Kelewenu 4 - Kazambale lé Sebe Sauunu 1979

Wo go Piɛri valé Jan nya minwiinmunu ’lɛ

¹ Piɛri valé Jan a we fena aan wo munu lɛ, Balebanmunu koo, Balebangikɔnzan koo, Sadusémunu koo, ’bɛnu bɔ wo ma.

² Wolé we paale munu gi ’na ’bɛnu ma; yé wa gɔɔnna Jézu zé ma léé, mi éé nwaan gale va, yé ’bɛ ’na wo ma é ziin.

³ Yé wo wo kun. Gunu dɔra, bɛwemalé wo wo vɔ bokɔn gi fɔɔ yé tu kini.

⁴ Naa, munu lé wo dére ’ko ’ma, wo kiɛre dɔ a ta; woo mi baa fié wuru soru bɔa.

⁵ ’Bɛ é tu kini, minwiinzannu koo, mi segelenu koo, sɛbɛgifemunu koo, wo zén ékeva Jérusalɛm.

⁶ Balebanmunu ’lɛzan Ane a, Kaifu a, Jan a, Alézandre a, munu faa lé wo ke Balebanmunu ’lɛzannu lelenu nya koo, wa wo va.

⁷ Wo Piɛri valé Jan dɔ ’wo méléna, yé wo we laa wo lee léé: Plɛplɛ kaa nya lé ka ke we ’ko kɛlɛnaa? Ka a kɛlɛna de ɛ tɔ gii?

⁸ ’Té Léli Sauun Piɛri kun yé é lé wo lɛ léé: ’Kaa minwiinzannu valé Izraɛl mi segelenu,

⁹ ka we laa ko lee kyɔ wezin lé é kɛlɛ furuagyɛzan lɛ, a ma, yé fɛan zo lé é béli, yé ko fe,

¹⁰ ka faa a gi dɔɔ ma, yé Izraɛl munu faa a gi dɔɔ léé, Nazarɛtzan Jézu Krist lé ka a gyɛ yili la, yé Kazambale a nwa gale va, a tɔ ma lé mi ’ko dɔ ka yuɛ va plɛplɛ.

¹¹ Gɔlɛ lé ’kaa kɔndɔzannu sɔn vɔ a ma, É kɛlɛ kɔnsungɔlɛ nya, Jézu a ’bɛ nya.

¹² Mi bɛ ’ka mi sié we gi lo; yé tɔ bɛ ’ka munu va la wuo ’ko, yé ko si we gi ’bɛ nya lo.

¹³ Wa ye léé, Piɛri valé Jan bli ta dɔ plɛplɛ yé wa gi dɔɔ léé, wa flami planu lé wo ’ka we dɔɔa lo, wo nya, yé wo gi vuru. Yé tɔɔn, é dɔ wo gi léé, wa é kyɛn Jézu va.

¹⁴ Naa, gɔnézan lé é béli, wo ’bɛ ye é dɔle wo va, yé wo ’ka we zi pa dére do kpen ye lɛ lo.

¹⁵ Wo lé wo lɛ léé: ’Ka bɔra sɛ. Yé ’bɛ zuo webolikinimunu lu zi ble

¹⁶ yé wo léé: Mɛ we lé kaa dan a kɛlɛ lɛ munu ’konu lɛɛ? Wo gyɛzorowe blɛn kɛlɛ Jérusalɛm munu faa yuɛ va, yé kaa ’ka bɔa ’bɛ ta yɔɔle lɛ lo.

¹⁷ Naa, kaa yi ga wo lee glawe plale nya wo lɛ léé, té wo we fe mi do kpen lɛ tɔ ’ko nya é dɛrɛ lo, té we ’ko é nwɛɛn munu méléna lo we gi.

¹⁸ Yé wo wo laa, yé wa yi ga wo lee wéiin léé, té wo we fe Jézu tɔ nya lo, té wo we paa munu gi ’bɛ tɔ nya lo.

¹⁹ Piɛri valé Jan a zi pa wo lɛ léé: É dɔ ka gi kaa? Dé ko ka dére lɛdɔmale mini Kazambale dére ta, ’bɛ a tegele Kazambale yuɛ gii?

