Kelewenu 7 - Kazambale lé Sebe Sauunu 1979

Étiɛne ébo zé fe

¹ Balebanmunu ’lɛzan léé: É a ’bɛ zo weboen nyaa?

² Étiɛne léma: An bwenu valé an tinu, ’ka tɔné dɔ an lɛ ma. Fuabale bɔra kaa tra Abraam va, ’té é a é nyanale Mézopotami tɛrɛ la, ’té é ’ka tan nyana lɛ Karan lo,

³ yé é lé a lɛ léé: ’I si i lelenu va, ’i si ilé tɛrɛ la yé ’i go tɛrɛ lé maa dan a nagɔɔn lɛ i lɛ, a ta.

⁴ É si Kaldénu lé tɛrɛ la, yé é nyana Karan. Dé a ti ga faa é si ’bɛna yé tɛrɛ lé ka ke é nyanale a ta kyɔ ’ko, yé Kazambale a nɔla ’bɛna;

⁵ Bale ’ka tɛrɛ kiéné nɔ lɛ a lɛ azé nya lo yé é ’ka é gane dɔrana boen ye lɛ lo, naa, Bale blivolɛdére fe a lɛ léé, é dan tɛrɛ nɔ lɛ a lɛ azé nya, ’bɛ valé a kulunu zé nya é voéla lii, dɔlé ’té alé né do kpen ’ka lo.

⁶ Kazambale lé a lɛ léma: I kulu é dan nyana lɛ tɛrɛ bɛ la; yé wo dan kɛlɛ lɛ ’bɛna munu lé luu nya, yé ’bɛnu é dan kle pa lɛ wo ta lɛɛ wuru fié.

⁷ Naa, Kazambale léé, bɛn lé ’bɛnu é dan pla lɛ wo nwiin, ’é dan ’bɛnu lé we ble lɛ. ’Bɛ zuo, wo dan fwi lɛ ’bɛna yé wo dan ’é bɔ lɛ yee tɛrɛ ’ko la.

⁸ Yé Kazambale é gi pa do Abraam va ganedɔwe nya. Bɛwemalé Abraam Izak yaa yé é a gane dɔ a yi sɔraazan nya. Yé Izak Jakɔb yaa yé é a gane dɔ, yé Jakɔb guniwuo vu ta fié yaa yé é wonu gane dɔ.

⁹ Guniwuonu Jozɛfu ma maawo yé wa dan yé mi lé ’bɛ a lɔ, ’bɛ go a nya Éjipiti tɛrɛ la.

¹⁰ Naa, Kazambale kɛlɛ a va, yé ’bɛ a si élé kleblelenu faa gi. ’Bɛ wedɔɔle nɔ a lɛ, yé ’bɛ a kɛlɛ mi zin nya Éjipitinu nwiinzan blɛn Faraɔn yuɛ gi yé Faraɔn a kɛlɛ élé kɔnzan valé Éjipiti tɛrɛ la gbɔrɔnama nya.

¹¹ Lɔrɔ dɔ Éjipiti tɛrɛ faa valé Kanaan tɛrɛ la. Nyanéblele kɛlɛ blɛn, yé kaa tranu ’ka fɛblele ye lɛ lo.

¹² Jakɔb a ’ma léé, buruwɔlɛ a Éjipiti tɛrɛ la yé é kaa tranu nwunvɔ ana é vinin gɔnɔ do.

¹³ Yé a gɔnɔ fiézan nya Jozɛfu ébo nagɔɔn é bwenu lɛ, yé ’bɛna lé Faraɔn Jozɛfu bɛn dɔɔ.

¹⁴ Yé Jozɛfu mi nwunvɔ é ti Jakɔb valé é bwenu faa sina. Wa mi yɔ yaa wɔlɛ vu ta soru.

¹⁵ Jakɔb go Éjipiti tɛrɛ la; ana mi lé é ga, yee valé kaa tranu nya,

¹⁶ yé wo go wo nya Sisɛm, yé mi pana lé Abraam a lɔ gɔɔlifu nya Sisɛm ti Amɔɔ benu lee, wo wo pa ’bɛna.

¹⁷ Blivolɛdére lé Kazambale a fe Abraam lɛ, a lɛsɔɔbléyi bɔ é pu, yé Juifinu ’léé gi gyɛ di yé wo fan Éjipiti tɛrɛ la,

¹⁸ fɔɔ, yé minwiinzan blɛn bɛ lé, ’bɛ ’ka Jozɛfu dɔɔ lɛ lo, ’bɛ pla wo nwiin.

¹⁹ Wo nwiinzan ’ko dabli kɛlɛ kaa bɛnnu lɛ, yé é nyané pa kaa tranu ta fɔɔ yé é léé, ’wo sɔn vɔ ’wolé nénu ma, léé, té wo vo é yuɛma lo.

