Kelewenu 26 - Kazambale lé Sebe Sauunu 1979

¹ Agripa lé Pɔl lɛ léé: Ko zi nɔ i lɛ; ’izé gi fe. Yé Pɔl é bɛ soi yé é we si é ma dére ’konu nya yé é léé:

^2-3 Minwiinzan Agripa, i Juifinu lé gɔnɔlawenu valé wolé zavɔwenu dɔɔ é zima, bɛwemalé an gi a é nanale kyɔ léé, a se a an lɛ léé, we faa lé Juifinu a dɔ an nwiin, maa wo si an nwiin. Ilé zanté, ’i tɔné dɔ an lɛ bli tiéé nya ma.

⁴ É sia an kiéné ma fɔɔ kyɔ, ’té maa nyanaan Jérusalɛm an bɛnnu méléna, bɛwemalé Juifinu faa an kɛlɛwenu dɔɔ.

⁵ Dé é sɔ wo lɛ léé, wa fe, wa dɔɔ é kyɛn léé, maa a Farizimi nya. Palu lé é ke tegele é mini é bɔlunu ta kolé bazorozi ta, maa a a va mi do nya.

⁶ Yé lao wean ma lé wo ke anlé we blena yee lé ke ’ko: we lé Kazambale a fe ko tranu lɛ, an bli a yee ɛ lɛ, amalé.

⁷ Ko bɛnnu vu ta fié lé wo ke Kazambale bɔna bléyi faa ma, tu valé é kinile ma, wo bli a ’bɛ kɛlɛle lɛsɔɔle lɛ é ziin. Minwiinzan, an bli a we ’ko bɔle lɛ, amalé Juifinu an tɔ fe.

⁸ Mɛmalé é a ka gi léé, munu lé wo ga, Kazambale lé wo nwale a viéwe nyaa?

Pɔl é bli nɔlale zuo fe

⁹ É vinin, é dɔ an gi léé, dé an we plɛplɛ kiɛre kɛlɛ Nazarɛtzan Jézu tɔ ma, ’bɛ a é zima.

¹⁰ Yee lé maa a kɛlɛ Jérusalɛm. Balebanmunu segelenu a se kɛlɛ an lɛ, amalé an Kazambale lé munu kiɛre vɔ bokɔn gi. Wa wo gyɛna aan wo, ’té an péli a é vɔle wo gyɛmunu va.

¹¹ Gɔnɔ kiɛre nya an we lɛdɔ wo gi bazorokɔnnu faa gi, yé an gla kɛlɛ wo va léé, ’wo sɔn vɔ ’wozé Bale zuozi ma. An bli flile wo ma bɛ nyané zi an nyané pa wo ta fɔɔ bɛn bɛnu lé flanu ta.

¹² Balebanmunu segelenu a se kɛlɛ an lɛ yé an go Damas wo dére nya, yee we duo kɛlɛle we gi.

¹³ Naa, minwiinzan, é yiéyi, san do si la gi yé é diri maa valé an béénu zi zia. A bile mini yiri ta.

¹⁴ Ko faa dia tɛrɛ va, yé maa dére do ’ma yé é we fe an lɛ Ébru dére gi yé é léé: Sɔl, Sɔl, mɛmalé i nyané paan an taa? I guli vɔ turu an lɛ, ibo lɛ lé bé kɛlɛ, bélé diri lé é gane zun ézan lé foroné ma, a zo.

¹⁵ Yé maa léé: Anzan, de ɛ ke bii nyaa? Yé Mizan léé: Maa a Jézu lé, i ke nyané pana a ta, a nya.

¹⁶ Naa, ’i nwa, ’i dɔ loru. An bɔra i va wean ma, yee lé é ke ’ko: I an ye fɛan zo kyɔ ’ko koo, wenu lé maa dan wo gɔɔn lɛ i lɛ koo, maa i kɛla wo zuofezan valé wo nayezan nya.

¹⁷ Maa dan i si lɛ munu ’ko valé bɛn bɛnu lé maa i nwunvɔ wo va, wo lee.

