Kelewenu 9 - Kazambale lé Sebe Sauunu 1979

Sɔl bli nɔla

¹ Naa, Sɔl a yifaama Mizan zuomunu gyɛle ɛ ma, yé é go Balebanmunu ’lɛzan va,

² yé é a laa ’bɛ lee léé, ’bɛ ’é sɛbɛ nɔ ’é lɛ Damas lé bazorokɔn gi munu zé nya léé, dé é zi dɛrɛ ’ko ta tawozannu ye, dé wa gɔnénu nyaoo, dé wa lomu nyaoo, ’é bale vɔa wo ma yé ’é da wo faa nya Jérusalɛm.

³ É a gona Damas aan wo, é bɔ fla sɔnɔ tɔɔn, san do si la gi, yé ’bɛ diri a zi.

⁴ É dia tɛrɛ va, yé é dére do ’ma yé ’bɛ lé a lɛ léé: Sɔl, Sɔl, mɛmalé i nyané paan an taa?

⁵ É a zi pa ’bɛ lɛ léé: Anzan, de ɛ ke bii nyaa? Yé Mizan léé: Maa a Jézu lé i ke nyané pana a ta, a nya.

⁶ ’I nwa, ’i bɔra fla, yé wean é a lé bé kɛlɛ, wo dan a fe lɛ i lɛ ’bɛna.

⁷ Munu lé wo ke a va, kwakwa vɔ ’bɛnu ta; wo dére ’ko ’ma é zima, naa, wo ’ka mi do kpen ye lɛ lo.

⁸ Sɔl nwa tɛrɛ va, ’té a yuɛ a é fuole, duowo, é ’ka fɛ do kpen yé lo. Wo kun a bɛ ma, yé wo go a nya Damas.

⁹ É vo ’bɛna yi yaa, ’té é ’ka fɛna yé lo, ’té é ’ka fɛ blé lo, ’té é ’ka ’yi minian lo.

¹⁰ ’Té Jézu zuomi do a Damas, wa laama Ananias. Mizan we fe ’bɛ lɛ yuɛzi gi yé é léé: Ananias. É léé: Mizan, maa lo.

¹¹ Yé Mizan lé a lɛ léé: ’I nwa, ’i go fla worona zi lé wa laama Drɔle, a ta, yé Taase mi do lé wa laama Sɔl, bé gini Judas lé kɔn gi.

¹² É a bazorona, yé é a ye yuɛzi gi léé, mi do lé wa laama Ananias, ’bɛ wɔra, yé ’bɛ é bɛ pla ’é ta, élé fɛna yele é ziin we gi.

¹³ Ananias lé Mizan lɛ léé: Mizan, we lɛrɛlɛrɛ faa lé mi ’ko a kɛlɛ ilé munu ma Jérusalɛm, maa a ’ma mi kiɛre ta.

¹⁴ Balebanmunu segelenu a se kɛlɛ a lɛ léé, munu faa lé wo ke i tɔ laana fɛkona, é bale vɔ ’bɛnu ma.

¹⁵ Mizan lé a lɛ léé: ’I go. Mi ’ko, maa a si anlé wekɛlɛfɛ nya an tɔ bɔrale we gi, bɛnnu koo, minwiinmunu koo, Izraɛlnu koo, wo va.

¹⁶ É dan nyané ble lɛ an tɔ ma fɛan zo, maa dan ’bɛ gɔɔn lɛ a lɛ.

¹⁷ Ananias go. É bɔ aan wo kɔn gi é bɛnu pla Sɔl ta yé é léé: An bwe Sɔl, Mizan Jézu lé é bɔra i va ’té i a zia, yee ɛ an pa zia ilé fɛna yele é ziin valé Léli Sauun vɔle i ta we gi.

¹⁸ A bléyi duo nya fɛnu si a yuɛ va bélé pɔ kɔlɛnu zo yé wo dia, yé é fɛna ye é ziin. É nwa yé wa batizéwo.

¹⁹ A zuo dé é fɛ ble faa é plɛplɛ ye é ziin. Sɔl vo yi kenu nya zuomunu lé wo ke Damas, wo va.

Sɔl wenéné fe Damas

²⁰ Tɔɔn, yé é we fe bazorokɔnnu gi léé, Jézu a Kazambale Be nya.

²¹ Munu faa lé wa ’ma, wo gi vuru yé wo léé: Mi lé éé nyané paan munu lé wo tɔ ’ko laan, wo ta, Jérusalɛm, yeean ke bɛ loo? Yé é ’ka da lɛ wo si lɛ ’ko yé é go wo nya é yerele Balebanmunu segelenu lɛ loo?

