Kelewenu 27 - Kazambale lé Sebe Sauunu 1979

Pɔl Rom zi sia

¹ Wo dére kɛlɛ aan wo do léé, ko vɔ ’yitagoro gi gole Itali we ma, wo Pɔl valé bokɔngimi kenu bɛ vo sunyayɔsoru ’lɛzan lee. É a Ogisi palu va mi do nya, wa laama Julius.

² Ko vɔ ’yitagoro do lé é si Adramit, a gi. É dan gié lɛ Azi tɛrɛ bɛ do la. Yé ko go, ’té Arisaak a ko va. É si Tɛsalɔnik, Masédɔane tɛrɛ la.

³ ’Bɛ é tu kini, ko bɔ Sidɔn. ’Té Julius éé Pɔl paan é zima, yé é zi nɔ a lɛ léé, ’é go ’é béénu va, ’té ’bɛnu éé wezin kɛla a lɛ.

⁴ Ko si aan wo ’bɛna fu giéle ’ka bɔ lɛ ékema lo, bɛwemalé wɛyi worona tɛrɛ lé wa laama Sipri, ko gié a san gi zia.

⁵ Wɛyi lé éé bɔa Silisi tɛrɛ valé Panfili tɛrɛ ma, ko ’bɛ kini aan wo, ko bɔ Mira, Lisi tɛrɛ la.

⁶ ’Bɛna mi, sunyayɔsoru ’lɛzan ’yitagoro do ye, ’té é si Alézandri, ’té é go Itali tɛrɛ la. Yé ko vɔ ’bɛ gi.

⁷ Yi kiɛre nya, ko vo tawona drɔɔ. Kleblele nya lé ko bɔ Sinid vazia. Fu lé we ma lé ko ’ka bɔ lɛ ’bɛna lo. Wɛyi worona tɛrɛ lé wa laama Krɛt, ko gié a sɔnɔ, Salmoné vazia.

⁸ Kleblele nya lé ko gié a bɛ do la. Fɛ lé wana laama Bopɔɔ, ko bɔ ’bɛna. Fla lé wa laama Lazé, ’bɛ a a sɔnɔ.

⁹ Yi kiɛre gié. Lɔrɔsɔnbléyi bozen gié tɛkɛ, bɛwemalé tawole ’yitagoro gi kɛlɛ tɔntɔn.

¹⁰ Aléwemalé, Pɔl we pla wo lɛ yé é léé: Gɔnénu, maa a ye léé, ta ’ko wole é dan kɛlɛ lɛ we tɔntɔn valé fɛ kiɛre sɛrɛwe nya; kɔnénu valé ’yitagoro saa zé we kaan lo, kobozen koo é ziin.

¹¹ Sunyayɔsoru ’lɛzan é tɔné dɔ ’yitagorovɔzan valé ’yitagorozan dérenu lɛ, yé é ’ka é tɔné dɔ lɛ Pɔl zé lɛ lo.

¹² Fla ’ko ’ka aan wo é zima yé wo dunubléyi kɛlɛ ’bɛna lo, é dɔ wo va mi kiɛre gi léé, ’wo si ’bɛna, yé ’wo kwa kuli léé, ’wo bɔ Fénis, Krɛt tɛrɛ la, yé ’wo dunubléyi kɛlɛ ’bɛna. Fla ’ko yara a é dɔle yirivɔna san fié la zia.

Fu plɛplɛ gié wɛyi ta

¹³ Yirinwana bɛyila fu kun giéle ma drɔɔ, yé é dɔ wo gi léé, we lé wa fe, é dan vo lɛ ’wozé ma. Wo goro dɔmafɛ nwa, yé wo gié wɛyi worona tɛrɛ lé wa laama Krɛt, a bɛ do la.

¹⁴ Ana ’ka tan mɔn lɛ lo, yé fu plɛplɛ lé wa laama Yurakilɔn, é kun giéle ma; é si wɛyi worona tɛrɛ vazia.

¹⁵ Yé é ’yitagoro nyunu yé fu lé we ma wo ’ka bɔa ’yitagoro drɔle lɛ élé zi ta lo, amalé ko daan kobo ma yé fu go ko nya.

¹⁶ Ko gié wɛyi worona tɛrɛ kiéné lé wa laama Kloda, a sɔnɔ, yé é vo sɛ yé kolé ’yitagoro kiéné é san ko lee.

¹⁷ Dé wa yere é zima faa, wo bɔmiva bawɔrɔnu si yé wa vuru ’yitagoro ma. Wo ’yitagoro ta sɔ tua, léé, dé wo da dia Siit nyéné ta. ’Ko zo lé, ko daan kobo ma yé fu go ko nya.

¹⁸ Fu ’ko gié aan wo plɛplɛ, bɛwemalé ’bɛ é tu kini ko kɔné kenu vuli wɛyi va.

¹⁹ A yi yaazan nya ko ’yitagoro gi fɛ kenu vuli wɛyi va koboan.

²⁰ Yi kiɛre nya yiri valé monénénu ’ka bɔra lɛ lo, yé fu kɛlɛ plɛplɛ é ziin fɔɔ yé ko bli si ko bélile lɛ.

²¹ Yi kiɛre nya wo ’ka fɛ ble lɛ lo. Yé Pɔl dɔ wo worona yé é léé: Maa léma, dé ka vo kɔɔn ka tɔné dɔna an lɛ yé ka ’ka si lɛ Krɛt lo, ’té we tɔntɔn ’ko valé sɛrɛwe ’ko ’ka kɔɔn bɔa ko ma lo.

