Kelewenu 8 - Kazambale lé Sebe Sauunu 1979

¹ Étiɛne gyɛle sɔ Sɔl lɛ. A yi duo nya wo nyané pa Jérusalɛm léglizigimunu ta é baba, yé wo faa nwɛɛn Judé tɛrɛ valé Samari tɛrɛ la. Nwunvɔzannu saa ɛ vo Jérusalɛm.

Sɔl nyané pa léglizigimunu ta

² Bale lé zi sɔlɛzannu Étiɛne pa, yé ’bɛnu a wuvɔ siaale nya.

³ Sɔl ’wii léglizigimunu ta, ’té éé wɔraan kɔnnu gi, ’té éé gɔnénu valé lomu kunwo, yé é wo vɔ bokɔn gi.

⁴ Wo lé wo nwɛɛn bɛ, wo go fɛfaana Bale dére fele nya.

⁵ Filip go Samari tɛrɛ la fla do la yé é Krist lé we fe ’bɛna.

⁶ Mi gu é tɔné dɔ Filip dére lɛ é zima; gyɛzorowenu lé é ke a kɛlɛna, wa ye yé we lé é ke a fena, wa ’ma, azama.

⁷ Naa, yo tiridɔlenu si gwegyɛmunu kiɛre gi siaale plɛplɛ nya, yé furuagyɛzannu valé ganesuruzannu kiɛre béli.

⁸ Yé fla ’ko la munu gi nana é baba.

⁹ Mi do ana é kyɛn fla ’ko la, wa laama Simɔn. É a ébo kɛlɛna blɛn yo kɛlɛle nya, yé é Samari munu gi vuru.

¹⁰ É sia né kiiéné ma yé é bɔ mi kwa boen ma, wo faa wo tɔné dɔ a lɛ é zima yé wo léé: Mi ’ko a Bale lé plɛplɛ lé wa laama plɛplɛ blɛn, a nya.

¹¹ É munu gi vuru élé yo kɛlɛle nya ana mɔn, amalé woo tɔné dɔa a lɛ flee.

¹² Naa, Filip Kazambale plale mi nwiin valé Jézu Krist tɔ lé we fe wo lɛ wenéné nya aan wo, wo dɔ a ta, yé é gɔnénu valé lomu batizéwo.

¹³ Simɔn bozen dɔ a ta, yé dé wa batizéwo é ’ka si lɛ Filip va é dɛrɛ lo. É gyɛzorowenu valé we blɛnblɛnnu kɛlɛle ye yé a gi vuru.

¹⁴ Nwunvɔmunu lé wo ke Jérusalɛm, wa ’ma aan wo léé, Samarinu Kazambale dére nyi si yé wo Piɛri valé Jan pa wo lɛ zia.

¹⁵ ’Bɛnu bɔ aan wo Samari munu va wo bazoro wolé we ma léé, Léli Sauun ’é vɔ wo ta.

¹⁶ Naa, é ’ka tan vɔ lɛ wo va mi do kpen ta lo. Wo wo batizéwo é wo Mizan Jézu tɔ gi.

¹⁷ Yé Piɛri valé Jan ’wo bɛnu pla wo ta yé Léli Sauun vɔ wo ta.

¹⁸ Simɔn a ye aan wo léé, nwunvɔzannu bɛnu plale mi ta nya lé Léli Sauun vɔ munu ta, é da gɔɔli nya wo lɛ,

¹⁹ yé é léé: ’Ka plɛplɛ ’ko nɔ an lɛ é ziin, yé dé an bɛ pla mian ta yé Léli Sauun é vɔ a ta.

²⁰ Naa, Piɛri lé a lɛ léma: Bii valé ilé gɔɔli ’é go kyɛ va ékeva. É a i gi léé, woo Kazambale lé blɛ ’ko yé gɔɔli nyaa?

²¹ I bli ’ka tegele Kazambale yuɛ gi lo, amalé izé do kpen ’ka we ’ko gi lo.

