Kelewenu 24 - Kazambale lé Sebe Sauunu 1979

Wo we dɔ Pɔl nwiin

¹ Yi soru bɔle zuo, Balebanmunu ’lɛzan Ananias da, é valé mi segelenu koo, voka do lé wa laama Tɛɛtul koo, wo nya. Yé wo Pɔl tɔ fe gbɔrɔnama lɛ.

² Wo Pɔl laa, yé Tɛɛtul kun we dɔle ma a nwiin yé é léé: Ko nwiinzan blɛn Félis, ilé we ma lé ko a drɔɔ amalé ko gi nana. I ko ma wenu kɛlɛ é zima, bɛwemalé kolé bɛn ’ko, i a wolé tɛrɛ la kɛlɛna é zima.

³ Yee lé ko a yena we faa gi fɛfaana, yé ko i bɔ vɔ ko bli faa nya.

⁴ Naa, té maa i mɔn lo we gi, ilé zanté, wean ko dan a fe lɛ i lɛ dére sɛnu nya, ’i tɔné dɔ a lɛ ilé wezin kɛlɛle gi.

⁵ Ko mi ’ko ye, é a wɔlɛwɔlɛgyɛzan nya, yé éé dan zavɔle nya Juifinu méléna fɛfaana. É a mi palu do léé, woo wo laama Nazarɛtzannu, wo nwiinzan nya.

⁶ Yé é ziin é a kwa kulina léé, ’é Balebangikɔn sɛrɛ. Yé ko a kun. É sɔ ko lɛ léé, ko alé we ble kolé bélidɔwe yɛrama.

⁷ Naa, sunyanuzan segele Lisias da, yé ’bɛ a si ko lee gla nya.

⁸ Yé é lé a tɔfezannu lɛ léé, ’wo da i va. Dé i we laa a lee, we faa lé ko dɔ a nwiin i dan a ’ma lɛ iboan.

⁹ Yé Juifinu dɔ a dére ta yé wo léé, a zo lé é ke.

¹⁰ Gbɔrɔnama tɔmase kɛlɛ Pɔl lɛ léé, ’ézé fe yé Pɔl kun ézé fele ma yé é léé: Maa a gi dɔɔ léé, lɛɛ kiɛre nya i a bɛn ’ko lé weblezan nya, bɛwemalé an pa i ta yé maa dan we fe lɛ i lɛ we sile an nwiin we ma.

¹¹ An go Jérusalɛm, Bale bɔle we gi, ’bɛna ’ka tan gié lɛ yi vu ta fié ta lo. I dan a gi dɔɔ lɛ iboan, ’té dé bé laa mi lee.

¹² Balebangikɔn koo, bazorokɔnnu gi koo, fla koo, wo ’ka an ye lɛ za vɔna mi do va ’bɛna lo, yé wo ’ka an ye lɛ é ziin munu zénna ékeva gbɔrɔnama ma fɛ dona lo.

¹³ We lé wa dɔna an nwiin lao, wo ’ka bɔa an kunle lɛ a nya lo.

¹⁴ Maa fe i lɛ webozen nya, maa an tranu lé Bale bɔa, zi dɛrɛ lé wa tamunu laama palu do, a yɛrama. Yé we faa lé é ke é gyɛle bélidɔwe sɛbɛ gi, é valé balelayemunu lé sɛbɛnu gi, maa a é dɔle ’bɛnu ɛ ta.

¹⁵ Mi tegelenu valé munu lé wo ’ka tegele lo, wo dan nwa lɛ gale va. An bli a Kazambale lɛ a we ma, bélé fɛan zo lé wo bli ke a lɛ, a zo.

¹⁶ Bɛwemalé maa a anbo tununa yifaama léé, té anlé wevasibli é we dɔ an nwiin Kazambale valé munu yuɛ va lo.

¹⁷ An sile ana lɛɛ kiɛre zuo, an da blɛ kɛlɛ lɛ an bɛn lɛ, é valé Bale banle we gi.

¹⁸ Maa a ’bɛ kɛlɛna aan wo, wo bɔ an ma Balebangikɔn gi, ’té maa a tegele, ’té mi kiɛre ’ka an va lo; ’té zɔ ’ka wé lo.

¹⁹ Naa, Azi tɛrɛla Juifi mi kenu bɛ, dé an ma we a wo gi, é a lé wo da an tɔ fe i lɛ woboan.

²⁰ Dé ’bɛ kaan lo, dé maa a webolikinimunu ’lɛ, wenyanéan munu ’ko a ye an nwiin, ’wa fe ma.

²¹ We do kpen‐an maa a kɛlɛ, yee lé ke ’ko: maa siaa wo méléna léé: Migalenu nwale lé we ma lé an ke kyɔ ka ’lɛ, ’té ka anlé we blé.

²² Félis zi dɛrɛ ’ko lé we dɔɔ tegele, yé é yi bɛ dɔ wo lɛ yé é léé: Dé sunyanuzan segele Lisias da faa yé maa kalé we yuɛ gi bo.

²³ Yé é lé sunyayɔsoru ’lɛzan lɛ léé, ’é yuɛ pa Pɔl va, yé ’é a vo éboma sɛ. Té wo a yi ga alé mi do kpen lee léé, té wo a mawe kɛlɛ lo lo.

²⁴ Yi kenu giéle zuo, Félis valé é na Juifi le Drusil da, yé é léé, ’wo da Pɔl nya. Yé é tɔné dɔ Pɔl lɛ léé, ’bɛ é blivole Krist lɛ lé we fe ’é lɛ.

²⁵ Naa, we tegele koo, mi lé ébo kunle we faa gi koo, we lé Bale é dan a ble lɛ munu va koo, Pɔl vo wo fena a lɛ. Kana zén Félis gi yé é léé: ’I go é bléyi. Dé maa bléyi do ye yé maa dan i laa lɛ.

²⁶ A bli a a lɛ léé, Pɔl é dan gɔɔli nɔ lɛ ’é lɛ, bɛwemalé yi ke ma éé munu nwunvɔa Pɔl laana léé, ’bɛ é we fe ’é lɛ.

²⁷ ’Ko zo lé lɛɛ fié gié, yé Pɔɔkius Fɛsitus dɔ Félis pa gi. É sɔ Félis lɛ léé, ’é Juifinu gi nana, amalé é Pɔl vo bokɔn gi.