Kelewenu 28 - Kazambale lé Sebe Sauunu 1979

Pɔl a wɛyi worona tɛrɛ Malte ta

¹ Ko sile we gi zuo, yé wo lé ko lɛ léé, wɛyi worona tɛrɛ ’ko, wa laama Malte.

² Ana bwiimunu wo wezin kɛlɛ ko lɛ é baba. Lɛɛ da yé dunu vɔ é baba, amalé wo kyɛ blɛn sɔn, yé wo ko faa dɔ a zi.

³ Pɔl kyɛbɛné din do sia, yé é a wo zénna kyɛ ’léé aan wo, yé ménénwunnu do bɔra kyɛ din gi kyɛsan lé we ma, yé é dun a bɛ ma suiɛ nya.

⁴ Bwiimunu méné ye aan wo é dunle a bɛ ma, wo lé ’wo ke lɛ léé: Mi ’ko a migyɛzan nya weboen nya. A sole wɛyi lee zuo, é ’ka sɔ lɛ Mi Tegle lɛ léé, é vo é yuɛma lo.

⁵ Pɔl é bɛ puo, yé méné ’ko dia kyɛ va, yé Pɔl ’ka nyané do kpen ble lɛ lo.

⁶ Munu ’konu vo a naginina léé, dé a bɛ é dan zii lɛɛ? ɛɛ, dé é dan dia lɛ yé é ga é kelee? Wo mɔn aan wo a lɛbɛnna, yé wo ’ka aan wo a ye lɛ léé, we tɔntɔn do kpen bɔ a ma lo, amalé wo dére nɔla, yé wo léé, é a bale do nya.

⁷ Wɛyi worona tɛrɛ ’ko, wazan laama Publius; alé tɛrɛnu a fɛkona zi. É ko si bɛn nya yé é ko yia é va yi yaa bélé é béénu zo.

⁸ ’Bɛ bléyi va, Publius ti a é yiale, é kɔlɛ gi kyɛdɔle valé tɔɔlɔ nya é ma. Pɔl go a va yé é bazoro, yé é bɛ pla a ta yé é béli.

⁹ ’Bɛ zuo, ’yi worona tɛrɛlamunu bɛnu da, yé é wo béli,

¹⁰ yé wo ko tɔ kɛlɛ blɛn, yé ko gobléyi va, fɛnu lé ko mawe ke wo gi, wo wo nɔ ko lɛ.

Pɔl bɔ Rom

¹¹ Moné yaa zuo, ko vɔ ’yitagoro do lé é si Alézandri, a gi. É dunubléyi gié wɛyi worona tɛrɛ ’ko la; fiané bale foto drapo a a ma.

¹² Ko bɔ aan wo Sirakuz, yé ko vo ’bɛna yi yaa.

¹³ Ko si ’bɛna, yé ko gié gɔɔn sɔnɔ zia, yé ko bɔ Régio. ’Bɛ lé tu kini yirinwana bɛyilazia fu kun giéle ma yé ko yi fié kɛlɛ zia fɔɔ Puzɔl.

¹⁴ Ana lé ko bwenu ye yé wo zanté vɔ ko lɛ léé, ’ko yi sɔrafié kɛlɛ wo va. ’Ko zo lé ko go Rom.

¹⁵ Bwenu lé wo kolé we ’ma, wo si Rom yé wo da ko si lɛ zia fɔɔ Apius flɛi valé fɛana lé Otɛli yaa ke, ana. Pɔl wo ye aan wo, é Kazambale bɔ vɔ, yé a bli ta dɔ plɛplɛ.

¹⁶ Ko bɔ aan wo Rom, yé wo zi nɔ Pɔl lɛ léé, yee valé é tabin sunya, ’wo nyana kɔn do gi é yɛrama.

Pɔl Bale lé we fe Rom

¹⁷ Yi yaa giéle zuo, Pɔl Juifinu segelenu laa. Wo zén aan wo ékeva é we fe wo lɛ yé é léé: An bwenu, maa ’ka wenyané do kɛlɛ lɛ munu lɛ lo, yé an ’ka an tranu gɔnɔlawenu sɛrɛ lɛ lo, naa, wo an vɔ bokɔn gi Jérusalɛm é pla, yé wo an si ’bɛna, yé wo an bɛ pa Romnu lee.

¹⁸ Wo we laa aan wo an lee yé wo ’ka we do kpen ye lɛ an ma gawe nya lo; amalé é sɔ wo lɛ léé, ’wo daan an ma.

¹⁹ Naa, Juifinu ’ka a nyi si lɛ lo, bɛwemalé é a lé an da anlé we nya Sézaa va. É ’ka an gi léé, maa we dɔ an bɛn nwiin lo.

²⁰ Amalé maa ka laa, ’ka da yé an we fe ka lɛ. We lé Izraɛlnu bli ke a lɛ, yee we ma lé wo gɔgɔbale ’ko vɔ an ma.

²¹ Yé wo lé a lɛ léé: Sɛbɛ do kpen ’ka si lɛ Judé tɛrɛ la yé ko ’bɛ ye ilé we ma lo. Yé bwe do kpen ’ka da lɛ i liwo lɛ lo, é valé i ma we nyané fe lɛ lo.

²² Naa, é sɔ ko lɛ léé, ko i bɔn gi we ’ma. Ko a gi dɔɔ léé, fɛfaana munu a palu ’ko ma guli nya.

²³ Wo yi do dɔ yé mi kiɛre da a va a nyanakɔn gi. Pɔl Kazambale plale mi nwiin lé we fe wo lɛ. Yé é Jézu lé we gɔɔn wo lɛ Moizi lé bélidɔwe valé balelayemunu lé sɛbɛ gi, kwa kulile nya wo ma. Wa wefele pélisia bladi fɔɔ yé nyanadi pa.

²⁴ We lé é a fe, mi kenu wo bli nɔla a we ma, yé mi pɔnénu ’ka pa lɛ a ta lo.

²⁵ Wo kini aan wo ékema ’té woo za vɔa, Pɔl we sɛné fe é ziin yé é lé wo lɛ léé: Wezen lé Léli Sauun a fe ka tranu lɛ balelayezan Ézai lɔlu nya; é léé:

²⁶ ’I go bɛn ’ko va yé bé fe wo lɛ léé: Ka dan we ma lɛ ka tɔné nya, yé é ’ka goo ka ’wuo gi lo. Ka dan fɛ nagini lɛ ka yuɛ nya yé ka ’ka dan a ye lɛ lo.

²⁷ Munu ’ko gi nyɛ ’ka kinié lo. Wo tɔné gi a plɛplɛ, dé wo da we ’ma wo tɔné nya. Yé wo ’wo yuɛ lɛ tan, dé wo da fɛ ye ’wo yuɛ nya. Wo we ’ko kɛlɛ, dé wo da we ’ma ’wo bli gi, Dé wo da ’wo bli nɔla, yé maa wo béli.

²⁸ Kazambale lé mi sile we gi ’ko, wa we pa bɛn bɛnu ɛ lɛ zia, yé wo dan a ’ma lɛ. ’Ka we ’ko gi dɔɔ ma.

²⁹ É we ’ko fe aan wo Juifinu go zavɔle plɛplɛ nya wo ke méléna.

³⁰ Pɔl lɛɛ fié lɛ sɔɔ kɔn do lé é a banwo, a gi. Munu faa lé woo dan a va, éé wo sié.

³¹ Yé é Kazambale plale mi nwiin lé we fe wo lɛ yé é Mizan Jézu Krist lé we paa wo gi gɔrɔ la, yé mi do ’ka a yi ga lɛ a lee lo.