Kelewenu 6 - Kazambale lé Sebe Sauunu 1979

Wo mi sɔrafié dɔ

¹ ’Bɛ bléyi va Jézu zuomunu ’léé taa zén a va, yé Grɛki Juifinu vo gun gyɛna Juifinu ma, yé wo léé, fɛ lé wa gulian ’wo ma yi faa do do ma, wo ’ka ’wolé gyɛzaralomu zé no é zima lo.

² Bɛwemalé mi vu ta fié Jézu zuomunu kiɛre laa, yé wo lé wo lɛ léé: Dé ko daan Bale dére fele ma yé ko kɛlɛ munu lé fɛ gulizannu nya, ’bɛ ’ka tegele lo.

³ Bɛwemalé, bwenu, ’ka ka va mi sɔrafié si a va, munu lé woo wo ma we zin fé, wo nya, ’té Léli Sauun ke wo ta, ’té wo we dɔɔ, yé ko nyanama ’ko bɛ pa wo lee.

⁴ Yé ko é vo yara pana bazorole valé dére fele ta tegele.

⁵ We ’ko sɔ zén‐ékevamunu faa lɛ, yé wo munu si a va; Léli Sauun vɔlazan Étiɛne lé alé blipale ke blɛn, yee a, Filip a, Prɔkɔɔ a, Nikanɔɔ a, Timɔn a, Paaménas a, Antiɔs mi Nikola lé é ke é vinin zi bɛ ta bazorozan nya, yee koo, woo lé wo wo si.

⁶ Wo go wo nya nwunvɔzannu va. Dé ’bɛnu bazoro faa yé ’bɛnu ’wo bɛ pla wo ta.

⁷ Kazambale dére lɛ si. Jézu zuomunu ’léé taa zén a va kiɛre Jérusalɛm, yé Balebanmunu kiɛre Bale lé we ’ko nyi si.

Wo Étiɛne kun

⁸ Étiɛne lé, Bale lé zin valé plɛplɛ ke a ta é baba, é a we blɛnblɛnnu valé gyɛzorowe blɛnblɛnnu kɛlɛna munu méléna.

⁹ Bazorokɔn do lé, wa laama voébomamunu lé bazorokɔn, a gi mi kenu koo, Sirɛne munu koo, Alézandri munu koo, Silisi tɛrɛ valé Azi tɛrɛ la Juifinu koo, wo nwa yé wo kun zavɔle ma Étiɛne va.

¹⁰ Naa, wedɔɔle valé Kazambale Léli lé é ke we fena wo nya bɛ, wo ’ka bɔa dɔle lɛ ’bɛnu ma plɛplɛ lo.

¹¹ Yé é ziin, wo munu lɔ vié pale Étiɛne ma we gi, yé ’bɛnu léma: Ko a ’ma léé, é Moizi valé Kazambale sɔnɔ.

¹² É ziin, munu koo, mi segelenu koo, sɛbɛgifemunu koo, wo ’bɛnu bli nwa yé ’bɛnu baa Étiɛne ta, yé ’bɛnu a kun, yé ’bɛnu go a nya webolikinimunu va.

¹³ Wo viéwena?-?yezannu bɔra yé ’bɛnu léé: Mi ’ko, é ’ka daan sɔnɔ dérenu fele ma fɛna sauun ’ko valé bélidɔwe ma lo.

¹⁴ Naa, ko a ’ma a ta léé, Nazarɛtzan Jézu ’ko, é dan fɛkona sɛrɛ lɛ, yé gɔnɔlawenu lé Moizi a nɔ ko lɛ, é dan wo nɔla lɛ.

¹⁵ Webolikinimunu faa vo Étiɛne naginina téiin, yé wa yara ye bélé lanje yara zo.