²⁰ ’Bɛ bléyi va lé wo Moizi yaa. É a é nɔnɔmi Kazambale yuɛ gi. Wa pa moné yaa é ti lé kɔn gi;

²¹ yé dé wo sɔn vɔ a ma Faraɔn lu a si é be nya yé ’bɛ a pa.

²² We lé Éjipitinu a dɔɔ, wa faa paa Moizi gi. É a plɛplɛ dérenu valé we kɛlɛlenu gi.

²³ A lɛɛ kɛlɛ aan wo yɔ fié, é dɔ a gi léé, ’é go we lɛ é bwenu Izraɛlnu va.

²⁴ É Izraɛl mi do ye, ’té Éjipiti mi do a kle pana a ta, yé é kleblezan ta guli dan yé é ’bɛzé lɛgi pa, yé é Éjipiti mi gyɛ.

²⁵ É a Moizi gi turu léé, é bwenu a gi ’ma léé, ’é nya lé Kazambale é dan wo si lɛ we gi, naa, wo ’ka a gi ’ma lɛ lo.

²⁶ Dé ’bɛ é tu kini é bɔ Izraɛl mi kenu ma, ’té wo saa éé guli daan, yé é a a va léé, ’é wo kuun yé é wo pa ékema yé é léé: ’Kaa munu, ka saa lé. Mɛwemalé ka a nyané pana ka ke taa? Ka a bwe valé bwe nya.

²⁷ Naa, mi lé é ke nyané pana é bɔluzan ta, ’bɛ Moizi nyunu yé ’bɛ lé Moizi lɛ léé: De ɛ bii kɛlɛ ko nwiinzan valé kolé weblezan nyaa?

²⁸ É sɔ i lɛ léé, i an gyɛ bélé fɛan zo lé i Éjipiti mi gyɛ yese, a zoo?

²⁹ Dére ’ko ma lé Moizi vɔ fli gi, yé é go nyana lɛ Madian tɛrɛ la. Ana lé é négɔné fié yaa.

³⁰ ’Bɛ zuo lɛɛ yɔ fié, lanje do da a va Sinai gɔ lé bwi la, yiliné lé kyɛ ke a blena, alé kyɛnɛnɛ gi.

³¹ Dé Moizi ’bɛ ye a gi vuru we ’ko ma; yé é bié a naginile we ma yé é Mizambale dére ’ma,

³² yé ’bɛ léé: I tranu lé Bale lé an nya, Abraam koo, Izak koo, Jakɔb koo, wolé Bale lé an nya. Moizi kɔlɛ manyɔɔn yé é ’ka dɔ lɛ a gi léé, é yuɛ vɔ a ta é dɛrɛ lo.

³³ Yé Mizambale lé a lɛ léé: ’I sawala si i gane ma. Fɛana lé i ke é dɔle, ana a é tinle.

³⁴ Maa anlé munu lé nyané blele ye Éjipiti tɛrɛ la. Maa wolé dunnule ’ma, yé maa zun wo sile luubale gi we ma. Sin, ’i da yé maa i pa zia Éjipiti tɛrɛ la.

³⁵ Moizi ’ko lé wo sɔn vɔ a ma yé wo léé, de ɛ bii kɛlɛ ko nwiinzan valé kolé weblezan nyaa? yee lé Kazambale a pa zia wo nwiinzan valé wo ta gulidanzan nya, ’té lanje lé é bɔra a va yiliné gi bɛ, ’té ’bɛ éé bɔa a va.

³⁶ Yee ɛ wo si Éjipiti tɛrɛ la we blɛnblɛnnu valé gyɛzorowenu kɛlɛle nya, Éjipiti tɛrɛ la koo, Wɛyi Sɔɔn va koo, bwi gi koo, wona, lɛɛ yɔ fié gi.

³⁷ Moizi ’ko ɛ we fe Izraɛl benu lɛ léé: Kazambale é dan mi do nwa lɛ ka lɛ ka bwenu méléna balelayezan nya bélé ’yee zo.

³⁸ Munu lé wo zén ékeva bwi gi, yee Moizi a wo va, yé é a lanje va gɔ nwiin, ’té ’bɛ lanje éé we fé a lɛ. Yee Moizi ’ko lɛ lé lanje mi vo é yuɛma dére nɔ, yé é a nɔ kaa lɛ.

³⁹ Naa, é ’ka sɔ lɛ kaa tranu lɛ léé, wa lɛdɔma lo. Wo nwun zi dɔ a ta, yé wo bli nɔla Éjipiti tɛrɛ la zia é ziin,

⁴⁰ yé wo lé Arɔn lɛ léé: ’I kozé balenu kɛlɛ, yé ’bɛnu ’é vo tawona ko ’lɛ, naa, Moizi ’ko lé é ko si Éjipiti tɛrɛ la, dé mɛ we ɛ bɔ ’bɛ maa? ko ’ka ’bɛ gi dɔɔa lo.

