Jérémi Lé Wuvɔ Sɛbɛ 2 - Kazambale lé Sebe Sauunu 1979

Jérusalɛm gi we lɛdɔle voélazan

¹ Yé mɛ kɛlɛɛ? Gakelebale bli fli yé é lati bua Siɔn munu ta, É Izraɛl lé fua tɔbɔle si la gi yé é a zun tɛrɛ la, A bli fli yian nya, A gane dɔrana sele ’ka dɔ lɛ a gi lo.

² Mizan Jakɔb lé munu nyanana faa sɛrɛ, ’té a nyanai ’ka zén‐é wo ta lo; A bli flile baba zi, é Izraɛl munu yɔɔna plɛplɛnu guru zana a gi; É a kɛlɛ léé, wo burula tɛrɛ va. É fuatɛrɛ valé é nwiinzannu sɔnné sɛrɛ.

³ A bliflile baba zi, é Izraɛl munu lé plɛplɛ nyaa; É é bɛyi si wo ’lɛ wo nyanézannu yuɛ va, É kyɛ bi Jakɔb lé munu méléna, Yé kyɛnɛnɛ wo zi fɛnu faa ble.

⁴ É sa gana wo ma bélé wo nyanézan zo, A bɛyi éé bon‐ɛn‐an wo nya bélé mi lé éé nwaan é bɔluzan ma, a zo; Fɛnu faa lé woo mi yuɛgi bɔa, é wo sɛrɛ, A wɛwɛ dɔ yé éé zén‐é Siɔn munu lé sɔkɔn ta bélé kyɛ lé.

⁵ Mizan kɛlɛ bélé wo nyanézan zo, É Izraɛl munu ble; é wolé fuakɔnnu faa ble, É wo yɔɔna plɛplɛnu sɛrɛ; É Juda munu kɛlɛ nyanéblezannu valé dunnuzannu saa nya.

⁶ É élé sɔkɔn zana a gi bélé zianféi sɛrɛle zo, É wolé zén‐ékemana sɛrɛ; Gakelebale a kɛlɛ, yé Siɔn munu gi san ’wolé fɛti valé ’wolé flinyinu ma, Yé alé bliflile baba zi, é sɔn vɔ minwiinzan blɛn valé Balebanzan ma.

⁷ Mizan léabo ’é banna ma, é sɔn vɔ élé fɛna sauun ma; É Siɔn lé fuakɔnnu pa wo nyanézannu lee, Wo siaa Gakelebale lé kɔn gi, yé wo wo dére ’ma baa, Bélé fɛan zo lé wa maan fɛtiyi la, a zo.

⁸ É a Gakelebale gi léé, é dan Siɔn munu lé kɔn gurunu sɛrɛ lɛ. É kɔn dɔ baworo soi, é ’ka é bɛ si lɛ ana lo fɔɔ yé é wo sɛrɛ tata; É fla zi gɔrɔnu valé kɔn plɛplɛnu ma vo drɔɔdrɔɔ, Wo kɛlɛ ékeva é ’bin nya.

⁹ Tɛrɛ zén alé duolinu ta, É a lɛ tan foliɛwɔlɛnu sɛrɛ, é wo yéli, Siɔn munu nwiinzan blɛn valé minwiinzannu a bɛnnu va, bélidɔwe ’ka ana é dɛrɛ lo. Balelayezannu é ziin, Gakelebale ’ka we gɔɔn‐an wo lɛ yuɛzi gi é dɛrɛ lo.

¹⁰ Siɔn mi segelenu woo nyanaan tɛrɛ va, ’té wo ’ka we sié a ta lo. Wo vun zén ’wo nwiin, Wo bɔlɔ zén ’wo ta; Jérusalɛm munu ’wo ’wuo dia tɛrɛ va.

