛ wuo É boroné la bléyi va, ’Bɛ a é zima.

²⁸ Iin, dé Gakelebale a fe mian lɛ léé, ’É vo é do yé ’é tadɔ, ’bɛzan a kɛlɛ ma.

²⁹ ’É é ’wuo wɔra a gane wuo ma, Dé a bli é dan vo lɛ we lɛɛ?

³⁰ É dan é blin nɔ lɛ ’é blingyɛzan lɛ. Wo dan serele bo lɛ a ma kiɛre.

³¹ Naa, Mizan ’Ka sɔn vɔa ’bɛ zoɛ minu ma yifaama lo.

³² Alé nyané pale mi ta zuo, É élé nyanai zénle valé mi mawe dɔɔle nagɔɔn‐an a lɛ.

³³ Naa, kle pale munu ta valé wo zunle ’Ka Mizan lé blibɔmawe nya lo.

³⁴ Dé woo luugimunu faa zɔn‐o Wo gane nya wolé tɛrɛ la,

³⁵ Dé woo glawe kɛla mi tegelenu lɛ Loruzan yara,

³⁶ Dé woo we dɔa mi tegele nwiin weblena, ’naan, Mizan ’ka ’bɛna yé loo?

³⁷ De ɛ bɔa a fele lɛ léé, we ’ko é dan bɔ lɛɛ? ’Té dé Mizan ’ka a nyi si lɛ lo.

³⁸ We zin valé wenyané éé sié Loruzan lé blibɔmale va, yee kaan loo?

³⁹ Mɛmalé blaminu woo voo gun gyɛna wolé tɛrɛla gii? É a lé wo we pla ’wobo lɛ, wolé wenyané ma.

⁴⁰ Kaa kaabo kɛlɛwe nagini yé kaa wo gi kuli, Yé kaa nɔla Gakelebale vazia;

⁴¹ Kaa yara valé kaa bɛnu nwa Kazambale lé é ke la gi, a vazia:

⁴² Ko wenyané kɛlɛ, ko nwa Bale ma, I ’ka ko ma we vo lɛ lo.

⁴³ I bli fli amalé i yɔɔ ko lee; i ko zuo bin; I munu gyɛ, ’té i nyanai ’ka zén‐é wo ta lo;

⁴⁴ I ibo ta yɔɔ lati wuo, Léé, té kolé bazorolenu é bɔ i va lo.

⁴⁵ I ko kɛlɛ serelebomazannu valé yuɛvɔzizannu nya Munu méléna.

⁴⁶ Munu faa lé wo ke ko nyanézannu nya, Woo we fé ko ma,

⁴⁷ Kanale blɛn koo, guru koo, ’Wiile ko ta koo, sɛrɛle tata koo, yee lé bé nɔ ko lɛ.

⁴⁸ An yuɛyi éé yoroan bélé ’yiyoro zo, Anlé munu sɛrɛle tata we ma.

⁴⁹ An yuɛyi éé zén‐é yifaama, ’té é ’ka kinié lo, ’Té é ’ka bélié lo,

⁵⁰ Fɔɔ yé Gakelebale lé é ke la gi loru Yé ’é a nagini yé ’é a ye;

⁵¹ An yuɛ a kle blena, Anlé flamunu faa lé we ma.

⁵² Munu lé wo ke an nyanézannu nya, ’té ko valé wonu lé we ’ka lo, Wo an zuo bin bélé wi zo.

⁵³ Wa a va léé, wo an pa guru gi, Yé wo gɔlɛnu vuli an va.

⁵⁴ ’Yinu an ta pla, Yé maa léé: Anzé nyaa.

⁵⁵ Oo Gakelebale, maa i tɔ laa ’Té maa a guru wɔlɛ ma.

⁵⁶ I an dére ’ma; Té i tɔné lɛ tan anlé bawuruma flinle valé an siaalenu lee lo.

⁵⁷ Yian nya lé maa i laa, i bié an sɔnɔ, Yé i lé an lɛ léé: Té i kana lo.

⁵⁸ Mizan, i dɔ an zuo, I an tabo.

⁵⁹ Gakelebale, kle lé wa pa an ta, bé ye; ’I anlé we ble.

⁶⁰ We faa lé wa lɛgi pa an ma, bé ye, Wo nwa an ma do, wo faa an ma we ble.

⁶¹ Gakelebale, wo an sɔnɔ fɛan zo, bé ’ma, I wo faa lé an ma weblele ’ma.

⁶² An nyanézannu lé wefele an ma valé wo bɔngiwenu Lé wa bɛ paan ékema do an ma yi faa do do ma, bé ’ma.

⁶³ Dé wa é nyanaleoo, dé wo nwaoo, ’bé nagini, Woo an tɔ vɔa lɛrɛ nya.

⁶⁴ Oo Gakelebale, i dan wo gooli pa lɛ Wo bɛ panyanama yɛrama;

⁶⁵ ’I bli plɛplɛ nɔ wo lɛ Yé ’i bale pa wo ma ma.

⁶⁶ Oo Gakelebale, ’i wo zuo bin i bli flile nya, yé ’i wo kulu ga Lanu wuo.