⁴¹ ’Bɛ bléyi va wo diriné foto kɛlɛ yé wa ban, yé wo gi nana ’wo bɛnu panyanama ma.

⁴² Yé Kazambale é nwun zi dɔ wo ta yé é wo vo lagifɛnu bɔna, é a é gyɛle balelayemunu lé sɛbɛ gi fɛan zo, a zo; wo léé: Izraɛl munu, wi lé ka gyɛ, é valé sarakanu lé ka bo bwi gi Lɛɛ yɔ fié wuo, an lɛ lé ka kɛlɛɛ?

⁴³ Ka Mɔlɔk lé sɔkɔn valé Réfan bale lé monéné si; Miyilinu ’ko lé ka wo kɛlɛ, wo bɔle we gi. Maa dan go lɛ ka nya é ziin Babilɔn zi.

⁴⁴ Zén‐ékeva sɔkɔn a kaa tranu lee bwi gi; mi lé é we fe Moizi lɛ, ’bɛzan lé a lɛ léé: Bé kɛlɛ a kɛlɛbɛ lé bé ye, a yɛrama.

⁴⁵ Dé kaa tranu sɔkɔn ye, wo goan yé wo bɔra a nya bɛnnu lé Kazambale wo bin wo ’lɛ, wolé tɛrɛ la, ’té Jozué a wo zilɛzan nya. Yee sɔkɔn vo ana fɔɔ yé é bɔ David zé bléyi ma.

⁴⁶ David kɛlɛ mi zin nya Kazambale yuɛ gi yé ’bɛ a laa Bale lee léé, ’é kɔn dɔa Jakɔb lé Bale zé nya;

⁴⁷ yé Salomɔn ɛ yee kɔn dɔ Bale lɛ.

⁴⁸ Naa, duowo, kɔn lé mi a dɔa, Loruzan ’ka nyanaan ’bɛ gi lo, fɛan zo lé balelayezan a fe, a zo; é léé:

⁴⁹ Mizambale léé: La a ’élé fuablin nya, Yé tɛrɛ a ’é ganewuofɛ nya; Mɛ kɔn lé ka dɔa ’ézé nyaa? ’É flinna a kyɛɛn?

⁵⁰ ’É bɛan é fɛ ’konu faa kɛlɛ loo?

⁵¹ ’Kaa wemaplɛplɛzannu, ka lé ka bli ’ka sié ka kɛlɛwe kyɛn lɛ lo yé ka tɔnénu ’ka voo we lɛ lo, ka a é dɔle Léli Sauun ma plɛplɛ yifaama. Ka tranu a fɛan zo, a bɛ duo gi lé ka ke é ziin.

⁵² Balelayezannu va mi kyɛn ta lé ka tranu ’ka nyané pa lɛ loo? Munu lé, wo Mi Tegele dale fe é kyɛn, ka tranu wo gyɛ. Lao ka ’bɛzan liwo yé ka kɛlɛ ’bɛ gyɛzannu nya,

⁵³ ’kaa lé ka bélidɔwe ye lanjenu va, yé ka ’ka a kɛlɛ lɛ monomono lo, ka lé.

Wo Étiɛne gyɛ gɔlɛ nya

⁵⁴ Wo dére ’konu ’ma aan wo, wo bli fli é baba yé wo vo wo suiɛ dɔrana é ke la a za nya.

⁵⁵ Naa, Léli Sauun Étiɛne kun, yé é lagi gini téiin, yé é Kazambale lé fuasan ye, yé é Jézu ye é dɔle Kazambale bɛyila.

⁵⁶ Yé é léé: Ka yua, la lɛ a é sole, yé maa blami Be yé é dɔle Kazambale bɛyila.

⁵⁷ Wo siaa plɛplɛ yé wo bɛ dɔ ’wo tɔné gi yé wo faa baa a ta ékeva,

⁵⁸ yé wo go a nwun zi vulile nya fɔɔ fla gini lɔ ma, yé wa gyɛ gɔlɛ nya. Anayemunu wolé sɔnu zana pɛniɛ do lé wa laama Sɔl, a wuo.

⁵⁹ Bléyian va lé wa Étiɛne gyɛna gɔlɛ nya, ’té éé bazoroan a fele nya léé: Mizan Jézu, ’i an si.

⁶⁰ Yé é powuo zun tɛrɛ va, yé é siaa dére plɛplɛ nya léé: Mizambale, té i wenyané ’ko dɔ wo nwiin lo. Dére ’konu fele zuo, é yi gyɛ.