Jérémi Lé Wuvɔ Sɛbɛ 1 - Kazambale lé Sebe Sauunu 1979

Jérusalɛm munu a kle blena

¹ Yé mɛ ɛ kɛlɛɛ? Fla lé a tamunu ke é vinin kiɛre, é vo é plaa? É kɛlɛ bélé zanagala le do zo. Yee lé a tɔ ke turu é bɔle blɛn bɛnnu méléna, ’té é kɛlɛ tɛrɛ faa nwiinzan nya, Yee ɛ vo luubale gii?

² Éé wuvɔa tu la, yé a yuɛyi a golɛ la blé; Munu faa lé é sɔ wo lɛ, a tɔrɔpaazan do ’ka ye lɛ ’bɛnu va lo; A béénu faa bli nɔla a ma, Yé wo kɛlɛ a nyanézannu nya.

³ Judamunu kɛlɛ lulazannu nya, yé wo kɛlɛ luu nya, ’té woo yaan wo ta. Woo nyanaan bɛnnu méléna, Yé wo ’ka flinna do yena pelo; Wolé kle blɛn blele gi, nyanépawotazannu faa éé bɔraan wo ma fiaa.

⁴ Siɔn zinu ga, naa, mi ’ka gona ana fɛti kɛlɛna é dɛrɛ lo, Lunu tuu ana zinu faa ’léé; Alé Balebanzannu éé dunnuan, Alé blɛnnu a kle blena, yé fla ta kyɛ a é dɔle.

⁵ Munu lé woo yaan wo ta, ’bɛnu éé minié wo ta; wo nyanézannu vo drɔɔ; Naa, Gakelebale a zun, Wenyané kiɛre lé é a kɛlɛ bɛ, alé we ma; Alé nénu faa luutawo yaawotazannu ’lɛ.

⁶ Siɔn tɔbɔle faa san é lee; A nwiinzannu kɛlɛ bélé yilédiri lé É ’ka é blena do kpen yé lo, a zo, ’Té plɛplɛ ’ka a lee lo, yé éé fwian mi lé ke a zuo binna, a ’lɛ.

⁷ Jérusalɛm lé klebleyi valé alé nyanaizénlayi nya, We néné faa lé ke azé nya é vinin, wo sele dɔ a gi, Naa, sin alé munu dia munu lé ’bɛnu éé yaan wo ta, ’bɛnu lee, ’té wo bɔvazan do kpen ’ka lo; Wo nyanézannu wo nagini é pla, ’té woo yéri sié a zunle we ma.

⁸ Jérusalɛm lé wenyané fan, Bɛwemalé é kɛlɛ léabomafɛ nya; Munu faa lé wa tɔ bɔa turu, wa yé mi porole nya, amalé woo serele boo a ma; Yeebozen éé bamaflin woo, ’té éé ’wuo vɔa é wuo.

⁹ Alé sɔ lɔlu tiri dɔ, yé é ’ka bɔn‐in bɔrɔan é nyaale ma lo; Munu gi vuru a diabɛ lé we ma, yé a tɔrɔpaazan ’ka lo; Oo Gakelebale, ’i anlé nyanainya we ye. Ko nyanézannu éé ko naginian ’wo yuɛ zuo.

¹⁰ Yaawotazannu ’wo bɛ soi Yé wo alé fɛwezannu faa si, Yé bɛnnu lé i wo zénle ékeva yi ga ilé munu nya, Wo wo ye wɔrana ilé fɛna sauun na.

¹¹ Alé munu faa éé bamaflin woo, woo fɛblele naginian; Woo wolé fɛwezannu no fɛblele we ma, Léé, wo fuu ’é kɛlɛ wo ta é ziin. Gakelebale, bé ye, woo serele boo an ma fɛan zo, bé nagini.

¹² Maa a wefena ka lɛ, ka faa lé ka ke giéna ’ko, ka lɛ. ’Ka nagini, ’ka ye, nyané lé maa a blena ’ko, ’Bɛ zoɛ nyanéblele bɛ aa? Gakelebale bli fli baba yi nya é kle pa an ta.

¹³ É kyɛ si loru yé é a zén an wɔlɛnu ma ’té éé wo blé. É séli vɔ an lee, Yé é kɛlɛ léé, an dia an zuozia; É an bli kyɛ dɔ é baba, yé an fuu éé sié an ta yifaama.

¹⁴ Bale anlé weplenu yere an bɔrɔ ma, É a vɔ é ke zi an bɔrɔ ma, É anlé plɛplɛ nyaa, Mizan an pa munu lé maa ’ka bɔa dɔle lɛ wo ma plɛplɛ lo, wo lee.

¹⁵ Mizan anlé gulidanzannu faa dia, É sunyanu gu blɛn zén ékeva an ma, Léé, ’wo anlé pɛniɛnu gyɛ; Mizan Juda munu zɔn é gane nya bélé dɔrɔporo zo.

¹⁶ Bɛwemalé an wuvɔa, ’té an yuɛyi éé zén‐é, Naa, mian énɔ an tɔrɔ paama, é si an ma baa, Mian éé an fuu dɔa an ta, yee lé. Guliwuo vo an nyanézannu lɛ, amalé an benu bli kyɛ dɔ é baba.

¹⁷ Siɔn é bɛ soi, Yé mi do ’ka we lɛ a zi lo; Jakɔb nyanézannu lé é ke ’bɛna tɛrɛ la, Gakelebale wo nwa a ma; Jérusalɛm kɛlɛ naaninvɔmafɛ nya wo méléna.

¹⁸ Gakelebale a tegele, Naa, é we fe an lɛ yé an bɔrɔ vɔɔ a ta. ’Kaa migɔnɔ faa, ’ka tɔné dɔ, ’ka anlé nyanéblele ye. Anlé blɛnnu valé anlé pɛniɛnu go luu gi.

¹⁹ Maa an béénu laa, yé wo dabli kɛlɛ an lɛ, Bléyian va lé anlé Balebanzannu valé anlé mi segelenu a fɛblele naginina, Léé, wo fuu ’é kɛlɛ ’wo ta é ziin, Wo ga fla blɛn ta.

²⁰ Gakelebale, ’i anlé nyanéblele blɛn ye. An bli ’ka é male an gi lo, An zuru a vɔna an gi, Naa, an tɔné gi kɛlɛ plɛplɛ i ma. Gwɔun a fɛ gyɛna gɔrɔ zi, ’té ga a fla.

²¹ Wo anlé bamaflinle ’ma, yé mi do ’ka an tɔrɔ paa lɛ lo; An nyanézannu faa anlé we tɔntɔnnu ’ma; Wo gi nana léé, bé kɛlɛ é zima; Naa, yi lé bé zana dɔɔ, léé, wozé ’é kɛlɛ bélé anzé zo, a yi ’é bɔ ma.

²² ’I wolé wenyanénu faa ye ma. We lé bé kɛlɛ an lɛ anlé wenyanénu faa lé we ma, ’I wozé kɛlɛ a zo ma, Naa, an bamaflin wo di, yé an nyané ble an bli gi.