²² Naa, ’i bli nɔla ilé wenaané ma, yé ’i bazoro Mizambale lɛ, yé dé é dan i ma we vo lɛ ilé gi bɔrɔle naané maa?

²³ Maa a ye léé, i a bli nyané maawona yé bii a weple lé luubale gi.

²⁴ Simɔn lé a lɛ léé: Kabozen ’é zanté vɔ Mizambale lɛ an lɛ, yé we lé ka a fe, té a do kpen é bɔ an ma lo.

²⁵ Wo wenayedére valé Mizan dére fe aan wo faa, Piɛri valé Jan nɔla é ziin Jérusalɛm wenéné fele nya Samarinu lé fla kiɛre la.

Filip valé Étiopi mi

²⁶ Mizambale lé lanje do we fe Filip lɛ yé é léé: ’I nwa yé ’i go yirinwana bɛyila nyéné la, zi lé é si Jérusalɛm yé é zun Gaza, a ta.

^27-28 É nwa yé é go. Yé bé ye, Étiopi tɛrɛ la mi do lé é ke miblale nya, é si Bale bɔna Jérusalɛm yé é a gona élé tɛrɛ la é ziin. É a Étiopi munu nwiin le Kandas lé minisi nya, yé ’bɛlé fuafɛnu faa a yee ɛ lee. Gɔnézan ’ko a é nyanale élé goro gi, ’té éé balelayezan Ézai lé sɛbɛ ta fé.

²⁹ Yé Kazambale Léli lé Filip lɛ léé: ’I go yé ka kee goro ’ko nya.

³⁰ Filip vlan si a vazia, yé balelayezan Ézai lé sɛbɛ lé Étiopi mi ke a ta fena, é a ’ma. Yé é lé ’bɛ lɛ léé: Sɛbɛ lé bé ta fé bɛ, bé gi maan?

³¹ ’Bɛ lé a lɛ léé: Dé mi ’ka a gi fe lɛ an lɛ lo, an bɔa a gi ’male lɛ kaa? Yé é lé Filip lɛ léé: ’I vɔ goro gi yé ’i nyana an va.

³² Sɛbɛ kuru lé é ke a ta fena, yee lé ke ’ko: Wo go a nya, bélé ’bla lé wo go a gyɛ lɛ, a zo; Yé é ’ka we si lɛ a ta lo Bélé fɛan zo lé ’blané lé é ke é kyɛɛbɔizan lee, ’té é ’ka wé lo, a zo.

³³ Ébo kɛlɛ kiéné bléyian va, wo ’ka alé we ble lɛ lo. De ɛ dan a kulu lé we fe lɛɛ? Naa, alé vole é yuɛma bɔi a ta tɛrɛ la.

³⁴ Miblale lé Filip lɛ léé: De lé we lé balelayezan ke a fena ’bɛ zoo? Abozen lé we lé laa, mi bɛ lé we léé? Bé gi fe an lɛ.

³⁵ Yé Filip we si a la, yé é a pélisia sɛbɛ kuru ’ko la yé é Jézu lé wenéné fe a lɛ.

³⁶ Wa gona aan wo yé wo bɔ ’yi ma. Miblale léé: ’Yi lo; mɛ fɛ ɛ yi ga an lee léé, té wo an batizéwo loo?

³⁷ Filip léé: Dé i bli vo Jézu lɛ tegele we ’ko nyi éé sié. Miblale léé: An bli vo Jézu Krist lɛ léé, é a Bale Be nya.

³⁸ É goro dɔ yé yee valé Filip zun yé wo go ’yi va, yé Filip a batizéwo.

³⁹ Wo bɔra aan wo ’yi va, Mizambale Léli Filip si, yé miblale ’ka a ye lɛ é dɛrɛ lo. Bléyian va lé é ke gona zia gi nanale nya,

⁴⁰ ’té Filip a Azot. Ana lé é si yé é go fɔɔ Sézaré, wenéné fele nya fla faa lé é gié wo ta, ana.