Kelewenu 3 - Kazambale lé Sebe Sauunu 1979

Furuagyɛzan béli Balebangikɔn ’léé

¹ Piɛri valé Jan go ékeva Balebangikɔn gi bazoro bléyi nya, yiri tɛnlale nya.

² Mi do ana mi, a bu a yaa furuagyɛzan nya. Munu a sié yifaama, ’té wa nyanaan Balebangikɔn ’léé lé, wa laama Nɔnɔmi, ana, munu lé woo wɔraan Balebangikɔn gi, fɛ doropale wo lee we ma.

³ Mi ’ko, é Piɛri valé Jan ye aan wo wɔrana ana, é fɛ doro pa wo lee.

⁴ Piɛri valé Jan a nagini téiin, yé Piɛri lé a lɛ léé: ’I ko nagini.

⁵ É dɔ a gi léé, wo dan fɛ nɔ lɛ é lɛ, amalé é vo wo naginina flee.

⁶ Yé Piɛri lé a lɛ léé: Gɔɔli valé kyan ’ka an lee lo. Fɛ lé é ke an lee, maa a no i lɛ. Nazarɛtzan Jézu Krist tɔ nya, ’i nwa ’i tawo.

⁷ Yé Piɛri kun a bɛyi ma yé é a nwa. A bléyi duo nya a gane valé a seenéwɔlɛnu dɔ plɛplɛ.

⁸ É dɔ loru fɔrɔle do nya, yé é kun tawole ma. Wo wɔra wo nya Balebangikɔn gi, ’té éé tawoo, ’té éé fɔrɔan, ’té éé Kazambale tɔ zin fé.

⁹ Yé munu faa a ye tawona, é valé Kazambale tɔ zin fena.

¹⁰ Yé wa gi dɔɔ léé, gɔnézan lé é ke é nyanale turu Balebangikɔn ’léé Nɔnɔmi na, ’té éé doro paan, yee lé. Aléwemalé wo ’léé vo é dɔle é pla yé wo gi faa vuru wo ma we lé é kɛlɛ gɔnézan lɛ, alé we ma.

Piɛri we ’ko gi fe munu lɛ

¹¹ É ’ka aan wo sina Piɛri valé Jan ma lo, bɛwemalé givurumunu faa go vlan nya wo va, Balebangikɔn lɛɛ lé Salomɔn a kɛlɛ, a wuo.

¹² Piɛri we ’ko ye aan wo, é lé munu lɛ léé: ’Kaa Izraɛl munu, mɛmalé ka gi vuru we ’ko maa? Mɛmalé ka a ko ginina bélé fɛan zo lé kobozen lé plɛplɛ valé kobozen lé wezin kɛlɛle nya lé ko mi ’ko kɛlɛ tawozan nya, a zoo?

¹³ Abraam koo, Izak koo, Jakɔb koo, wozé Bale, kaa tranu zé Bale, ’bɛ é wuozan Jézu tɔ kɛlɛ blɛn. Yee lé ka liwo, yé ka sɔn vɔ a ma Pilat ’lɛ, ’té é dɔ ’bɛ gi léé, ’é dan a vo lɛ éboma.

¹⁴ Ka sɔn vɔ Mi Sauun lé é ke tegele, a ma, yé ka a laa Pilat lee léé, ’é wezin kɛlɛ ’wo lɛ migyɛzan bɔrale nya bokɔn gi ’wo lɛ.

¹⁵ Yé ka bélile punsina gyɛ, yee lé Kazambale a nwa gamunu va. Ko a anayezannu nya.

¹⁶ Mi ’ko lé ka a ye yé ka a dɔɔ, bli vole Jézu tɔ lɛ nya lé Jézu tɔ mi ’ko kɛlɛ plɛplɛ. Bli vole Jézu lɛ ɛ mi ’ko béli tata ka faa yuɛ va.

¹⁷ Yé sin, an bwenu, maa a gi dɔɔ léé, ka we ’ko kɛlɛ ’ka tanyila, ka valé ka nwiinmunu nya.

¹⁸ Naa, wenu lé Kazambale a fe é kyɛn élé balelayezannu faa lɔlu nya léé, é a lé ’élé Krist é nyané ble, ’ko zo lé é a faa lɛ sɔɔ.

¹⁹ Bɛwemalé, ’ka bli nɔla, yé ’ka zi nɔla kalé wenyané ’yibole we ma,

²⁰ léé, a bléyi ’é bɔ yé Mizambale ’é fu vɔ ka ma, yé ’é Jézu Krist pa ka lɛ zia. Bale a fe léé, é dan a pa lɛ ka lɛ zia, naa,

²¹ é dan vo lɛ la gi fɔɔ yé a bléyi é bɔ yé fɛnu faa é kɛlɛ ’wo dɔbɛ gi, fɛan zo lé Kazambale a fe é kyɛn élé balelayezannu sauun lɔlu nya, a zo.

²² Moizi a fe léé: Mizan, kazé Bale, é dan mi do nwa lɛ ka lɛ ka bwenu méléna balelayezan nya bélé ’yee zo. We faa lé é dan a fe lɛ ka lɛ, ka dan ka tɔné dɔ lɛ a lɛ.

²³ Dé miomian ’ka é tɔné dɔ lɛ yee balelayezan ’ko lɛ lo, wo dan ’wo kan kini lɛ ’bɛzan ma.

²⁴ É sia Samuɛl bléyi va, balelayemunu faa lé wo we fe é ke zuo, wo yi ’konu lé we fe é ziin.

²⁵ Ka a balelayemunu kululazannu nya, é valé gipawe lé Kazambale a kɛlɛ kaa tranu va, a vamunu nya, ’té Kazambale a fe Abraam lɛ léé: Tɛrɛ la bɛnnu faa drɔɔ é dan vo lɛ i kulu gi bɛ.

²⁶ Kazambale é wuozan Jézu nwa aan wo yé é a pa ka lɛ zia é vinin, ka drɔɔ vole we gi, yé ka faa do do ’é si kalé weple kɛlɛle zuo.