Kelewenu 5 - Kazambale lé Sebe Sauunu 1979

Ananias valé Safira lé we

¹ Naa, mi do ana, wa laama Ananias, yee valé é na Safira féi do dan,

² yé a ma gɔɔli ke vo Ananias lee, ’té a na ’bɛ gi dɔɔ, yé é da a pɔné nya nwunvɔmunu va.

³ Piɛri lé a lɛ léé: Ananias, mɛwemalé Satan i bli fan fɔɔ yé i viéwo Léli Sauun lɛ, ’té féi ma gɔɔli ke vo i lee?

⁴ Dé i ’ka kɔɔn féi ’ko dan lɛ lo, é ’ka ilé féi nya loo? Yé dé bé dan faa, ’té a ma gɔɔli ’ka izé nya loo? Mɛwemalé we ’ko zo dɔ i bli gii? I ’ka viéwo lɛ munu lɛ lo, i viéwo Kazambale ɛ lɛ.

⁵ Ananias dére ’konu ’ma aan wo, é dia yé é ga. Yé kana blɛn zén ana munu gi.

⁶ Pɛniɛnu nwa, yé wo sɔ vuru a ma yé wo goan, yé wa pa.

⁷ ’Bɛ zuo, dé lɛrɛ yaa giéle léé? a na da. We lé é bɔ, é ’ka ’bɛ gi dɔɔa lo.

⁸ Piɛri lé a lɛ léé: Gɔɔli ’léé ’ko va lé ka féi daan? Yé é lé a lɛ léé: Iin, yee lé.

⁹ Yé Piɛri lé a lɛ léé: É kɛlɛ kaa yé ka dére kɛlɛ do Mizambale Léli gi dannaa? Bé ye, wo lé wo i zana pa, wa kɔn ’léé bɛ, yé wo dan go lɛ bii é nyao é ziin.

¹⁰ A bléyi duo nya é dia Piɛri gane wuo yé é ga. Pɛniɛnu wɔra yé wo bɔ a ma é gale, yé wo go a nya yé wa pa é zana sɔnɔ.

¹¹ Kana blɛn zén léglizigimunu faa gi, é valé munu faa lé wo we ’konu ’ma, wo gi.

Wo gyɛzorowenu valé we blɛnblɛnnu kiɛre kɛlɛ

¹² Nwunvɔmunu gyɛzorowe kiɛre valé we blɛnblɛnnu kɛlɛ munu méléna. Wo faa a Balebangikɔn lɛɛ lé Salomɔn a kɛlɛ, a wuo,

¹³ yé é ’ka dɔ lɛ mi bɛ do kpen gi léé, ’é pa wo va lo. Naa, munu vo wo tɔ zin fena é baba.

¹⁴ Wo lé wo bli ke Mizan lɛ, gɔnénu valé lomu, wo taa vo zénna a va yifaama.

¹⁵ Munu da gyɛgyɛmunu nya flaworo dii yé wo wo yia yialafɛnu valé saanu ta, léé, dé Piɛri a giéna yé a furɔ ’é zén wo va mi kenu ta.

¹⁶ Mi gu si Jérusalɛm zi flanu ta yé wo da gyɛgyɛmunu valé munu lé yo tiridɔlenu nyané pa wo ta, wo nya, yé wo faa béli.

Wo nyané pa nwunvɔzannu ta

¹⁷ Naa, Balebanmunu ’lɛzan valé Sadusémunu lé wo ke a va, wo bli a é fanle nwunvɔzannu ma maawole nya yé wo nwa,

¹⁸ yé wo nwunvɔzannu kun, yé wo wo vɔ bokɔn gi.

¹⁹ Naa, Mizambale lé lanje do bokɔn lɛ so é béli, yé é ’bɛnu bɔra yé é lé wo lɛ léé:

²⁰ ’Ka go, ’ka dɔ Balebangikɔn gi, yé ka mibéliwe ’ko gi faa fe munu lɛ.

²¹ Wo ’bɛ ’ma aan wo, wo go bladi Balebangikɔn gi yé wo kun we paale ma munu gi. Balebanmunu ’lɛzan valé é vamunu da aan wo, yé wo webolikinimunu valé Izraɛl mi segelenu faa laa, yé wo mi pa zia nwunvɔzannu sina bokɔn gi.