²⁰ We lé ko a ye yé ko a ’ma, ko ’ka bɔa daanle lɛ ’bɛ fele ma lo.

²¹ Wo glawe pla Piɛri valé Jan lɛ é ziin, yé wo daan wo ma. Munu faa a Kazambale tɔ zin bɔna we lé é bɔ, a ma, amalé wa kɛla fɛan zo yé wo we lɛdɔ Piɛri valé Jan gi, munu lé we ma lé wo ’ka a ye lɛ lo.

²² Gɔnézan lé é béli gyɛzorowe ’ko nya, a lɛɛ gié lɛɛ yɔ fié ta.

Blipaalɛmunu bli ta plɛplɛ laa Bale lee

²³ Wo daan Piɛri valé Jan ma aan wo, wo go ’wolé munu va, yé we faa lé Balebanmunu segelenu valé mi segelenu a fe wo lɛ, wa fe ’wolé munu lɛ.

²⁴ ’Bɛnu a ’ma aan wo, wo faa ’wo dére bié Kazambale lɛ ékeva yé wo léma: Kozan, la koo, tɛrɛ koo, wɛyi koo, fɛ faa lé ke wo gi koo, bii ɛ wo kɛlɛ.

²⁵ Bii ɛ we fe Léli Sauun nya ko tra i wuozan David lɔlu nya léé: Mɛwemalé wele wooo ’ko ke bɛnnu mélénaa? Mɛwemalé munu a boawe ’ko bɔrɔna ’wo bɔn‐in?

²⁶ Tɛrɛ la minwiinzannu nwa yé tɛrɛzannu ’wo péli vɔ do Mizambale valé élé nyɔnɔzén?-?nwiinzan ma.

²⁷ Wezen lé, Érɔd koo, Pɔns Pilat koo, bɛnnu koo, Izraɛl munu koo, wo faa ’wo péli vɔ do fla ’ko la i wuozan sauun Jézu ma, ’té bii nyɔnɔ zén a nwiin bɛ, a ma,

²⁸ we lé bé kɛlɛ é kyɛn i bɛ valé ilé we dɔɔle nya, a yɛrama.

²⁹ Laona, Mizambale, ’i wolé glawe plale ko lɛ ’ma ma. ’I wuozannu bli ta dɔ plɛplɛ yé wo ilé we fe ma;

³⁰ ’i bɛ soi yé mi bélile koo, gyɛzorowenu koo, we blɛnblɛnnu koo, yé ’wo kɛlɛ i wuozan sauun Jézu tɔ ma.

³¹ Wo nyaa bazorole nya aan wo, fɛana lé wo ke é zénle ékeva, a ma nyɔɔn, yé Léli Sauun wo faa kun yé wo Kazambale dére fe wo bli tadɔle plɛplɛ nya.

Wolé fɛnu faa vo ékeva

³² Mi gu lé wo bli ke Jézu lɛ, wo bli valé wo gibɔrɔle a do. Wo va mi do ’ka a fé léé, ézé fɛ ɛ ke ’ko lo, naa, wolé fɛnu faa vo ékeva.

³³ Nwunvɔzannu a Mizan Jézu nwale gale va nayezannu nya, yé wo we ’ko fe plɛplɛ kiɛre nya, ’té Bale lé zin blɛn a wo faa ta.

³⁴ Nyanégyɛzan do kpen ’ka wo va lo. Wo faa lé, féi valé kɔnnu ke wo lee, wa daan,

³⁵ yé woo goo a mafɛ nya nwunvɔzannu va, yé ’bɛnu a guli munu ma fɛan zo lé mi faa do do mawe ke fɛ gi, a yɛrama.

³⁶ Lévi mi do ana, wa laama Jozɛfu, yé nwunvɔzannu a tɔ pa é ziin Banabas, ’bɛ gi léé, mi dɔ plɛplɛzan. É si wɛyi worona tɛrɛ lé wa laama Sipri, ana.

³⁷ Élé féi do dan, yé é da a ma gɔɔli nya nwunvɔzannu va.