Kelewenu 25 - Kazambale lé Sebe Sauunu 1979

Pɔl léé, ’é go élé we nya Sézaa va

¹ Fɛsitus bɔ aan wo tɛrɛ ’ko la, ’bɛ zuo yi yaa é si Sézaré yé é go Jérusalɛm.

² Balebanmunu segelenu valé Juifi mi segelenu Pɔl tɔ fe a lɛ.

³ Wo zanté vɔ a lɛ léé, ’é wezin kɛlɛ ’wo lɛ yé é Pɔl pa zia Jérusalɛm. Wa a mabɛnna léé, wa gya zia.

⁴ Fɛsitus lé wo lɛ léé: Pɔl a munu lee Sézaré yé é vo sɛ yé maabozen é go ana.

⁵ Kalé mi segelenu ’é pa an va yé ko go wo nya, yé dé wenyanéan gɔné ’ko a kɛlɛ, ’wa fe.

⁶ Dé yi sɔraa léé? dé yi vu léé? Fɛsitus a kɛlɛ Jérusalɛm, yé é go Sézaré. ’Bɛ é tu kini, é nyana élé weblena yé é lé munu lɛ léé, ’wo da Pɔl nya.

⁷ ’Bɛ da aan wo, Juifinu lé wo si Jérusalɛm, wo ’bɛ zi lɛ sɔɔ, yé wo vo we kiɛre plɛplɛnu dɔna ’bɛ nwiin, yé ’bɛ ’ka Pɔl kun lɛ lo.

⁸ Pɔl kun we sile ma é nwiin yé é léma: Maa ’ka wenyané kɛlɛ lɛ Juifinu lé bélidɔwe koo, Balebangikɔn koo, Sézaa koo, wo ma lo.

⁹ É sɔ Fɛsitus lɛ léé, ’é Juifinu gi nana, yé é lé Pɔl lɛ léé: É sɔ i lɛ léé, i go Jérusalɛm yé wo ilé we ble we ’konu ma an yuɛ va ’bɛnaa?

¹⁰ Pɔl léé: Maa ’ka é dɔle Sézaa lé webleblin ’lɛ ’ko loo? ’Wo anlé we ble ma. Bé gi dɔɔ é zima léé, maa ’ka wenaané do kpen kɛlɛ lɛ Juifinu ma lo.

¹¹ Dé maa weple kɛlɛoo, dé gawe lé maa a kɛlɛoo, an ’ka an gale za vɔna lo. Naa, wenu lé wo wo dɔ an nwiin, dé wa vié nya, a se ’ka mi do kpen lɛ léé, é an pa wo lee lo. ’An go anlé we nya Sézaa va.

¹² Dé Fɛsitus valé mi segelenu lu zi ble faa é lé a lɛ léé: Bii léé, ’é go élé we nya Sézaa vaa? I dan go lɛ a va.

Wo da Pɔl nya Agripa valé Bérénis ’lɛ

¹³ Yi kenu zuo, minwiinzan Agripa valé Bérénis da we lɛ Fɛsitus va Sézaré.

¹⁴ Wo yi kiɛre kɛlɛ ’bɛna, yé Fɛsitus Pɔl lé we zuo fe Agripa lɛ yé é léé: Félis mi do vo bokɔn gi.

¹⁵ Dé maa a Jérusalɛm Balebanmunu segelenu valé Juifinu lé mi segelenu a tɔ fe an lɛ, yé wo léé, ’wo ga dɔ a nwiin.

¹⁶ Yé maa lé wo lɛ léé: Romnu va na, mi lé wa tɔ fe, dé wo ’ka da lɛ ’bɛzan nya é tɔfemunu ’lɛ lo, yé wenu lé wa tɔ fe wo ma, dé wo ’ka zi nɔ lɛ a lɛ léé, ’é wo si ’é nwiin lo, wo ’ka ’bɛzan nɔ munu lɛ lo.

¹⁷ Amalé wo da ’ko, yé maa ’ka webleyi dɔ lɛ lo. ’Bɛ é tu kini an nyana anlé weblena, yé maa léé, ’wo da mi ’ko nya.

¹⁸ A tɔfemunu da, yé we lɛrɛlɛrɛnu lé é dɔ an gi léé, wo dan wo dɔ lɛ a nwiin, wo ’ka ’bɛ do kpen fe lɛ lo.

¹⁹ Za a wo worona wobozen lé bazorozi lé we ma, é valé Jézu do lé we ma. Jézu ’ko ga yé Pɔl léé, é a é yuɛma.

²⁰ Dé é a maa nya, ’bɛ zo we bɔina ginin ’ka an gi lo. Yé maa a laa a lee léé, dé é sɔ a lɛ léé, é go Jérusalɛm, yé walé we ble we ’konu ma ’bɛnaa?

²¹ Naa, Pɔl léé, ’wo élé we vo, ’é go élé we nya kaa nwiinzan blɛn va. Bɛwemalé maa léé, ’wo yuɛ pa a va fɔɔ yé maa a pa zia Sézaa va.

²² Agripa lé Fɛsitus lɛ léé: É sɔ an lɛ léé, an gɔné ’ko dére ’ma. Yé Fɛsitus léé: I dan a ’ma lɛ tɛlɛ.

²³ Amalé dé tu kini, Agripa valé Bérénis da wolé fua blɛn tagɔɔnle nya, yé wo wɔra weblekɔn gi sunyanu?-?zannu valé fla mi segelenu va. Fɛsitus dére ta lé wo da Pɔl nya.

²⁴ Yé Fɛsitus léma: Minwiinzan Agripa valé ka faa lé ka ke é zénle ékeva ’ko, ’ka mi ko ye. Alé we ma lé Jérusalɛm Juifinu valé fla ’ko la Juifinu da an va, yé wo siaa léé, té mi ’ko é vo é yuɛma lo.

²⁵ Yé maa léé, maa a ye léé, é ’ka we do kpen kɛlɛ lɛ gawe nya lo. Yé yeebozen léé, ’é go élé we nya kaa faa nwiinzan blɛn va, bɛwemalé é dɔ an gi léé, maa dan a pa lɛ zia ’bɛ lɛ.

²⁶ Maa ’ka a ma we do kpen ye lɛ yé maa a pa zia Sézaa lɛ sɛbɛ gi lo. Amalé maa da a nya ka méléna ’ko, yé é ziin, maa da a nya bii minwiinzan Agripa va. É sɔ an lɛ léé, ka we laa a lee, yé we lé maa dan a gyɛ lɛ sɛbɛ ta, yé maa a dɔɔ.

²⁷ É dɔ an gi léé, dé an bokɔngizan do pa zia yé wean wa dɔ a nwiin, dé maa ’ka a fe lɛ lo, ’té ’bɛ a boawe nya.