²² Sin, an we plaan ka lɛ léé, ’ka bli ta dɔ plɛplɛ; naa, kaa va mi do kpen ’ka dan ga lɛ lo. ’Yitagoro do kpen ɛ dan sɛrɛ lɛ.

²³ Bale lé, maa ke azé nya, ’té maa a bɔa bɛ, alé lanje do bɔra an va kyɔ é béli,

²⁴ yé é lé an lɛ léé: Pɔl, té i kana monomono lo. É a lé i dɔ Sézaa ’lɛ. Yé bé ye, munu faa lé wo ke ’yitagoro gi i va, Kazambale wo nɔ i lɛ.

²⁵ Bɛwemalé, ’ka bli ta dɔ plɛplɛ. An bli a Kazambale lɛ léé, é a fe an lɛ fɛan zo, é dan a kɛlɛ lɛ a zo.

²⁶ Naa, ko dan zana lɛ wɛyi worona tɛrɛ do la.

²⁷ A yi vu ta ziɛnzan nya é béli, bléyian va lé Adriatik wɛyi go ko nya, béli tu la é dɔ ’yitagoro gi nyanamapamunu gi léé, ’wo bɔ tɛrɛ sɔnɔ.

²⁸ Wo bale dan ’yi va yé é kɛlɛ mɛtrɛ nya yɔ do wɔlɛ vu ta sɔrafié. Wo bié sɛ yé wa dan é ziin, yé é kɛlɛ mɛtrɛ yɔ do wɔlɛ sɔraa.

²⁹ Wo kana léé, dé goro é dan zun lɛ gɔlɛnu maa? bɛwemalé wo goro zuozia gorodɔmafɛ ziɛn zun, yé wo vo tu kinile lɛbɛnna bli pɛpɛ nya.

³⁰ Naa, ’yitagoro gi nyanamapamunu a a va léé, ’wo bɔra ’yitagoro gi, bɛwemalé wa ’yitagoro kiéné plana wɛyi ta dabli nya a fele nya léé, gorodɔmafɛnu lé wo ke goro ’lɛ bɛ, ’wa wo zunna ’yi va.

³¹ Pɔl lé sunyayɔsoru ’lɛzan valé sunyanu lɛ léé: Dé munu ’ko ’ka vo lɛ ’yitagoro gi lo, ka ’ka bɔa sile lɛ we gi lo.

³² Yé sunyanu ’yitagoro kiéné ma balenu bɔi yé é vɔ ’yi va.

³³ Tu kinile ’lɛ, Pɔl we pla munu faa lɛ léé, ’wo fɛ ble, yé é léé: Ka bli kyɛ dɔle we ma, a yi vu ta ziɛnzan lé ke kyɔ, ka ’ka tan fɛ do kpen ble lɛ lo.

³⁴ Amalé, maa lé ka lɛ léé, ’ka fɛ ble, é a lé ka ’bɛ kɛlɛ ka sile we gi we ma, naa, ka nwin gɔ do kpen ’ka dan san lɛ ka lee lo.

³⁵ É we fe aan wo wo lɛ ’ko zo, é buru sia yé é Bale bɔ vɔ wo faa yuɛ va, yé é a bɔi, yé é kun a blele ma.

³⁶ Yé wo faa ’wo bli ta dɔ plɛplɛ yé wo fɛ ble é ziin.

³⁷ Ko faa a ’yitagoro gi mi wuru do yɔ yaa wɔlɛ vu ta suiɛdo.

³⁸ Wo kan aan wo é zima, wo ’yitagoro bɛn si buruwɔlɛ vulile nya wɛyi va.

’Yitagoro sɛrɛ

³⁹ Dé tu kini, wo ’ka tɛrɛ ma kunna ye lɛ lo. Wo wɛyi bɛ polu do ye, ’té nyéné ana; é sɔ wo lɛ léé, goro ’é go ’bɛna, ’té dé ’bɛ é bɔa gole lɛɛ?

⁴⁰ Wo ’yitagoro dɔmafɛnu fuo yé wo wo vɔ wɛyi va, yé a bléyi duo nya wo goro yaradrɔfɛ ma balenu fuo yé wo goro yara zia sɔ dɔ fu ’lɛ, yé wo yara dɔ gɔɔn ma zia.

⁴¹ Naa, wo bɔ nyéné la, ’yiyoro fié méléna, yé goro zun a ma. Yé goro yara zia wɔra a gi yé é kua, tɔɔn, wɛyi nwale plɛplɛnu wo goro zuozia ’wii.

⁴² É dɔ sunyanu gi léé, ’wo bokɔngizannu gyɛ, dé wo va mi kenu é da vɔ fli gi ’yisile nya.

⁴³ Naa, é sɔ sunyayɔsoru ’lɛzan lɛ léé, ’é Pɔl si we gi, amalé é a yi ga wo lee léé, té wa kɛlɛ lo. É léé: ’Kaa lé, ka ’yisile dɔɔ, ’ka vɔ ’yi va é vinin, yé ka bɔ gɔ la;

⁴⁴ yé ka mi pɔnénu, ’ka yilifeenu valé ’yitagoro feenu sia yé ’ka ’yi kini wo nya. ’Ko zo lé wo faa bɔra gɔ la drɔɔ.