²² Sunyanu bɔ aan wo, wo ’ka wo ye lɛ bokɔn gi lo. Wo nɔla é ziin ’wo pa gi yé wa zuo fe wo lɛ

²³ yé wo léé: Ko bɔ bokɔn ma, ’té a lɛ a é tanle é zima, ’té sunyanu a é dɔle a ’léé nuu. Naa, dé ko kɔn lɛ so, ko ’ka mi do kpen ye lɛ kɔn gi lo.

²⁴ Balebangikɔnzan valé Balebanmunu segelenu dére ’konu ’ma aan wo, gi bɔrɔ pa wo ma nwunvɔzannu lé we ma, dé we ’ko é dan nyaa lɛ kaa? wo ’ka a gi dɔɔa lo.

²⁵ Yé mi do da a fe lɛ wo lɛ léé: Ka yua, munu lé ka wo vɔ bokɔn gi, wa we paana munu gi Balebangikɔn gi.

²⁶ Balebangikɔnzan valé sunyanu go yé wo da wo nya drɔɔ, naa, wa kanana munu lee léé, dé wo da ’wo gyɛ gɔlɛnu nya, azama.

²⁷ Wo da aan wo wo nya webolikinimunu ’lɛ, Balebanmunu ’lɛzan we pla wo lɛ léé:

²⁸ Ko ’ka a yi ga lɛ ka lee wéiin léé, té ka we paa munu gi tɔ ’ko nya lo loo? Yé ka ye, ka kalé wepaale sɔɔla Jérusalɛm woro dii fɛfaana, yé ka a a va léé, ka mi ’ko nyɛwe dɔ ko nwiin.

²⁹ Piɛrinu léé: É a lé wo Kazambale lɛdɔma yé ’bɛ é mini munu ta.

³⁰ Jézu lé ka a gyɛ é dunle nya yili la bɛ, kaa tranu zé Bale a nwa gale va.

³¹ Kazambale a nwa é bɛyi nya Zilɛzan valé Mibélizan nya, léé, ’é zi nɔ Izraɛl munu lɛ léé, ’wo bli nɔla yé Bale ’é wo ma we vo wolé wenyanénu ma.

³² Ko a we ’konu nayezannu nya, yé Léli Sauun a ’bɛ nya é ziin, ’té Kazambale a no munu lé wa lɛdɔama, wo lɛ bɛ.

³³ Webolikinimunu bli fli dére ’konu ma é baba, yé é sɔ wo lɛ léé, ’wo wo gya.

³⁴ Naa, Farizimi do ana wa laama Gamaliɛl, é a bélidɔwedɔɔzan nya yé é a mi tegele nya mi faa yuɛ gi; é nwa webolikinimunu méléna yé é lé munu lɛ léé, ’wo nwunvɔzannu bɔra sɛ.

³⁵ A zuo é lé wo lɛ léé: Izraɛl munu, ’ka yuɛ pa kabozen va we lé ka dan a kɛlɛ lɛ munu ’konu lɛ, a we ma.

³⁶ Todas bɔrana ’ka tan mɔn lɛ lo. É ’ébo kɛlɛ mi blɛn nya yé dé mi wuru fié léé? wo zén a zuo. Wo mi ’ko gyɛ yé a zuomunu faa kini ékema yé azé we nyaa é pla.

³⁷ A zuo, Galilé tɛrɛ la mi Judas bɔra munu nɔnɔ bléyi va. Mi kiɛre zén a zuo; yé é ga é ziin, yé a zuomunu faa kini ékema.

³⁸ Sin, maa lé ka lɛ léé, té ka we munu ’konu zi lo. ’Ka daan wo ma, ’wo go. We lé wa pélisia ’ko, é valé nyanama ’ko, dé é si munu va é dan nyaa lɛ.

³⁹ Naa, dé é si Kazambale va ka ’ka bɔa a yi gale lɛ lo. Té ka bli si kabo lɛ yé ka guli dan Kazambale va lo.

⁴⁰ Wo dɔ a dére ta. Wo nwunvɔzannu laa aan wo, yé wo wo bla plén nya yé wa yi ga wo lee léé, té wo we fe Jézu tɔ nya lo, yé wo daan wo ma.

⁴¹ Nwunvɔzannu si webolikinimunu va yé wo gi nana léé, Kazambale a ye léé, wo dɔle nyané blele wuo Jézu tɔ ma yara lé.

⁴² Yé yi faa do do ma wo vo we paana munu gi, ’té woo Jézu Krist lé wenéné fé Balebangikɔn valé kɔnnu gi, wo ’ka daan lɛ a ma lo.