¹¹ An yuɛyi kiɛre zénle we ma an yuɛ fuu si é ta, a bli ’ka é male an gi lo; An gi nyɛ kini Dunu zénmitawe lé é bɔ anlé munu ma, alé we ma. Nunukénénénu valé nyɔmanénu fuu si wo ta flaworo dii zinu ta.

¹² Wo lé wo bunu lɛ léé: ’Sa a kyɛɛn? Nwɛ a kyɛɛn? Yé wo dia flaworo dii zinu ta bélé munu lé wo wo tuo, wo zo, Wo ga wo bunu blinii.

¹³ An dan fe lɛ i lɛ nɔɔ? Jérusalɛm munu, maa ka daan mɛ fɛ maa? Jérusalɛm munu, Maa ka daan mɛ fɛ ma ka tɔrɔ paale we maa? Naa, ka manɔn a blɛn bélé wɛyi zo; de ɛ bɔa a nyaale lɛɛ?

¹⁴ Kalé balelayezannu lé balelayele a boawe valé vié nya, Wo ’ka ilé weple bɔra lɛ Léé, té ka go luu gi lo lo. Wenu lé wa gɔɔn ka lɛ wa viéwenu valé dabliwe nya.

¹⁵ Giézannu faa woo bɛ gya i ta, Woo ’furu fɛɛn, woo ’wuo nyɔɔn‐an Jérusalɛm munu ma, Yé wo léé: Fla lé wo léé, é a é nɔnɔmi é baba, É a tɛrɛlamunu faa lé ginanamafla nya, yee lé é ke ’koo?

¹⁶ Ka nyanézannu faa woo ’léé fuoan ka ma, Woo ’furu fɛɛn, yé woo suiɛ giéan ékema, Yé wo léé, ko mini a ta. We lé ko lɛbɛn‐é turu, yee lé bɛ; ko a lɛbɛn, yé é bɔ; ko a ye sin.

¹⁷ Gakelebale é bligiwe lɛ sɔɔ, Dére lé é a fe é kyɛn, é a lɛ sɔɔ; Yee fla lé é a sɛrɛ, ’té a nyanai ’ka zén‐é a ta lo; É i kɛlɛ i nyanézannu ginanamafɛ nya, yé munu lé wo yaa i ta, é wolé plɛplɛ taa pa.

¹⁸ Woo siaan, ’té wo bli a Mizan lɛ, Siɔn munu lé flagɔrɔ, ’i kɛlɛ bélé mi lé éé wuvɔa é yiéyi valé é béli, ’té a yuɛyi éé yoroan, a zo. Té i flin lo, Té i yuɛyi é nyaa i yuɛ gi lo.

¹⁹ ’Ka nwa, ’ka ma dunnu wo a lɛ é béli, ’Ka bligiwenu faa bɔra yé ’ka zana Mizan lɛ; ’Ka bɛ nwa a vazia, kalé nénu lé ke gana Lɔrɔ nya zi blannu faa ta, wo vole é yuɛma we ma.

²⁰ Gakelebale, ’bé gini, mi lé i ’bɛ zoɛ we kɛlɛ a lɛ, ’bé ye. É a lé lomu wobo kulu blee? Né kiénénu lé wo bli bɔ wo ma, ’wo wo blee? É a lé wo Balebanzannu valé balelayezannu gyɛ za ma Mizan lé fɛna sauun naa?

²¹ Né valé mi kwanu wo dia zinu ta, Wo anlé blɛnnu valé anlé pɛniɛnu gyɛ gwɔun nya. I bli fliyi nya i wo gyɛ, I wo bɔrɔ bo; i nyanai ’ka zén lɛ wo ta lo.

²² I di kinile laa bɛ faa ma léé, ’é zén an gi, bélé fɛti yi la mi zénle zo. Gakelebale bli fli yian nya, mi lé ’bɛ é so a lee, ’bɛzan ’ka lo, yé voéyuɛmazan ’ka lo. Munu lé maa wo pa yé wo tin, An nyanézan wo ble.