²² Naa, Sɔl dɔ plɛplɛ yé we ginin kiɛre go dɔle nya a gi, yé é Damas Juifinu kele, a gɔɔnle nya léé, Jézu a Krist nya.

Sɔl so Juifinu lee

²³ Yi suwulu giéle zuo, Juifinu ’wo gi pa do léé, ’wa gya,

²⁴ yé Sɔl wo gi pale do we ’ma. É béli valé é yiéyi munu vo Sɔl mabɛnna fla zi gɔrɔnu ’léé, léé, dé wa ye wa gyɛ.

²⁵ Naa, yi do nya é béli zuomunu a sia yé wa zun gɔrɔ zi kyɛɛ gi.

Sɔl go Jérusalɛm

²⁶ Sɔl bɔ aan wo Jérusalɛm, é kwa kuli léé, ’é pa zuomunu va, naa, ’bɛnu faa kana a lee. ’Bɛnu ’ka pa lɛ a ta léé, é kɛlɛ Jézu zuozan nya lo.

²⁷ Naa, Banabas a pa ’é va yé ’bɛ go a nya nwunvɔmunu va. Fɛan zo lé Sɔl Mizan ye zia yé ’bɛ we fe a lɛ koo, fɛan zo lé é we fe gɔrɔ la Damas Jézu tɔ nya koo, Banabas a zuo fe wo lɛ.

²⁸ Sɔl éé goo ’té éé dan wo va Jérusalɛm, yé é we fe Mizan tɔ gi éboen ma ’té kana ’ka a gi lo.

²⁹ É we fe yé é za vɔ Grɛki Juifinu va é ziin. Naa, munu ’ko wa a ma vɔɔna léé, ’wa gyɛ.

³⁰ Bwenu a gi dɔɔ aan wo, yé wo go a nya Sézaré, yé wa pa zia Taase.

³¹ Léglizigimunu a drɔɔ Judé tɛrɛ faa koo, Galilé tɛrɛ koo, Samari tɛrɛ koo, wona. Wa é dɔle plɛplɛ yé wo tawo Mizambale lee kana nya wo gi, yé wo ’léé gi gyɛ Léli Sauun bɔle wo va nya.

Éné béli

³² Piɛri go aan wo we lɛ Kazambale lé munu faa va, é bɔra é ziin Lida munu va.

³³ É mi do ye ’bɛna, wa laama Éné. Furuagyɛzan lé. É vo é yiale lɛɛ sɔraa.

³⁴ Piɛri lé a lɛ léé: Éné, Jézu Krist i béli. ’I nwa, ’ilé yialafɛ ma’lɛrɛ. Tɔɔn, yé é nwa.

³⁵ Lida munu valé Sarɔn munu faa ’bɛ ye aan wo, wo bli nɔla Mizambale va.

Dɔkas nwa gale va

³⁶ Le do a zuomunu va Jopé, wa laama Tabita. Wa laama Grɛki dére gi Dɔkas, ’bɛ gi léé, gan. Éé nyanama zin kiɛre paan yé éé blɛ kɛla nyanégyɛzannu lɛ.

³⁷ ’Bɛ bléyi ’ko va gyɛ vɔ a ma yé é ga. Wa zuru yé wa pla kɔn nwiin kɔnné do gi loru.

³⁸ Lida ke aan wo Jopé sɔnɔ, zuomunu a ’ma léé, Piɛri a ’bɛna, wo mi fié nwunvɔ a laana léé, ’é da ’wo va é nya do.

³⁹ Piɛri nwa yé wo go munu ’konu nya. Wo bɔ aan wo, wo go Piɛri nya kɔn nwiin kɔnné gi. Gyɛzaralomu Piɛri zi lɛ sɔɔ wuvɔle nya, yé varɔnu valé sɔnu lé lezan ’ko a kɛlɛ, ’té é a wo va, wa gɔɔn a lɛ.

⁴⁰ Piɛri munu faa bɔra, yé é zun ’é powuo la yé é bazoro. Yé é yara nɔla lezan gale ta yé é léé: Tabita, ’i nwa. Yé ’bɛ é yuɛ fuo yé ’bɛ Piɛri ye, yé ’bɛ nyana.

⁴¹ Piɛri kun a bɛ ma yé é a nwa. Yé é Kazambale lé munu valé gyɛzaralomu laa yé é a nɔ wo lɛ ’té é a é yuɛma.

⁴² We ’ko nwɛɛn Jopé munu faa va yé mi kiɛre ’wo bli vo Mizan lɛ.

⁴³ Piɛri vo yi kiɛre nya Jopé zérigyɛzan do lé wa laama Simɔn, a va.