¹⁸ Maa a i nwunvɔna wo va wo yuɛ fuole we gi, yé ’wo si gunutinu va, yé ’wo nɔla san va, yé ’wo si é ziin Satan lé plɛplɛ wuo yé ’wo nɔla Kazambale va yé wo bli ’é vo an lɛ, yé maa wo ma we vo wolé wenyanénu ma, yé ’wo tɔnɔ ble Kazambale lé munu va.

Pɔl we fe Juifinu valé bɛn bɛnu lɛ

¹⁹ Aléwemalé, minwiinzan Agripa, an ’ka sɔn vɔ lɛ lagi yuɛzi ma lo.

²⁰ Maa we fe munu lɛ léé, ’wo bli nɔla yé ’wo zi nɔla yé ’wo da Kazambale va yé ’wo blinɔlale lé kɛlɛwe kɛlɛ ma. É vinin maa fe Damas munu lɛ, ’bɛ zuo maa fe Jérusalɛm valé Judé munu faa lɛ, bɛn bɛnu koo, maa a fe ’bɛnu é lɛo.

²¹ Wean ma lé Juifinu an kun Balebangikɔn gi, yé wa kwa kulina léé, ’wo an gya, yee lé ke bɛ.

²² Naa, Kazambale ɛ bɔ an va amalé maa ana fɔɔ kyɔ yi ’ko nya; yé maa a we fena tɔmunu valé mi planu lɛ, yé wenu lé balelayemunu valé Moizi wo fe léé, wo dan bɔ lɛ, maa yee ɛ fe ’té, maa ’ka we bɛ fe lɛ lo.

²³ Yee wenu lé ke ’ko: Krist é dan nyané ble lɛ, yé é dan kɛlɛ lɛ mi gale nwale vinin nya gamunu va, yé é dan san lé we fe lɛ ko bɛn valé bɛn bɛnu lɛ.

Pɔl zɛ vɔ Agripa ma

²⁴ Pɔl we fe aan wo ’ko zo we sile é nwiin we ma, Fɛsitus we fe é dére biéle nya léé: Pɔl, gwe a i wuo gi! Ilé we dɔɔle kaii gwe vɔ i ’wuo gi ’bɛ zoo?

²⁵ Pɔl a zi pa léé: Fɛsitus, mi zin, gwe do kpen ’ka an ’wuo gi lo. Wenu lé maa ke wo fena, wa wezennu valé ’wuoatawenu nya.

²⁶ Bii minwiinzan we ’konu dɔɔ yé maa wo fe i lɛ kpaklaa. We ’konu ’ka kɛlɛ lɛ kyeen gi lo, bɛwemalé maa gi dɔɔ léé, we ’konu va we do kpen ’ka é yɔɔle i ma lo.

²⁷ Minwiinzan Agripa, i pa balelayemunu dére taa? Maa a gi dɔɔ léé, i pa wo ta.

²⁸ Yé Agripa lé Pɔl lɛ léé: Pɔl, i we fe é baba. É vo sɛ yé i an kɛlɛ Krétiɛn nya.

²⁹ Pɔl lé a lɛ léé: Dé kyɔ léoo, dé yi bɛ ma léoo, é sɔ an lɛ léé, fɛan zo lé an ke, Bale i kɛlɛ a zo; naa, bii do kpen kaan lo, ka faa lé ka ke ka tɔné dɔna an lɛ kyɔ, fɛan zo lé an ke, Bale ’é ka kɛlɛ a zo, té wo gɔgɔbale vɔ ka bɛ ma é wo lo.

³⁰ Minwiinzan koo, gbɔrɔnama koo, Bérénis koo, munu faa lé wo ke é nyanale wo va koo, wo nwa.

³¹ Wa gona aan wo, wo lé ’wo ke lɛ léé: Mi ’ko ’ka we do kpen kɛlɛ lɛ a yerewe valé gawe nya lo.

³² Yé Agripa lé Fɛsitus lɛ léé: Dé mi ’ko ’ka a fe lɛ léé, ’é go élé we nya Sézaa va lo, ’té wo bɔa kɔɔn léé, wo daan a ma.